व्यावसायिकांचा विरोध, राजकारण्यांचा दबाव झुगारून सिडकोतील उच्चभ्रू कॅनॉट प्लेस मार्केटमधील ५० दुकाने, व्हीआयपी हॉटलांचे अतिक्रमण महापालिकेच्या पथकाने गुरुवारी काढले. या कारवाईनंतर खऱ्या अर्थाने कॅनॉट प्लेसने मोकळा श्वास घेतला.
कॅनॉट प्लेसच्या मार्केटमध्ये सिडको प्रशासनाने व्यावसायिकांना दुकाने विकली आहेत. मूळ दुकानांचे क्षेत्रफळ तुलनेने कमी आहे, दुकानासमोरचा परिसर खुला ठेवण्यात आला आहे. मार्केटमध्ये खरेदीसाठी येणाऱ्यांना तेथे फिरता यावे, खरेदी करता यावी हा त्यामागचा उद्देश होता. मात्र, बहुतेक व्यावसायिकांनी दुकानांच्या समोरचा खुला परिसर गिळंकृत केला होता, त्यामुळे मार्केटमध्ये येणाऱ्या व्यक्तींना मार्केटमधील मुख्य रस्त्यांवरून फिरावे लागत होते. बहुतेक व्यावसायिकांनी आपल्या मूळ दुकानांच्या पुढच्या भागात शेड उभारून दुकानाचे क्षेत्रफळ वाढवले होते. त्या संदर्भात अनेक वेळा महापालिकेकडे तक्रारी झाल्या, पण जुजबी कारवाई करण्यापलीकडे महापालिकेने काहीच
केले नाही.
सुनील केंद्रेकर यांच्याकडे महापालिका आयुक्तपदाची सूत्रे आल्यावर गुरुवारी या भागात धडक कारवाई करण्यात आली. कारवाईचे नेतृत्व उपायुक्त रवींद्र निकम यांनी केले. दोन जेसीबी, मोठा कर्मचारी वर्ग व पोलिसांच्या ताफ्यासह पालिकेचे पथक कॅनॉट परिसरात दाखल झाले. दुकानांच्या समोरचे फूटपाथ महापालिकेच्या पथकाने रिकामे केले. या कारवाईदरम्यान वाय झेड फोर्ड कंपनीच्या शोरुमचे कार्यालय पाडण्यात आले. हे कार्यालय फूटपाथवर थाटण्यात आले होते. याशिवाय व्हीआयपी मराठा हॉटेल, मराठा हॉटेल, शिवा हॉटेलचे अतिरिक्त बांधकाम पाडण्यात आले. हे बांधकाम पाडताना काही राजकीय व्यक्तींनी दबाव आणण्याचा प्रयत्न केला, पण या दबावाला पालिकेच्या पथकाने जुमानले नाही.
चायनीज खाद्यपदार्थ तयार करून त्याची विक्री करणाऱ्या हॉटेल्सची अतिरिक्त बांधकामे देखील पाडण्यात आली. सुमारे पन्नास हॉटेल्स व दुकानांवर कारवाई करण्यात आल्याचे पालिकेतर्फे सांगण्यात आले. पालिकेने प्रसिद्धीस दिलेल्या निवेदनात म्हटले आहे की, या कारवाईत टीन शेड, पत्र्यांचे कंपाउंड वॉल, दुकानांचे ओटे, खुर्च्या, स्टँड, कुलर, डिजिटल बोर्ड, कमान आदींवर कारवाई करण्यात आली व ते हटवण्यात आले.
सिडकोला पत्र देण्याचे आदेश
कॅनॉट प्लेस ही सिडकोची मालमत्ता आहे. सिडको प्रशासनाने काही दुकाने मालकी हक्कावर तर, काही दुकाने लीजवर विकली आहेत. मालमत्तांवर सिडकोचाच ताबा आहे. सिडकोच्या मालमत्तेचा व्यावसायिकांनी गैरवापर केला आहे, त्यामुळे त्यांच्यावर कारवाई करा, असे पत्र सिडको प्रशासनाला द्या, अशी सूचना आयुक्त सुनील केंद्रेकर यांनी उपायुक्त रवींद्र निकम यांना केली आहे. निकम यांनी पत्र दिल्यावर जागेच्या गैरवापराबद्दल सिडको प्रशासन व्यावसायिकांवर कायदेशीर कारवाई करेल.
मोबाइल अॅप डाउनलोड करा आणि राहा अपडेट
