अत्यल्प पर्जन्यमानामुळे दुष्काळाचा दाह राज्याच्या अनेक भागांना सहन करावा लागत असून, हंडाभर पाण्यासाठी भटकंती करावी लागत अाहे. त्यामुळे सरकारने नागरी आणि ग्रामीण भागातील पिण्याच्या पाण्याची टंचाई दूर करण्यासाठी प्रशासनाच्या अधिकारांत वाढ केली आहे.
मंत्रिमंडळ उपसमितीच्या झालेल्या बैठकीत नागरी आणि ग्रामीण भागातील पिण्याच्या पाण्याची टंचाई दूर करण्याच्या उपायांच्या काही तरतुदींमध्ये सुधारणा करण्यात आल्या आहेत. भौतिक निकष शिथिल करून आर्थिक मर्यादेतही वाढ करण्याचा निर्णय घेण्यात आला आहे. दुष्काळाचे चटके सहन करत असलेल्या मराठवाड्यासह राज्यातील इतर जिल्ह्यांसाठी हा निर्णय दिलासादायक आहे.
नवीन निर्णयानुसार जिल्हाधिकारी, विभागीय आयुक्तांच्या अधिकारामध्येही वाढ करण्यात आली आहे. पूर्वी तात्पुरत्या पूरक नळ पाणीपुरवठा योजनेसाठी जिल्हाधिकाऱ्यांच्या आर्थिक अधिकारात १० लाखांची आणि आयुक्तांच्या अधिकारात ३० लाखांची वाढ करण्यात आली आहे.
पाणीपुरवठा योजनेच्या विषेश दुरुस्तीसाठी जिल्हाधिकाऱ्यांच्या अधिकारात १५ लाख तर, आयुक्तांच्या अधिकारात २० लाखांची वाढ करण्यात आली आहे.
जुन्या विहीरींच्या दुरुस्तीसाठी जिल्हाधिकाऱ्यांच्या अधिकारात १ लाख आणि आयुक्तांच्या अधिकारा दीड लाखांची वाढ केली आहे. बैलगाडीने पाणीपुवठा करण्यासाठी प्रतिदीन प्रति बैलगाडीसाठीचा दर ३०० रुपयांवरुन ५०० रुपये करण्यात आला आहे.
चर खोदण्याच्या उपायांत समोवश
ग्रामीण भागातील पिण्याच्या पाण्याची टंचाई परिस्थिती निवारणार्थ घेण्यात येणाऱ्या उपाययोजनांमध्ये धरणामध्ये अथवा तलावामध्ये चर खणण्याचा समावेश करण्यात आला आहे. त्यामुळे नागरिकांना तत्काळ पाणीपुरवठा करणे शक्य होणार आहे.
आता ५ किलोमीटरपर्यंत लाभ
तात्पुरत्या पूरक नळ पाणीपुरवठा योजनांसाठी पूर्वी २ किलोमीटरपर्यंत मंजुरी देण्यात येत होती. आता ही अट ५ किलोमीटरपर्यंत शिथील करण्यात आली आहे. प्रस्ताव तयार करताना कार्यान्वित असलेल्या नळा पाणीपुरवठा योजनेचा उद्भव कमी पडत असेल किंवा पूर्ण आटला असेल तरच तात्पुरती पाणीपुवठा योजना हाती घ्यावी, असेही निर्देश देण्यात आले आहेत.
असे आहेत अधिकार
उपाययोजना...........................जिल्हाधिकारी................... आयुक्त
तात्पुरती पाणीयोजना..............२० लाखापर्यंत..................५० लाखांपर्यंत
पाणीयोजना दुरुस्ती................३० लाखापर्यंत...................५० लाखांपर्यंत
जुन्या विहीरींची दुरुस्ती............०२ लाखांपर्यंत...................३ लाखांपर्यंत
धरण, तलावात चर खोदणे.......०५ लाखांपर्यंत...................१० लाखांपर्यंत
टँकरसाठी हायड्रन्ट................०.५० लाखापर्यंत................१ लाखापर्यंत
बैलगाडीने पाणीपुरवठा.................प्रतिदिन प्रति बैलगाडी ५०० रुपयांपर्यंत
मोबाइल अॅप डाउनलोड करा आणि राहा अपडेट
