म. टा. प्रतिनिधी, लातूर
मराठवाड्यातील दुष्काळग्रस्त शेतकऱ्यांच्या मदतीला पुण्यात स्पर्धा परीक्षेचा अभ्यास करणारे युवक धावून आले आहेत. निलंगा तालुक्यातील १५० शेतकरी, शेतमजुरांच्या कुटुंबांना प्रत्येकी दोन हजार रुपयांचा किराणा माल त्यांनी घरपोच आणून दिला. त्यामुळे त्यांचा दसरा, दिवाळीचा सण आनंदात साजरा होणार आहे.
निलंगा येथील उपजिल्हाधिकारी डॉ. भवानजी आगे यांनी पुण्यात स्पर्धा परीक्षेचा अभ्यास करणाऱ्या १०० विद्यार्थ्यांपर्यंत मराठवाड्यातील दुष्काळग्रस्त शेतकऱ्यांना मदत करणयचा विचार पोहचवला होता. त्याचा चांगला परिणाम झाला. विद्यार्थ्यांनी आपण या भागात मदत केली पाहिजे असे ठरवले. त्यांनी 'सेव्ह फार्मर, सेव्ह नेशन' ही संकल्पना प्रत्यक्षात आणली. सर्व विद्यार्थ्यांनी खर्चातील काही रक्कम बचत करून, इतरांकडून देणगी मिळवून निधी संकलन केले. त्यांना या कामात हिरकणी महिला व बालकल्याण प्रतिष्ठान यांचे ही सहकार्य लाभले. पुण्यातील शिवगर्जना मित्रमंडळ मुंढवा यांनी गणेश विर्सजन मिरवणुकीचा खर्च टाळून ३० हजार रुपयांचा निधी दुष्काळग्रस्तांना दिला.
निधी संकलनात सक्रिय असलेले निलेश निबांळकर, सदानंद नाईक, योगेश सोनवणे, निखिल चिंचनसुरे, धनंजय गाडे, अर्जुन रसाळ, प्रवीण भोसले, विशाल भापकर, स्नेहल अडसुळ, अश्विनी डफळ आदिनी निलंगा तालुक्यातील यलमवाडी,शाबीतवाडी, हसोरी खुर्द, हासोरी बुद्रुक, या चार गावातील शेतकऱ्यांची भेट घेऊन त्यांच्याशी संवाद साधला. त्यातून त्यांनी १५० कुटुंबाची निवड केली. प्रत्येक कुटुंबाला साखर, शेंगदाणे, साबुदाना, गोडेतेल, मटकी, हरभरा दाळ, तुरदाळ, मुगदाळ, कपड्याचे, स्नानाचे साबण, खोबरेल तेल, बिस्कीट, मीठ, हळद, जिरे, मोहरी, पोहे, रवा, टुथपेस्ट, चहापावडर आदी किराणा वस्तुची एकत्रीत पिशवी दिली.
यावेळी उपजिल्हाधिकारी डॉ. भवानजी आगे, तलाठी गुजर, पुरी, स्पर्धा परिक्षेची तयारी करणारे निलंगा तालुक्यातील कासारशिरसीचे निखिल चिंचनसुरे यांनी विद्यार्थ्यांना या 'सेव्ह फार्मर, सेव्ह नेशन' या उपक्रमासाठी मदत केली.
मोबाइल अॅप डाउनलोड करा आणि राहा अपडेट
