Ravindra.Taksal@timesgroup.com
शहर व परिसरात गेल्या काही दिवसात लागोपाठ झालेल्या अपघातांमुळे सुरक्षित वाहतुकीचा प्रश्न ऐरणीवर आला आहे. बेशिस्त वाहतुकीला शिस्त लागावी, यासाठी पोलिसांनी कारवाईचे सत्र हाती घेत गेल्या दहा महिन्यांत दोन कोटी रुपयांचा दंड वसूल केला. वाहतुकीस अडथळा ठरणारी अतिक्रमणे, अडथळे दूर करण्यासाठी पोलिस आयुक्तांनी प्रयत्न केले. मात्र, बेशिस्त वाहतुकीला पूर्णतः लगाम लावता आला नाही. त्यात वाहनचालकांच्या चुकीबरोबरच सिग्नल बंद, दुभाजक नसणे, खड्डेमय रस्ते आदी कारणांमुळेही अपघातास निमंत्रण मिळत आहे.
हे टाळण्यासाठी आवश्यकता आहे ती सर्व संबंधित विभागाने समन्वयाने काम करण्याची.
वा ढते अपघात हा चिंतेचा विषय बनला आहे. अपघाताची कोणतीही घटना घडताच बघ्यांची गर्दी होते. त्यातून कधी-कधी माणूसकी जपणाऱ्यांकडून मदतीसाठी धावपळ केली जाते. हा रस्ता मृत्युचा सापळा बनला आहे, तो रस्ता मृत्यूचा सापळा बनला आहे, अशी चर्चाही करत झालेल्या घटनेबाबत हळहळ व्यक्त केली जाते.
त्या घटनेसंदर्भात पोलिसी कारवाई केली जाते आणि काही दिवसांनी ती घटनाही लोक विसरून जातात. पुन्हा त्याच रस्त्यावर अपघाताची दुसऱ्या घटनेची भर पडते. दिवसेंदिवस अपघाताचे प्रमाण वाढत असतानाही या प्रश्नाकडे मात्र, फारसे गांभीर्याने पाहिले जात नसल्याचे वास्तव आहे आणि ते नाकारता येत नाही.
हा प्रश्न केवळ एकट्या औरंगाबाद शहराचा वा जिल्ह्याचा नाही तर हा सार्वत्रिक झाला आहे. वर्षाकाठी हजारो जणांचे बळी रोड अपघातामुळे जातात. अनेकांचे घर त्यामुळे उद‍्ध्वस्त होते. मनाचा ब्रेक, उत्तम ब्रेक यासह अन्य घोषवाक्य केवळ फलकावरच राहतात. अपघाताचे प्रमाण कमी करण्यासाठी त्या तुलनेत फारसे काम, प्रयत्न होताना दिसत नाही.
शहर व परिसरात अपघाताची घटना ही नित्यांची बाब झाली आहे. एकट्या जालना रोडवर गेल्या महिन्याभरात झालेल्या अपघातात तीन जणांना आपले प्राण गमवावे लागले आहे. यात मित्रासोबत जात असतानाच दुचाकीवरून पडल्याने समीर सुधीर पेडगावकर या १६ वर्षीय तरुणाचा काही दिवसांपूर्वी दुर्देवी मृत्यू झाला. तर दोन दिवसांपूर्वीच बीड बायपास रोडवर भरधाव ट्रकच्या धडकेत सामाजिक कार्यकर्त्या मंदा संजय वालतुरे यांचा मृत्यू झाला. जळगाव रोडवर अज्ञात वाहनाच्या धडकेत दुचाकीस्वार सय्यद नवाब सय्यद मुसा हे मरण पावले. अपघातात जखमी होणाऱ्याची संख्याही मोठ्या प्रमाणात आहे. अर्थात, आकडेवारीपेक्षा यापुढे रोड अपघातात होणार नाही, कोणाचाही जीव जाणार नाही, याकडे अत्यंत गांभीर्याने पाहणे व तशा उपाययोजना करणे आवश्यक आहे.
वाहन चालविण्याचा परवाना देताना आरटीओकडून वाहनधारकांची परीक्षा घेण्यात येते. नियमाची माहिती करून दिली जाते, पण खरंच प्रत्यक्षात परवाना मिळविल्यानंतर बहुतांश वाहनधारक त्याचे पालन करतात का? हा प्रश्नच आहे. पोलिस आयुक्त अमितेश कुमार व वाहतूक विभागाने बेशिस्त वाहुतकीला लगाम लावण्यासाठी प्रयत्न केलेत. जड वाहनांना शहरात प्रवेशा संदर्भात निर्बंध घालण्यात आले. वाहतुकीस अडथळा करणारे अतिक्रमण दूर करत अनेक रस्त्यांचा, चौकांचा श्वास मोकळा झाला, हे खरे असले तरी सुरक्षित वाहतूक व्यवस्थेसाठी आवश्यक परिस्थिती अनेक कारणामुळे होऊ शकलेली नाही.
बेफाम वेगाने गाड्या चालविणे, नियम न पाळणे, अवैध प्रवासी वाहतूक, दारू पिउन गाडी चालविणे, वाहन सुस्थितीत नसणे, चुकीच्या पद्धतीने ओव्हरटेक करणे यासह बहुतांश मानवी चुकामुळे अपघात जास्त प्रमाणात होतात, पण त्याचबरोबर खराब रस्ते, अरुंद रस्ते, सुरक्षित वाहतुकीसाठी आवश्यक त्या सुविधा नसणे, याबाबींही महत्वाच्या आहेत. ही जबाबदारी संबंधित स्थानिक स्वराज्य संस्थेची असते.
शहरातील अनेक सिग्नल आज बंद अवस्थेत आहेत. रुंदीकरणानंतरही अनेक ठिकाणचे विद्युत खांब काढण्यात आलेले नाही. पार्किंगची सुविधा अपुरी असल्याने रस्त्यावर वाहने उभे केली जातात तर अनेक ठिकाणी दुभाजक नसल्याने बेशिस्त वाहतुकीला नकळत प्रोत्साहन दिल्यासारखे होत आहे. केवळ पोलिसांना दोष देऊन चालणार नाही. यासाठी रस्ते व वाहतुकीशी संबधित असलेल्या विविध यंत्रणा यात आरटीओ, सार्वजनिक बांधकाम खाते, महापालिका यांच्यात समन्वय असणे गरजेचे आहे. प्रत्येक विभागाने आपली जबाबदारी नीट पार पडल्यास काही अंशी का असेना हा प्रश्न तडीस लावण्यात निश्चित मदत मिळू शकते.
सुदैवाने शहर पोलिस आयुक्तालयाच्या प्रमुखपदी अमितेश कुमार तर महापालिका आयुक्तपदी सुनील केंद्रेकर यांच्या रुपाने कर्तव्यदक्ष अधिकारी लाभले आहेत. कणखर नेतृत्व मिळाल्यास ती यंत्रणा कोणती करामत करू शकते, याचा प्रत्यय या दोन्ही अधिकाऱ्यांच्या कार्यशैलीमुळे औरंगाबादकरांनी अनुभला आहे. त्यामुळे सुरक्षित वाहतुकीस आवश्यक असणाऱ्या सुविधांचे प्रश्न सुटण्यास मदत होईल, अशी आशा करण्यास हरकत नाही.
मोबाइल अॅप डाउनलोड करा आणि राहा अपडेट
