केंद्र सरकारकडून येणारी तूरडाळ येत्या काही दिवसांमध्ये शहरातील खुल्या बाजारात (मॉलमध्ये) विक्रीसाठी उपलब्ध करण्यात येणार आहे. ही डाळ ९५ रुपये प्रतिकिलो दराने उपलब्ध करण्यात येणार आहे. यासाठी शासनस्तरावर हालचाली सुरू असल्याची माहिती सूत्रांनी दिली.
गेल्या काही दिवसांमध्ये तूरडाळीचे भाव गगनाला भिडले होते. या कालावधीमध्ये व्यापाऱ्यांनी सर्वसामान्य नागरिकांना १४० ते १६० रुपये प्रतिकिलो डाळीची विक्री केली होती. आता नागरिकांना कमी दरात डाळ उपलब्ध करून देण्यासाठी शासनाने प्रयत्न सुरू केले आहेत. राज्य शासन केंद्र सरकारकडून तूर खरेदी करणार आहे. त्यापासून तयार होणारी डाळ बृहन् मुंबई, पुणे, नागपूर व औरंगाबामधील खुल्या बाजारात विक्री करण्यात येणार आहे. नागरिकांना डाळ विकत घेणे शक्य व्हावे यासाठी सरकारचे प्रयत्न सुरू आहेत. यानुसार औरंगाबाद शहरातील किराणा मर्चंट असोसिएशन, डी मार्ट, सपना सुपर मार्केट, मर्चंट असोसिएशन, बेस्ट प्राइज, स्टार बाजार, मोर या दालनांतून येत्या काही दिवसांमध्ये ९५ रुपये प्रतिकिलो मिळणारी सरकारी डाळ उपलब्ध
होणार आहे. सणासुदीचे दिवस सुरू होत आहेत. तूरडाळ; तसेच इतर डाळींचा व्यापाऱ्यांकडून साठा होऊ नये म्हणून खुल्या बाजारात विक्री करण्यात येणारी सरकारी डाळ ही ऑगस्ट, सप्टेबर व ऑक्टोबर या महिन्यांमध्ये सरकारी दरामध्ये उपलब्ध करून देण्यात येणार आहे.
सणासुदीतही आउटलेट सुरू
येत्या काही दिवसांमध्ये श्रावण महिना व त्यानंतर दसरा, दिवाळी हे सणासुदीचे दिवस सुरू होत आहेत. या कालावधीमध्ये तूरडाळ; तसेच इतर डाळींचा व्यापाऱ्यांकडून साठा होऊ नये म्हणून खुल्या बाजारात विक्री करण्यात येणारी सरकारी डाळ ही ऑगस्ट, सप्टेबर व ऑक्टोबर या महिन्यांमध्ये सरकारी दरामध्ये उपलब्ध करून देण्यात येणार आहे.
सामाजिक बांधिलकतून १२० रुपये किलोने विक्री सुरू
सामाजिक उपक्रमाचा एक भाग म्हणून शहरातील व्यापाऱ्यांनी १२० रुपये प्रतिकिलो डाळ विक्री करण्यासाठी शहरात तीन केंद्र सुरू केले आहेत. शहरातील जुना मोंढा येथील संजयकुमार अँड कंपनी व जितेंद्रकुमार हिरजी अँड कंपनी; तसेच जुगराज कुंदनलाल मुथा यांनी शासकीय मदतीशिवाय १२० रुपये प्रतिकिलोने डाळ विक्रीला सुरुवात केली आहे. या ठिकाणी नागरिकांसाठी प्रत्येकी १ किलो डाळीचे पॅकेट तयार करण्यात आले आहेत. मंगळवारी अपर जिल्हाधिकारी पी. एल. सोरमारे यांच्या हस्ते उपक्रमाचे उद्‍घाटन करण्यात आले.
संपूर्ण जिल्ह्यात आवाहन करणार
औरंगाबाद शहरातील व्यापाऱ्यांनी सुरू केलेल्या या उपक्रमाप्रमाणेच जिल्ह्यातील प्रत्येक तालुक्यात; तसेच मोठ्या गावांमध्ये अशा प्रकारचा उपक्रम व्यापाऱ्यांनी सुरू करण्यासंदर्भात प्रशासनाकडून विचार करण्यात येत अाहे. यासाठी व्यापाऱ्यांसोबत चर्चा करण्यात येणार असल्याचे पुरवठा विभागातील वरिष्ठ अधिकाऱ्यांनी सांगितले.
मोबाइल अॅप डाउनलोड करा आणि राहा अपडेट
