Maharashtra Times

म. टा. प्रतिनिधी, औरंगाबाद

कृषी उत्पन्न बाजार समितीत गेल्या तीन दिवसांपासून पालेभाज्यांची आवक एकदम वाढल्याने दर घसरले आहेत. अवघ्या १० रुपयांना ४ जुड्या मिळत आहेत. पालकच्या १० ते १४ हजार, मेथीच्या ८ ते १२ हजार आणि कोथिंबिरीच्या सुमारे १० ते १५ हजाराहून अधिक जुड्या रोज बाजारात येत आहेत.

बाजार समितीत गेल्या आठवडयापर्यंत भाजीपाल्याची आवक मुबलक होती. मात्र या दोन दिवसांत अचानक पालेभाज्यांची आवक वाढली आहे. सुमारे ८ ते १० हजार जुड्यांची आवक एकदम १४ ते १८ हजार जुड्यांवर ठेपलीय. या वाढलेल्या आवकीमुळे ५ ते १० रुपयांना असलेल्या जुडीचा दर आता एकदम घसरला आहे. दिवाळी विशेषत: कार्तिकी एकादशीनंतर पालकवर्गीय भाज्यांची आवक वाढते. वातावरणातील गारवा आणि मुबलक भाज्यांसाठी हा काळ पूरक आहे. औरंगाबाद जिल्हा, गंगापूर, नगर, नाशिक आणि जालना परिसरातून पालेभाज्यांची आवक होत आहे. तर 'नाशिकहून आलेली आवक जेव्हा-जेव्हा वाढते तेव्हा-तेव्हा दर घसरतो,' असे औरंगाबाद बाजार समितीतील होलसेल व्यापारी प्रभाकर पवार यांनी सांगितले.

शशिकांत खोबरे या औरंगपुऱ्यामधील भाजीविक्रेत्यांच्या म्हणण्यानुसार 'एकदम आवक वाढणे ही शेतकऱ्यांच्या मुळाशी येते. कारण उत्पादन घेण्यासाठी आलेला खर्च हा मोठा असतो व किरकोळ दरात उत्पादन विकणे म्हणजे तोटा सहन करणे आहे.' पळशीचे शेतकरी महंमद शेख म्हणाले, 'भाजीपाल्याचे उत्पादन फार-फार तर दोन दिवस घरात ठेवणे परवडते, पण पालकवर्गीय भाज्या लगेच विकाव्या लागतात. त्यांची साठवणूक करून ठेवणे परवडत नाही. यामुळे जो भाव येईल तो भाव घेऊन या भाज्या विकाव्याच लागतात. धान्याचे उत्पादन आणि भाज्यांचे उत्पादन घेण्यात हाच फरक आहे. कृषी उत्पन्न बाजार समितीत सुमारे ३०० रुपये शेकडा या नुसार होलसेल दर या पालकवर्गीय भाज्यांना मिळत आहे.'

आवक वाढल्यामुळे शेतकऱ्यांचे नुकसान होते. मेथी, पालक आणि कोथिंबिरीचे बी सुमारे १२० ते १४० रुपये किलो दराने घ्यावे लागते. आम्हाला त्यावर खत, बी-बियाणे आणि फवारणी याचाही खर्च येतो. हा खर्च पाहिला तर एका जुडीमागे सुमारे ६० पैसे ते ८० पैसे नुकसान सहन करावे लागते. शेतकरी हजारो जुडया तयार करतो. यामुळे हे नुकसान सहन न होणारे आहे. - कल्याणराव मोरे, मालपिंप्री

Latest Images