एकच प्लॉट अनेकांना विक्री करून फिर्यादीची फसवणूक करणारा आरोपी शेषराव शेगुळे याला गुरुवारपर्यंत पोलिस कोठडीत ठेवण्याचे आदेश प्रथम वर्ग न्यायदंडाधिकारी बी. के. पाटील यांनी दिले.
याप्रकरणी लोचनानाबाई प्रभाकर गुडे (६९, रा. पानगाव, ता. रेणापूर, लि. लातूर) यांनी आरोपी शेषराव दगडू शेगुळे (५०, रा. जयभवानीनगर, एन-२ सिडको) याच्याविरुद्ध फिर्याद दिली होती. फिर्यादीनुसार, गुडे यांची मुले जयभवानीनगरमध्ये राहतात. फिर्यादी आपल्या मुलांना भेटण्यासाठी जयभवानीनगर येथे आल्या असता, त्यांना आरोपी शेषराव दगडू शेगुळे भेटला. त्याने सांगितले की, माझी सुंदरवाडी गट क्रमांक ३९ येथे औरंगाबाद परिसरात प्लॉटिंग विक्रीसाठी आहे. या प्लॉटचे ले-आउट झालेले आहे. तुम्ही माझ्यावर विश्वास ठेवून बाँडवर प्लॉट खरेदी करा. तुम्ही म्हणाल तेव्हा मी माझ्या पैशाने तुम्हाला रजिस्टरी करून देईन. आरोपीच्या बोलण्यावर विश्वास ठेवून फिर्यादीने सुंदरवाडी येथे गट नंबर ३९मधील २० बाय ३० आकाराचे प्लॉट नंबर १६७, १६८, १६९, १७०, १७१, १७२ असे सहा प्लॉट ९ लाख रुपयांत १४ डिसेंबर २०१४ रोजी खरेदी केले. त्याच दिवशी शेंगुळे फिर्यादीला सुंदरवाडी येथे घेऊन गेला व त्याने ते प्लॉट फिर्यादीला दाखाविले, मात्र मार्किंग करून दिली नाही. माझ्याकडे पैसे नसल्याने मी या प्लॉटवर तार कंपाउंड केले नसल्याचे सांगितले. प्लॉटला मार्किंग करून देण्याबाबत सांगितले असता, तो वेळ मारून नेत असे. पुढे फिर्यादी आणि त्यांचे नातेवाईक ९ एप्रिल २०१६ रोजी प्लॉटचे मार्किंग करण्यासाठी सुंदरवाडीला गेला असता, आजुबाजुच्या लोकांनी तेच प्लॉट आणखी दोघांना विकले असल्याचे सांगितले. याबाबत आरोपी शेषराव शेंगुळे याला विचारले असता, त्याने माहिती न देता फिर्यादीला खोट्या केसेसमध्ये दाखल करण्याची धमकी दिली. फिर्यादीने मुकुंदवाडी पोलिस ठाण्यामध्ये दिलेल्या तक्रारीवरून पोलिसांनी आरोपी शेषराव शेंगुळे याला अटक केली. प्रकरणाच्या सखोल तपासासाठी आरोपीला पोलिस कोठडी देण्याची विनंती सहाय्यक सरकारी वकील डी. आर. काठुळे यांनी कोर्टात केली. ही विनंती ग्राह्य धरून कोर्टाने आरोपीला पोलिस कोठडीत ठेवण्याचे आदेश दिले.
मोबाइल अॅप डाउनलोड करा आणि राहा अपडेट
