म. टा. प्रतिनिधी, औरंगाबाद
‘लहान - मोठ्या सर्व शस्त्रक्रियांमध्ये, आयसीयूमध्ये, पेन मॅनेजमेंट, पेनलेस डिलिव्हरीमध्ये भूलशास्त्रतज्ज्ञ डॉक्टरांची भूमिका महत्त्वाची असते. वैद्यकशास्त्रामध्ये अत्यंत महत्वाची भूमिका बजावणाऱ्या भूलतज्ज्ञांनी आपली पडद्यामागील कलाकार ही भूमिका सोडून समाजासमोर यायला हवे,’ असे प्रतिपादन डॉ. बाल वेंकटसुंदरम यांनी शनिवारी येथे केले.
‘इंडियन सोसायटी ऑफ अनेस्थेशियालॉजिस्ट’ची राज्य तसेच शहर शाखा आणि एमजीएम वैद्यकीय महाविद्यालय व रुग्णालय यांच्यावतीने आयोजित राज्यस्तरीय भूलशास्त्रावरील परिषदेच्या (मिसाकॉन २०१६) दुसऱ्या दिवशी, शनिवारी एका परिसंवादात डॉ. वेंकटसुंदरम यांनी मार्गदर्शन केले. ‘अनेक गुंतागुंतीच्या शस्त्रक्रियांमध्ये आता पूर्ण भूल न देता लोकल ऍनेस्थेशिया दिल्याने अनेक धोके टाळतात, रुग्णाला लवकर डिस्चार्ज मिळू शकतो आणि याचे कोणतेही साईड इफेक्टही नाहीत,’ असे त्यांनी आपल्या विषयाची मांडणी करताना सांगितले . दिवसभर तीन हॉलमध्ये तीस तज्ज्ञ डॉक्टरांनी मार्गदर्शन केले.
डॉ. वेंकटसुंदरम म्हणाले, ‘आता भूलतज्ज्ञांनीच पुढे येणे गरजेचे झाले आहे. आपल्या शास्त्राचे महत्त्व सर्वसामान्यांना कळण्याकरिता संघटनेच्या माध्यमातून आणीबाणीच्या प्रसंगी करावयाच्या प्रथमोपचारांच्या प्रशिक्षणासारखे विविध उपक्रम राबविणे अत्यावश्यक आहेत. भुलीची गरज आणि महत्व पटवून देण्याकरिता जनजागृती, रुग्ण आणि त्यांच्या नातेवाईकांशी संवाद अशा विविध माध्यमातून संवाद वाढवून समाजापर्यंत पोहोचवा,’ असे आवाहन त्यांनी केले. संघटनेच्या माध्यमातून राबविण्यात येणाऱ्या जीवन संजीवन योजनेअंतर्गत, आणीबाणीच्या प्रसंगी रुग्णावर कोणते प्रथमोपचार करावेत, कसे करावेत याचे मोफत प्रशिक्षण नागरिकांना देण्यात येणार आहे. याचाच एक भाग म्हणून रविवारी सकाळी १० ते १२ दरम्यान ६५ ऑपरेशन थिएटर असिस्टंटना असे प्रशिक्षण देण्यात येणार आहे. यावेळी संघटनेची नूतन राज्य कार्यकारिणी या वेळी निवडण्यात आली. अध्यक्षपदी डॉ. हितेंद्र महाजन (नाशिक), सचिव म्हणून डॉ. मनीषा काटीकर (सोलापूर) यांची निवड झाली.
मोबाइल अॅप डाउनलोड करा आणि राहा अपडेट
