टीम मटा, औरंगाबाद
मराठवाड्यात सर्वत्र नॅशनल हेरल्ड प्रकरणी निर्दशने करण्यात आली. या आंदोलनाच्या निमित्ताने सर्वत्र काँग्रेस कार्यकर्ते रस्त्यावर उतरल्याचे चित्र पाहवयास मिळाले. यावेळी पंतप्रधान नरेंद्र मोदी यांच्या नेतृत्वाखालील भाजप सरकारविरोधात घोषणाबाजी करण्यात आली.
औरंगाबादमध्ये निदर्शने
औरंगाबाद: बहुचर्चित हेरॉल्डप्रकरणी काँग्रेसला बदनाम करण्याचे षडयंत्र रचल्याच्या आरोपावरून शहर काँग्रेसच्यावतीने शनिवारी जोरदार निदर्शने करण्यात आली. गांधीपुतळा येथे शनिवारी दुपारी जिल्हाध्यक्ष केशवराव औताडे, आमदार अब्दुल सत्तार, शहराध्यक्ष अॅड. सय्यद अक्रम, माजी आमदार डॉ. कल्याण काळे, जिल्हा परिषद अध्यक्ष श्रीराम महाजन, विलास औताडे, भाऊसाहेब जगताप, विनोद तांबे, मनोज पाटील, हमद चाऊस, राजेंद्र दाते, अनिल सोनवणे, जगन्नाथ काळे, लियाकत पठाण, सुदाम सोनवणे, खालेद पठाण, सरोज मसलगे आदींसह कार्यकर्ते, पदाधिकारी मोठ्या संख्येने उपस्थित होते. निदर्शनापूर्वी गांधीभवनात बैठक आयोजित करण्यात आली होती. आमदार सत्तार म्हणाले, 'देशातील जनतेला मूर्ख बनविण्याचा डाव आता जास्त दिवस चालणार नाही. भाजपला देशातील जनता योग्य जागा दाखवून देईल.' कल्याण काळे म्हणाले, 'स्वातंत्र्य लढ्यात काँग्रेसचा सहभाग सक्रिय होता, हे विसरून चालणार नाही.'
कन्नडमध्ये आंदोलन
कन्नड : शहरातील बाळासाहेब पवार चौकात कन्नड तालुका काँग्रेसच्यावतीने नॅशनल हेरल्ड प्रकरणी माजी आमदार नितीन पाटील यांच्या नेतृत्वाखाली शनिवारी भाजप सरकार विरोधात जोरदार घोषणा देण्यात आल्या. यावेळी तालुकाधध्यक्ष बाबासाहेब मोहिते, नगराध्यक्ष संतोष कोल्हे, भाऊसाहेब थोरात, अब्दुल जावेद, राजकुमार गंगवाल, चंद्रकांत देशमुख, नासेर शेख, उपस्थित होते.
उस्मानाबादमध्ये घोषणाबाजी
उस्मानाबाद : भाजप सरकारकडून काँग्रेसच्या राष्ट्रीय अध्यक्षा सोनिया गांधी व राहूल गांधी यांच्यावर नॅशनल हेरल्ड प्रकरणी गुन्हे दाखल करण्यात आली आहेत. या विरोधात उस्मानाबाद जिल्हा काँग्रेस कमेटीच्यावतीने निदर्शने करण्यात आली. यामध्ये जिल्ह्यातील काँग्रेसचे पदाधिकारी व कार्यकर्ते मोठ्या संख्येने सहभागी झाले होते.
वैजापूरमध्ये निषेध
वैजापूर : नॅशनल हेरॉल्डप्रकरणी राष्ट्रीय काँग्रेसच्या अध्यक्षा सोनिया गांधी व राहूल गांधी यांच्यावर गुन्हे दाखल केल्याचा निषेध करण्यासाठी तालुका काँग्रेसतर्फे शनिवारी आंबेडकर चौकात निदर्शने करण्यात आली. या आंदोलनाचे नेतृत्व युवक काँग्रेसचे तालुकाध्यक्ष उमेश नाईकवाडी यांनी केले. यावेळी माजी नगराध्यक्ष बाळासाहेब संचेती,कॉग्रेसचे जिल्हा उपाध्यक्ष सुभाष तांबे, तालुकाध्यक्ष प्रशांत पाटील सदाफळ, शेख सलिम, सारंगधर डिके, प्रमोद नांगरे, ईद्रिस खान, बाळा सुतवणे, ज्ञानेश्वर घोडके, प्रविण तांबे आंदोलनात सहभागी झाले होते.
जालन्यात आंदोलन
जालना : नॅशनल हेरल्ड प्रकरणी जालना शहरात निर्दशने करण्यात आली. या आंदोलनाच्या निमित्ताने जालन्यातील काँग्रेस कार्यकर्ते रस्त्यावर उतरले होते. यावेळी काँग्रेसच्या कार्यकर्त्यांनी व पदाधिकाऱ्यांनी पंतप्रधान नरेंद्र मोदी यांच्या नेतृत्वाखालील भाजप सरकारविरोधात घोषणाबाजी केली.
काँग्रेसची निदर्शने
लातूर : काँग्रेस कार्यकर्त्यांनी लातूरात दोन ठिकाणी निदर्शने केली. माजी आमदार वैजनाथ शिंदे, जिल्हा काँग्रेसचे अध्यक्ष अॅड. व्यंकट बेद्रे, तालुका अध्यक्ष दगडुसाहेब पडीले यांच्या उपस्थितीत काँग्रेसच्या कार्यकर्त्यांनी निदर्शने केली. युवक काँग्रेसच्या कार्यकर्त्यांनी महापालिकेच्या परिवहन समितीचे सभापती विक्रांत गोजमगुंडे यांच्या नेतृत्वाखाली निदर्शने केली. रघुनाथ मदने, सुरज वाजे, जावेद मणियार, विजय पारीख, रहेमान शेख, पप्पु देशमुख, अॅड. समद पटेल आदी सहभागी झाले होते.
नांदेडमध्ये जत्रेचे स्वरूप
नांदेड : संपत्तीच्या विवादाची बंद पडलेली फाइल पुन्हा उघडून काँग्रेसच्या राष्ट्रीय नेत्यांना बदनाम करण्यासाठी मोदी सरकारने सुरू केलेल्या सूड सत्राच्या विरोधात शनिवारी काँग्रेसचे हजारो कार्यकर्ते रस्त्यावर उतरले. त्यामुळे जिल्हाधिकारी कार्यालयासमोर जत्रेचे स्वरुप आले होते. तब्बल चार तास संपूर्ण वाहतूक बंद पडली होती. काँग्रेसचे प्रदेशाध्यक्ष खासदार अशोक चव्हाण यांच्या सूचनेनुसार धरणे आंदोलन करण्यात आले. यावेळी धरणे आंदोलनाचे नेतृत्व आमदार अमिता चव्हाण, वसंतराव चव्हाण, अमरनाथ राजूरकर, जिल्हाध्यक्ष बी. आर. कदम यांनी केले. यावेळी अब्दुल सत्तार, शफी अहेमद कुरेशी, मंगला निमकर यांची भाषणे झाली. या धरणे आंदोलनास महापौर शैलजा स्वामी, जिल्हा परिषद अध्यक्षा मंगला गुंडले, माधवराव पाटील-जवळगावकर आदी उपस्थित होते.
मोबाइल अॅप डाउनलोड करा आणि राहा अपडेट
