राष्ट्रीय स्वयंसेवक संघाचे ज्येष्ठ प्रचारक व केंद्रीय कार्यकारिणी सदस्य सुरेश केतकर यांचं आज निधन झालं. ते ८२ वर्षांचे होते. गेल्या काही काळापासून पार्किन्सनने आजारी असलेल्या केतकरांना लातूरच्या रुग्णालयात उपचारासाठी दाखल करण्यात आलं होतं, तिथेच त्यांची प्राणज्योत मालवली.
मूळ पुण्याचे असलेले केतकर यांनी बी.एस.सी. व बी.पी.एड. पदव्या घेतल्यानंतर काही काळ नोकरी केली. पुढे ते संघाचे प्रचारक म्हणून कार्यरत झाले. काही काळ सांगली, सोलापूर येथे काम केल्यानंतर पुढे त्यांनी मुंबई महानगर प्रचारक, महाराष्ट्र प्रांताचे शारीरिक शिक्षण प्रमुख, पश्चिम क्षेत्र प्रचारक, अखिल भारतीय शारीरिक शिक्षण प्रमुख, अखिल भारतीय प्रचारक प्रमुख, सह-सरकार्यवाह इत्यादी जबाबदाऱ्या समर्थपणे सांभाळल्या होत्या.
चैतन्याचा झरा असलेले केतकर देशभरातील लाखो कार्यकर्त्यांच्या कुटुंबाचे जणू पालकच होते. त्यांनी उभ्या केलेल्या प्रत्येक कामावर त्यांच्या आत्मियतापूर्ण शैलीचा प्रभाव होता. देशभरातील प्रवासात भेटणाऱ्या प्रत्येक कार्यकर्त्याची तपशीलवार माहिती लक्षात ठेवून पुढच्यावेळी त्यांची प्रेमळ विचारपूस करणारे केतकर हे संघकामाचा चालता-बोलता स्मृतिकोश होते.
गेली काही वर्षे वार्धक्यामुळे तसेच अनेक शारीरिक व्याधींनी ग्रस्त असूनही सुरेश केतकर यांनी शक्य त्या पद्धतीने संघाचे काम सुरूच ठेवले होते. आपल्या प्रत्येक प्रवासात निवडक कार्यकर्त्यांशी संवाद साधणे, पत्रांमार्फत देशभरातील कार्यकर्त्यांचे शंकासमाधान करणे अशी कामे ते सातत्याने करीत होते. क्रीडा भारती, संस्कार भारती, अखिल भारतीय किसान संघ अशा अनेक संस्था-संघटनांना उभे करण्यात केतकर यांचे मोठे योगदान होते.
गेले काही वर्षे पार्किन्ससचा विकार बळावल्यामुळे लातूर येथे त्यांचा मुक्काम होता. त्यांना विवेकानंद रूग्णालयात दाखल करण्यात आले होते. पण आज सकाळी त्यांनी अखेरचा श्वास घेतला. लातूर येथेच त्यांच्यावर अंत्यसंस्कार होणार आहेत.
स्वतःसाठी कठोर आणि इतरांसाठी मृदू असलेले केतकर हे आपले 'रोल मॉडेल' होते. कर्मठ आणि नेमस्त जीवन जगत असतानाही सर्व कार्यकर्त्यांना त्यांच्या प्रेमाचा स्पर्श झाला होता. त्यांच्या स्मृती यापुढेही आम्हाला काम करण्याची प्रेरणा देत राहतील, अशा भावना संघाचे सरसंघचालक मोहन भागवत यांनी व्यक्त केल्या.
मोबाइल अॅप डाउनलोड करा आणि राहा अपडेट
