शहरात गाजलेल्या डॉ. चित्रा दिनेश डकरे यांच्या खुनप्रकरणाचा उलगडा करण्यात अखेर पोलिसांना जवळपास तीन महिन्यांनंतर यश आले. या प्रकरणी पोलिसांनी दोन भुरट्या चोरांना अटक करण्यात आली आहे. त्यांच्यापैकी एक जण पोलिस कर्मचाऱ्याचा मुलगा असून दुसरा अल्पवयीन आहे.
पोलिसांनी पकडलेल्या दोघांपैकी एक अमोल नारायण घुगे (वय १९, रा. शिवनेरी कॉलनी, एन-९, हडको), हा असून त्याचे वडील पोलिसनाईक आहेत. तो बारावीचा विद्यार्थी असून, दुसरा अल्पवयीन अकरावीत शिकतो. या दोघांना पकडण्यात आल्याची माहिती पोलिस आयुक्त अमितेशकुमार यांनी दिली. दिवाळीनंतर मुलीला भेटण्यासाठी आलेल्या डॉ. चित्रा दिनेश डकरे (वय ६०) यांचा २ डिसेंबर २०१५ रोजी सकाळी सव्वादहाच्या सुमारास हडको, एन-९ मधील विमल ज्योती सहकारी गृहनिर्माण संस्थेच्या पहिल्या मजल्यावर गळा चिरून खून झाला होता. या खुनाचा तपास गुन्हे शाखेकडे सोपवण्यात आला होता.
विमलज्योती सोसायटीमध्ये दुसऱ्या मजल्यावरील फ्लॅटमध्ये डॉ. नीलेश आस्वार हे पत्नी स्नेहल व सात वर्षांचा मुलगा उत्कर्ष यांच्यासह राहतात. डॉ. स्नेहल यांचे वडील दिनेश सूर्यभान डकरे व आई डॉ. चित्रा डकरे (रा. हिवरखेड, ता. मोर्शी, जि. अमरावती) २३ नोव्हेंबर रोजी मुलीकडे दिवाळीनिमित्त आल्या होत्या. डॉ. नीलेश हे सासरे दिनेश डकरे यांना घेऊन २ डिसेंबर रोजी सकाळी साडेनऊ वाजता एन ७ परिसरात प्लॉट पाहण्यासाठी गेले होते. त्यानंतर सव्वादहाच्या सुमारास डॉ. स्नेहल हॉस्पिटलमध्ये गेल्या. त्यांचा मुलगा उत्कर्ष सकाळी साडेसात वाजता शाळेमध्ये गेला होता. घरात चित्राबाई एकट्याच होत्या. त्यामुळे घरात कोणीही नसताना एकट्या असलेल्या चित्रा यांचा खून झाल्याने शहरात खळबळ उडाली होती.
अमोल घुगे व त्याचा मित्र विमलज्योती सोसायटीमध्ये चोरी करण्यासाठी घुसले होते. डॉ. नीलेश आस्वार यांच्या घरात प्रवेश करणापूर्वी त्यांनी शेजारी एस. के. गोरे, डॉ. संजय सूर्यवंशी आणि व्यापारी रवींद्र निकुंभ यांच्या फ्लॅटच्या कड्या बाहेरून लावल्या. डॉ. नीलेश यांच्या फ्लॅटचे दार उघडे असल्याने दोघे लगेच आत शिरले. त्यांनी बैठकीच्या खोलीत दिवाणावर बसलेल्या डॉ. चित्रा यांचे तोंड दाबून हात-पाय दोरीने बांधायला सुरुवात केली. परंतू, त्यांनी आरडाओरड करून आणि प्रतिकार करण्यास सुरुवात केली. अमोलने त्यांचे तोंड दाबून हात पाठीमागे नायलॉनच्या दोरीने बांधले. या झटापटीत संशयितांनी तीनवेळा डॉ. चित्रा यांच्या गळ्यावर धारदार शस्त्राने वार केले. त्यात डॉ. चित्रा यांचा मृत्यू झाला, अशी माहिती तपासात समोर येत आहे. त्यानंतर भेदरलेल्या संशयित आरोपी गॅलरीतून उडी मारून पळून गेले.
या घटनेचा तपास करण्याचे आव्हान पोलिसांसमोर होते. सर्व बाजुने तपास करूनही गुन्ह्यामागील कारण व आरोपी सापडत नव्हते. सिडको पोलिस व गुन्हे शाखेच्या पथकाने सराईत गुन्हेगार व इतर संशयितांची चौकशी करूनही सुगावा लागत नसल्याने हे प्रकरणी श्रृती भागवत खुनप्रकरणाप्रमाणेच उकल न होत राहणार का, अशी शंका शहरातील नागरिकांना येत होती. पण भुरट्या चोरांवर लक्ष केंद्रित केल्यानंतर पोलिसांच्या हाती धागेदोरे लागले. अमोल घुगे व त्याचा अकरावीतील मित्राने हा खून केल्याचे तपासात पुढे आहे. काही दिवस पाळत ठेवल्यानंतर खात्री झाली व त्यानंतर त्यांना गुरुवारी रात्री त्यांना ताब्यात घेण्यात आले, अशी माहिती पोलिस आयुक्त अमितेशकुमारयांनी दिली. यावेळी पोलिस उपायुक्त वसंत परदेशी, संदीप आटोळे, गुन्हे शाखेचे सहायक पोलिस आयुक्त खुशालचंद बाहेती, पोलिस निरीक्षक अविनाश आघाव आदी उपस्थित होते. दरम्यान, अमोल घुगे आणि विधीसंघर्ष बालकास शनिवारी कोर्टासमोर हजर करण्यात आले. घुगे यास ३ मार्चपर्यंत पोलीस कोठडीचे आदेश दिले. तर, विधीसंघर्ष बालकाची रवानगी बाल न्यायालयात करण्याचे आदेश दिले आहेत.
गुन्हा उघडकीस आणल्याबद्दल पोलिस आयुक्तांनी गुन्हे शाखेच्या पथकाला एक लाख रुपयांचे पारितोषिक जाहीर केले आहे. या पथकात सहायक पोलिस निरीक्षक गजानन कल्याणकर, उन्मेष थिटे, पोलिस उपनिरीक्षक प्रशांत आवारे, नसीम खान, शिवाजी झिने, सुधाकर राठोड, विजयानंद गवळी यांचा समावेश आहे.
मोबाइल अॅप डाउनलोड करा आणि राहा अपडेट
