म. टा. प्रतिनिधी, वैजापूर
वाड्या, वस्त्यांवर भेडसावणार पाणीप्रश्न, टँकर मंजुरी, विहीर अधिग्रहणाचे अपूर्ण प्रस्ताव, दुष्काळी परिस्थिती या विषयांवर नुकत्याच झालेल्या आमसभेत चर्चा झाली. तहसीलदारांसह सर्व विभागांच्या अधिकाऱ्यांवर हलगर्जीपणाचा आरोप करण्यात आला. मात्र, अधिकाऱ्यांनी केवळ औपचारिक उत्तरे देऊन वेळ मारून नेल्याने ही बैठक निष्फळ ठरली.
या आमसभेच्या अध्यक्षस्थानी आमदार भाऊसाहेब पाटील चिकटगावकर हे होते. जिल्हा परिषद उपाध्यक्ष दिनकर पवार, उपविभागीय अधिकारी लक्ष्मीकांत साताळकर, गटविकास अधिकारी डी. एस. आहिरे, नायब तहसीलदार चैताली दराडे, सभापती शिवाजी आधुडे, उपसभापती सुभाष जाधव, एल. एम. पवार, प्रभाकर बारसे यांची प्रमुख उपस्थिती होती. पाथ्री, पेंडेफळ, आलापूरवाडी, झोलेगाव, भोकरगाव, धोंदलगाव, नालेगाव, खंडाळा आदी गावांसह वाड्या, वस्त्यांना टँकरने अपुरा पाणीपुरवठा होत आहे. त्यामुळे तेथे लोकसंख्येच्या प्रमाणात अतिरिक्त टँकरचे प्रस्ताव पाठवण्याची सूचना पाणीपुरवठा विभागाचे अभियंता के. पी. कड यांनी बैठकीत केली. साकेगाव, कोरडगाव येथील भारत निर्माण योजनेच्या कामात गैरव्यवहार होऊनही समितीवर कारवाई होत नसल्याबद्दल ग्रामस्थांनी आक्षेप घेतला. यावर पाणीपुरवठा विभागाने कामाचे मूल्यांकन करून फरक आढळल्यास संबंधितांवर कारवाई करण्याचे आदेश आमदारांनी दिले. मनसेचे कल्याण पाटील दांगोडे यांनी कृषी विभागाकडून जलयुक्त शिवारची कामे कासवगतीने सुरू असल्याची व अधिकाऱ्यांच्या गैरहजरीबाबत तक्रार मांडली. जलयुक्त शिवार योजनेत तालुक्यातील सर्वच गावे टप्प्याटप्प्याने घेण्यात येणार असून पहिल्या वर्षीच्या ३१ गावांपैकी २० गावांत कामे सुरू आहेत. तसेच यावर्षी निवड झालेल्या गावातही कामे सुरू होणार असल्याचे तालुका कृषी अधिकारी मुनीर शेख यांनी सांगितले. पोलिसाकंडून शहरात न्यालालयाच्या आदेशानुसार
हेल्मेटसक्ती केली जात आहे. तसेच गाड्या पकडण्याची कारवाई होत असल्याबद्दलही ग्रामस्थांनी आमदारांकड गाऱ्हाणे मांडले. परंतु, हा न्यायालयाचा आदेश असल्याने हेल्मेट वापरावे लागणारच, असे पोलिस निरीक्षक अनिरुद्ध नांदेडकर यांनी ठणकावून सांगितले. वैजापूर शहरातील नौगजी बाबा दर्गा परिसरातील जागा हडप करुन त्यावर प्लॉटिंग केल्याची तक्रारही बैठकीत करण्यात आली. बैठकीला नांमकाचे उपअभियंता प्रशांत वनगुजरे, कृषी अधिकारी हणमंत बोयनर आदी अधिकारी उपस्थित होते.
आमसभेला तहसीलदार वंदना निकुंभ, नगरपालिका, सार्वजनिक बांधकाम, महाविरण व राज्य परिवहन महामंडळाचे जबाबदार अधिकारी हजर नव्हते. त्यामुळे अनेक प्रश्न प्रलंबित राहिले. निकुंभ यांची बदली करण्याचा ठराव यावेळी घेण्यात आला. नांदूर-मधमेश्वर जलदगती कालव्यातून पाण्याचे एक आवर्तन सोडावे, शेतकऱ्यांचे कर्ज व एक वर्षाचे वीज बिल माफ करावे, चारा छावणी सुरू करावी व टँकरचे प्रस्ताव त्वरित मंजूर करावे हे ठराव आमसभेत मंजूर झाल्याचे आमदार भाऊसाहेब पाटील चिकटगावकर यांनी यावेळी जाहीर केले.
मोबाइल अॅप डाउनलोड करा आणि राहा अपडेट
