आयुक्त महाजन यांना हटवले

November 16, 2015, 12:45 pm

म. टा. प्रतिनिधी, औरंगाबाद

अविश्वास प्रस्ताव मंजूर झाल्यामुळे आयुक्त प्रकाश महाजन यांची राज्य सरकारने सोमवारी मंत्रालयातील सामान्य प्रशासन विभागात बदली केली. 'सर्वसाधारण सभेने घेतलेल्या निर्णयानुसार महाजन यांना आयुक्तपदावरून दूर करण्यात येत आहे,' असे बदलीच्या आदेशात म्हटले आहे. अविश्वास मंजूर झाल्यामुळे आयुक्तांची बदली करण्याची ही महापालिकेच्या इतिहासातील पहिलीच वेळ आहे. अतिरिक्त आयुक्त रमेश पवार यांच्याकडे अायुक्तपदाचा अतिरिक्त कार्यभार सोपविण्यात आला आहे. निवृत्ती महिनाभरावर आलेली असताना त्यांची बदली केली आहे.

प्रकाश महाजन यांच्याविरुद्ध २० ऑक्टोबर रोजी झालेल्या सर्वसाधारण सभेत नगरसेवकांनी अविश्वास प्रस्ताव बहुमताने मंजूर केला. प्रस्तावाच्या बाजूने ९५ व विरोधात १३ मते पडली होती. महापालिका अधिनियमानुसार आयुक्तांच्या विरोधातला अविश्वास प्रस्ताव पाच अष्टमांश मतांनी मंजूर झाल्यास शासनाने आयुक्तांना तात्काळ परत बोलवणे बंधनकारक होते, पण सर्वसाधारण सभेत प्रस्ताव मंजूर झाल्यावरही तीन आठवड्यांपेक्षा जास्त काळ शासनाने महाजन यांना आयुक्तपदावर कायम ठेवले. दिवाळीनंतर त्यांना शासनाच्या सेवेत परत बोलवण्यात येणार असल्याचे बोलले जात होते. त्यानुसार आज सायंकाळी पाचच्या सुमारास महाजन यांच्या बदलीचे आदेश त्यांच्या कार्यालयाला प्राप्त झाले. सर्वसाधारण सभेने मंजूर केलेल्या अविश्वास प्रस्तावाचा संदर्भ बदलीच्या आदेशात देण्यात आला आहे. त्यांनी सामान्य प्रशासन विभागात रुजू व्हावे, असे त्या आदेशात स्पष्ट करण्यात आले आहे. पालिकेचे अतिरिक्त आयुक्त रमेश पवार यांच्याकडे पुढील आदेशापर्यंत आयुक्तपदाचा अतिरिक्त कार्यभार देण्यात येत असल्याचेही आदेशात नमूद करण्यात आले.

महाजन यांच्या बदलीचे आदेश प्राप्त झाल्यानंतर सभागृहनेते जंजाळ यांनी पालिकेच्या आवारात फटाके फोडून व पेढे वाटून आनंद व्यक्त केला. महाजन ९ सप्टेबर २०१४ रोजी आयुक्त म्हणून रुजू झाले होते. रमेश पवार यांनी १ सप्टेबर २०१४ रोजी अतिरिक्त आयुक्त म्हणून पदभार स्वीकारला होता. महाजन यांच्या विरोधात सर्वात प्रथम 'एमआयएम'च्या नगरसेवकांनी अविश्वास प्रस्ताव महापौर त्र्यंबक तुपे यांच्याकडे दाखल केला होता. वि‌िवध तक्रारींचा पाढा महाजन यांच्या विरोधात वाचला जाऊ लागला. त्यातच भाजपच्या पालिकेतील पदाधिकाऱ्यांनी महाजन यांच्या विरोधात आघाडी उघडली व त्यांच्या विरोधात अविश्वास प्रस्ताव आणण्याची घोषणा केली. दरम्यानच्या काळात पालकमंत्री रामदास कदम यांनीही अविश्वास प्रस्तावात विशेष लक्ष घातले. अविश्वास प्रस्तावाला खासदार चंद्रकांत खैरे यांनी विरोध केला. तो मोडून काढण्यासाठी कदम यांनी थेट शिवसेनेचे पक्षप्रमुख उद्धव ठाकरे यांच्या उपस्थितीत 'मातोश्री'वर पालिकेतील शिवसेना पदाधिकाऱ्यांची बैठक घेतली व महाजन यांच्या विरोधात अविश्वास प्रस्ताव आणण्यासाठी ठाकरे यांच्याकडूनच आदेश घेतले. त्यानंतर महाजन यांच्या विराेधात अविश्वास प्रस्ताव मंजूर झाला.

भाजपने मांडला अविश्वास प्रस्ताव

पालकमंत्र्यांकडून प्रस्तावाची पाठराखण

उद्धव ठाकरेच्या उपस्थितीत शिवसेनेची बैठक

अविश्वास प्रस्तावाला साथ देण्याचा ठाकरेंचा आदेश

अविश्वास प्रस्तावासाठी 'एमआयएम'चीही साथ

Latest Images