म. टा. प्रतिनिधी, बीड
बीड जिल्ह्यातील अनेक भागात रविवारी मुसळधार पाऊस झाला. त्यामुळे अनेक ठिकाणी पुराचा फटका बसला आहे. जिल्ह्यातील बहुतेक नद्या दुथडी भरून वाहत आहेत. अनेक गाव तलाव आणि पाझर तलाव फुटल्याने खरीप पिकांचे अतोनात नुकसान झाले आहे. या पावसाने जिल्ह्यात ओला दुष्काळसदृश्य परिस्थिती निर्माण झाली आहे. बीड शहरात १९८९ साली आलेल्या पुराची पुनरावृत्ती झाली. आंबेडकर पुतळा, बालाजी मंदिराचा परिसर जलमय झाला आहे. जिल्ह्यात झालेल्या मुसळधार पाऊस झाला.
बीडजवळ असलेल्या डोकेवाडा प्रकल्प रात्री पाटोदा तालुक्यात झालेल्या पावसाने भरून त्यातील पाणी प्रवाह बिंदुसरा नदीत अचानक आले. त्यामुळे बीड शहरात बिंदुसरा नदीचे पाणी शिरले. आंबेडकर पुतळा परिसरात नदीचे पाणी घुसले. या भागात अडकलेल्या १५ नागरिकांना शोध व बचाव पथकाने नागरिकांच्या सहाय्याने बाहेर काढले.
बीड शहरातील खासबाग परिसरात शिरलेल्या नदीच्या पाण्यात तिसच्या जवळपास कुटुंब अडकली होती. त्या कुटुंबांना सुरक्षित स्थळी हलवण्यात आले. गुलजारपूरा, मासूम कॉलनी, मोमिनपुरा भागात पाणी शिरल्याने नगर परिषद कर्मचारी यांच्या मदतीने समाज मंदिरात, डाक बंगला येथे निवास व्यवस्था करण्यात आली. तर कृष्ण मंदिर, सावता माळी चौक, साई पॅलेस जालना रोड परिसरात मोठ्या प्रमाणात पाणी साचल्याने हे पाणी काढण्यासाठी जेसीबी मशीन व कर्मचारी तैनात करण्यात आले.
बीड शहरात आलेल्या पावसाने निर्माण झालेली पूरस्थिती पाहण्यासाठी बिंदुसरा नदी किनारी नागरिकांनी मोठी गर्दी केली होती. बीडकडून उस्मानाबाद, सोलापूर, केज अंबाजोगाई लातूरकडे जाणारी मोठी वाहने एस. टी. बसेस बिंदुसरानदीवरील बार्शी नाक्यावरील पूल धोकादायक बनल्याने पाटोदा मांजरसुंबा अशी वळवण्यात आली होती. जिल्हाधिकारी नवलकिशोर राम, पोलीस अधीक्षक अनिल पारसकर यांनी शहरातील ठिकठिकाणी निर्माण झालेल्या पूर स्थितीला भेट देऊन पाहणी केली.
डोकेवाडी तलावाचे पाणी बिंदुसरेत आल्याने पाण्याची पातळी वाढली होती. दुपारनंतर पाणी ओसरत असून काळजी करण्याचे कारण नाही. नदी पात्राजवळ लोकांनी जाऊ नये, असे आवाहन जिल्हाधिकारी नवल किशोर राम यांनी परिस्थितीची प्रत्यक्ष पाहणी करून केले.
१४४ लहान मोठे सिंचन प्रकल्प भरले
या पावसाने बिंदुसरा, कुंडलिका, सिंदफना, मांजरा, गोदावरी नद्या दुथड़ी भरून वाहत आहेत. सर्व १४४ लहान मोठे सिंचन प्रकल्प पूर्ण भरले आहेत. माजलगाव धरणाचे तीन दरवाजे एक मीटरने उघडले आहेत. आठ दरवाजे दरवाजे अर्ध्या मीटरने उघडले आहेत. सोन्ना खोटा येथील उर्ध्व कुंडलिका धरणाच पाण्याने पुल वाहून गेल्याने चिखलबिड गावाचा संपर्क तुटला आहे. परळी तालुक्यात वाण नदीत पांगरी येथील नामदेव भिवाजी कनकुटे आणि त्यांच्या दोन शेळ्या तर गेवराई तालुक्यात सिंदफना नदीत हिरापुर येथील अनिल नवनाथ कळसकर ( वय २९) हा युवक हे वाहून गेला असून या दोघांचा शोध सुरू आहे.मांजरा नदीला महापूर आला आहे. बीड तालुक्यातील हिंगणी आणि चौसाळा नदीच्या संगमावर हिंगणी बु. गावचे गोरक्ष लोखंडे यांना एनडीआरएच्या जवानांनी पुरातुन सुखरुप सुटका केली.
मोबाइल अॅप डाउनलोड करा आणि राहा अपडेट
