ई-फार्मसी आणि ऑनलाइन औषध खरेदी-विक्रीच्या निषेधार्थ बुधवारी (दि. १४) शहरातील सुमारे २ हजार औषधविक्रेत्यांनी त्यांची दुकाने बंद ठेवली. यानिमित्ताने वाहन फेरी काढण्यात आली. या रॅलनीनंतर गोमटेश मार्केटजवळील दलालवाडीतील औषधीभवन येथे सभा घेऊन शासनाचा निषेध व्यक्त करण्यात आला. बंद १०० टक्के यशस्वी झाला.
दरम्यान, बंद आणि रॅलीमुळे नागरिकांची, रुग्णांची गैरसोय होऊ नये यासाठी औषधीभवन येथे औषध नियंत्रण कक्ष आणि शहरातील २२ वेगवेगळ्या ठिकाणची मेडिकल्स सुरू ठेवण्यात आली होती. बेकायदा चालू असलेला ऑनलाईन औषध विक्रीचा व्यवसाय बंद करावा, या औषधांमुळे होत असलेल्या दुष्परिणामांपासून सामान्य नागरिकांना वाचवावे, डॉक्टरांच्या चिठ्ठीशिवाय अँटिबायोटिक्स, वेदनाशमक अथवा अन्य औषधांच्या वापरास चालना मिळू शकते यासारखे ९ धोके निर्माण होत असल्याने ऑनलाइन औषध खरेदीसंबंधी शासनाने तातडीने पावले उचलावीत आणि कठोर कारवाई करावी अशा आशयाचे निवेदन औषधविक्रेत्या संघटनेतर्फे जिल्हाधिकारी व अन्न आणि औषध प्रशासनाचे सहआयुक्तांना निवेदन देण्यात आले. उप‌जिल्हाधिकारी संभाजी अडकुणे आणि सहआयुक्त विराज पौनिकर यांनी हे निवेदन स्विकारले. यावेळी अध्यक्ष रावसाहेब खेडकर, रामेश्वर राठी, शैलेंद्र रावत, दिलीप ठोले, विनोदकुमार लोहाडे, दिनेश सेठी, कपिल टिबडीवाला, बाबूराव सोनुने यांच्यासह औरंगाबाद जिल्हा केमिस्ट ड्रगिस्ट असोसिएशनचे सर्व पदाधिकारी व शहरातील २ हजार औषध विक्रेते उपस्थित होते.
पैठणगेटहून रॅली
सुमारे २ हजार औषधविक्रेत्यांनी पैठणगेट ते जिल्हाधिकारी कार्यालयापर्यंत वाहन रॅली काढली. यावेळी विविध घोषणा फलक घेऊन औषधविक्रेते सामील झाले होते. लोकमान्य टिळक आणि गोविंदभाई श्रॉफ यांच्या पुतळ्यास अभिवादन करून फेरी पैठणगेट, औरंगपुरा, चेलीपुरा, सिटी चौक, मार्गे जिल्हाधिकारी कार्यालय आणि नंतर जिल्हाधिकारी कार्यालय ते औरंगपुरा येथील नाथ मार्केट मध्ये असलेल्या अन्न व औषध प्रशासन विभाग कार्यालयात गेली. यानंतर औषधीभवन येथे सभा घेऊन राज्यशासनाचा निषेध करण्यात आला.
मोबाइल अॅप डाउनलोड करा आणि राहा अपडेट
