पोलिसांची भीती दाखवत तरुणीकडून खंडणी उकळली

December 16, 2015, 12:25 pm

म. टा. प्रतिनिधी, औरंगाबाद

प्रियकराला अश्लिल फोटो पाठवणे एका तरुणीला चांगलेच महागात पडले आहे. तिच्या प्रियकराला खुनाच्या गुन्ह्याखाली अटक झाली असून पोलिस तिची चौकशी करणार असल्याची भिती तिला दाखविण्यात आली. या गुन्ह्यातून वाचण्यासाठी तिच्याकडून ४० हजार रुपयांची खंडणी तिघांनी उकळली. या तरुणीने हर्सूल पोलिस ठाण्यात तक्रार दिल्यानंतर या तिघांविरुद्ध पोलिस ठाण्यात गुन्हा दाखल करण्यात आला आहे.

मयूरपार्क परिसरातील २४ वर्षांच्या तरुणीसोबत हा प्रकार घडला. ती एका कंपनीत कामाला असून जालना रोडवरील एका महाविद्यालयात तिचे बारावीपर्यंतचे शिक्षण झाले आहे. या ‌ठिकाणी ‌अजित जाधव (रा. एन २, कामगार चौक) याच्यासोबत तिचा परिचय झाला होता. २०१४ साली अजितने फेसबुकवर तिच्याशी संपर्क साधला. यानंतर फेसबुक व वॉटसअपच्या माध्यमातून त्यांचा संपर्क वाढला. अजितने तिला आपण पुण्याला मॉलमध्ये कामाला असल्याची थाप मारली होती. आपली परिस्थिती खराब असल्याचे सांगत त्याने तिच्याकडून यापूर्वी १६ हजार रुपये उकळले आहेत. ओळखीचे रुपांतर प्रेमात झाल्याने अजितने तिला तिचे अश्लिल फोटो वॉटसअपवर टाकण्याची गळ घातली होती. या तरुणीने ही मागणीही पूर्ण केली. १० डिसेंबर रोजी तिच्या मोबाइलवर एका अनोळखी मोबाइलधारकाचा कॉल आला होता. त्याने अजित जाधव हा खुनाच्या केसमध्ये अडकला असून ज्या ज्या लोकांनी त्याला मेसेज, फोन केले आहे. त्यांची पोलिस चौकशी करणार आहेत. यामध्ये तिचा क्रमांक प्रथम असल्याची थाप मारली. तसेच या प्रकरणातून वाचवायचे असल्यास ४० हजार रुपयांच्या खंडणीची मागणी केली. या प्रकाराने ही तरुणी गोंधळून गेली. समोरील तरुणाने दिलेल्या गणेश उत्तरेश्वर पाठक याच्या जालना रोडवरील एसबीआय बँकेच्या शाखेमधील बँक खात्यामध्ये तिने ही रक्कम जमा केली. दरम्यान, दोन-तीन दिवस उलटल्यानंतर आपली अजित जाधव व त्याच्या मित्रांनी फसवणूक केल्याचे तिच्या लक्षात आले. मंगळवारी तिने हर्सूल पोलिस ठाण्यात दुपारी या प्रकरणी तक्रार दाखल केली. त्यावरून आरोपी अजित जाधव, वकील वाघ व एका अनोळखी व्यक्तीविरुद्ध खंडणीचा गुन्हा दाखल करण्यात आला आहे.

Latest Images