मुखेड शहरात जिल्हा परिषद हायस्कूलच्या मैदानावर थाटण्यात आलेल्या फटाक्यांच्या दुकानांना सोमवारी सायंकाळी अचानक आग लागली. या आगीत संपूर्ण १६ दुकाने खाक झाली असून, यामध्ये आठ मोटारसायकली आणि एक ऑटोही खाक झाली आहे. या घटनेत ८० लाख रुपयांचे नुकसान झाल्याचा प्राथमिक अंदाज आहे.
जिल्हा परिषद शाळेच्या मैदानावर फटाक्यांची दुकाने लावण्यात आली असून, यातील एका दुकानाला सायंकाळी आग लागली. त्यानंतर काही वेळातच बाजूच्या दुकानांमध्येही आग पसरली. आगीचे नेमके कारण समजू शकले नाही. जवळपास एक किलोमीटर अंतरापर्यंत फटाक्यांचा आवाज येत होता. घटनास्थळी दोन हजार नागरिकांचा जमाव जमला होता. पाणी टंचाईमुळे आणि एकच अग्निशामक दलाची गाडी असल्याने तत्काळ पाण्याचे बंब पोचू शकले नसल्याने मोठे नुकसान झाले.
फटके खरेदी करण्यासाठी नागरिकांनी मोठी गर्दी केली होती. आगीमुळे खरेदीसाठी आलेले ग्राहक सैरावैरा पळत सुटले. त्याचवेळी फटाक्याच्या दुकानांजवळ उभ्या असलेल्या ग्राहकांच्या दुचाकींनीही पेट घेतला. या परिसरात बाजूलाच असलेले एक घरही या आगीच्या भक्ष्यस्थानी पडले. पोलिस आणि अग्निशामक दलाची गाडी घटनास्थळी येईपर्यंत बहुतेक सर्वच दुकाने जळून खाक झाले.
मोबाइल अॅप डाउनलोड करा आणि राहा अपडेट
