निर्दयी खून व पाशवी बलात्कार
औरंगाबाद - शहरात गाजलेल्या मानसी देशपांडे खून खटल्यातील मुख्य आरोपी जावेद खान ऊर्फ टिंगऱ्या याला बलात्कार, खून या खटल्यात दोषी ठरवून हायकोर्टाने फाशीची शिक्षा सुनावली आहे. या निर्दयी व पाशवी बलात्काराची ही पार्श्वभूमी.
अहिंसानगरातील पूर्वा अपार्टमेंटमध्ये ११ जून २००९ रोजी मानसी शंकर देशपांडे (वय २१) या महाविद्यालयीन तरुणीचा रात्रीच्यावेळी निर्घृण खून झाला होता. बलात्कार करून तिच्या शरीरावर खिळे ठोकले, तसेच मोबाइलच्या वायरने गळा दाबून खून केल्याचे उघडकीस आल्यानंतर औरंगाबाद शहरात मोठी खळबळ उडाली होती. ती आपल्या घरात एकटीच झोपलेली असताना चोरीच्या उद्देशाने घरात शिरलेल्या जावेदखान याने मोबाइल चार्जिंगच्या वायरने तिचे हात बांधले, ओढणीने पाय बांधले. घरातील मोबाइल, सोन्याची अंगठी व रोख ४५० रुपये आदींची चोरी केली. त्यानंतर मानसीवर लैंगिक अत्याचार करून तिच्या डोक्यात स्क्रूड्रायव्हर घालून आणि शरीरावर २१ वार करून तिचा निर्घृण खून केला होता.
या घटनेतील आरोपीला तातडीने पकडावे, या मागणीसाठी महिला संघटनांसह विविध संस्था, राजकीय पक्षांनी निषेध मोर्चेही काढले होते. यासंदर्भात शहरातील जिन्सी पोलिस ठाण्यात मानसीचा भाऊ अनिकेतने फिर्याद दिल्यानंतर पोलिस निरीक्षक सोपान बोरसे यांनी गुन्हा नोंदविला. श्वानपथक, तसेच ठसे तज्ज्ञांची तपासासाठी मदत घेण्यात आली. घाटी रुग्णालयात शवविच्छेदन करण्यात आले. त्यासाठी विशेष तपासपथक स्थापन करण्यात आले. गुन्हे शाखेतील अधिकाऱ्यांनी तपासात मदत केली होती. सायबर सेलचे तत्कालीन पोलिस निरीक्षक गौतम पातारे यांच्या तपासात मानसीचा चोरीला गेलेला मोबाइल हॉटेल व्यवसायिक प्रदीप चंडालिया यांच्याकडे सापडला. त्याने तो टिंगऱ्याने दिल्याचे आढळून आल्यानंतर पोलिसांनी त्यास ताब्यात घेतले. पोलिसांनी चोरी, बलात्कार आणि खून त्यानेच केल्याचा शोध लावला होता. पोलिस निरीक्षक सोपान बोरसे यांनी २२ जून २००९ रोजी प्रदीप चंडालिया, राम बोडखे, आणि जावेदखान ऊर्फ टिंगऱ्या या आरोपींना अटक केली होती. बलात्कार करून मोबाइलच्या वायरने मानसीचा गळा आवळून खून केल्याप्रकरणी तपासाअंती जावेद खान याच्यावर जिल्हा कोर्टात आरोपपत्र दाखल करण्यात आले होते.
सरकार पक्षातर्फे ३३ साक्षीदार तपासण्यात आले होते. त्यातील सहाजणांनी साक्ष फिरविली होती. या प्रकरणात मानसीच्या घरातून मोबाइल व सीमकार्डची चोरीही झाली होती. ते विकत घेणारे प्रदीप चंडालिया व राम संभाजी बोडखे यांच्यावर आरोपीला मदत केल्याचा गुन्हा दाखल करण्यात आला होता. या प्रकरणाची सुनावणी अतिरिक्त सत्र न्यायाधीश एस. एन. पाठक यांच्यासमोर झाली होती. त्यांनी जावेद यास बलात्कार, खून व पुरावा नष्ट करणे या प्रकरणात दोषी ठरवून कलम ३०२ अन्वये जन्मठेप, दरोडा व अन्य गुन्ह्यांत एक वर्ष सक्तमजुरी व सात वर्षे, तसेच बलात्कारप्रकरणी १० वर्षे कैदेची शिक्षा सुनावली होती.
या निर्णयाच्या विरोधात आरोपी व राज्य शासनाने मुंबई हायकोर्टाच्या औरंगाबाद खंडपीठात धाव घेतली होती. या याचिकेची सुनावणी न्या. ए. व्ही. निरगुडे व न्या. इंदिरा जैन यांच्यासमोर पूर्ण झाली असून निकाल २२ जानेवारी रोजी राखीव ठेवण्यात आला होता. टिंगऱ्याला देण्यात आलेली ही शिक्षा अपूर्ण आहे, त्याला फाशीची शिक्षाच हवी होती. किमान त्याला पूर्ण कालावधीची जन्मठेपेची शिक्षा तरी व्हायला हवी होती, या कारणावरुन राज्य सरकारच्या वतीने खंडपीठात या शिक्षेला आव्हान देण्यात आले. मानसी देशपांडे हिच्यावर अत्त्याचार करून झालेला खून ही अति दुर्मिळातील दुर्मिळ घटना आहे. अत्याचार करणाऱ्यास जास्तीत जास्त शिक्षा व्हावी हा संदेश समाजात गेला पाहिजे म्हणून फाशीची शिक्षा देण्यात यावी, असा युक्तिवाद अतिरिक्त सरकारी वकील सुनील सोनपावले यांनी हायकोर्टात केला. हायकोर्टाने त्यावर शिक्कामोर्तब केले.
------------
चौकट
0 राम बोडखे, प्रदीप चंडालिया यांना प्रत्येकी एक हजार रुपये दंड
0 ११ जून २००९ रोजी मानसीचा खून झाल्याचे उघड
0 मानसीच्या अंगावर आढळल्या २१ जखमा
0 मानसीवर बलात्कार करून खून झाल्याचा आला होता वैद्यकीय अहवाल
0 फ्लॅटमधून मोबाइल, कपडे, अंगठीची चोरी
0 सप्टेंबर २०१० मध्ये कोर्टात दोषारोपत्र दाखल
0 सरकार पक्षाने ३३ साक्षीदार तपासले त्यापैकी ६ फितूर
0 २४ जानेवारी २०१२ रोजी सेशन कोर्टाने सुनावली जन्मठेपेची शिक्षा
0 हायकोर्टात सरकार व आरोपीतर्फे अपील
0 ४ वर्ष हायकोर्टात सुनावणी
0 २२ जानेवारी २०१६ रोजी सुनावणी पूर्ण. निकाल राखीव
0 ८ मार्च रोजी हायकोर्टाचा निकाल
