काँग्रेसमध्ये बदलाचे संकेत

November 15, 2015, 10:56 am

≫ Next: स्वच्छता मिशनवर कलाकारांचा आक्षेप

≪ Previous: अख्खे शहर बेहाल, मात्र लाखोंची उलाढाल

$

0

0

शहराध्यक्ष, जिल्हाध्यक्ष पदांसाठी चाचपणी सुरू

म. टा. विशेष प्रतिनिधी, औरंगाबाद

औरंगाबाद शहर, जिल्हा काँग्रेसचे नेतृत्व बदलण्यात येणार असल्याचे पक्षश्रेष्ठींनी सूचित केले आहेत. पंधरा दिवसांपूर्वी प्रदेशाध्यक्ष अशोक चव्हाण यांच्या औरंगाबाद दौऱ्यात यासंदर्भात सविस्तर चर्चा झाली असून, स्थानिक नेत्यांनी आपापली पसंती चव्हाणांना कळविली आहे. आता मुंबईतून नवीन नेतृत्वासंदर्भात चाचपणी सुरू आहे.

औरंगाबाद शहर व जिल्हाध्यक्षपदाची धुरा बदलण्याची मागणी काँग्रेस श्रेष्ठींकडे अनेक दिवसांपासून सुरू होती. शहराध्यक्ष अॅड. सय्यद अक्रम यांनी त्यांचा नियोजित कार्यकाळ पूर्ण केला आहे. केशवराव औताडे यांनी जिल्हाध्यक्षपदाची सूत्रे ताब्यात ठेवत जिल्हा परिषद, पंचायत समिती, नगपालिका निवडणुकांमध्ये जोरदार कमबॅक केले होते, मात्र नंतर लोकसभा, विधानसभा आणि महापालिका निवडणुकी काँग्रेसचा सपशेल पराभव झाला. त्याची कारणे वेगळी होती, पण दोन्ही अध्यक्षांचा कालावधी संपल्यामुळे आता नव्यांना संधी द्यावी, अशी मागणी पक्षातून जोर धरत होती. जिल्हाध्यक्ष पदावर कुणाची वर्णी लागणार याबाबत चर्चा सुरू होती. प्रदेशाध्यक्ष अशोक चव्हाण यांनी गेल्या आठवड्यात याचा आढावा घेतला. आमदार अब्दुल सत्तार, सुभाष झांबड, माजी आमदार डॉ. कल्याण काळे यांच्यासह माजी खासदार रामकृष्णबाबा पाटील, जिल्हा बँकेचे चेअरमन सुरेश पाटील यांनी चव्हाणांकडे योग्य तो संदेश दिला.

सूत्रांच्या माहितीनुसार; दोन्ही पदे बदलताना पात्रतेचे निकष लावण्यात येणार आहेत. शहरात काँग्रेसला मजबूत करण्यासाठी सर्वार्थाने स्ट्राँग असलेला नेता शोधणे सुरू आहे. जिल्ह्याचीही परिस्थिती तशीच आहे. दोन्ही पदांसाठी डझनभर नावे चर्चेत असली तरी चव्हाणांनी विशिष्ट नेत्यांच्या कार्यपद्धतीचा गुप्त अहवाल स्थानिक यंत्रणेकडून मागविला आहे.

दीड वर्षानंतर जिल्हा परिषद निवडणुका आहेत. त्यासाठी काँग्रेसने आतापासूनच तयारी सुरू केली आहे. दहा वर्षांनंतर मिळविलेली झेडपीची सत्ता पुन्हा राखायची असेल तर, कार्यकारिणीमध्ये आमूलाग्र बदल करावे लागणार असल्याची पक्षश्रेष्ठींना कल्पना आहे. अशा परिस्थितीत सर्व गटांना मान्य असणारा जिल्हाध्यक्ष निवडण्यासाठी तारेवरची कसरत सुरू आहे. लवकरच यासंदर्भात घोषणा होऊ शकते, असे सूत्रांनी सांगितले.

शहराध्यक्ष व जिल्हाध्यक्ष बदलण्यासंदर्भात मागणी आली आहे. त्यादृष्टिने चाचपणी सुरू आहे. नेमका बदल कधी करायचा हे अद्याप निश्चित नाही. पक्षवाढीच्या दृष्टिने योग्य निर्णय घेण्यात येईल.

- अशोक चव्हाण, प्रदेशाध्यक्ष, काँग्रेस.

मोबाइल अॅप डाउनलोड करा आणि राहा अपडेट

---

स्वच्छता मिशनवर कलाकारांचा आक्षेप

November 15, 2015, 10:58 am

≫ Next: सुविधांच्या शोधात म्हैसमाळ पर्यटन

≪ Previous: काँग्रेसमध्ये बदलाचे संकेत

$

0

0

म. टा. प्रतिनिधी, औरंगाबाद

जिल्हा परिषदेच्या 'पाणी व स्वच्छता मिशन'च्या कलापथक निवड चाचणीत काही संघांना हेतूपुरस्सरपणे डावलले असल्याचा आरोप स्थानिक कलापथकांनी केला आहे. परीक्षकांची संख्या विषम नसणे, काही संघांना प्रात्यक्षिक चाचणीसाठी जास्त वेळ देऊन इतर संघांना डावलल्याचे प्रकार घडले आहेत. माहितीच्या अधिकारात मिळालेल्या माहितीनुसार परीक्षकांच्या गुणदानात खाडाखोड असल्याचा आक्षेप कलाकारांनी घेतला आहे.

'पाणी व स्वच्छता मिशन' कार्यक्रमासाठी जिल्हा परिषद कार्यालयात ३ ऑगस्ट २०१५ रोजी कलापथक निवड चाचणी घेण्यात आली. या चाचणीत एकूण ३५ पथकांपैकी ११ संघांची निवड करण्यात आली. या मिशनअंतर्गत जिल्ह्यात जनजागृतीचे एकूण २०० कार्यक्रम होणार आहेत. एका कार्यक्रमासाठी संबंधित पथकाला पाच हजार रुपये मानधन मिळणार आहे. यंदा परजिल्ह्यातील पथकांचीही निवड करण्यात आली आहे. ही संपूर्ण चाचणी वादग्रस्त असल्याचा आक्षेप स्थानिक कलापथकांनी घेतला आहे. निवड चाचणीत स्थानिकांना जाणीवपूर्वक डावलण्यात आल्याचे कलाकार युवराज सुतार यांनी सांगितले. चाचणीत निवड झालेल्या संघांना सादरीकरणासाठी किमान १२ मिनिटांचा कालावधी देण्यात आला. बाद ठरलेल्या संघांचे ५-६ मिनिटात सादरीकरण थांबवण्यात आले. त्यामुळे पथनाट्याचा विषय नीट मांडता आला नाही, असे सुतार म्हणाले. निवड चाचणीसाठी एकूण ६ परीक्षक होते. नाट्यशास्त्र विभागाचे २ प्राध्यापक, पंचायत विभाग, आरोग्य विभाग आणि पाणी व स्वच्छता विभागातील ४ अधिकारी परीक्षक होते. चाचणी घेण्यासाठी परीक्षकांची संख्या विषम असावी, असा नियम आहे. पण, हा नियम धाब्यावर बसवण्यात आला. तसेच चाचणी सुरू असताना बरेच परीक्षक जागेवर नव्हते. याबाबत स्थानिक कलापथकांनी जिल्हा परिषदेचे मुख्य कार्यकारी अधिकारी डॉ. अभिजीत चौधरी यांना निवेदनाद्वारे माहिती दिली; मात्र, त्यांनी कारवाई केली नाही, असे कलाकारांनी सांगितले. विशेष म्हणजे हा सर्व प्रकार 'माहितीच्या अधिकारात' उघड झाल्यानंतर कलाकारांनी आक्षेप नोंदवले. सर्व कलाकारांना समान कार्यक्रम देण्यात यावे, अशी मागणी शाहीर लक्ष्मण मोकासरे, युवराज सुतार, मदन मिमरोट, शाहीर के. एस. नवतुरे, शाहीर दिनकर भाले, भास्करराव करवंदे यांनी केली आहे.

स्थानिकांना का डावलले ?

पाणी व स्वच्छता मिशन कार्यक्रमात सांगली, वर्धा, जालना व बुलडाणा जिल्ह्यातील कलापथकांची निवड झाली आहे. यातील काही संघांचे सादरीकरण अत्यंत सुमार असूनही वशिल्यामुळे निवड झाली, असा आक्षेप घेण्यात आला आहे. औरंगाबाद जिल्ह्यातील कार्यक्रम स्थानिक कलापथकांनाच द्यावेत, अशी मागणी कलाकारांनी केली आहे. शिवाय स्थानिकांना डावलण्याची कारणे सांगा असे कलाकारांनी म्हटले आहे.

निवड चाचणीच्या गुणदान पद्धतीत दोष आहे. कलापथकांच्या निवडीत पक्षपातीपणा असून जिल्हा परिषदेने सर्व कलाकारांना समान संधी द्यावी. अन्यथा, विभागीय आयुक्तालयासमोर निदर्शने करण्यात येईल. - युवराज सुतार, कलापथक प्रमुख

मोबाइल अॅप डाउनलोड करा आणि राहा अपडेट

सुविधांच्या शोधात म्हैसमाळ पर्यटन

November 15, 2015, 10:58 am

≫ Next: जायकवाडीत ९.४७% उपयुक्त पाणीसाठा

≪ Previous: स्वच्छता मिशनवर कलाकारांचा आक्षेप

$

0

0

म. टा. प्रतिनिधी, औरंगाबाद

'मराठवाड्याचे महाबळेश्वर' अशी ख्याती असलेल्या म्हैसमाळचे पर्यटन पर्यटकांसाठी खडतर अनुभव ठरत आहे. खुलताबाद ते म्हैसमाळ रस्त्याची प्रचंड दुरवस्था झाल्याने वाहनचालक जेरीस आले आहेत. १५ किलोमीटरचा प्रवास केल्यानंतर पर्यटकाचे अंग ठणकल्याशिवाय राहत नाही. तसेच संयुक्त वनव्यवस्थापन समिती वारेमाप शुल्क वसूल करीत असूनही पर्यटकांसाठी सुविधा नाहीत.

थंड हवेचे ठिकाण असलेल्या म्हैसमाळची ख्याती सर्वदूर आहे. निसर्ग पर्यटनाचा आनंद घेण्यासाठी वर्षभर पर्यटकांची गर्दी असते. सध्या पर्यटन हंगाम असला तरी म्हैसमाळला पर्यटकांची गर्दी घटली आहे. अत्यंत खडतर रस्ता गर्दी घटण्याचे कारण आहे. खुलताबाद ते म्हैसमाळ रस्त्यावर खूप खड्डे आहेत. शिवाय ठिकठिकाणी रस्ता खचला आहे. या रस्त्याने वाहन चालवणे कठीण झाल्यामुळे पर्यटकांनी थंड हवेच्या ठिकाणाकडे पाठ फिरवली आहे. वेरूळ, खुलताबादला आलेले पर्यटक आवर्जून म्हैसमाळला भेट देतात. बाहेरच्या जिल्ह्यातील व राज्यातील पर्यटकांची यात सर्वाधिक संख्या आहे. खड्ड्यांनी व्यापलेल्या रस्त्याने प्रवास करणे पर्यटकांसाठी शिक्षा ठरली आहे. विशेषतः दुचाकीचालक पर्यटकांचे अंग ठणकल्याशिवाय राहत नाही. गिरिजामाता मंदिर व बालाजी मंदिरात दर्शनासाठी जाणाऱ्या भाविकांची संख्या लक्षणीय आहे. खराब रस्त्यामुळे पर्यटक व भाविक त्रस्त झाले आहेत. वेरूळ-खुलताबाद-म्हैसमाळ पर्यटन प्राधिकरणाअंतर्गत म्हैसमाळ रस्त्याचे काम होणार आहे; मात्र कामासाठी निधी नसल्याने काम रखडले आहे. म्हैसमाळ गाव ते टीव्ही सेंटर रस्ता सर्वाधिक खराब आहे.

व्ह्यू पॉईंटजवळ वाहन घसरून किरकोळ अपघात घडत आहेत. पायाभूत सुविधा नसल्यामुळे चांगल्या पर्यटनस्थळाची दुर्दशा झाली आहे. खड्ड्यांच्या रस्त्याने प्रवास केल्यानंतर निसर्ग पर्यटन करण्याचे पर्यटकांमध्ये त्राण उरत नाही. इतर सुविधा नसल्या तरी किमान दर्जेदार रस्ता पाहिजे, अशी मागणी पर्यटकांनी केली आहे.

धोकादायक कठडे

म्हैसमाळ येथील 'व्ह्यू पॉइंट' पर्यटकांचे आकर्षण केंद्र आहे. या स्पॉटवर पर्यटकांच्या सुरक्षिततेसाठी लोखंडी कठडे लावले आहेत; मात्र काही कठडे गंजल्यामुळे तुटले आहेत. पर्यटकांची गर्दी झाल्यास तुटलेल्या कडठ्याजवळ अपघाताची शक्यता आहे. व्ह्यू पॉइंटवर माहितीफलक नसल्याने पर्यटकांना पर्यटनस्थळाची पुरेशी माहिती मिळत नाही.

सुविधांची वानवा

म्हैसमाळ येथे वन विभागाच्या वतीने निसर्ग पर्यटन विकसित करण्यात आले आहे. पर्यटन विकासासाठी संयुक्त वन व्यवस्थापन समिती नेमण्यात आली आहे. ही समिती प्रति पर्यटक ५ रुपये उपद्रव शुल्क, दुचाकीसाठी १० व चारचाकी वाहनासाठी २० रुपये शुल्क घेते. शुल्क वसुलीतून पायवाटा, रस्ते, विश्रामगृह व पाणवठ्याची देखभाल करण्यासाठी शुल्क असल्याचे नमूद केले; मात्र, पर्यटकांसाठी सुविधा नाही. पिण्याचे पाणीसुद्धा नसल्याने पर्यटक त्रस्त झाले आहेत.

मोबाइल अॅप डाउनलोड करा आणि राहा अपडेट

जायकवाडीत ९.४७% उपयुक्त पाणीसाठा

November 15, 2015, 10:31 am

≫ Next: ७०० रिक्षा परवाने केले पुनरुज्जीवित

≪ Previous: सुविधांच्या शोधात म्हैसमाळ पर्यटन

$

0

0

म. टा. प्रतिनिधी, औरंगाबाद

अहमदनगर-नाशिक जिल्ह्यांतील धरण समूहातून सोडलेल्या ८.२३ टीएमसी पाण्यापैकी रविवारी सकाळपर्यंत जायकवाडी धरणात ४.५९ टीएमसी पाणी पोहोचले असून प्राप्त आतापर्यंत २१ दशलक्ष घनमीटर पाणी वाटेतच जिरले आहे.

सध्या जायकवाडी धरणामध्ये २०५.५९१ दशलक्ष घनमीटर (९.४७ टक्के), अशी पाणीसाठ्याची स्थिती आहे. धरणात पाण्याची आवक आणखी काही दिवस सुरू राहणार आहे. येत्या काही दिवसांमध्ये पाणीसाठ्यात वाढ होणार आहे. जायकवाडीत उर्ध्व भागातील धरण समूहातून १२.८४ टीएमसी पाणी सोडण्याचा आदेश न्यायालयाने दिल्यानंतर गेल्या १५ दिवसांपासून रविवारी सकाळपर्यंत ऊर्ध्व प्रकल्पातून ८.२३ टीएमसी पाणी सोडण्यात आले. यापैकी ३.८२ टीएमसी पाणी धरणात दाखल झाले असून २१.७२ दशलक्ष घनमीटर पाणी मध्येच गायब झाले आहे. पाणी सोडण्याचा कोटा पूर्ण होत असल्यामुळे काही प्रकल्पातून पाणी सोडणे बंद करण्यात आले आहे. आतापर्यंत मुळा प्रकल्पातून १.२४, निळवंडे २.२८, दारणा २.२५, कडवा ०.३८, मुकणे ०.६७, कडवा ०.३८, मुकणे ०.६७, आळंदी ०.५, गंगापूर धरणातून १.३६ तसेच उर्ध्व धरणातील वापरासाठी सोडण्यात आलेले, असे एकूण ८.२३ टीएमसी पाणी सोडण्यात आले आहे. अद्यापही ४.६१ टीएमसी पाणी सोडणे शिल्लक असले तरी, प्रत्यक्षात एकूण आठ ते नऊ टीएमसी पाणी येण्याची शक्यता आहे.

विसर्ग सुरू

जायकवाडी धरणामध्ये मुळामधून २३५, निळवंडे २ हजार, ओझर वेअर १८०९, मधमेश्वर बंधारा १५८९ क्सुसेक्स पाणी सोडण्यात येत असून, पैठण येथे १२३१ क्सुसेक्स पाणी येत आहे.

मोबाइल अॅप डाउनलोड करा आणि राहा अपडेट

७०० रिक्षा परवाने केले पुनरुज्जीवित

November 15, 2015, 11:00 am

≫ Next: भुयारी मार्ग की उड्डाणपूल?

≪ Previous: जायकवाडीत ९.४७% उपयुक्त पाणीसाठा

$

0

0

म. टा. प्रतिनिधी, औरंगाबाद

नूतनीकरणाला उशीर झाल्याने रिक्षांचे अनेक परवाने रद्द करण्यात आले होते. राज्यातील सर्व प्रदेशिक परिवहन अधिकारी (आरटीओ) कार्यालयांत रिक्षा परवाना नूतनीकरणाचे नियम समान असावेत म्हणून रद्द केलेल्या रिक्षा परवान्यांचे नूतनीकरण करण्यासाठी शासनाने योजना जाहीर केली होती. औरंगाबाद आरटीओ कार्यालयात शहर आणि ग्रामीण भागातील ७५०हून अधिक रिक्षा चालकांच्या परवान्यांचे या योजनेत नूतनीकरण करण्यात आले आहेत.

शहरात पुलांच्या कामामुळे होणाऱ्या वाहतुकीच्या कोंडीमुळे पोलिस आयुक्तांनी डिझेल रिक्षा हद्दपार करण्याचा निर्णय घेतला. रिक्षांची संख्या कमी झाल्यामुळे वाहतुकीला शिस्त लागेल, अशी पोलिसांची अपेक्षा आहे, मात्र आता शहरात रिक्षांची संख्या अधिक वाढण्याची शक्यता आहे. दरवर्षी आरटीओ कार्यालयात रिक्षा परवाना नूतनीकरण करून घ्यावा लागते. नियमानुसार अनेक रिक्षाचालकांनी परवाना नूतनीकरण केले नाही. त्यामुळे त्यांचे परवाने रद्द करण्यात आले होते. त्यामुळे काही चालकांनी आपल्या रिक्षा स्क्रॅप केल्या तर, काहींना रिक्षा विकावी लागली.

राज्यात रिक्षा परवाना नूतनीकरणासाठी विशिष्ट नियम नाहीत. विविध आरटीओ कार्यालयांत रिक्षा परवाना नूतनीकरणासाठी आकारणायत येत असलेले शुल्क वेगवेगळे आहे. या नियमामध्ये सुसूत्रता आणण्यासाठी परिवहनमंत्री दिवाकर रावते यांनी रद्द झालेल्या परवान्यांचे १५ हजार रुपये आणि आरटीओ शुल्क भरून नूतनीकरण करून देण्याचा निर्णय घेतला होता. हा निर्णय राज्यातील सर्व आरटीओ कार्यालयांना लागू करण्यात आला. या योजनेला मुंबईत कमी प्रतिसाद मिळाला. त्यामुळे योजनेची मुदत वाढवून देण्यात आली होती. आरटीओ कार्यालयात ७०० हून अधिक रिक्षाचालकांनी परवान्यांचे नूतनीकरण करून घेतले. शहर आणि जिल्हा या दोन्ही प्रवर्गातील रिक्षांचा समावेश आहे. यात ३००हून परवाने जिल्ह्यातील असल्याची माहिती सूत्रांनी दिली.

३० नोव्हेंबरपर्यंत मुदतवाढ

रिक्षा परवाना नूतनीकरणाची मुदत १० नोव्हेंबरला संपली. राज्यभरातील रिक्षाचालकांचा या योजनेला प्रतिसाद विचारात घेऊन ही मुदत ३० नोव्हेंबरपर्यंत वाढवून देण्यात आली आहे.

मोबाइल अॅप डाउनलोड करा आणि राहा अपडेट

भुयारी मार्ग की उड्डाणपूल?

November 15, 2015, 11:01 am

≫ Next: नाट्यगृहांसाठी रंगकर्मी, रसिक एकवटले

≪ Previous: ७०० रिक्षा परवाने केले पुनरुज्जीवित

$

0

0

म. टा. प्रतिनिधी, औरंगाबाद

शिवाजीनगर रेल्वे क्रॉसिंगवरील वाहतूक कोंडीचा प्रश्न लवकर सुटण्याची चिन्हे नाहीत. येथे रेल्वे विभागातर्फे अंडरब्रिज तयार करण्याची स्थानिकांची मागणी आहे; मात्र वाहनांची संख्या जास्त असल्याने उड्डाणपूल बांधावा लागेल, असे संकेत रेल्वेने दिले आहेत.

शहराच्या दक्षिणेकडे देवळाई, सातारा येथे गेल्या काही वर्षांत लोकसंख्या वाढल्याने शिवाजीनगर रेल्वे क्रॉसिंगवरून जाणाऱ्या वाहनांची संख्या वाढली आहे. येथील वाहनांची संख्या शहरातील इतर रेल्वे क्रॉसिंगपेक्षा जवळपास तिप्पट आहे. येथे रोज सकाळी १० ते दुपारी १२ व सायंकाळी पाच ते आठ दरम्यान वाहनांची गर्दी होते. शाळा सुटल्यानंतर घराकडे जाणारी पालकांची वाहने, स्कूल बसलाही रेल्वेक्रॉसिंगवर कोंडीमधून वाट शोधावी लागते.

औरंगाबाद रेल्वे मार्गावर रेल्वेची संख्या वाढली आहे. सकाळी ६ ते दुपारी साडेतीन पर्यंत जनशताब्दी, जालना-नगरसोल डेमू, पॅसेंजर, नरसापूर-नगरसोल, सचखंड एक्स्प्रेस, तपोवन एक्स्प्रेस, हैदराबाद पॅसेंजर या रेल्वेमुळे सतत गेट बंद केले जाते. प्रत्येकवेळी गेट बंद केल्यानंतर बीड बायपासकडे देवळाईचौक आणि शिवाजीनगरकडे हॉटेल जानकीपर्यंत वाहतूक थांबते. या कोंडीतून पुढे जाण्यासाठी वाहनधारकांमध्ये स्पर्धा लागले व अनेकवेळा किरकोळ अपघात होतात. सायंकाळी सहा नंतरही रेल्वेची संख्या जास्त असल्याने घरी परतणाऱ्या नागरिकांना गेट उघडेपर्यंत तिष्ठावे लागते. या परिस्थितीतून मार्ग काढण्यासाठी क्रॉसिंगखाली रेल्वे विभागाने भुयारी मार्ग तयार करण्याची मागणी आहे. परंतु, ही साइट भुयारी मार्गासाठी अनुकूल नसल्याने महाराष्ट्र राज्य रस्ते विकास महामंडळलाने उड्डाणपूल बांधावा, अशी सूचना रेल्वे विभागाने केली आहे. त्यामुळे भुयारी मार्ग की उड्डाणपूल हा पेच निर्माण झाला आहे.

कोंडीमुळे गमावले प्राण

सुमारे दोन वर्षांपूर्वी स्कुटीवरून जाणारी एक तरुणी रेल्वे क्रॉसिंगजवळ अपघातामुळे खाली पडली. तिच्या डोक्याला जबर मार लागला. काहीजणांनी तिला हॉस्पिटलमध्ये नेण्याचा प्रयत्न केला पण वाहतूक कोंडीमुळे वेळेवर उपचार मिळू शकले नाहीत.

क्रॉसिंगची दुरुस्ती होणार

दक्षिण मध्य रेल्वेचे महाव्यवस्थापक रवींद्र गुप्ता डिसेंबरच्या पहिल्या आठवड्यात औरंगाबादला भेट देणार आहेत. त्यापूर्वी येथील लेव्हल क्रॉसिंगचे काम पूर्ण केले जाणार आहे. शिवाजीनगर रेल्वेक्रॉसिंगवर खूप खड्डे असून त्याचा वाहनचालकांना मोठा त्रास होतो. त्यामुळे महाव्यस्थापकांच्या दौऱ्यापूर्वी दुरुस्ती केली जाणार असल्याचे सांगण्यात आले.

संग्रामनगर गेट करणार बंद

औरंगाबाद येते लोहमार्गावर पैठण रोड व संग्रामनगर येथे उड्डाणपूल बांधण्यात आले आहेत. या दोन्ही पुलाखालील क्रॉसिंग सुरू आहे. पूल बांधल्यानंतर गेट बंद करण्याचा नियम आहे. त्यामुळे ते लवकरच बंद करणार असल्याची माहिती रेल्वेचे विभागीय व्यवस्थापक डॉ. ए. के. सिन्हा यांनी दिली.

> रेल्वेने भुयारी मार्गासाठी प्राथमिक सर्व्हेक्षण केले असून रस्त्याची उंची व रेल्वे गेटच्या उंचीत जास्त फरक नाही. त्यामुळे येथे भुयारी मार्ग केल्यास पावसाचे, ड्रेनेजचे पाणी साचू शकते, जड वाहन व सिटीबस जाणे शक्य नाही, त्यामुळे भुयारी मार्गाचा उपयोग होणार नसल्याचा अहवाल देण्यात आला आहे.

> उड्डाणपूल बांधण्याबद्दल महाराष्ट्र राज्य रस्ते विकास महामंडळाच्या काही अधिकाऱ्यांनी शंका उपस्थित केली आहे. येथे उड्डाणपूल बांधल्यास त्याचा देवळाई चौकात उतार काढता येणार नाही. देवळाई चौकापुढे हा पूल उतरवण्यासाठी जागा नसल्याने उड्डाणपूल कसा बांधावा, असा प्रश्न पडला आहे.

शिवाजीनगर रेल्वेक्रॉसिंग वरील समस्या सुटण्यासाठी भुयारी मार्ग बांधावा लागणार आहे. त्याबद्दलचे निवेदन रेल्वे मंत्रालय, पालकमंत्री रामदास कदम यांना देण्यात आले आहे. दिल्ली येथे रेल्वे मंत्र्यांची भेट घेऊन हा पेच सोडवावा, अशी मागणी करणार आहोत.

- राजेंद्र जंजाळ, सभागृह नेता

मोबाइल अॅप डाउनलोड करा आणि राहा अपडेट

नाट्यगृहांसाठी रंगकर्मी, रसिक एकवटले

November 15, 2015, 11:02 am

≫ Next: पैसेवारीसाठी ग्रामपंचायतस्तरीय समिती

≪ Previous: भुयारी मार्ग की उड्डाणपूल?

$

0

0

म. टा. प्रतिनिधी, औरंगाबाद

शहरातील संत एकनाथ रंगमंदिर व संत तुकाराम नाट्यगृहाची दूरवस्था दूर करण्यासाठी रंगकर्मी व कलाप्रेमी नागरिकांनी पुढाकार घेतला आहे. सिडकोतील बेट्रा सभागृहात रविवारी सायंकाळी झालेल्या बैठकीत महत्त्वाचे निर्णय घेण्यात आले आहेत.

संत तुकाराम नाट्यगृह व संत एकनाथ रंगमंदिराची दुर्दशा झाली आहे. खंडीत पाणी पुरवठा, तुटलेल्या खुर्च्या, अस्वच्छ स्वच्छतागृह, तुटलेले रंगमंच, धुळीने माखलेले नाट्यगृह, नादुरूस्त वातानुकूलित यंत्रणा अशा अनेक समस्या आहेत. याबाबत रंगकर्मी व रसिकांनी मनपा प्रशासनाकडे पाठपुरावा करूनही उपयोग झाला नाही. बेट्रा सभागृहात झालेल्या बैठकीला डॉ. आनंद निकाळजे, नीना निकाळजे, प्रा. मोहन फुले, सतीश परळीकर, संदीप भगाडे, पोपट गायकवाड, हेमंत अष्टपुत्रे, राजू परदेशी, विनोद सरकटे उपस्थित होते. दोन्ही नाट्यगृहांतील समस्यांच्या प्रेझेंटेशनची जबाबदारी राजू परदेशी, संदीप सोनार व पवन गायकवाड सांभाळणार आहेत. एक व दोन डिसेंबर रोजी लोकप्रतिनिधींची भेट घेऊन समस्यांचे प्रेंझेटेशन करण्यात येणार आहे, तसेच हेमंत अष्टपुत्रे यांनी एक महिना दोन्ही नाट्यगृहांची स्वखर्चाने साफसफाई करणार आहेत. दर दोन महिन्यांनी रंगकर्मी व रसिक रंगमंदिराची स्वच्छता करणार आहेत. याबाबत येत्या २४ नोव्हेंबर रोजी पुन्हा बैठक घेण्यात येणार आहे.

मोबाइल अॅप डाउनलोड करा आणि राहा अपडेट

पैसेवारीसाठी ग्रामपंचायतस्तरीय समिती

November 15, 2015, 11:03 am

≫ Next: राजकारणामुळे पालखीला ग्रहण

≪ Previous: नाट्यगृहांसाठी रंगकर्मी, रसिक एकवटले

$

0

0

म. टा. प्रतिनिधी, औरंगाबाद

राज्यात दुष्काळ जाहीर करण्यासाठी पीक पैसेवारी काढण्याच्या पद्धतीत बदल करण्यात आला असून प‌िकांची पैसेवारी काढण्यासाठी ग्रामपंचायत स्तरावर पैसेवारी समिती स्थापन केली जाणार आहे. आता प्रमुख प‌िकांचे सहा कापणी प्रयोग केले जाणार आहेत. पैसेवारी जाहीर करण्यासाठी महसुली गाव हे घटक धरण्यात येणार आहेत.

राज्यात निर्माण होणारी टंचाई परिस्थिती, त्या अनुषंघाने दुष्काळ जाहीर करणे तसेच विविध उपाययोजना जाहीर करून आणेवारी पद्धतीत बदल करण्याची मागणी केली जात होती. या मागणीनुसार आणेवारी पद्धतीचा अभ्यास करून बदल करण्याच्या दृष्ट‌िने विभागीय आयुक्त, पुणे यांच्या अध्यक्षतेखाली समिती स्थापन करण्यात आली होती. या समितीच्या शिफारशी विचारात घेऊन सरकारने पीक पैसेवारी पद्धतीसाठी खरीप हंगामी २०१५ पासून निर्णय घेतला आहे. शास्त्रोक्त पद्धतीने पीक पैसेवारी घोषित करण्यापूर्वी जुन्याच पद्धतीने पैसेवारी काढण्यात येईल. पैसवारी जाहीर करण्यासाठी हंगामी, सुधारित व अंत‌िम पैसेवारी काढण्याच्या तारखा जाहीर करण्यात आल्या आहेत. कोकण, पुणे, नाशिक, औरंगाबाद या चार विभागांची अंत‌िम पैसेवारी १५ डिसेंबर रोजी जाहीर करण्यात येईल तर नागपूर, अमरावती या विभागात ३१ डिसेंबरला पैसेवारी जाहीर होईल. रब्बी पिकांची पैसेवारी घोषित करण्याच्या तारखांमध्ये कोणताही बदल करण्यात आला नाही.

ग्राम पैसेवारी समितीचे अध्यक्ष मंडळ निरीक्षक अथवा तत्सम अधिकारी राहतील. मंडळातील गावांची विभागणी करून प्रत्येक ग्रामपंचायतीसाठी स्वतंत्र अध्यक्ष व समिती असावी व त्यासाठी मंडळ अधिकारी, नायब तहसीलदार, अव्वल कारकून, पंचायत समितीचे विस्तार अधिकारी, कृषी अधिकारी यांनाही अध्यक्ष करता येणार आहे. प्रत्येक प्रमुख पिकांचे किमान ६ पीक कापणी प्रयोग घेण्यात यावे. मात्र हे प्रयोग ग्रामपंचायतवार करण्यात यावे, पीक कापणी प्रयोगाची जबाबदारी महसूल विभागकडेच राहील.

मोबाइल अॅप डाउनलोड करा आणि राहा अपडेट

---

राजकारणामुळे पालखीला ग्रहण

November 15, 2015, 11:04 am

≫ Next: ‘कमी मुद्दे मांडल्यास वेळ वाचेल’

≪ Previous: पैसेवारीसाठी ग्रामपंचायतस्तरीय समिती

$

0

0

म. टा. प्रतिनिधी, उस्मानाबाद

संत गोरोबा कुंभार यांना संतश्रेष्ठांचा दर्जा लाभलेला आहे. उस्मानाबाद जिल्ह्यातील तेर या त्यांच्या मूळ गावातून निघणारी कार्तिक एकादशीसाठीची पालखी म्हणजे उस्मानाबाद शहरवासीयांसाठी खरी दिवाळीच असते. परंतु, अलीकडील काळात तेर येथील संत गोरोबा काका यांच्या मंदिरातही राजकारण्यांचा चंचू प्रवेश झाल्याने व तेथील कारभारातील त्यांच्या हस्तक्षेपामुळे मूळ वारकरी व भाविक ही अलीकडील दोन वर्षांत पालखी सोहळ्यापासून अलिप्त राहावे लागत आहे.

भाऊबीज दिनी शुक्रवारी तेर येथून पंढरपूरकडे विठूरायाच्या भेटीसाठी निघालेल्या संत गोरोबा काकाच्या पालखीचे (पायदळ वारीचे) शनिवारी (बालदिनी) उस्मानाबाद शहरात आगमन झाले. यावेळी या पालखी सोहळ्यात अवघे ५० ते ६० जणच असल्याने या पालखीला ग्रहण लागल्याची चर्चा शहरवासीयांबरोबरच वारकरी संप्रदायात आहे.

पंढरपूरकडे जाणाऱ्या संतश्रेष्ठ गोरोबा काकांच्या पालखीसाठी पूर्वी उस्मानाबादेत नगरपालिकेकडून जय्यत तयारी केली जायची. पालखीबाबत लाऊड स्पीकरवरून वार्ता देऊन शहरवासीयांना अवगत केले जायचे पालखी मार्गाची स्वच्छता करून या मार्गावर किटकनाशक औषधाची फवारणी केली जायची. ऐन दिवाळीच्या हंगामात हा पालखी सोहळा येत असल्याने शहरवासीयसुद्धा तोरणे उभारून तसेच रांगोळ्या काढून या पालखीचे आनंदाच्या व उत्साहाच्या वातावरणात जंगी स्वागत करीत असत.

उस्मानाबाद नगरपालिकेवर राष्ट्रवादी काँग्रेसची एकहाती सत्ता आहे. संतश्रेष्ठ गोरोबा कुंभार मंदिर देवस्थानच्या विश्वस्त मंडळाची कोर्टबाजी होवून आता राष्ट्रवादीचे ज्येष्ठ नेते डॉ. पद्मसिंह पाटील व राष्ट्रवादी काँग्रेसमधील त्यांच्या सहकाऱ्यांची विश्वस्त मंडळात नियुक्ती झाली आहे. राष्ट्रवादीचे आमदार राणा जगजितसिंह पाटील हेसुद्धा या मंदिराच्या कारभारावर लक्ष ठेवून असतात. मात्र, शुक्रवारी तेर येथून पालखी पंढरपूरकडे निघाली असताना डॉ. पद्मसिंह पाटील व आमदार राणा रणजितसिंह पाटील या पिता-पुत्रांची अनुपस्थिती प्रकर्षाने जाणवली.

संत गोरोबा कुंभार मंदिराची ही पालखी शनिवारी उस्मानाबाद शहरात मुक्कामी आली असताना त्याची दखल उस्मानाबाद नगरपरिषदेत घेतली नाही किंवा या पालखी आगमन संदर्भाने उस्मानाबाद शहरवासीय व परिसरातील नागरिकांना अवगत केले नाही.

नगरपरिषदेचे राजकारण

उस्मानाबाद नगरपालिकेतील राष्ट्रवादी काँग्रेसची पदाधिकारी व नगरसेवक मंडळी डॉ. पद्मसिंह पाटील यांचेय सुपूत्र तथा आमदार राणा जगजितसिंह पाटील यांना मानणारी आहे. नगरपरिषदेचे यात राजकारण आहे किंवा नाही याबाबत मत-मतांतरे असली तरीही पालखी सोहळ्याला ग्रहण लागले अशी चर्चा मात्र, वारकऱ्यांबरोबरच शहरवासियांत आहे. शंभरच्या आसपासचे वारकऱ्यांसह संतश्रेष्ठ गोरोबा काकांची पालखी हे चित्र मात्र पाहणाऱ्यांसाठी केविलवाणी वाटत होते.

साहित्यिकही दूरच

साहित्य संमेलनाच्या मागणीच्या वेळी राष्ट्रसंत गोरोबा काकाचा महिमा वर्णन करणारी साहित्यप्रेमी मंडळीही या पालखी सोहळ्याच्या आगमनप्रसंगी फारशी दिसून आली नाही.

मोबाइल अॅप डाउनलोड करा आणि राहा अपडेट

‘कमी मुद्दे मांडल्यास वेळ वाचेल’

November 15, 2015, 10:32 am

≫ Next: तूरडाळ, ज्वारीची भाकर जेवणातून गायब

≪ Previous: राजकारणामुळे पालखीला ग्रहण

$

0

0

म. टा. प्रतिनिधी, नांदेड

न्यायालयात मुद्दा मांडतांना वकिलांनी थोडक्यात आणि आवश्यक तेच मांडले पाहिजे. त्यामुळे न्यायालय आणि तुमचा वेळ वाचून इतर कामांसाठी वेळ मिळेल. न्यायालयात मुद्दे लांबलचक न मांडता अत्यंत थोडक्यात मांडावे ज्यावरून न्यायाधिशांना त्याचे आकलन सहज व लवकर होईल. यामुळे वकिल व पक्षकार या दोघांना आपला वेळ वाचवून पुढे जाता येईल, असे मत मुंबई उच्च न्यायालयाचे न्या. अरुण चौधरी यांनी व्यक्त केले.

बार कॉन्सील ऑफ महाराष्ट्र अॅँड गोवाच्यावतीने नांदेड येथे आयोजित कायदेविषयक शिक्षण कार्यक्रमात न्यायमुर्ती चौधरी बोलत होते. यावेळी महाराष्ट्र बार कॉन्सीलचे माजी अध्यक्ष अॅड. जयंत जायभावे, अॅड. बी. के. गांधी, अॅड. आशिष देशमुख, अॅड. अनिल गोवरदिवे, विद्यमान अध्यक्ष अॅड. हर्षद निंबाळकर, सचिव अॅड. सतिश देशमुख, नांदेड जिल्हा वकिल संघाचे अध्यक्ष अॅड. विजयकुमार भोपी, नांदेडच्या प्रमुख जिल्हा व सत्र न्यायाधिश सविता बारणे, जिल्हा न्यायाधिश जी. बी. गुरव, न्यायाधिश शरद पवार, न्यायाधिश वसावे उपस्थित होते. या प्रसंगी पुढे बोलतांना न्या. चौधरी म्हणाले, 'डॉक्टर व वकील या दोन व्यवसायांना नोबल असे विशेषण लावले जाते. परंतु, दुर्दैवाने या दोन्ही व्यवसांयामध्ये पैशांचा हव्यास वाढला आहे. वैद्यकीय व्यवसायात तंत्रज्ञान आले. औषधी महाग झाल्या या बाबींना मान्य केले तरी नक्कीच कुठे तरी गडबड आहे. कारण एखाद्या व्यावसायीक उद्योगापेक्षा दवाखान्याचे उत्पन्न कितीतरी अधिक झाले आहे. असाच काहीसा भाग वकिली उद्योगात आला आहे. वकील व्यवसाय हा नोबलच राहिला पाहिजे यावर प्रत्येकांने विचार करून काम करावे, महाराष्ट्र व भारतीय बार कॉन्सीलने यावर लक्ष घालून वकिलांच्या फीस घेण्याच्या पद्धतीवर नियंत्रण आणण्याची गरज आहे.'

नांदेडच्या प्रमुख जिल्हा व सत्र न्यायाधिश सविता बारणे म्हणाल्या, 'वकिली व्यवसाय सुरू करतांना काही पथ्य पाळावयाची असतात. पक्षकारांने आज किती रक्कम फिस म्हणून दिली त्यापेक्षा त्याचे काम झाल्यानंतर त्याने आपल्याला दिलेले आशीर्वाद आणि आठवणी ह्या जास्त किमंत असणाऱ्या असतात. वकिलांसह सर्वांनी नेहमी आपले कान आणि डोळे उघडे ठेवायचे असतात तर ज्ञान आपोआप वाढत जाते. वकिलांनी उलट तपासणी कशी घ्यावी यासाठी वकिल संघटनेने मार्गदर्शक कार्यक्रमांचे आयोजन करावे, तसेच कनिष्ठ वकिलांसाठी घरकुल योजना कशी अस्तित्वात आणता येईल यावर विचार करावा.'

७० वकिलांचा सत्कार

नांदेड जिल्ह्यात गेली ३० वर्ष वकिली सेवा करणाऱ्या ७० वकिलांचा सत्कार न्यायमूर्ती अरूण चौधरी यांच्या हस्ते करण्यात आला. त्यात अॅड. एस. एन. हाके, अ्रॅड. श्यामसुंदर अर्धापूरकर, अॅड. जयंत कुर्तडीकर, अॅड. आर. जी. परळकर, अॅड. ईश्र्वर जोंधळे, अॅड. बादलगांवकर, अॅड. गहीलोत, अॅड. अन्वरोद्दीन, अॅड. भोसले, अॅड. देशमुख, अॅड. शिंदे, अॅड. पुयड, अॅड. शिंदे आदींसह अनेकांचा समावेश होता.

मोबाइल अॅप डाउनलोड करा आणि राहा अपडेट

तूरडाळ, ज्वारीची भाकर जेवणातून गायब

November 15, 2015, 11:07 am

≫ Next: झेडपी भरतीत आरोग्य सेविकांबाबत दुजाभाव

≪ Previous: ‘कमी मुद्दे मांडल्यास वेळ वाचेल’

$

0

0

म. टा. प्रतिनिधी, उस्मानाबाद

गेल्या काही दिवसांपासून वाढत असलेल्या महागाईमुळे सर्वसामांन्य त्रस्त झाले आहेत. बाजारात तूरडाळ १६० तर ज्वारी ३० रुपये किलो याप्रमाणे विक्री केली जात आहे. यामुळे नागरिक त्रस्त झाले आहेत. सर्वसामांन्याच्या जेवणातून तूरडाळ, ज्वारीची भाकर गायब होण्याच्या मार्गावर आहे. त्यासोबतच कडब्याचे दर गगनाला भिडले असल्याने जनावरांच्या चाऱ्याचा प्रश्न बिकट झाला आहे.

ज्वारीचे कोठार अशी उस्मानाबाद व सोलापूर जिल्ह्याची ओळख आहे. मात्र, सततच्या दुष्काळी स्थितीमुळे यंदाही उस्मानाबाद व सोलापूर जिल्ह्यातील रब्बी ज्वारीची पीक परिस्थिती समाधानकारक नाही. तूरडाळीच्या तडक्यानंतर आता ज्वारीनेही दरात उचल खाल्ल्याने सर्वसामांन्याच्या जेवणातून ज्वारीची भाकर व तूरडाळ गायब होण्याच्या मार्गावर आहे. दर्जेदार ज्वारीला उस्मानाबाद जिल्ह्यातील कळंब येथील आडत बाजारात प्रतिक्विंटल तीन हजार रूपये इतका विक्रमी भाव मिळू लागला आहे. त्यामुळे ज्वारी उत्पादक बळीराजा सुखावणार असला तरी गोरगरिबाची, कष्टकऱ्याची भाकरी मात्र, आता त्याच्यासाठी दूर्मिळ होणार आहे.

उस्मानाबाद जिल्ह्यात मालदांडी ज्वारीचा नवीन माल बाजारात विक्रीसाठी येण्यास आणखीन दोन महिन्याचा कालावधी आहे. परंतु, सध्या बाजारपेठेत उपलब्ध असलेल्या मालदांडी ज्वारी (रब्बी ज्वारी) बरोबरच ज्वारीच्या कडब्याचे दर गगनाला भिडल्यामुळे पशुपालकांना पशुपालन करणे कठीण झाले आहे. चारा, पशुखाद्य, सरकीपेंड व शेंगदाणा पेंड याचे दरही सद्या तेजीकडेच झुकलेले असल्याने पशुपालक दुभती जनावरेही बाजारात विक्रीसाठी आणू लागले आहेत. त्यामुळे जिल्ह्यातील पशूधन घटण्याची भीतीही व्यक्त केली जात आहे. गेल्या चार वर्षांपासून जिल्ह्यात सरासरीपेक्षा कमी झालेला पाऊस आणि वातावरण झालेले बदल यामुळे ज्वारीचे माहेरघर म्हणून गणल्या जाणाऱ्या उस्मानाबाद व सोलापूर जिल्ह्यात ज्वारीच्या उत्पादनात दिवसेंदिवस घट होत चालली आहे. प्रतिकुल हवामानामुळे यंदाही ज्वारीच्या पिकाबाबत शेतकऱ्यातून साशंकताच व्यक्त करण्यात येत आहे. त्यामुळे बाजारपेठेत सद्या ज्वारीच्या दराने ३० रूपये प्रतिकिलोपर्यंत येवून ठेपली आहे. मागणी व पुरवठा यातील तफावत लक्षात घेवून हे दर आणखीन वाढतील अशी शक्यता बाजारपेठेतील जाणकारांनी वर्तविली आहे.

ज्वारीच्या कडब्याच्या पेंडीचा दर प्रतिपेंडी ३० रूपयापर्यंत गेला आहे. त्यामुळे शेतकऱ्यांचे पावसाअभावी कमी उत्पादनामुळे झालेले नुकसान वाढीव दरामुळे भरून निघत असले तरी पशुपालक मात्र, हैराण झाले आहेत.

कडबा भाव खाऊ लागला

गेल्या तीन वर्षाप्रमाणे यंदाही ज्वारीचे उत्पादन घटण्याचीच शक्यता वर्तविण्यात येत असल्यामुळे शिवाय ज्वारीच्या वाढत्या मागणीमुळे ज्वारीचे दर तूरडाळीप्रमाणेच वेगाने तेजीकडे वाटचाल करू लागले आहेत. पौष्टिक म्हणून गणला जाजारा कडबादेखील चांगलाच भाव खाऊ लागला आहे. परिणामी यंदा ज्वारी खायला महाग होणार हे सुस्पष्ट आहे.

मोबाइल अॅप डाउनलोड करा आणि राहा अपडेट

झेडपी भरतीत आरोग्य सेविकांबाबत दुजाभाव

November 15, 2015, 11:20 am

≫ Next: राज्य नाट्य स्पर्धेत वशिलेबाजी ?

≪ Previous: तूरडाळ, ज्वारीची भाकर जेवणातून गायब

$

0

0

'एनआरएचएम'च्या कर्मचारी सरळसेवा भरतीपासून दूर

makarand.kulkarni@timesgroup.com

औरंगाबाद : राज्यातील जिल्हा परिषदांच्या आरोग्य विभागांतर्गत सरळसेवा भरती प्रक्रिया राबविण्यात येत आहे. कायमस्वरुपी आरोग्य सेविकांची रिक्त पदे यातून भरली जातील, पण निवड प्रक्रियेत राष्ट्रीय ग्रामीण आरोग्य अभियानामध्ये (एनआरएचएम) कार्यरत असलेल्या आरोग्य सेविकांना थेट संध उपलब्ध नाही. त्यामुळे वर्षानुवर्षे राबणाऱ्या कर्मचाऱ्यांना तोकडे मानधन आणि सरळसेवा भरतीतून आरोग्य सेविकेस ३० हजार रुपये वेतन मिळणार आहे. हा दुजाभाव दूर करण्यासंदर्भात थेट राज्यपालांकडेच साकडे घालण्यात आले आहे.

राष्ट्रीय ग्रामीण आरोग्य अभियान सुरू होऊन अकरा वर्षे झाली. लोकसंख्या व कामाचे स्वरूप लक्षात घेऊन उपकेंद्र स्तरावरील, गरजेपोटी अजून एक आरोग्य सेविका म्हणून, या आरोग्य सेविकांची कंत्राटी पद्धतीने नेमणूक करण्यात आली. पूर्वी कार्यरत असलेली कायमस्वरुपी आरोग्य सेविका आणि एनआरएचएमची कंत्राटी आरोग्य सेविका यांची शैक्षणिक अर्हता सारखीच आहे. कामही सारखेच आहे, मात्र त्या मानाने मोबदला मिळत नाही. प्राप्त माहितीनुसार 'एनआरएचएम'च्या कंत्राटी आरोग्य सेविकेस दहा हजार तर कायमस्वरुपी आरोग्य सेविकेस ३० ते ३५ हजार रुपये मोबदला मिळतो. यामुळे सरकारच्या 'समान काम समान वेतन' या धोरणाला हरताळ फासला गेला आहे. संपूर्ण महाराष्ट्रात हे चित्र आहे.

आता राज्यातील सर्व जिल्हा परिषदांमध्ये सरळ सेवा भरती प्रक्रिया राबविली जात आहे. त्यासाठी जाहिराती प्रसिद्ध झाल्या आहेत. मराठवाड्यातील परभणी आणि उस्मानाबाद जिल्हा परिषद वगळता अन्य सहा ठिकाणी आरोग्य सेवक महिलांची २०९ पदे भरायची आहेत तर, आरोग्य सेवक पुरुष या प्रवर्गाची ३६ पदे भरली जाणार आहेत. या भरतीप्रक्रियेत पूर्वीपासून कार्यरत असलेल्या एनआरएचएमच्या कंत्राटी आरोग्य सेविकांना प्राधान्या दिले जावे, अशी मागणी जोर धरत आहे. मराठवाडा विकास मंडळाचे सदस्य डॉ. अशोक बेलखोडे यांनी यासंदर्भात राज्यपाल के. विद्यासागर राव यांना यासंदर्भात सविस्तर पत्र दिले आहे. वरील सूचनेचा विचार करून ही प्रक्रिया थांबवावी, अशी विनंती डॉ. बेलखोडे यांनी केली आहे.

जिल्हा परिषदेच्या सरळ सेवा भरतीत दहा-दहा वर्षांपासून कार्यरत असलेल्या कंत्राटी कर्मचाऱ्यांना प्राधान्य दिले गेले पाहिजे. किंबहुना त्यांच्यातूनच जर पदे भरली गेली तर किमानपक्षी थोडाफार अन्याय तरी कमी होईल. राज्यपालांना यासंदर्भात पत्र लिहिले आहे. यावर सकारात्मक पावले उचलली जातील, अशी अपेक्षा आहे. - डॉ. अशोक बेलखोडे, तज्ज्ञ सदस्य, मराठवाडा विकास मंडळ.

आरोग्य सेवकांची जिल्हानिहाय भरती

औरंगाबाद - ५ जालना - २७ हिंगोली - १८ नांदेड - ४१ लातूर - ८ बीड - ११० एकूण - २०९ (ही पदे महिलांची आहेत.)

मोबाइल अॅप डाउनलोड करा आणि राहा अपडेट

राज्य नाट्य स्पर्धेत वशिलेबाजी ?

November 15, 2015, 11:12 am

≫ Next: शेतकऱ्यांची झोळी रिकामी

≪ Previous: झेडपी भरतीत आरोग्य सेविकांबाबत दुजाभाव

$

0

0

रंगकर्मींनी नोंदवला सांस्कृतिक संचालनालयाकडे आक्षेप

म. टा. प्रतिनिधी, औरंगाबाद

राज्य नाट्य स्पर्धेत स्थानिक समन्वयकाचे हितसंबंध स्पर्धेच्या निकालावर अप्रत्यक्ष परिणाम करतात. त्यामुळे ५४ वर्षांची परंपरा लाभलेल्या स्पर्धेचा दर्जा राखण्यासाठी स्थानिक समन्वयक दूर करण्याची मागणी रंगकर्मी डॉ. सतीश साळुंके यांनी केली आहे. अंतिम फेरीतील विजेत्या तीन संघांच्या कलाकार-तंत्रज्ञांना सहभाग प्रमाणपत्र द्यावे, असे साळुंके यांनी सांस्कृतिक कार्य संचालनालयाला लिहिलेल्या पत्रात म्हटले आहे. या मागणीमुळे राज्य नाट्य स्पर्धेत नवा वाद चव्हाट्यावर आला आहे.

महाराष्ट्र राज्य हौशी नाट्य स्पर्धेला शहरात मंगळवारी सुरुवात होणार आहे; मात्र नाट्य स्पर्धेत पडलेल्या नवीन पायंड्यांबाबत काही रंगकर्मी नाराज आहेत. काही वर्षांपूर्वी राज्य नाट्य स्पर्धेचे संयोजन समाजकल्याण विभाग करीत होता. आता ही जबाबदारी स्थानिक समन्वयक सांभाळत आहेत. या कामासाठी त्यांना सांस्कृतिक कार्य संचालनालयाकडून मानधन दिले जाते; मात्र, स्थानिक समन्वयक एखाद्या नाट्य संस्थेशी संबंधित असतात. स्पर्धेच्या कालावधीत समन्वयक दररोज परीक्षकांना भेटत असतात. त्यामुळे काही नाट्यसंघांचे अप्रत्यक्ष ब्रँडींग होते. परिणामी, परिचित संघाला पारितोषिक देताना इतर संघांवर अन्याय होतो असा आक्षेप रंगकर्मी डॉ. सतीश साळुंके यांनी घेतला आहे. निकालावर दूरगामी परिणाम करणारा स्थानिक समन्वयक नावाचा घटक दूर केल्यास निकोप स्पर्धा होईल असे साळुंके यांनी सांगितले. शिवाय अंतिम फेरीतील प्रथम तीन विजेत्या संघातील सर्व कलाकार व तंत्रज्ञांना सहभाग प्रमाणपत्र देण्याची गरज आहे. विजेत्या नाटकात सहभाग घेतल्याचा कोणताच पुरावा त्यांच्याकडे नसतो. सर्व सहभागींना रंगमंचावर प्रमाणपत्र देणे शक्य नसल्यास पोस्टाने पाठवा अशी आग्रही मागणी साळुंके यांनी केली आहे. याबाबत राज्य सांस्कृतिक कार्य संचालनालयाला त्यांनी पत्र पाठवले आहे. राज्य नाट्य स्पर्धेचा दर्जा टिकवण्यासाठी व अनिष्ट प्रकार टाळण्यासाठी नवीन बदल करणे आवश्यक असल्याचे त्यांनी सांगितले. दरम्यान, याबाबत अधिक माहितीसाठी सांस्कृतिक कार्य सहसंचालक मनोज सानप यांच्याशी संपर्क होऊ शकला नाही.

परीक्षकांचा दर्जा काय?

सध्या राज्य नाट्य स्पर्धेसाठी साधारण दर्जाचे परीक्षक असतात. बहुतेक परीक्षक जु्न्या पठडीतील नाटकांशी संबंधित असल्याने नवीन प्रयोगशील नाटकांना परीक्षकांच्या दृष्टिकोनाचा फटका बसतो असे साळुंके यांनी सांगितले. परीक्षकांच्या मानधनात वाढ केल्यास दर्जेदार व रंगभूमीवर सक्रिय रंगकर्मी स्पर्धेचे परीक्षण करतील असा उपायही त्यांनी सूचवला आहे.

नाट्य स्पर्धेच्या निकालावर काही घटक निश्चित परिणाम करतात. शासकीय यंत्रणेमार्फत स्पर्धा घेतल्यास कुणी आक्षेप घेणार नाही. परीक्षकांवर प्रभाव पाडून स्थानिक समन्वयक निकालावर परिणाम करतात. - डॉ. सतीश साळुंके, रंगकर्मी

मोबाइल अॅप डाउनलोड करा आणि राहा अपडेट

शेतकऱ्यांची झोळी रिकामी

November 16, 2015, 12:31 pm

≫ Next: इतिहासच चुकीचा शिकवला

≪ Previous: राज्य नाट्य स्पर्धेत वशिलेबाजी ?

$

0

0

म. टा. प्रतिनिधी, औरंगाबाद

मराठवाड्यात दुष्काळी परिस्थितीमुळे आत्महत्यांचे सत्र वाढत असून त्या होऊ नये तसेच शेतकऱ्यांच्या कुटुंबाच्या पोटात दोन घास पडावे या उद्देशाने राज्य शासनाने मराठवाड्यातील सर्व जिल्ह्यांमधील शेतकऱ्यांसाठी राष्ट्रीय अन्नसुरक्षा योजनेच्या धर्तीवर सवलतीच्या दराने धान्य पुरवठा करणे सुरू केले, मात्र ऑक्टोबर महिन्यात मराठवाड्यातील तब्बल ८ लाख ७० हजार सदस्यांना धान्य अद्यापही पडून असल्याने याचे वाटप झाले नाही. सप्टेंबर महिन्यातही हा आकडा ९ लाखांवर होता.

मराठवाड्यातील आठही जिल्ह्यांमध्ये ऑक्टोबर महिन्यात १३ हजार ८६४ टन धान्याचे वाटप करण्यात आले आहे. सर्वाधिक शंभर टक्के उस्मानाबाद जिल्ह्यात तर सर्वात कमी ५५ टक्के बीड जिल्ह्यात धान्य वाटप करण्यात आले असल्याची नोंद पुरवठा विभागामध्ये करण्यात आली आहे. मराठवाड्यातील दुष्काळी परिस्थितीमुळे विभागातील सर्व शेतकऱ्यांना अन्नसुरक्षा योजनेअंतर्गत तीन रुपये किलो दराने तांदूळ तर २ रुपये किलो दराने गहू देण्यात येत आहेत. त्यामुळे दुष्काळी भागातल्या शेतकऱ्यांना काही प्रमाणात दिलासा मिळत असला तरी सातबाऱ्यात नाव नाही, रेशनकार्ड नाही अशा अन्नधान्य वाटपासंदर्भातील तक्रारींची संख्याही मोठी आहे. या योजनेअंतर्गत मराठवाड्यात ३६ लाख शेतकऱ्यांना धान्याचे वाटप करण्यात येणार असून दहा नोव्हेबरपर्यंत २७ लाख ५८ हजार ०५ शेतकऱ्यांना १२ हजार ८६४ टन धान्याचे वाटप करण्यात आले.

दुष्काळाने सर्वाधिक होरपळलेल्या बीड जिल्ह्यामध्ये ऑक्टोबर महिन्यामध्ये सर्वात कमी केवळ ५५ टक्के धान्याचे वाटप करण्यात आले आहे. बीड खालोखाल नांदेड जिल्ह्यात ६३ टक्के धान्य वाटप झाले आहे. सप्टेंबर महिन्यातही याच दोन जिल्ह्यांमध्ये तुलनेत कमी धान्यवाटप झाले होते.

मोबाइल अॅप डाउनलोड करा आणि राहा अपडेट

इतिहासच चुकीचा शिकवला

November 16, 2015, 12:33 pm

≫ Next: डेंगीची साथ

≪ Previous: शेतकऱ्यांची झोळी रिकामी

$

0

0

म. टा. प्रतिनिधी, औरंगाबाद

'राज्याचा आणि देशाचा इतिहास हा ब्र‌िटिशांच्या अनुषंगाने शिकवला गेला, तोच मुळात चुकीचा इतिहास होता. आजही तसाच शिकवला जात आहे,' असे परखड मत अभिनेते व स्वा. सावरकरांचे अभ्यासक शरद पोंक्षे यांनी मांडले.

संत एकनाथ रंगमंदिरात सोमवारी सायंकाळी स्वतंत्रते भगवती सामाजिक संस्थेच्या उपक्रमात 'क्रांतीकारकांच्या आठवणी आणि सावरकरांचे विचार' या कार्यक्रमात ते बोलत होते. 'आपल्याला हिंदू राष्ट्र म्हणवून घेताना सुद्धा लाज वाटेल अशा पद्धतीत इतिहास रचला गेला, शिकवला गेला. ४१ लढाया जिंकणारा पहिला बाजीराव पेशवा शिकवला गेला नाही, जगज्जेता अॅलेक्झांडर अधिक शिकवला गेला. तात्या टोपे, शिकवला गेला नाही; इतरच काही शिकवले गेले. राईट बंधुंनी विमानाचा ‌शोध लावला हे बिंबवले गेले, पण मराठी माणूस तळपदे यांनी विमानाचा शोध लावला हे सांगितलेच गेले नाही. इतिहासाची पाने इंग्रजांच्या पद्धतीतच रचली गेली. वास्तविक १९४७ मध्ये स्वातंत्र्य मिळाले तेव्हापासून आज २०१५ पर्यंत इंग्लिश बिंबवले गेले. संस्कृत विषयास तडीपार करण्यात आले, हेच चुकत गेले. ऋषीमुनींच्या मौखिक शिक्षणावर अधिक भर दिला गेला असता तर, अधिक चांगले झाले असते. कलेच्या माध्यमातून इतिहास, विचारांचा आणि संस्कृतीचा जागर घडावा, ही भावना नसल्याने हे चुकीचे पायंडे पडत आहेत,' असे मत त्यांनी मांडले.

यावेळी अस्मिता काळे यांनी देशभक्तीपर गीते सादर केली. पदन्यास आर्ट आणि अनुनाद कलाविष्कारच्या कलावंतांनी देशभक्तीपर गीतांवर नृत्य सादर केले. सूत्रधाराची भूमिका पार्थ बावस्कर अकाणि निर्मला अस्वलीकर यांनी पार पाडली.

फुकट म्हणून गर्दी

पार्थ बावस्कर आणि त्याचे सहकारी दोन महिन्यांपासून या कार्यक्रमासाठी परिश्रम घेत आहेत. हा कार्यक्रम फुकट आहे म्हणून औरंगाबादकरांनी गर्दी केली असल्याचे शरद पोंक्षेनी यावेळी सांगितले. फुकट असलेले काहीही घेऊ नका, असा सल्ला देत कार्यक्रम संपल्यावर बॉक्समध्ये काहीतरी पैसे टाका, असे आवाहन त्यांनी केले. संपूर्ण कार्यक्रमात इतिहासाचा जागर मांडताना चालू घडामोडींसह इतिहासाचे पाइक व परंपरा मानणाऱ्या सर्वांवर चिमटे काढत सामाजिक नेते आणि राजकारण्यांवर परखड भाष्य केले. त्याला रसिकांनी टाळ्या व शिट्या वाजवून प्रतिसाद दिला.

मोबाइल अॅप डाउनलोड करा आणि राहा अपडेट

---

डेंगीची साथ

November 16, 2015, 12:35 pm

≫ Next: ‘पोलिओ व्हॅक्सिन’चे कवच लवकरच

≪ Previous: इतिहासच चुकीचा शिकवला

$

0

0

म. टा. प्रतिनिधी, औरंगाबाद

जिल्ह्यात डेंगी तापाची साथ पसरली आहे. पैठण तालुक्यातील विहामांडवा जिल्हा परिषद सर्कलमध्ये दहा रुग्ण आढळून आले. त्यापैकी दोघांचा डेंगीने मृत्यू झाला. जिल्ह्यात सतर्कतेच्या सूचना देण्यात आल्या असून आरोग्य विभागाने ग्रामीण भागात जनजागृती करावी, असे आदेश जिल्हा परिषदेचे आरोग्य सभापती विनोद तांबे यांनी दिले.

पैठण तालुक्याचा दौरा विनोद तांबे यांनी केला. विहामांडवा जिल्हा परिषद सर्कलमध्ये अनेकजण तापाने आजारी असल्याचे सांगण्यात आले होते. त्यानुसार कोळीबोडखा, केकत जळगाव आणि तुळजापूर या गावांना त्यांनी भेट दिली. या गावांमध्ये अनुक्रमे सहा, दोन आणि दोन, असे दहा रुग्ण डेंगीचे आढळून आले होते. कोळीबोडखा येथील दोन रुग्णांचा मृत्यूही झाल्याचे गावकऱ्यांनी सांगितले. तालुका वैद्यकीय अधिकारी तसेच हिवताप निर्मूलन विभागाचे अधिकारी, कर्मचाऱ्यांना या गावांचे सर्वेक्षण करण्याचे आदेश तांबे यांनी दिले. जिल्हा आरोग्य अधिकाऱ्यांनाही सतर्क राहण्याच्या सूचनाही त्यांनी दिल्या. जिल्ह्यातील अन्य गावांमधूनही संशयित डेंगीच्या पेशंटची संख्या वाढत असल्याची माहिती मिळाल्यावरून आरोग्य विभागाने जनजागृती करावी, अशा सूचना देण्यात आल्या आहेत. वैद्यकीय अधिकाऱ्यांच्या जीपवर भोंगे लावून नागरिकांमध्ये जनजागरण करण्याचे आदेशही देण्यात आले आहेत. पैठण तालुक्यात कालपासून याची अंमलबजावणी करण्यात आली. नागरिकांनीही दक्ष राहणे गरजेचे आहे. पाणीसाठे आठवड्यातून एकदा रिकामे करून कोरडा दिवस पाळणे आवश्यक आहे. जेणेकरून डासांची व्युत्पत्ती थांबण्यास मदत मिळेल, असे तांबे यांनी सांगितले.

धूळ झटकणार

आरोग्य विभागाने काही वर्षांपूर्वी चिकनगुनियाची साथ पसरल्यानंतर धूर फवारणी यंत्रांची खरेदी केली होती. सध्या २३ फॉगिंग मशीन आहेत. या मशीनच्या संदर्भात सभापतींनी आज आरोग्य विभागात विचारणा केली. ग्रामीण भागात डासांचा प्रादुर्भाव रोखण्यासाठी ही यंत्रे वापरासाठी काढण्याची शक्यता आहे.

...

आरोग्य विभागाकडे डेंगीच्या अधिकृत रुग्णांची संख्या फक्त १५ नोंदविण्यात आली. त्यातही ग्रामीण भागातील आकडा केवळ तीन आहे. एकीकडे सभापतींच्या पाहणीत एकट्या पैठण तालुक्यात दहा पेशंट आढळून आले. आता ही तफावत कधी दूर होणार, असा प्रश्न आहे.

मोबाइल अॅप डाउनलोड करा आणि राहा अपडेट

‘पोलिओ व्हॅक्सिन’चे कवच लवकरच

November 16, 2015, 12:36 pm

≫ Next: जिल्हा बँकेत ११ लाखांचा दरोडा

≪ Previous: डेंगीची साथ

$

0

0

म. टा. प्रतिनिधी, औरंगाबाद

संपूर्ण राज्यात नोव्हेंबर महिन्याच्या शेवटपर्यंत सर्व सरकारी रुग्णालयांमध्ये; तसेच सर्व शासकीय वैद्यकीय महाविद्यालयांमध्ये पाच गंभीर आजारांपासून संरक्षण देणारी 'पेंटाव्हॅलंट' ही महत्त्वाची लस सर्वत्र उपलब्ध होणार आहे. त्याचवेळी 'पोलिओ ड्रॉप्स'बरोबरच येत्या काही महिन्यांमध्ये 'इन्अॅक्टिव्हेटेड पोलिओ व्हॅक्सिन'ही (आयपीए) सर्वत्र उपलब्ध होणार आहे. खासगी रुग्णालयांमध्ये प्रत्येकी ४०० ते ७०० रुपयांपर्यंत शुल्क आकारण्यात येत असलेले दोन्ही व्हॅक्सिन प्राथमिक आरोग्य केंद्रापासून सर्वत्र मोफत उपलब्ध होणार आहेत.

सद्यस्थितीत 'पेंटाव्हॅलंट' व्हॅक्सिनचा साठा राज्यामध्ये उपलब्ध झाला असून, या संबंधीचे आदेश प्राप्त होताच प्रत्येक प्राथमिक आरोग्य केंद्रापासून ते जिल्हा रुग्णालयापर्यंत सर्वत्र ही लस दिली जाणार आहे. सार्वजनिक आरोग्य विभागाकडून शासकीय वैद्यकीय महाविद्यालय व रुग्णालयांमध्येही ही लस उपलब्ध करून दिली जाणार आहे. शहरातील घाटीमध्येही ही लस उपलब्ध होणार आहे. सूत्रांकडून मिळालेल्या माहितीनुसार; राज्याचे आरोग्यमंत्री डॉ. दीपक सावंत यांच्या उपस्थितीत 'पेंटाव्हॅलंट'च्या उद्घाटनाचा कार्यक्रम होणार असून, त्यानंतर राज्यामध्ये सर्वत्र ही लस उपलब्ध होण्याचे

संकेत आहेत.

आतापर्यंत सर्व शासकीय रुग्णालयांमध्ये 'डीपीटी'ची लस दिली जाते. त्यामुळे घटसर्प (डिप्थेरिया), धनुर्वात (टिटॅनस), डांग्या खोकला (पर्टोसिस) या गंभीर आजारांपासून संरक्षण मिळते. आता 'पेंटाव्हॅलंट'मध्ये या तीन आजारांशिवाय मेंदूज्वर, निमोनिया, कान फुटणे तसेच कावीळ 'ब' या गंभीर आजारांपासून संरक्षण देणाऱ्या 'हिब' व 'हेपटायटिस बी' या लसींचा समावेश आहे. खासगी रुग्णालयांमध्ये 'पेंटाव्हॅलंट' या लसीसाठी ४५० ते ७०० रुपये आकारण्यात येतात. आता ही लस प्रत्येक गाव-खेड्यातील बालकांपर्यंत पोहोचणार आहे. त्याचबरोबर 'इनॅक्टिव्हेटेड पोलिओ व्हॅक्सिन'ही (आयपीव्ही) येत्या काही महिन्यांत सर्वत्र उपलब्ध होणार आहे.

सर्व शासकीय रुग्णालयांमध्ये 'पोलिओ ड्रॉप्स' तोंडावाटे दिल्या जातात. त्याच्या जोडीला १०० टक्के कायमच्या पोलिओ मुक्तीसाठी 'पोलिओ व्हॅक्सिन'ही दिले जाणार आहे. 'पोलिओ व्हॅक्सिन'साठी खासगीत ४०० ते ५०० रुपये शुल्क आकारले जातात. सुदैवाने दोन्ही व्हॅक्सिन शिशुंना जन्मानंतरच्या दीड महिना, अडीच महिने, साडेतीन महिने व १८ महिन्यांच्या कालावधीत देण्यात येतात. त्यामुळे दोन्ही व्हॅक्सिन एकाचवेळी देणेही शक्य होणार आहे.

...

'मिशन इंद्रधनुष्य' या उपक्रमामध्ये लस घेणे राहून गेलेल्या सर्व दोन वर्षापर्यंतच्या बालकांना चार टप्प्यांमध्ये 'बीसीजी', 'पोलिओ ड्रॉप्स', 'व्हिटॅमिन ए' व 'डीपीटी'ची लस दिली जाणार आहे. या उपक्रमामध्ये फेब्रुवारीपर्यंत औरंगाबाद जिल्ह्यातील सर्व बालकांचे १०० टक्के लसीकरण होणार असल्याची माहिती डॉ. खतगावकर यांनी 'मटा'ला दिली.

मोबाइल अॅप डाउनलोड करा आणि राहा अपडेट

जिल्हा बँकेत ११ लाखांचा दरोडा

November 16, 2015, 12:38 pm

≫ Next: नोकरीच्या आमिषाने साडेचार लाखाचा गंडा

≪ Previous: ‘पोलिओ व्हॅक्सिन’चे कवच लवकरच

$

0

0

म. टा. प्रतिनिधी, औरंगाबाद

जिल्हा मध्यवर्ती सहकारी बँकेच्या लासूर स्टेशन शाखेवर धाडसी दरोडा टाकण्यात आल्याचा प्रकार रविवारी रात्री घडला. गॅस कटरचा वापर करीत दरोडेखोरांनी तिजोरीतील ११ लाख रुपये पळविले. विशेष म्हणजे या ठिकाणी सुरक्षिततेची कोणतीही व्यवस्था तैनात करण्यात आली नव्हती.

लासूर स्टेशन येथील बाजार समितीच्या आवारात जिल्हा मध्यवर्ती सहकारी बँकेची शाखा आहे. रविवारी ही शाखा बंद होती. रात्रीच्या सुमारास दरोडेखोरांनी खिडकीचे गज गॅस कटरने कापून आतमध्ये प्रवेश मिळविला. आतमध्ये असलेली तिजोरी देखील गॅस कटरने कापण्यात आली. तिजोरीतील ११ लाख रुपये दरोडेखोरांनी पळविले. सोमवारी सकाळी हा प्रकार उघडकीस आला. रविवारी बाजार समितीमध्ये सुट्टी असल्याने वर्दळ कमी होती. तसेच येथील गेटवर असलेले सुरक्षारक्षक ‌देखील निवांत होते. हा प्रकार कळताच स्थानिक गुन्हेशाखेच्या पथकाने घटनास्थळी धाव घेतली. श्वान पथकाला पाचारण करण्यात आले होते, मात्र दरोडेखोरांचा माग काढण्यात त्यांना अपयश आले. लासूर स्टेशनच्या शाखेत सुरक्षारक्षकच नाही व तेथे सीसीटीव्हीही बसविण्यात आलेले नाहीत.

असुरक्षित बँक लक्ष्य

चोरट्यांनी ज्या बँकांची सुरक्षा व्यवस्था कमकुवत आहे. अशा बँकांना लक्ष्य केले आहे. यापूर्वी कन्नड व वडोदबाजार येथील महाराष्ट्र बँकेच्या शाखा; तसेच वैजापूर येथील जिल्हा मध्यवर्ती सहकारी बँकेची शाखा फोडण्यात आली आहे. याचा तपास अद्याप लागू शकलेला नाही.

मोबाइल अॅप डाउनलोड करा आणि राहा अपडेट

नोकरीच्या आमिषाने साडेचार लाखाचा गंडा

November 16, 2015, 12:39 pm

≫ Next: विद्यार्थिनीची आत्महत्या

≪ Previous: जिल्हा बँकेत ११ लाखांचा दरोडा

$

0

0

म. टा. प्रतिनिधी, औरंगाबाद

विदेशात खाजगी नोकरी लावण्याचे आमिष दाखवित शहरातील नऊ तरुणांना साडेचार लाखाचा गंडा घालण्यात आल्याचा प्रकार उघडकीस आला आहे. या प्रकरणी ग्लोबल कार्पोरेट मॅनेजमेंटच्या पसार संचालकाविरुद्ध आर्थिक गुन्हेशाखेत तक्रार आल्यानंतर उस्मानपुरा पोलिस ठाण्यात गुन्हा दाखल करण्यात आला आहे.

ग्लोबल कार्पोरेट मॅनेजमेंट या कंपनीने सप्टेंबर २०१५ मध्ये एका वर्तमानपत्रात नोकरीची जाहिरात दिली होती. यामध्ये कॅनडा, ऑस्ट्रेलिया, न्यूझीलंड या देशामध्ये स्टोअर मॅनेजर, कॅशीयर, स्टोअर किपर, प्लंबर, वेटर, कारपेंटर आदी पदासाठी कायमस्वरूपी नोकरी उपलब्ध असून एक लाख ते पावणेदोन लाख रुपये पगार देण्याचे आमिष दाखविण्यात आले होते. या जाहिरातीनुसार सय्यद जफर सय्यद इसाक (वय ५०, रा. कटकट गेट) यांनी उस्मानपुरा येथील कंपनीचे कार्यालय गाठले. या ठिकाणी मॅनेजर नेहा पाटील यांच्याशी त्यांची भेट झाली. पाटील यांनी त्यांना नोकरी उपलब्ध असल्याचे सांगत कंपनीच्या नियमाप्रमाणे काही रक्कम भरावी लागणार असल्याचे सांगितले. सय्यद जफर यांचे नातेवाईक ऑस्ट्रेलियामध्ये असल्याने त्यांनी त्यांच्या मुलाला त्या ठिकाणी नोकरी लावायची विनंती केली. पाटील यांनी ही बाब कबुल करीत व्हिसा, विमानाचे तिकीट व मेडिकलसाठी प्रत्येकी ७५ हजार रुपये भरावे लागणार असल्याची माहिती दिली. तसेच सुरुवातीला ५० हजार व व्हिसा मिळाल्यानंतर २५ हजार रुपये भरावे लागणार असल्याचे सांगितले. यावर विश्वास बसल्यामुळे सय्यद जफर यांनी त्यांच्या मुलासहित इतर आठ नातेवाईक असे नऊ जणांचे साडेचार लाख रुपये चेकद्वारे नेहा पाटील यांच्याकडे जमा केले. या प्रकारानंतर नेहा पाटील यांनी कंपनीचे संचालक वृषभ शहा यांच्याशी त्यांची भेट घालून दिली. शहा यानेही नोकरी मिळेल असे आमिष दाखविले.

नोकरीसंदर्भातील कागदपत्रे सय्यद जफर यांनी कार्यालयात जमा केली होती, मात्र ६ नोव्हेंबरपासून या कंपनीच्या कार्यालयाला टाळे ठोकलेले त्यांना आढळून आले. मॅनेजर नेहा पाटील यांची भेट घेतल्यानंतर त्यांनी ५ नोव्हेंबरपासून कंपनीच्या कार्यालयाची चावी वृषभ शहा घेऊन गेले असल्याची म‌ाहिती दिली. शहा यांच्या मोबाइलवर संपर्क साधण्यात आला असता त्यांचे तिनही मोबाइल बंद असल्याचे लक्षात आले. फसवणूक झाल्याचे लक्षात आल्यानंतर सय्यद जफर यांनी आ‌र्थिक गुन्हेशाखेत धाव घेत तक्रार दिली. त्यांच्या तक्रारीवरून पसार वृषभ शहाविरुद्ध उस्मानपुरा पोलिस ठाण्यात फसवणुकीचा गुन्हा दाखल करण्याची प्रक्रिया सोमवारी रात्री उशीरापर्यंत सुरू होती.

मोबाइल अॅप डाउनलोड करा आणि राहा अपडेट

विद्यार्थिनीची आत्महत्या

November 16, 2015, 12:43 pm

≫ Next: आयुक्त महाजन यांना हटवले

≪ Previous: नोकरीच्या आमिषाने साडेचार लाखाचा गंडा

$

0

0

म. टा. प्रतिनिधी, औरंगाबाद

पडेगावात दहावीत शिकणाऱ्या १५ वर्षांच्या मुलीने गळफास घेऊन आत्महत्या केल्याचा प्रकार सोमवारी उघडकीस आला. परिसरातील तरुणाच्या छेडछाडीला कंटाळून मुलीने आत्महत्या केल्याचा आरोप तिच्या पालकांनी केला आहे.

पडेगावातील मस्कट सिटी, पोलिस कॉलनी येथे प्रा. ज्ञानेश्वर गायके यांचे रो-हाउस आहे. गायके हे शिऊर येथील संत बहिणाबाई महाविद्यालयात प्राध्यापक आहेत. ते पत्नी, दोन मुली व एका मुलासोबत राहतात. त्यांची लहान मुलगी ऋतुजा (वय १५) ही औरंगपुरा येथील शिशुविहार प्रशालेत दहाव्या इयत्तेत शिकते. रविवारी रात्री ऋतुजा दुसऱ्या मजल्यावरील तिच्या खोलीमध्ये झोपली होती. सोमवारी सकाळी बारावाजेपर्यंत झोपेतून उठली नसल्याने तिच्या पालकांनी रूमचा दरवाजा ठोठावला असता आतून काही प्रतिसाद मिळाला नाही. त्यांनी खिडकीतून आत डोकावून पाहिले असता तिने फॅनला ओढणीने गळफास घेतल्या दिसून आले. याप्रकरणी छावणी पोलिस ठाण्यात अकस्मात मृत्यूची नोंद करण्यात आली आहे. रात्री उशिरापर्यंत पालकांनी तक्रार दिलेली नव्हती.

वाद

मुलीचे वडील प्रा. गायके यांनी सांगितले की, रविवारी सायंकाळी बिस्किटचा पुडा आणण्यासाठी गेलेल्या ऋतुजाला मी ईश्वर नावाच्या तरुणासोबत पाहिले होते. त्याला जाब विचारल्यानंतर त्याचे कुटुंबीय आमच्या घरी येऊन भांडले. ईश्वर हा नेहमी ऋतुजाचा पाठलाग करीत होता. यापूर्वी देखील त्याच्या घरी जाऊन ऋतुजाच्या आईने त्याला समजावून सांगण्याची विनंती केली होती. महिला तक्रार निवारण केंद्रात देखील एकदा फोनद्वारे ‌ही माहिती दिली होती. छेडछाडीला कंटाळून तिने आत्महत्या केली.

मोबाइल अॅप डाउनलोड करा आणि राहा अपडेट