म. टा. प्रतिनिधी, औरंगाबाद
सिडको - हडको भागात सलग सातव्या दिवशी नागरिकांना निर्जळीला सामोरे जावे लागले. जलवाहिनींवरील दुरुस्तीसाठी औरंगाबाद सिटी वॉटर युटिलिटी कंपनीने घेतलेल्या मेगा शटडाउनमुळे नागरिकांना मेगा मनस्ताप होत आहे. यात नगरसेवकही भरडले जात आहेत.
औरंगाबादहून जायकवाडीला पाणीपुरवठा करणाऱ्या ७०० आणि १४०० मिलिमीटर व्यासाच्या जलवाहिनीवरील दुरुस्ती कामासाठी व जायकवाडी येथील पंपहाउस, फारोळा जलशुध्दीकरण केंद्रातील दुरुस्ती कामासाठी कंपनीने शनिवारी बारा तासांचे मेगा शटडाउन घेतले. यामुळे पाणीपुरवठ्याचे वेळापत्रक एक दिवस पुढे ढकलले, पण हे काम फक्त कागदोपत्रीच झाले. सिडको - हडको भागात शटडाउन घेण्याच्या दोन दिवस अगोदरपासून पाणीबाणी निर्माण झाली होती. ती अद्यापही सुरू आहे. पवननगर वॉर्डाचा काही भाग, सिडको एन ११, एन ११ बी सेक्टर, यादवनगर, सुरेवाडी, रोजाबाग, दिल्ली गेट परिसर, ठाकरेनगरचा काही भाग, सिडको एन २ आदी भागात पाणीपुरवठा आज झाला नाही. पुंडलिकनगर भागातही पाणीपुरवठा झाला नाही. त्यामुळे या वॉर्डच्या नगरसेविका मीना गायके यांनी शिष्टमंडळासह कंपनीच्या कार्यालयावर धडक दिली व पाणीपुरवठा सुरळीत करण्याची मागणी केली. सिडको एन ५ व एन ७ पाण्याच्या टाकीवर सायंकाळी उशिरा सिडको-हडको भागातील नगरसेवक जमा झाले. उपमहापौर प्रमोद राठोड, नगरसेवक सीताराम सुरे, बन्सीलाल जाधव, नितीन चित्ते, राज वानखेडे, रालूल रोजतरक, किशोर नागरे, अशोक वळसे आदी जलकुंभावर ठाण देऊन बसले होते. पाणीपुरवठ्यातील नेमकी समस्या काय आहे व पाणीपुरवठा केव्हा सुरळीत केला जाणार, याबद्दल त्यांनी विचारणा केली.
मात्र, या ठिकाणी कंपनीचे सक्षम अधिकारी नगरसेवकांच्या प्रश्नांना उत्तर देण्यासाठी उपस्थित नव्हते. नगरसेवकांनी थोडे आक्रमक होताच कंपनीचे अधिकारी सोनल खुराणा, पालिकेचे कार्यकारी अभियंता हेमंत कोल्हे सिडको एन ७ च्या जलकुंभावर आले. त्यानंतर कामाला गती मिळाली. काम गतीने सुरू करण्यात आले तरी उद्या मंगळवारी देखील सिडको - हडको भागाला पाणीपुरवठा होण्याची शक्यता नसल्याचे बोलले जात आहे.
केंद्रेकरांची ताकीद
आयुक्त सुनील केंद्रेकर एन ७ येथील जलकुंभावर रात्री नऊ वाजता भेट दिली व तेथे जमलेल्या नगरसेवक, नागरिकांशी चर्चा केली. त्यानंतर अधिकाऱ्यांना 'पाणीपुरवठ्यासंदर्भात कोणतेही छोटे मोठे काम केले तर त्याची माहिती दोन तासात मला मिळालीच पाहिजे,' अशी सक्त ताकीद दिली. जलकुंभाच्या परिसरात निर्माण झालेल्या व्हॉल्व्हच्या समस्येबद्दल अधिकाऱ्यांना जाब विचारला. 'रात्री कितीही उशीर झाला तरी व्हॉल्व्हच्या दुरुस्तीचे काम झालेच पाहिजे. त्याशिवाय घरी जाऊ नका. सिडको-हडकोच्या कोणत्या भागात किती पाणीपुरवठा केला जातो याची माहिती उद्याच द्या,' असे आदेश दिले.
मेगा शटडाउनमुळे नागरिक त्रस्त झाले आहेत. पाणीपुरवठा खंडित झाला आहे. सात - सात दिवस पाणीपुरवठा होणार नसेल, तर अशा प्रकारच्या शटडाउनचा काय उपयोग. कंपनीच्या अधिकाऱ्यांनी काळजीपूर्वक काम केले असते, तर नागरिकांना मनस्ताप सहन करावा लागला नसता.
- नितीन चित्ते, नगरसेवक
जलकुंभाजवळ व्हॉल्व्ह बसवण्याचे काम कंपनीने योग्य प्रकारे केले नाही. बसवलेला व्हॉल्व्ह तीनवेळा वेल्डिंग करून आणावा लागला. व्हॉल्व्हसाठीचे आवश्यक साहित्य तेथील कामगारांकडे नव्हते. त्यामुळे पाणीपुरवठा वेळेत सुरळीत झाला नाही. परिणामी नागरिकांना पाणी - पाणी करावे लागत आहे.
- किशोर नागरे, माजी नगरसेवक
