भाजप सरकारच्या काळात गेल्या वर्षांत काही कामे चांगली झाली आहेत. या सरकारने मागासवर्गीयांच्या कल्याणासाठी, त्यांना ताठमानेने जगता यावे यासाठी सर्व प्रकारच्या मागासवर्गीय आर्थिक विकास मंडळाला निधी देण्याची मागणी वैशाली बौद्ध विहाराचे विश्वस्त केशव कांबळे यांनी केली.
राज्यातील भाजप सरकारला एक वर्ष पूर्ण झाल्याबद्दल लोकसंवाद कार्यक्रमाचे आयोजन करण्यात आले होते. या कार्यक्रमाच्या अध्यक्षस्थानी केशव कांबळे होते. यावेळी राज्याचे परिवहन, बांधकाम राज्यमंत्री विजय देशमुख, भाजपचे जिल्हाध्यक्ष नागनाथ निडवदे, शैलेश लाहोटी, गुरुनाथ मगे, सुधीर धुत्तेकर, मोहन माने, प्रविण कस्तुरे यांची उपस्थिती होती.
लोकसंवाद कार्यक्रमात सहभागी होताना अभियंता अतुले चिमने म्हणाले, '२०१३ साली जर्मनीवरुन सौर ऊर्जा विषयातील शिक्षण पूर्ण करुन भारतात आलो. त्यावेळी सौर ऊर्जा क्षेत्रात काही तरी करावे अशी इच्छा होती. मात्र, त्यावेळच्या सरकारच्या धोरणाने ते शक्य झाले नाही. आता मोदी सरकारने सौर ऊर्जा क्षेत्रात काम करण्यासाठी विविध संधी उपलब्ध करून दिल्या आहेत.'
या वेळी बोलताना राज्यमंत्री विजय देशमुख यांनी राज्य सरकारने केलेल्या कामाचा आढावा घेतला. ते म्हणाले, 'काँग्रेस, राष्ट्रवादी काँग्रेसवाल्यांनी १५ वर्षात घाण केली आहे. ती स्वच्छ करण्यास सुरुवात केली आहे.'
यावेळी शैलेश गोजमगुंडे यांनी प्रस्ताविक केले. शैलेश लोहोटी, नागनाथ निडवदे, यांनी मनोगते व्यक्त केली. याच कार्यक्रमात शहरातील विविध भागातील कार्यकर्त्यांनी भाजपमध्ये प्रवेश केला.
मोबाइल अॅप डाउनलोड करा आणि राहा अपडेट
