औरंगाबाद महापालिकेच्या आयुक्तपदी ओमप्रकाश बकोरिया यांना लवकर पाठवा, अशी विनंती सुनील केंद्रेकर यांनी गुरुवारी थेट मुख्यमंत्री देवेंद्र फडणवीस यांच्याकडे फोनवरून केली. बकोरिया यांच्याशीही त्यांनी फोनवरून संपर्क साधला.
महापौरांच्या दालनात अधिकारी-पदाधिकाऱ्यांबरोबर सुनील केंद्रेकर यांनी बैठक घेतली. बैठकीनंतर पदाधिकारी व केंद्रेकर सभागृहनेता राजेंद्र जंजाळ यांच्या दालनाच्या अँटीचेंबरमध्ये येऊन बसले. बंद दाराआड सुमारे अर्धातास या सर्वांची चर्चा सुरू होती. त्यानंतर सर्वजण बाहेर पडले. अँटीचेंबरमध्ये झालेल्या चर्चेची माहिती सूत्रांनी दिली. त्यानुसार, 'आयुक्तपदी तुम्हीच कायम राहा,' अशी गळ पदाधिकाऱ्यांनी घातली. 'तुम्ही तशी तयारी दाखवा,' मुख्यमंत्र्यांकडे जाऊन आम्ही बकोरिया यांच्या बदलीची ऑर्डर रद्द करून आणतो,' असे पदाधिकारी म्हणाले. तेव्हा केंद्रेकर यांनी आपल्याकडे सिडकोचे कोणते आणि किती पदभार आहेत याची माहिती दिली. ही कामे पूर्ण करायची असतील तर महापालिकेच्या कामकाजाकडे जास्त लक्ष देता येणार नाही, असे त्यांनी पदाधिकाऱ्यांच्या लक्षात आणून दिले. मी आयुक्त नसलो तरी शहराचा नागरिक म्हणून मी वेळोवेळी सूचना करीत जाईल, महापालिकेत माझी सूचना टाळली जाईल, असे वाटत नाही. नवीन आयुक्तदेखील सक्षम आहेत, तेही चांगले काम करतील, अशी समजूत केंद्रेकरांनी काढली. त्यानंतर त्यांनी थेट मुख्यमंत्री देवेंद्र फडणवीस यांना फोन लावला व बकोरिया यांना पुणे महापालिकेतून कार्यमुक्त करून पालिकेत लवकर पाठवा, अशी विनंती केली.
बकोरिया आज सूत्रे स्वीकारणार
औरंगाबाद महापालिकेचे आयुक्त म्हणून ओमप्रकाश बकोरिया शुक्रवारी बाराच्या सुमारास सूत्रे स्वीकारणार असल्याचे समजते. बकोरिया यांना आज सायंकाळी पुणे महापालिकेतून कार्यमुक्त करण्यात आले. ते उद्या दुपारी बारापर्यंत औरंगाबादेत येऊन आयुक्तपदाची सूत्रे स्वीकारतील, असे सूत्रांनी सांगितले.
मोबाइल अॅप डाउनलोड करा आणि राहा अपडेट