म. टा. प्रतिनिधी, औरंगाबाद
जिल्ह्यात रब्बी गव्हाच्या पिकाला अवकाळी पावसाचा फटका बसला आहे. पावसाने झोडपलेल्या गव्हाचा रंग उडून प्रत खराब झाली आहे. जिल्ह्यात एकूण १५.२६ मिलिमीटर पाऊस झाला आहे. या पावसाने पिकांचे फार नुकसान झाले नाही; मात्र वादळात काही ठिकाणी मका व गव्हाचे पीक आडवे पडले आहे.
दोन दिवसांपासून पडत असलेल्या अवकाळी पावसाचा फटका रब्बी पिकांना बसला आहे. सध्या रब्बी पिकांची सोंगणी सुरू असून गहू काढणीच्या अवस्थेत आहे. यावर्षी पाणीटंचाई असल्यामुळे गव्हाचे क्षेत्र तुलनेने कमी आहे. पण, सप्टेंबर महिन्यातील परतीच्या पावसाने फुलंब्री व सिल्लोड तालुक्यांतील पाणीटंचाई दूर केली. या दोन तालुक्यांत गव्हाचे सर्वाधिक क्षेत्र आहे. आतापर्यंत गव्हाची काढणी पूर्ण झाली आहे. उशिरा पेरलेला गहू सोंगणीच्या अवस्थेत आहे. या गव्हाला अवकाळी पावसाचा तडाखा बसला आहे. काढणी पूर्ण झालेला व शेतात उभ्या असलेल्या पिकाला पावसाने झोडपले. त्यामुळे गव्हाचा रंग उडून प्रत खराब झाली आहे. या पिकाचा रंग उडाल्यामुळे कमी भाव मिळण्याची शक्यता आहे. हरभरा, ज्वारी, मका या पिकांचे तुलनेने नुकसान झाले नाही. कन्नड व सिल्लोड तालुक्यात वादळामुळे मका आडवी पडली आहे. कन्नड, सोयगाव, सिल्लोड व फुलंब्री तालुक्यात कांदा बिजोत्पादन घेण्यात येते. यावर्षी दहा हजार एकरवर कांदा बियाणे घेतले जाणार आहे. सुदैवाने, अवकाळी पावसात कांदा बियाणे पिकाचे नुकसान झाले नाही. गंगापूर तालुक्यात सर्वाधिक ९.५६ मिलिमीटर पाऊस झाला आहे.
मिटमिटा परिसरात वीटभट्ट्यांचे नुकसान
पडेगाव: मिटमिटा, पडेगाव, दौलताबाद परिसरात शुक्रवारी सकाळी एक तास पाऊस पडला. वादळी वारे व विजेचा कडकडाट व गारांसह आलेल्या पावसाने वीटभट्टीचालकांचे नुकसान केले. पावसाचे पाणी अनेक ठिकाणी पाणी साचले. या पावसामुळे विहीर, बोअरवेलचे पाणी वाढण्यास मदत होणार आहे. वीज पडून हायटेन्शन तारा पडल्यामुळे काही काळ वीजपुरवठा खंडित झाला. महावितरणच्या कर्मचाऱ्यांनी दुरुस्ती करून पुरवठा सुरळीत केला. या पावसामूळे सोंगणी करून शेतात ठेवलेला गहू, ज्वारीचे नुकसान झाल्याचे शेतकऱ्यांनी सांगितले. दरम्यान, पावसामुळे नुकसान झाल्याने वीटभट्टीचालक किरण दुबिले यांनी चिंता व्यक्त केली.
कांदा बियाणांचे कन्नडमध्ये नुकसान
कन्नड:तालुक्याच्या बहुतांश भागात शुक्रवारी पहाटेपासून पावसाने वादळी वाऱ्यासह जोरदार हजेरी लावली. सकाळी सुमारे अर्धा तास धुवांधार व त्यानंतर दोन तास पावसाची रिप-रिप चालू होती. देवगाव, जळगाव घाट, जैतापूर, जेहूर, चापानेर, हतनूर, चिकलठाण, कन्नड शहर परिसरात वादळी वाऱ्यासह जोरदार पाऊस पडला. यामुळे वीटभट्टी, कांदा व कांदा बिजवाई व रब्बी मका पिकाचे मोठे नुकसान होण्याचा अंदाज आहे.
फळबागांना फटका
खुलताबादः तालुक्याच्या काही भागात शुक्रवारी सकाळी अचानक आलेल्या पावसाने शेती व वीटभट्टीचे मोठे नुकसान झाले. केले. सकाळी सातच्या सुमारास ढगांचा गडगडाट व विजेच्या कडकडाटासह पावसाने हजेरी लावली, साडेदहा वाजेपर्यंत रिमझिम पाऊस पडत होता. खुलताबाद, सुलीभंजन, नंद्राबाद, कागजीपुरा या भागातील वीटभट्टी व्यावसायिकांचे मोठे नुकसान झाले. कच्च्या विटांचा चिखल झाला. शेतातील ज्वारी, हरभरा, मोहरी, करडई पिकांचे आतोनात नुकसान झाले. मोसंबी, डाळिंबाच्या फळबागांनाही फटका बसला. गारा पडल्या नाही, हे आमचे भाग्य अशी प्रतिक्रिया वडोद येथील शेतकरी साहेबराव चव्हाण यांनी व्यक्त केली. शेतात कांदा लागवड केलेली असून गारांचा पाऊस आला असता तर, संपूर्ण कांदा पिकाचे नुकसान झाले असते असे त्यांनी सांगितले.
सिल्लोड तालुक्यात चाऱ्याची चिंता
सिल्लोड : तालुक्यात शुक्रवारी सकाळी हलक्या स्वरूपाचा पाऊस झाला, पण जोराचा वारा सुटला होता. या पावसामुळे रब्बी हंगामातील पिकांचे नुकसान झाले आहे. काही शेतकऱ्यांनी पावसाचा अंदाज घेऊन मळणी केलेल्या गव्हाचे भूस ओले झाले. त्यामुळे जनावारांच्या चाऱ्याचा प्रश्न बिकट
होणार आहे. तालुक्यात सकाळी सातच्या सुमारास अचानक आभाळ भरून आले व पावसाला सुरुवात झाली. निल्लोड मंडळात मोठा पाऊस पडला. या पावसामुळे सोंगणीला आलेला गहू आडवा झाला असून, गहू काळा पडण्याची शक्यता आहे. यावर्षी पाणी असलेल्या शेतकऱ्यांनी कांदा बियाणे पिकाची लागवड मोठ्या प्रमाणात केली आहे, त्यांचे पावसामुळे नुकसान झाले. वाऱ्यामुळे फुले गळाली असून उशिरा लागवड केलेल्या कांदा बियाणे पिकावर फुली रोग पडण्याची शक्यता आहे. पावसामुळे आंब्याचा मोहर गळाला. आभाळ घोंगावत असल्याने हार्वेस्टरने गव्हाची मळणी केलेल्या शेतकऱ्यांचे नुकसान टळले. वैरण म्हणून उपयोगी येणाऱ्या गव्हाच्या भूसाला त्यांनी प्राधान्य दिले नाही, या शेतकऱ्यांना चाराटंचाई सतावेल.
वीज पडून बैलाचा मृत्यू
वैजापूर ः तालुक्यातील सुराळा येथे शुक्रवारी पहाटे वीज पडून बैलाचा मृत्यू झाला. भाऊसाहेब गणपत आहेर यांच्या शेतवस्तीवर बैलाच्या अंगावर वीज पडली. बैलाची किंमत चाळीस हजार रुपये आहे. तलाठी शेख फेरोज व सहायक अशोक शितोळे यांनी पंचनामा केला. वैजापूर, बोरसर व लासूरगाव मंडळात शुक्रवारी पहाटे हलका पाऊस पडला. बोरसर मंडळात १७ मिमी पावसाची नोंद झाली आहे. सकाळी आठवाजेपर्यंत पावसाची रिपरिप सुरू होती. रब्बी हंगामातील बहुतांश गहु, ज्वारी व हरबरा ही पिके शेतकऱ्यांनी काढली आहेत. मात्र उशीरा लागवड केलेला गहू व कांद्याला फटका बसला. दरम्यान, तालुक्यात कुठेही गारपीट झाली नसल्याचे कृषी विभागाकडून सांगण्यात आले आहे.
मोबाइल अॅप डाउनलोड करा आणि राहा अपडेट
