म. टा. प्रतिनिधी, औरंगाबाद
'उरीमध्ये सैनिकांवर झालेल्या दहशतवादी हल्ल्यानंतर देशवासीयांमध्ये प्रचंड संताप आहे. लष्करी पातळीवर आणि हुशारीने पाकिस्तानला धडा शिकविण्याची हीच वेळ असून सरकारने ही वेळ गमावता कामा नये,' असे प्रतिपादन परराष्ट्र धोरणाचे अभ्यासक आणि इन्स्टिट्यूट फॉर नॅशनल सेक्युरिटी स्टडिजचे संचालक शेषाद्री चारी यांनी शनिवारी केले.
विष्णूपंत बी. अदवंत व्याख्यानमाला व माणिकचंद पहाडे विधी महाविद्यालयातर्फे आयोजित राज्यस्तरीय वादविवाद स्पर्धेनिमित्त ते शहरात आले होते. मार्गदर्शनानंतर त्यांनी पत्रकारांशी संवाद साधला. भारत व पाकिस्तानमधील तणावाच्या परिस्थितीबाबत ते म्हणाले, 'आंतरराष्ट्री पातळीवर पाकला मात देण्यासाठी भारताचे प्रयत्न सुरू आहेत. त्याला यशही मिळत आहे. उरीनंतर भारतीयांमध्ये पाकिस्तानबाबत प्रचंड रोष असून तो स्वाभाविक आहे. या घटनेनंतर आपल्याला संधी असून, ही संधी न गमावता पाकला लष्करी पातळीवर उत्तर द्यायलाच हवे. भारताने पाकिस्तानसोबतचे आर्थिक व्यवहारही कमी करावेत. सिंधू कराराबाबत पूनर्विचार करण्याची गरज भारताने पूर्वीच स्पष्ट केली आहे. पाकिस्तानमध्ये सिंधूचे पाणी सिंध मधल्या लोकांना देण्याऐवजी ते इस्लामाबाद, पाकव्याप्त पंजाबमध्ये दिले जाते. त्यामुळे सिंधमध्येही संघर्षाचे वातावरण निर्माण झाले आहे. १९७१ मध्येच भारताने सिंधू नदीच्या पाण्याचे फेरवाटप करायला हवे होते.'
समान नागरी कायद्याची गरज
तापडिया नाट्यमंदिरात आयोजित व्याख्यानमालेत 'सामाजिक समरसता आणि समान नागरी कायदा' या विषयावर चारी यांनी मार्गदर्शन केले. ते म्हणाले 'धर्मनिरपेक्षता, सामाजिक समरसेसाठी समान नागरी कायदा महत्त्वाचा ठरतो. समाजाला एकत्रित ठेवण्याचे काम धर्माच्या माध्यमातूनच होते. धर्माच्याबाबतीत प्रत्येक समज-गैरसमज आहेत.' यावेळी प्राचार्य डॉ. सी. एम. राव, अॅड. आर. डी. देशपांडे यांची उपस्थिती होती.
वकिलीसमोरही आव्हानेः रावते
वादविवाद स्पर्धेचा बक्षीस वितरण समारंभ परिवहन मंत्री दिवाकर रावते यांच्या उपस्थितीत झाला. विद्यार्थ्यांना मार्गदर्शन करताना रावते म्हणाले, 'याक्षेत्रात अनेक संधी असून आव्हानेही मोठ्या प्रमाणात आहेत. आपल्याला कोणत्या विषयात स्पेशलायइझेशन करायचे हे ठरविले पाहिजे. आज विविध न्यायालयांमध्ये सुमारे तीन कोटी खटले प्रलंबित आहेत.' यावेळी संस्थेचे उमाकांत पाटील यांची प्रमुख उपस्थिती होती.
मोबाइल अॅप डाउनलोड करा आणि राहा अपडेट
