डॉ. बाबासाहेब आंबेडकर मराठवाडा विद्यापीठाचा २०१५-१६चा अर्थसंकल्प तयार करण्याची प्रक्रिया सुरू झाली. विद्यापीठ विभागांना यापुढे त्यांच्या कामगिरीवर बजेटमध्ये वाटा मिळणार आहे. गेल्या आर्थिक वर्षातील खर्चाचा हिशेबही घेतला जाणार आहे. शनिवारी झालेल्या सिनेटच्या बैठकीत या विषयावर चर्चा झाली. १० डिसेंबरपासून ही प्रक्रिया होणार आहे.
विद्यापीठाच्या अधिसभेची बैठक आज झाली. बैठकीत प्रामुख्याने विद्यापीठाच्या अर्थसंकल्पावर चर्चा झाली. विभागांना शैक्षणिक खर्च, शैक्षणिक साहित्य खरेदी यासाठी निधी दिला जातो. विद्यापीठाच्या अर्थसंकल्पात काही विभागांना अधिक तर, काहींना कमी वाटा मिळतो. त्यामुळे आता अर्थसंकल्प तयार करताना विभागांच्या कामगिरीचा आढावाही घेतला जाणार आहे. विभागांमधील शिक्षण, संशोधनाची स्थिती, रिसर्च प्रोजेक्ट अशा बाबींचा विचार करण्यात येणार आहे. चांगली कामगिरी असलेल्या विभागांना निधीमध्ये जास्त वाटा मिळणार आहे. दिलेल्या निधीचा वापर कसा केला गेला, याचाही आढावा घेतला जाणार आहे. १० डिसेंबरपासून गेल्या वर्षाच्या खर्चाचा आढावा घेतला जाणार आहे. हा आढावा विभागवार घेतला जाणार आहे. विभागांच्या विकासासाठी अर्थसंकल्पात अधिक वाटा मिळावा, यासाठी विभागांमध्ये स्पर्धा होणार आहे. बैठकीत भारतरत्न डॉ.बाबासाहेब आंबेडकर यांच्या नावाने आंतरराष्ट्रीय स्तरावरचा पुरस्कार देण्यास मान्यता, एनसीसीला एैच्छिक विषय म्हणून मान्यता देणे हे विषय मंजूर झाले.
प्राध्यापक, कर्मचाऱ्यांचेही घेणार मत
विद्यापीठाच्या अधिकार मंडळावर सध्या केवळ प्रशासकीय कर्मचारीच आहेत. येऊ घातलेल्या विद्यापीठ कायद्यानुसार नवीन अधिकार मंडळे अस्तित्वात येतील. त्यावेळेस ही संख्या वाढेल. अर्थसंकल्पात विभागांमधील प्राध्यापक आणि कर्मचारी यांचेही मत विचारात घेतले जाणार असल्याचे संकेत प्रशासनाने दिले आहेत.
बैठकीत अर्थसंकल्पाबाबत चर्चा झाली. विभागांची कामगिरी लक्षात घेत, दिलेल्या निधीचा आढावा घेऊन विभागांना बजेटमध्ये वाटा दिला जाईल. काटकसरीसह नवीन सूचनांबाबत त्यांची मतेही जाणून घेतले जातील.
- डॉ. बी. ए. चोपडे, कुलगुरू, डॉ. बाबासाहेब आंबेडकर मराठवाडा विद्यापीठ.
मोबाइल अॅप डाउनलोड करा आणि राहा अपडेट
