Maharashtra Times

Nikhil.Nirkhee@timesgroup.com

औरंगाबाद सोडून पुण्यामध्ये नामांकित महाविद्यालयात कनिष्ठ महाविद्यालयीन शिक्षण घेतले तर, अगदी नियोजनपूर्वक मुंबईतील मोठ्या संस्थेमध्ये 'इलेक्ट्रॉनिक्स'मध्ये अभियांत्रिकी शिक्षणासाठी प्रवेश मिळविला. याच विषयात ऑस्ट्रेलियामध्ये 'एमएस' करण्याचा निर्णय घेतला आणि मोठ्या धाडसाने एकटीने परदेशात राहून नामांकित विद्यापीठात पदव्युत्तर शिक्षण घेतले आणि संशोधन हाच आपला पिंड असल्याचे ओळखून संशोधनात करिअर करण्याचा निर्णय घेतला. 'इलेक्ट्रॉनिक्स'मध्ये 'रिसर्च असिस्टंट' म्हणून काम करीत असतानाच पीएचडीच्या आणि उभे आयुष्य संशोधनाच्या वाटेवर आहे औरंगाबादची श्रुती निरंतर.

निरंतर कुटुंबीय हे मूळचे मालेगावचे. श्रुतीचे वडील अनिल निरंतर हे महाराष्ट्र कृषी उद्योग विकास महामंडळाच्या सेवेमध्ये होते आणि त्यांची बदली १९८२च्या सुमारास औरंगाबादला झाली. तेव्हापासून जवळजवळ दोन दशके निरंतर कुटुंबीय औरंगाबाद शहरात होते. याच शहरामध्ये तद्दन कनिष्ठ मध्यमवर्गीय कुटुंबातील श्रुती घडत गेली. रवींद्र शाळेत; तसेच शारदा मंदिर कन्या प्रशालेत तिचे दहावीपर्यंत शिक्षण झाले. पहिल्यापासूनच श्रुती सर्व क्षेत्रांमध्ये चुणचुणीत होती. अभ्यासात हुशार होती आणि मुख्य म्हणजे अभ्यासाची तिला आवडही होती. गणित-विज्ञानाबरोबरच नाटक-नृत्य-खेळामध्येही चांगलीच गती होती. सर्वच क्षेत्रात तिची मुक्त मुशाफिरी सुरू असली, तरी तिने कधीही ८० टक्क्यांपेक्षा कमी गुण मिळविले नाहीत. पहिल्यापासून तिने 'सायन्स'मध्ये करिअर करण्याचे जवळजवळ निश्चित केले होते आणि आपले शहर सोडून बाहेर शिकण्याची आणि सर्वांगीण अनुभव घेण्याची तिची जबरदस्त इच्छा होती. त्यामुळेच दहावीमध्ये ९१ टक्के पटकावून पुण्याच्या मॉडेल कॉलेमध्ये विज्ञान शाखेला प्रवेश घेतला. कुटुंब औरंगाबादला; पण तिने एकटीने वसतिगृहात राहून बारावीमध्येही ८५ टक्के मिळविले. पुन्हा अगदी नियोजनपूर्वक आणि अजून मोठ्या शहरात आणि मोठ्या संस्थेमध्ये शिक्षण घेण्याचा निर्णय घेतला आणि योगायोगाने बांद्राच्या थॉडेमल शहानी इंजिनीअरिंग कॉलेजमध्ये तिला प्रवेश मिळाला. तिच्या आवडीच्या इलेक्ट्रॉनिक्स विषयामध्ये अभियांत्रिकी शिक्षणाची तिची इच्छा पूर्ण झाली. केवळ अभियांत्रिकी शिक्षणापर्यंतच मर्यादित न राहता पुढे शिकण्याची इच्छा निर्माण झाली आणि अर्थातच त्यासाठीचे नियोजनही सुरू केले. सर्व विचाराअंती तिने ऑस्ट्रेलिसामध्ये 'इलेक्ट्रॉनिक्स' विषयामध्ये 'एमएस' करण्याचा निर्णय घेतला आणि शैक्षणिक कर्ज घेऊन मेलबर्नच्या आरएमआयटी विद्यापीठात प्रवेश मिळविला. कुटुंबापैकी कोणालाही सोबत न नेता तिने स्वतः ऑस्ट्रेलिया गाठले आणि मोठ्या हिमतीने एकटी राहून यशस्वीपणे व चांगल्या ग्रेडसह 'एमएस' पूर्ण केले. 'एमएस' करतानाच या विषयामध्ये संशोधन करण्याची तीव्र इच्छाशक्ती तिच्यामध्ये निर्माण झाली आणि संशोधन हाच आपला पिंड आणि करिअर असल्याचे तिचे मनोमन ओळखले. याच ध्यासातून तिने 'रिसर्च असिस्टंट' म्हणून काम करण्याची अनेक विद्यार्थ्यांमधून संधी मिळविली. आता तिने पीएचडीचा ध्यास घेतला असून, संधोधनामध्येच करीअर करण्याचा निर्णय घेतला आहे. सद्यस्थितीत दोन भारतीय तज्ज्ञ तिचे ऑस्ट्रेलियातील गाइड आहेत. लवकरच तिला विद्यापीठाची शिष्यवृत्ती मिळण्याची चिन्हे आहे. आयुष्यभर संशोधन करण्याचा मानस तिने व्यक्त केला आहे. औरंगाबादमधून संशोधनासाठी ऑस्ट्रेलियात गेलेली ती कदाचित एकमेव विद्यार्थिनी असावी.

Latest Images