करमाड ते देऊळगावराजा दरम्यान एसटी बसमधील घटना
म. टा. प्रतिनिधी, औरंगाबाद
एसटी बसमध्ये जेष्ठ नागरिक दाम्पत्यास गुंगीचे बिस्कीट देऊन दीड लाखांचा ऐवज लंपास करण्यात आला. गेल्या शनिवारी करमाड ते देऊळगावराजा दरम्यान हा प्रकार घडला. याप्रकरणी सिडको पोलिस ठाण्यात गुन्हा दाखल करून करमाड पोलिसांकडे वर्ग करण्यात आला आहे.
सिडको परिसरातील ६० वर्षांची महिला व त्यांचे पती २४ सप्टेंबर रोजी एसटीने औरंगाबादवरून देऊळगावराजाला जात होते. सिडको बसस्टँडवरून ते बसमध्ये बसले. यावेळी करमाडजवळ अनोळखी सहप्रवाशाने त्यांना बिस्कीट खायला दिले. हे बिस्कीट खाल्यानंतर काही वेळातच त्यांना गुंगी आली. या दरम्यान आरोपीने त्यांच्या पतीच्या हातातील सोन्याचे लॉकेट, अंगठ्या व रोख चार हजार रुपये असा १ लाख ४४ हजारांचा ऐवज काढून घेतला. देऊळगावराजा जवळील वाटीका ढाब्याजवळ शुद्ध आल्यानंतर हा प्रकार या दाम्पत्याच्या लक्षात आला. याप्रकरणी गुरुवारी सिडको एमआयडीसी पोलिस ठाण्यात गुन्हा दाखल करण्यात आला. मात्र, गुन्हा करमाड पोलिस ठाणे हद्दीत घडला असल्याने करमाड पोलिस ठाण्याकडे पोलिस उपायुक्तांचा मार्फत हा गुन्हा वर्ग करण्यात आला.
दोन महिन्यांत दुसरी घटना
दोन महिन्यांत गुंगीचे औषध देऊन लुबाडण्याची ही जालना मार्गावरील दुसरी घटना आहे. किसन रतन सरदार (वय ६५, रा. एन ९, शिवाजीनगर) हे शेतकरी ३१ जुलै रोजी दुपारी ते जालना येथे जाण्यासाठी सिडको बसस्टँडवर आले होते. पुणे-अकोला बसमध्ये ते बसले. शेजारी बसलेल्या अनोळखी सहप्रवाशाने त्यांना चॉकलेट दिले. या चॉकलेटमध्ये गुंगीचे औषध मिसळण्यात आले होते. चॉकलेट खाल्यानंतर सरदार बेशुद्ध झाले. गुंगलेल्या सरदार यांच्याजवळील १६ हजार रुपये, सोन्याची अंगठी व मोबाइल असा ४७ हजार ५०० रुपयांचा ऐवज काढून घेण्यात आला.
मोबाइल अॅप डाउनलोड करा आणि राहा अपडेट
