म. टा. प्रतिनिधी, औरंगाबाद
पत्नीसह सासू-सासऱ्याच्या छळाला कंटाळून पतीच्या आत्महत्या प्रकरणातील दोन्ही मेहुण्यांचा अटकपूर्व जामीन सत्र न्यायाधीश एस. जी. शेटे यांनी शुक्रवारी (सहा नोव्हेंबर) फेटाळला.
या प्रकरणी पतीचे वडील मधुकर सिताराम पवार (६०, रा. देवगाव तांडा, बदनापूर) यांनी फिर्याद दिली आहे. फिर्यादीचा मुलगा नीतेश मधुकर पवार (मृत) याचे लग्न मे २०१३ रोजी पूजा हिच्याशी झाले होते. दोघे पुंडलिकनगरमध्ये भाड्याच्या घरामध्ये राहात होते. पूजा ही पैशासाठी नीतेशला त्रास देत होती. ठेकेदारीचे काम करणाऱ्या नीतेशने कामगारांसाठी आणलेले पैसे पूजा काढून घेत होती. त्यामुळे घरामध्ये सतत ताणतणाव राहायचा आणि छोट्या-मोठ्या भांडणावरून पूजा तिच्या माहेरी जात होती. नीतेशसह फिर्यादी मधुकर पवार व फिर्यादीच्या पत्नीला मारहाण केल्याप्रकरणी बदनापूरला अदखलपात्र गुन्हा दाखल आहे.
या सर्व त्रासाला कंटाळून नीतेशने २८ ऑगस्ट २०१५ रोजी आत्महत्या केली. त्यावरून कलम ३०६, ५०४, ३४ अन्वये सासरा शिवाजी दगडू राठोड, सासू सुमनबाई शिवाजी राठोड, पत्नी पूजा नीतेश पवार, मेहुणे अविनाश व आकाश यांच्यावर गुन्हा दाखल झाला. या प्रकरणी सासरा शिवाजी राठोड हा न्यायालयीन कोठडीत असून, दोन्ही मेहुणे अविनाश व आकाश यांनी अटकपूर्ण जामिनासाठी अर्ज दाखल केला होता. सुनावणीवेळी, आरोपी हे पतीच्या मृत्यूस कारणीभूत असून, साक्षीदारांवर दबाव आणू शकतात, मृत नीतेशचे पाकिट-मोबाइल जप्त करणे बाकी असून, आरोपींकडे असण्याची शक्यता असल्याने तपास करणे आहे, त्यामुळे आरोपींना जामीन देऊ नये, अशी विनंती सहाय्यक सरकारी वकील राजू पहाडिया यांनी केली. ही विनंती ग्राह्य धरून कोर्टाने आरोपींचा अटकपूर्व जामीन फेटाळला.
मोबाइल अॅप डाउनलोड करा आणि राहा अपडेट
