म. टा. प्रतिनिधी, औरंगाबाद
यादवांचा अभेद्य देवगिरी, जलदुर्ग जंजिरा, प्रतापगड व स्वराज्याची राजधानी रायगड. प्रत्येक किल्ला म्हणजे इतिहास. या किल्‍ल्यांना वास्तवात साकारण्याची संधी इतिहासप्रेमींना गुरुवारी मिळाली. नव्या पिढीला इतिहास माहिती नाही, हा समज फोल ठरवत विद्यार्थी, युवक, महिलांनी किल्ला बनवा स्पर्धेला उत्स्फूर्त प्रतिसाद दिला.
महाराष्ट्र टाइम्स, देवगिरीयन ट्रेकर्स व यशवंत कला महाविद्यालयाच्या वतीने शालेय व महाविद्यालयीन विद्यार्थ्यांसाठी आयोजित किल्ला बनवा स्पर्धेस गुरुवारी सुरुवात झाली. यशवंत महाविद्यालयाच्या प्रांगणात २१ संघांनी या स्पर्धेचे वलय वाढवले. किल्‍ल्यांचे चित्र काढा, या स्पर्धेतही विविध किल्‍ल्यांचे चित्रे पाहायला मिळाली. ५ बाय ५ जागेवर देवगिरी, प्रतापगड, जंजिरा व रायगड यापैकीच एक किल्ला बनवायचा होता. महाराष्ट्राच्या गौरवशाली इतिहासाला उजाळा व आनंदनिर्मितीतून किल्ले बनवताना सर्व स्पर्धक आपला किल्ला कसा हुबेहूब होईल याची काळजी घेत होते. यामध्ये आर्किटेक्ट आई-मुलगा, ज्योतीनगरच्या विशाल अपार्टमेंटची मुले, डॉक्टर मित्रांचा कट्टा, विनायकराव पाटील शाळेतील शिक्षिकांचा ग्रुपही सहभागी झाला. सुरेंद्र कुलकर्णी, पीएसआय आहेर व लाड, डॉ. राजीव मुंदडा, सहाय्यक विक्रीकर अधिकारी फावडे, देवगिरी ट्रेकर्सचे अध्यक्ष चंद्रकांत गायकवाड, उपाध्यक्ष प्रा. अरुण काटे, यशवंत महाविद्यालयाचे प्राचार्य डॉ. रवींद्र तोरवणे, प्रदीप बुरांडे आदींनी कार्यक्रमाचे उद्घाटन केले. कार्यक्रमाच्या यशस्वितेसाठी प्रा. डॉ. कल्याण माळी, धनंजय काळे, प्रा. जिजा शिंदे, प्रा. बाळासाहेब शिंदे, मिलिंद देशमुख, उपप्राचार्य संभाजी कमानदार, प्रा. अंकुश आवटी, प्रा. एन. जी. गायकवाड आदी परिश्रम घेत आहेत.
आज बक्षीस वितरण
शुक्रवारी दुपारी ४ वाजता बक्षीस वितरण व २९ ऑक्टोबरला सायंकाळी पाचपर्यंत प्रर्दशन खुले असेल. शुक्रवारीही चित्रकला स्पर्धा सकाळी ९.३० ते १०.३० पर्यंत होईल.ॉ
माझ्या दादाला किल्ले बनवणे खूप आवडते. मी स्वतः कधी किल्ला बनवला नव्हता. यावर्षी मी दहावीला आहे, पण स्वतःला या स्पर्धेत भाग घेण्यावाचून अडवू शकलो नाही. - सम्राट रोडे
देवगिरी किल्यामध्ये क्रिएटिव्हीटीला खूप वाव होता. आमच्या ग्रुपमधील प्रत्येकाला स्वतंत्रपणे खूप काही करण्याची संधी मिळाली. - सरिता हिरगीर
मोबाइल अॅप डाउनलोड करा आणि राहा अपडेट
