जिल्ह्यातील वाळूपट्ट्यांचे लिलाव झालेले नसतानाही शहरात वाळूचे बेकायदा साठे करून ठेवले होते. महसूल विभागाच्या पथकाने पोलिसांच्या मदतीने महसूलच्या बुधवारी दिवसभरात १६ ठिकाणी छापे टाकून सुमारे पावणेदोनशे ब्रास वाळू जप्त केली, अशी माहिती तहसीलदार रमेश मुंडलोड यांनी दिली.
महसूल विभागाच्या दोन पथकांनी बुधवारी सकाळी १०पासून कारवाईला सुरुवात केली. पथकांनी शहरासह परिसरातील साठ्यांवरही कारवाई केली. हर्सूल टी पॉइंट, पुंडलिकनगर रोड, शिवाजीनगर, देवळाई चौक, पंचवटी चौक, पडेगाव, एमजीएम, हडको आदी १६ ठिकाणी छापे टाकून वाळूचे साठे जप्त केले. सायंकाळपर्यंत सुरू असलेल्या या कारवाईमध्ये दोन्ही पथकांनी सुमारे पावणेदोनशे ब्रास वाळू जप्त केली असून, या वाळूची बाजारात सुमारे ८ लाख रुपये आहे. जप्त करण्यात आलेली वाळू तहसील कार्यालयाच्या आवारात ठेवण्यात आली आहे. शहर आणि परिसरात मोठ्या प्रमाणावर बांधकामे सुरू आहेत, मात्र दुसरीकडे वाळूपट्ट्यांचा लिलाव करण्यात आलेला नाही. शहरातील जाधववाडी, शिवाजीनगर, सातारा, देवळाई, पडेगाव या भागात अधिक बांधकाम सुरू अाहेत. या परिसरात चोरट्या पद्धतीने वाळू शहरात आणून विक्री करण्यात येत होती.
दरम्यान, जप्त करण्यात आलेल्या वाळू साठ्यांची परवानगी, रॉयल्टी भरल्याच्या पावत्या नसल्याचे आढळले. जिल्हाधिकारी डॉ. निधी पांडेय यांनी रस्त्यावर अवैध वाळू साठविणाऱ्यांवर कारवाई सुरू करण्याचे आदेश दिले आहेत. त्यानंतर ही कारवाई कारवाई सुरू करण्यात आली.
२ पथकांची कारवाई
तहसीलदार रमेश मुंडलोड, नायब तहसीलदार मीना वराडे यांच्या नेतृत्वाखाली २ पथक तयार करण्यात आली. या पथकांमध्ये ८ तलाठी, ४ मंडळ अधिकारी, ६ पोलिस, जेसीबी आणि ३ ट्रक यांचा समावेश होता.
मोबाइल अॅप डाउनलोड करा आणि राहा अपडेट