मुंबईसाठी औरंगाबादहून अर्ध्या तासात दोन विमानांचे उड्डाण होते. त्यामुळे भविष्यात यापैकी एखादी सेवा बंद होण्याची शक्यता नाकारता येत नाही. तसेच अपघाताचा धोकाही निर्माण झाला आहे.
औरंगाबाद विमानतळावर रात्री ८ वाजून ५ मिनिटांनी दिल्लीहून येणारे विमान उतरते. लगेच साडेआठ वाजता एअर इंडियाचे विमान मुंबईकडे रवाना होते. तर, ८ वाजून ४५ मिनिटांनी जेट एअरवेजचे विमान मुंबईहून येते. विशेष म्हणजे हे विमान लगेच रात्री ९ वाजता मुंबईकडे झेपावते. मुंबईला जाणाऱ्या या दोन विमानातील अंतर फक्त अर्ध्या तासाचे आहे. त्यामुळे या विमानांना प्रवासी कमी मिळत आहेत. आगामी काळात यातल्या एखाद्या विमानाची फेरी रद्द होऊ शकते. दोन वर्षांपूर्वी औरंगाबादहून सकाळच्या सत्रात दिल्लीसाठी जेट एअरवेज आणि स्पाइस जेटची विमान सेवा सुरू होती. मात्र, कमी प्रवाशांमुळे जेट एअरवेजला आपली सेवा बंद करावी लागली आहे. सध्या शहरात फक्त तीन विमान कंपन्यांच्या माध्यमातून वाहतूक सुरू आहे.
दहा मिनिटाला वाहतूक
मुंबई, दिल्लीसह विदेशातील अनेक विमानतळावरून प्रती दहा मिनिटाला एका विमानाचे उड्डाण होते. मात्र, तिथे रनवेची संख्या जास्त असते. टॅक्सीवे असतात. रनवेवरून विमान हटविण्यासाठी जास्त वेळ लागत नाही. परिणामी विमान वाहतूक नियंत्रण सोपे आहे. औरंगाबाद विमानतळावर फक्त एक रनवे आणि पॅरेलल टॅक्सी वे आहे. त्यामुळे विमान अपघाताची शक्यता नाकारता येत नाही.
विमानाचे वेळापत्रक संबंधित कंपन्यांकडून बदलण्यात येत आहे. औरंगाबादहून जाणारे प्रवासी वाढत आहेत. मुंबईसाठी अर्ध्या तासात दोन विमान असल्याने त्याचा प्रवाशांना फायदा होईल. स्पर्धेमुळे तिकिटाचे दर कमी होतील. कोणतीही विमान सेवा बंद होणार नाही, याची काळजी घेतली जाईल. याबाबत एअर इंडियाच्या प्रतिनिधींशी बोलून योग्य निर्णय घेऊ.
- अलोक वार्ष्णेय, विमानतळ संचालक, औरंगाबाद विमानतळ
मोबाइल अॅप डाउनलोड करा आणि राहा अपडेट
