पाच रस्त्यांना निधीचे ग्रहण

October 27, 2015, 12:14 pm

≪ Previous: पालिकेतील संघर्षात बोनस लटकणार

म. टा. विशेष प्रतिनिधी, औरंगाबाद

शहरात असूनही सार्वजानिक बांधकाम विभागाच्या अखत्यारित असलेल्या रस्त्यांचे ग्रहण दोन वर्षे उलटून गेले तरी सुटण्यास तयार नाही. मंजूर केलेल्या निधीतून अर्धेच पैसे मिळाल्याने या रस्त्यांचे हाल कायम आहेत. दरम्यान, रखडलेल्या तीन रस्त्यांच्या डागडुजीसाठी सरकारकडे एक कोटींची मागणी करण्यात आली आहे.

महापालिकेच्या हद्दीत असूनही सार्वजनिक बांधकाम विभागाकडे शहरातील पाच रस्ते आहेत. जालना रोड, जळगाव रोड, जळगाव टी पॉइंट ते दिल्ली गेट, हर्सूल ते सावंगी या रस्त्यांच्या डागडुजीचे राजकारण गेल्या दोन वर्षांपासून सुरू आहे. दोन वर्षांपूर्वी या रस्त्यांचा चेहरामोहरा बदलण्यासाठी २१ कोटी रुपये आणल्याचा दावा करण्यात आला होता. त्यापूर्वी सात वर्षांपासून औरंगाबाद शहरातील रस्त्यासाठी एक रुपयाही दिला गेला नव्हता. २१ कोटींची घोषणा करण्यात आली, पण प्रत्यक्षात निधी मिळालाच नाही. कारण काँग्रेसच्या घोषणेनंतर राष्ट्रवादी काँग्रेसने अर्थ खाते त्यांच्याकडे असल्याने निधी अडवून ठेवला. त्या दरम्यान लोकसभा, विधानसभा निवडणुका झाल्या आणि हा विषय मागे पडला. तत्कालीन आघाडी सरकारने दोन कोटी मात्र प्राथमिक डागडुजीसाठी दिले. त्यानंतर नवीन सरकार स्थापन झाले आणि त्यांनी वर्षभरात दहा कोटी रुपये दिले. मात्र, हा पैसा पूर्णपणे शहरातील पाच रस्त्यांवर खर्च झाला नाही. प्राधान्यानुसार जिल्ह्यातील अन्य रस्त्यांच्या कामांसाठी हा पैसा वापरला गेला. परिणामी, जालना रोड व जळगाव रोड वगळता अन्य रस्त्यांच्या कामाकडे दुर्लक्ष झाले. सूत्रांनी दिलेल्या माहितीनुसार जळगाव टी पॉइंट ते दिल्ली गेट रस्त्याची पुरती दुरवस्था झाली आहे. तशीच परिस्थिती हर्सूल ते सावंगी रस्त्याची आहे. या दोन्ही रस्त्यांच्या दुरुस्तीसाठी सार्वजनिक बांधकाम विभागाच्या स्थानिक कार्यालयाने मुंबई कार्यालयास एक कोटी रुपयांच्या निधीची मागणी केली आहे. हा निधी लवकरात लवकर मंजूर झाला तरच रस्त्याची डागडुजी शक्य होणार आहे.

मकबरा ते लेणीसाठी एक कोटी

मकबरा ते औरंगाबाद लेणी या पावणेतीन किलोमीटरच्या रस्त्याच्या दुरुस्तीसाठी नाबार्डअंतर्गत एक कोटी रुपये मंजूर झाले आहेत. त्यामुळे हा रस्ता लवकरच गुळगुळीत होणार आहे.

Latest Images