कांद्याचे भाव गडगडल्यावरही पैठणच्या कांदा मार्केटमध्ये कांद्याची मोठ्या प्रमाणात आवक सुरूच असून, रविवारी पैठणच्या कांदा मार्केटमध्ये विक्रमी सात हजार कांदा गोण्याची आवक झाली. कांद्याला १०० रुपयापासून ते ८५० रुपये प्रती क्विंटलपर्यंत भाव मिळाला.
या महिन्याच्या पहिल्या आठवड्यात बाजारात कांद्याची आवक घटल्याने कांद्याच्या भावात तेजी आली होती. कांदाला ५०० ते ११०० रुपये प्रती क्विंटलदरम्यान भाव मिळत होता, मात्र मागच्या काही दिवसांपासून शेतकऱ्यांनी बाजारात मोठ्या प्रमाणात कांदा आणला. त्यामुळे कांद्याचे भाव निम्म्याने कमी झाले होते. परिणामी, संतप्त झालेल्या शेतकऱ्यांनी चार मे रोजी पैठणचा कांदा बाजार बंद पाडला होता.
कांद्याचे भाव कमी झाल्याने बाजारात आवक कमी होईल, अशी अपेक्षा व्यक्त करण्यात येत होती, मात्र रविवारी पैठणच्या मार्केटमध्ये विक्रमी सात हजार कांदा गोण्याची आवक झाली. जास्त प्रमाणात कांद्याची आवक झाल्याने भाव गडगडणार, अशी भीती शेतकऱ्यांना वाटत होती. त्यामुळे शेतकऱ्यांच्या कांदा योग्य भावात खरेदी करा, असा इशारा पैठण
कृषी उत्पन्न बाजार समितीचे सचिव एन. आर. विखे यांनी व्यापाऱ्यांना दिला. त्यानंतर रविवारी चांगल्या प्रतीच्या कांद्याला ८५० रुपयांचा भाव मिळाला. हलक्या प्रतीच्या कांद्याला कमीत कमी १०० रुपये प्रती क्विंटल या प्रमाणे भाव मिळाला.
कांद्याला कमीतकमी १५ ते २० रुपयाचा भाव मिळावा, अशी माझी अपेक्षा होती, पण दिवसेंदिवस कांद्याचे भाव घसरत अाहेत. कांदा साठवून ठेवण्याची व्यवस्था नसल्याने नाइलाजाने मला आज कांदा विक्रीसाठी आणावा लागला.
- रामेश्वर उगले, शेतकरी, नायगाव
मोबाइल अॅप डाउनलोड करा आणि राहा अपडेट