विद्युत रोहित्रासाठी शेतकऱ्यांकडून पैसे मागाल तर, पोलिसात गुन्हे दाखल केले जातील, असा इशारा राज्याचे उर्जामंत्री चंद्रशेखर बावनकुळे यांनी महावितरणच्या अधिकाऱ्यांना दिला. बावनकुळे यांनी बुधवारी सिल्लोड येथे अधिकाऱ्यांची बैठक घेतली. या बैठकीला शेतकरी, वीज ग्राहक व भाजप पदाधिकारी उपस्थित होते.
या बैठकीत शेतकरी, वीज ग्राहका, भाजप पदाधिकाऱ्यांनी समस्यांचा पाढा वाचला. जिल्हा परिषदेचे माजी उपाध्यक्ष राजेंद्र जैस्वाल यांनी अधिकारी काम करत नसल्याचे सांगितले. सिल्लोड व सोयगाव तालुक्यातील शेतकऱ्यांना विद्युत रोहित्रासाठी होणाऱ्या फजितीची माहिती मंत्र्यांना दिली. यावेळी शेतकऱ्यांनी निवेदने दिली. रोहित्र जळाल्यानंतर ते बदलून देण्यासाठी अधिकारी कार्यालयात चकरा मारायला लावतात, रोहित्र लवकर देत नाहीत, पैसे मागतात, अशा तक्रारी केल्या. दोन वर्षे होऊनही विद्युत जोडणी दिली जात नसल्याचे सांगितले. या तक्रारी ऐकल्यानंतर उर्जामंत्र्यांनी अधिकारी, कर्मचाऱ्यांना निलंबित करण्याचा इशारा दिला. रोहित्र जळाल्यानंतर सात दिवसांच्या आत दुरुस्त करून किंवा बदलून द्यावा, असे आदेश दिले. अधिकारी, कर्मचाऱ्यांची तक्रार माझ्या मोबाइलवर करा, असे सांगितले.
या बैठकीला माजी आमदार सांडु पाटील लोखंडे, माजी जिल्हाध्यक्ष सुरेश बनकर, किसान मोर्चाचे प्रदेश सरचिटणीस मकरंद कोर्डे, तालुकाध्यक्ष ज्ञानेश्वर मोठे, उपसभापती इद्रीस मुलतानी, माजी तालुकाध्यक्ष दिलीप दाणेकर, ग्रामीण विभागाचे कार्यकारी अभियंता सादोरे, सहायक अभियंता अरूण गायकवाड आदी उपस्थित होते.
कर्मचारी निलंबित
सोयगाव तालुक्यातील शेतकऱ्यांच्या तक्रारीवरून विजेची कामे करणारी खासगी बीव्हीजी हा कंपनीचे कर्मचारी सचिन बर्दापूरकर यांना निलंबित करावे, असे आदेशत्यांनी दिले.
मोबाइल अॅप डाउनलोड करा आणि राहा अपडेट
