Ravindra.Taksal
@timesgroup.com
औरंगाबादः नोकरीपेक्षा काही तरी वेगळे करायचे, हा निश्चय करून माधुरी शिरीष बर्दापूरकर यांनी अपूर्व गृहोद्योग उभारला. निर्भेळ, उत्पादित मालाचा उत्तम दर्जा व प्रभावी मार्केटिंगच्या जोरावर आपले वेगळे स्थान निर्माण केले. आपल्यातल्या 'स्व'ची ओळख ही जीवनाची खरी शिदोरी. हाच धागा पकडून त्यांनी यशस्वी वाटचाल सुरू केली.
जुन्या पद्धतीने स्वादिष्ट व रुचकर पदार्थ तयार करण्यात हातखंडा असलेल्या माधुरी बर्दापूरकर मुळच्या औरंगाबादच्या. वडील विद्यापीठात नोकरीला, तर आई गृहीणी. घरात माधुरी यांच्यासह चार मुली. लहानपणापासून त्यांना विविध क्रीडा प्रकार खेळण्याची सवय. त्यातच पाककलेची गोडी लागली. शालेय शिक्षण संपले. महाविद्यालयीन शिक्षण सुरू असताना त्यांनी आपले हे छंद जोपासले. खो-खो, हॉकी आदी क्रीडा प्रकारात अनेक स्पर्धात त्या सहभागी झाल्या. १९८२ साली दहावी झाली. पुढील शिक्षण करता-करता त्यांनी मराठी व इंग्रजी टायपिंग पूर्ण केले. त्या जोरावर बी. कॉमच्या पहिल्या वर्षात शिक्षण सुरू असतानाच एका सहकारी बँकेत त्यांना लिपिक म्हणून काम करण्याची संधी मिळाली. त्यांची धडपड बघून पालकांनी शिक्षण सुरू असतानाच त्यांना जॉबसाठी नेहमी प्रोत्साहन दिले. त्यातून माधुरी यांचा आत्मविश्वास वाढत गेला. शिक्षण, नोकरी व छंद जोपासणे यांची सांगड घालत त्यांनी बी. कॉम पूर्ण केले. शिक्षण पूर्ण झाल्यावर १९८९ साली त्यांचा विवाह औरंगाबादेतच खासगी कंपनीत नोकरीस असलेल्या शिरीष बर्दापूरकर यांच्याशी झाला. गजानननगर भागात त्या राहतात. माहेरप्रमाणेच सासरीही त्यांना स्वतःचे निर्णय पूर्ण स्वातंत्र मिळाले. सासरच्या लोकांनी दिलेल्या प्रोत्साहनामुळे आधीपासून सुरू असलेली बँकेची नोकरी सुरू ठेवली. घरातील सर्व जबाबदारी पार पडून सकाळी साडेआठ वाजता बँकेत जाणे, रात्री घरी येण्यास बहुतेक वेळा रात्रीचे नऊ वाजत. घरासाठी काहीतरी करण्याची जिद्द असल्याने त्यांनी तारेवरची कसरत करत ही सर्व जबाबदारी पेलली. याच दरम्यान त्यांच्या घरात चिमुकल्याचे आगमन झाले. मानसीचा जन्म झाला. तिचे संगोपण, शिक्षण व घरातील जबाबदारी यांची सांगड घालत माधुरी यांनी नोकरीसह आपली पाककलेची आवड, वाचन आदी छंद जोपासले. त्यात कधीही खंड पडला नाही. या दरम्यान बर्दापूरकर दाम्पत्यास दुसरी मुलगी झाली. दोन्ही मुली महाविद्यालयीन शिक्षण घेत आहेत, तर माधुरी ऑक्टोबर २०१५ पर्यंत बँकेतच कार्यरत होत्या. कामातील एकसारखेपणामुळे त्यांना कंटाळा आला होता. त्यांचे मन आता कामात रमत नव्हते. त्यात चाकरी करण्यापेक्षा चाकोरीच्या बाहेर जाऊन काहीतरी वेगळे करूया, स्वतःची ओळख निर्माण करू ही भावना त्यांना शांत बसू देत नव्हती. शेवटी त्यांनी निर्णय घेतला. मनाना कौल दिला होता. त्यांनी बँकेच्या नोकरीचा राजीनामा देण्याचा धाडसी निर्णय घेतला. घरच्या घरी काही उद्योग, व्यवसाय सुरू करता येईल का, त्यातून कुटुंबाला आधार मिळावा आणि आपला रिकामा वेळ सत्कारणी लागावा यासाठी त्यांनी शोध मोहिम सुरू केली. अवगत असलेल्या रेसीपीच्या जोरावर पारंपरिक पद्धतीने स्वादिष्ट व रुचकर पदार्थ तयार करण्याचा निर्णय त्यांनी घेतला. त्यासाठी अपूर्व फूड प्रॉडक्टस् नावाने ऑक्टोबर २०१५मध्ये गृहोद्योग उभारला. नातेवाईक, ओळखीच्या लोकांना भेट म्हणून त्यांनी खलबत्यात कुटलेल्या कारळ, जवळ, खोबरे, शेंगादाण्याची चटणी आदी पदार्थ दिले. त्यास मिळालेल्या चांगल्या प्रतिसादामुळे हा उद्योग चांगला चालू शकेल, हा आत्मविश्वास त्यांना मिळाला. मार्केटचा अभ्यास व मागणी लक्षात घेत त्यांनी सुरुवातीला खलबत्यात कुटलेल्या विविध प्रकाराच्या चटण्या, शेंगादाणीची चटणी विक्री सुरू केली. त्यासाठी सुरुवातीला केवळ एक हजार रुपयांची गुंतवणूक करत कच्चा माल खरेदी केला. कमी कालवधीतच अपूर्व फूड प्रॉडक्टच्या चटण्यांना परिसरात चांगलाच प्रतिसाद मिळत गेला. त्यातून परिसरातील महिलांशी जिव्हाळ्याचे नाते निर्माण होते गेले. तसा त्यांचा आत्मविश्वासही वाढत गेला. दर्जेदार व चविष्ट उत्पादनामुळे प्रसिद्धी करण्याची गरज कधीच पडली नाही, असे त्या आवर्जून सांगतात. त्यानंतर टप्प्याटप्प्प्याने त्या एक एक उत्पादन वाढवित गेल्या. उपावसाची भाजणी, खोबरा, जवस, शेंगदाणे, तीळ, कढीपत्ता, दाळव, कारळाची पूड अशा वेगवेगळ्या चटण्यांसह सांबर मसाला, मेतकूट, खारे व गोड शंकरपाळे, मठरी पुरी, धपाटे - चटणी, सुरळी वडी, आदी पदार्थ तयार करण्यासही त्यांनी सुरुवात केली. हे पदार्थ बनविताना स्वच्छता, चव, मालाचा दर्जा उत्तम राखण्याची विशेष काळजी घेतली जाते. परिसरातील नियमित ग्राहकांसह चार ते पाच किराणा दुकानदारांकडूनही पदार्थांना मागणी वाढली आहे. दुकानात मालाची डिलेव्हरी करण्यासाठी त्या स्वतः जातात. त्यातूनच मार्केटिंगची शैलीही अवगत होत गेली. बाजारापेक्षा विश्वासार्ह दर्जाच्या वस्तू, पदार्थ मिळाल्याने ग्राहक समाधानी असतात, असे माधुरी यांनी सांगितले. शहरात आयोजित गृहोउद्योग वस्तूच्या प्रदर्शनात सहभागी होण्याच्या संधीतून त्यांना एक नवे व्यासपीठ मिळाले आणि या प्रदर्शानातून चांगली विक्री झाली. अजून काही नवीन करण्याची उर्मी त्यातून प्राप्त झाली. व त्यातून त्यांनी दिवाळीचे विविध फराळ तयार करण्याचे नियोजन सुरू केले आहे. आपल्या कामातून अन्य काही महिलांना रोजगाराच्या संधी उपलब्ध व्हाव्यात, असा मानस माधुरी यांचा असून त्या दिशेने त्यांनी वाटचाल सुरू केली. त्यांच्या या कामात पती शिरीष, सासू, दोन्ही मुली यांच्यासह सासरच्या लोकांची मदत झाली. त्यांच्यामुळे व्यवसाय वाढला असे त्या सांगतात. केवळ इच्छेतून एका महिलेने ही भरारी मारली. ती इतरांसाठी नक्कीच प्रेरणादायी आहे.
मोबाइल अॅप डाउनलोड करा आणि राहा अपडेट
