म. टा. प्रतिनिधी, औरंगाबाद
महापालिकेचे आयुक्त प्रकाश महाजन यांच्याविरुद्ध दाखल केलेल्या अविश्वास प्रस्तावासाठी 'एमआयएम'च्या नगरसेवकांनी शिवसेनेला साथ दिली. त्यामुळे भारतीय जनता पक्षानेही ऐनवेळी अविश्वासाच्या बाजुने मतदान केले. त्यामुळे ९५विरुद्ध १३ मतांनी प्रस्ताव मंजूर झाला. पाच नगरसेवक गैरहजर राहिले. अविश्वास प्रस्ताव तातडीने शासनाकडे पाठवण्याचे आदेश महापौर त्र्यंबक तुपे यांनी दिले. नवीन आयुक्तांची नियुक्ती होईपर्यंत अतिरिक्त आयुक्तांनी आयुक्त म्हणून काम करावे, असे त्यांनी स्पष्ट केले. महापालिकेच्या इतिहासात प्रथमच आयुक्तांविरुद्ध नगरसेवकांनी एकजूट दाखवून अविश्वास प्रस्ताव आणला.
आयुक्तांवर अकार्यक्षमतेचा ठपका ठेवत उपमहापौर प्रमोद राठोड, सभागृहनेते राजेंद्र जंजाळ, गटनेते भगवान घडमोडे, गजानन बारवाल यांनी महाजन यांच्या विरुद्ध अविश्वास प्रस्ताव दाखल केला होता. महाजन यांना शासनाच्या सेवेत परत पाठवावे, असे त्यात नमूद करण्यात आले. २० मुद‍्द्यांच्या आधारे आयुक्तांवर आरोपही या प्रस्तावात करण्यात आले. प्रस्तावाला सभापती दिलीप थोरात, गटनेते राजू वैद्य यांनी अनुमोदन दिले होते. मंगळवारी झालेल्या सर्वसाधारण सभेत हा प्रस्ताव मंजूर करण्यात आला. सकाळी ११ वाजता महापौर त्र्यंबक तुपे यांच्या अध्यक्षतेखाली सर्वसाधारण सभेला सुरुवात झाली. सभेवर अधिकाऱ्यांनी बहिष्कार टाकला. नगरसेवकांनी त्यावर आक्षेप घेत कारवाई करण्याची मागणी केली. आयुक्तांवरील अविश्वास प्रस्तावाचा विषय महापौरांनी चर्चेला घ्यावा, अशी सूचना सभागृहनेते जंजाळ यांनी केली. त्यानंतर प्रस्तावावर चर्चा सुरू झाली.
अफसर खान म्हणाले, 'अविश्वास प्रस्ताव आताच का आणला. सात महिने तुम्ही काय करीत होता. युतीचे पदाधिकारी आयुक्तांची बदली करू शकले असते.' कैलास गायकवाड म्हणाले, 'उशिरा का होईना योग्य प्रस्ताव ठेवला आहे. त्यामुळे प्रस्ताव ठेवणाऱ्यांचे अभिनंदन केले पाहिजे.'
काँग्रेसचे गटनेते भाऊसाहेब जगताप यांनी या प्रस्तावावर मतदानाची मागणी केली. गजानन बारवाल म्हणाले, 'हा प्रस्ताव मुख्यमंत्र्यांना पाठबळ देणारा आहे. त्यामुळे तो मंजूर झाला पाहिजे.' संगीता वाघुले म्हणाल्या, 'आयुक्तांनी योग्य पद्धतीने काम केले असते तर, ही वेळ आली नसती. ' अजीज खान, सीमा खरात, अब्दुल नाईकवाडे यांनीही मत मांडले. भगवान घडमोडे व राजू वैद्य यांनी अविश्वास प्रस्तावामागची भूमिका मांडली. स्वाक्षरीच्या माध्यमातून मतदान घेण्यात आले. प्रस्तावाच्या बाजूने ९५ तर, विरोधात १३ नगरसेवकांनी स्वाक्षऱ्या केल्या. पाच नगरसेवक गैरहजर राहिले. एमआयएमच्या सर्व २५ नगरसेवकांनी प्रस्तावाच्या बाजूने मतदान केले. काल सायंकाळपर्यंत शिवसेना-भाजपच्या प्रस्तावाच्या विरोधात मतदान करण्याची भाषा करणारे एमआयएमचे नगरसेवक आज ओळीने प्रस्तावाच्या बाजूने मतदान करण्यासाठी महापालिकेच्या सभागृहात उभे होते. प्रस्ताव मंजूर झाल्यावर पालिकेच्या आवारात फटाक्यांची आतषबाजी करण्यात आली.
१३ महिन्यांची कारकिर्द
प्रकाश महाजन यांची आयुक्तपदाची कारकिर्द जेमतेम १३ महिन्यांची ठरली. हर्षदीप कांबळे यांच्या बदलीनंतर ३ सप्टेंबर २०१४ रोजी त्यांनी आयुक्तपदाची धुरा सांभाळली. त्यांच्या कार्यकाळात औरंगाबाद शहराची स्मार्ट सिटी योजनेसाठी निवड झाली. येत्या ३१ डिसेंबर रोजी ते सेवानिवृत्त होणार आहेत. अविश्वास प्रस्तावावर प्रतिक्रिया व्यक्त करण्यास त्यांनी नकार दिला. मतदानाची मागणी करणारे नगरसेवक
भाऊसाहेब जगताप, अफसर खान, शेख सोहेल, अय्युब खान, वैशाली जाधव, रेश्मा कुरैशी, अब्दुल नवीद, मलिका बेदम हबीब कुरैशी, शबनम बेगम, बेगम खाजोद्दिन, अंकिता विधाते, ज्योती मोरे.
आशा निकाळजे, शोभा बुरांडे, ज्ञानोबा जाधव, कीर्ती शिंदे, सुनीता चव्हाण.
शिवसेना ः २८
भाजप ः २२
एमआयएम ः २५
शहर विकास आघाडी ः १०
इतर ः १०
एकूण : ९५
मोबाइल अॅप डाउनलोड करा आणि राहा अपडेट
