म. टा. प्रतिनिधी, औरंगाबाद
अखेर आरटीओ दक्ष झाले आहेत. त्यांनी गुरुवारपासून उमेदवारांची ओळख पटल्याशिवाय त्यांना वाहन परवाना परीक्षेच्या सभागृहात प्रवेश करण्यास बंदी घातली आहे. शिकाऊ वाहन परवाना परीक्षेसाठी डमी उमेदवार बसल्यानंतर ही कारवाई करण्यात आली.
आरटीओ कार्यालयात बुधवारी आकाश पांडे नावाच्या उमेदवाराच्या जागी साहिल चुडीवाल नावाचा तरुण परीक्षा देण्यासाठी आला होता. या घटनेनंतर गुरुवारी सकाळपासूनच वाहन परवाना परीक्षा देण्यासाठी आलेल्या उमेदवारांच्या ओळखपत्राची छाननी करण्यासाठी एका सहाय्यक मोटार वाहन निरीक्षकाची नेमणूक करण्यात आली होती. संबंधित कर्मचारी शिकाऊ वाहन परवान्यासोबत जोडलेली कागदपत्रे आणि आपल्या सोबत ओळखपत्र असलेल्या उमेदवारांनाच प्रवेश देत होते. शिकाऊ वाहन परवाना घेण्यासाठी आलेल्या उमेदवारांचीही अशीच तपासणी करण्यात आली. या सभागृहात उमेदवारांशिवाय अन्य कोणलाही प्रवेश दिला जात नव्हता. डमी उमेदवार मिळाल्याचे प्रकरण सापडल्यानंतर, आरटीओ विभागाकडून ही कारवाई करण्यात आली.
आज शिकाऊ वाहन परीक्षा होणार
९ सप्टेंबर रोजी अनेक उमेदवारांनी शिकाऊ तसेच पक्के वाहन परवाना चाचणीसाठी अपॉइंटमेट घेतली आहे. त्यामुळे महालक्ष्मीसाठी सुटी जाहीर करूनही या उमदेवारांची गैरसोय टाळण्यासाठी वाहन चाचणी परवाना परीक्षा घेण्यात येणार आहे. याशिवाय १७ सप्टेंबर रोजी हैदराबाद मुक्तीसंग्राम दिनाची सुट्टी असल्याकारणाने अशा अपाइंटमेंट घेणाऱ्या उमेदवारांचे अर्ज १६ सप्टेंबर आणि १९ सप्टेंबर रोजी स्वीकारले जाणार आहेत, अशी माहिती सहाय्यक प्रादेशिक परिवहन अधिकारी किरण मोरे यांनी दिली.
वाहन परवाना परीक्षा देण्यासाठी बुधवारी डमी उमेदवार आला होता. विभागातील ही बोगसगिरी बंद करण्यासाठी आम्ही आजपासून उमेदवारांची ओळख पटल्यानंतरच त्याला परीक्षा सभागृहात प्रवेश दिला. ही कारवाई यापुढेही सुरू राहील. - सर्जेराव शेळके, प्रादेशिक परिवहन अधिकारी
मोबाइल अॅप डाउनलोड करा आणि राहा अपडेट
