म. टा. प्रतिनिधी, औरंगाबाद
संघशाखेच्या माध्यमातून राष्ट्रभक्ती व नि:स्वार्थ सेवेचा संस्कार नियमितपणे घडत असतो, हाच वैभवशाली व बलशाली राष्ट्रनिर्मितीचा पाया आहे, असे मत राष्ट्रय स्वयंसेवक संघाचे विभाग संघचालक व डॉ. बाबासाहेब आंबेडकर वैद्यकीय प्रतिष्ठानचे संचालक अनिल भालेराव यांनी रविवारी येथे व्यक्त केले.
राष्ट्रीय स्वयंसेवक संघातर्फे भगतसिंगनगर, मयूरपार्क, हर्सूल परिसरातील स्वयंसेवकांसाठी ऑडिटर सोसायटी येथील उद्यानात 'भगतसिंगनगर महासंगम' या कार्यक्रमप्रसंगी ते बोलत होते. यावेळी मुख्य पाहुणे म्हणून संस्कार प्राथमिक व माध्यमिक विद्यालयाचे अध्यक्ष जगदीश देसले, भगतस‌िंगनगरचे संघचालक डॉ. विशाल ढाकरे हे उपस्थित होते.
भालेराव म्हणाले, 'दुसऱ्याचे दु:ख ते आपले दु:ख व दुसऱ्याचे सुखात आपले सुख पाहण्याचा संस्कार, कडवी शिस्त , खिलाडूवृत्ती, कुटुंबसमाज व राष्ट्रासाठी कष्ट सोसण्याची प्रवृत्ती या सद्गुणांची जोपासना संघाच्या दैनंदिन कार्यक्रमातून नकळत घडत जाते. संघाने देशभरातील दीड लाखांवरील सेवाकार्याच्या माध्यमातून सेवावृत्तीचा आदर्श घालून दिला आहे.' सुरुवातीला स्वयंसेवकांनी दैनंदिन शाखा, धृतयोग, सूर्यनमस्कार व समता याचे प्रात्यक्षिक यावेळी दाखविले. देसले यांनी या वेळी संघाच्या शिस्तबद्ध कार्यपद्धतीबद्दल गौरवोद्गार काढले. सुनील देशमुख यांनी प्रास्ताविक केले. हरीश वाघ यांनी आभार मानले.
श्रीरामनगरात महासंगम
समाजाच्या पुरुषार्थाला आवाहन करून सामाजिक एकात्मता प्रस्थापित होईल, असे मत राष्ट्रीय स्वयंसेवक संघाचे शहर कार्यवाह डॉ. दिवाकर कुलकर्णी यांनी शुक्रवारी व्यक्त केले. संघाच्या श्रीरामगनगराचा महासंगम कार्यक्रम ज्ञानेश विद्या मंदिरच्या मैदानावर पार पडला. यावेळी ते बोलत होते. या महासंगमला प्रमुख पाहुणे म्हणून संतोष चौधरी उपस्थित होते. व्यासपीठावर नगर संघचालक अजय तल्हार यांची उपस्थिती होती. श्रीरामनगर, मुकुंदवाडी, चिकलठाणा या भागातील स्वयंसेवक व नागरिक कार्यक्रमाला उपस्थित होते. संघ कार्याचा विस्तार संपूर्ण जगभर झाला आहे. जगातील ६५देशात शाखा असून, देशातील सर्व जिल्ह्यात संघाचे काम पोहचले आहे. देशभरात दीड लाखावर सेवा कार्य संघाच्या माध्यमातून सुरू असल्याची माहिती डॉ. कुलकर्णी यांनी दिली. स्वयंसेवकांनी प्रात्यक्षिके करून दाखविली.
विश्वकर्मानगरमध्ये महासंगम
'संघाचे वाढते काम आणि एकंदरीतंच त्यात होत असलेले संस्कार युवापिढीला प्रेरणादायी आहेत, संघाला सध्या नागरिकांकडून वेळ हवा आहे राष्ट्रनिर्मितीच्या काळात संघाला तुमच्याकडून वेळ हवा आहे. तो वेळ द्या,' असे आवाहन गोसेवा समितीचे प्रांतकार्यवाह सुधीर विध्वंस यांनी केले. सेव्हन हिल्स, सिडको बस स्टँड, आंबेडकरनगर, सिडको जकात नाका आणि पुन्हा सेव्हन हिल्स या विश्वकर्मानगराचा महासंगम रविवारी झाला. वेणूताई चव्हाण शाळेसमोरील संघशाखा परिसरात झालेल्या या महासंगमाच्या व्यासपीठावर यावेळी मोहन कुलकर्णी, डॉ. विनोदकुमार भाला यांची उपस्थिती होती.्र यावेळी विध्वंस म्हणाले, 'मुले, तरुण, सेवानिवृत्त यांच्यासाठी शाखेत वेगवेगळे कार्यक्रम चालत असतात. सध्या संघ विस्तारत आहे. यासाठी विविध जबाबदारी स्वत:हून उचलणारे स्वयंसेवक हवे आहेत. संघाचा भाग व्हा.'
मोबाइल अॅप डाउनलोड करा आणि राहा अपडेट
