नऊ जुगारी गजाआड
म. टा. प्रतिनिधी, औरंगाबाद
जुगार अड्ड्यावर छापा टाकत रोकडा हनुमान कॉलनी परिसरात जुगार खेळणाऱ्या नऊ जुगाऱ्यांना क्रांतिचौक पोलिसांनी अटक केली आहे. रविवारी दुपारी एक वाजता ही कारवाई करण्यात आली.
क्रांतिचौक पोलिस ठाण्याचे डीबी पथक पेट्रोलिंग करीत असताना त्यांना खबऱ्याकडून माहिती मिळाली की, सदरील परिसरात भारत गॅस एजन्सीच्या बंद पडलेल्या गोडाऊनजवळ काही इसम जुगार खेळत आहेत. मिळालेल्या माहितीवरून या ठिकाणी दुपारी एक वाजेच्या सुमारास छापा टाकला असता तेथे काही जण झन्नामन्ना प्रकारचा जुगार खेळताना दिसून आले. त्या सर्व नऊ जणांना पोलिसांनी ताब्यात घेतले. अमरसिंग भगतसिंग विश्‍वकर्मा, रामबहाद्दूर गोपाल सोनार, शेख सरोजोद्दीन शेख इनामउल्ला, भजनसिंग मान बहाद्दूर कामी, नरबहाद्दूर कालुसिंग बोहरा, पुष्पराज गगनसिंग विश्‍वकर्मा, दिलबहाद्दूर मनबहाद्दूर बीके, उमेश डमर कामी, शेरधन बहाद्दूर कामी अशी अटक केलेल्या आरोपींची नावे आहेत. आरोपींच्या ताब्यातून साडेपंधरा हजार रूपये रोख जप्त करण्यात आले आहेत. सदरील कारवाई परिमंडळ एकचे उपायुक्त वसंत परदेशी पोलिस निरीक्षक नागनाथ कोडे यांच्या मार्गदर्शनाखाली निरीक्षक इंदलसिंग बहुरे व पथकाने केली.
मोबाइल अॅप डाउनलोड करा आणि राहा अपडेट
