सराफा रोडवरील एकाच मालमत्तेच्या भूसंपादनासाठी एफएसआय व टीडीआर असा दुहेरी मोबदला मागितल्याप्रकरणी महापालिका प्रशासनाने दिलेल्या तक्रारीनुसार सिटीचौक पोलिसांनी बुधवारी अखेर मालमत्तेचे जीपीएधारक अब्दुल सिकंदर अब्दुल साजेद यांच्याविरुद्ध कलम ४२०नुसार फसवणुकीचा गुन्हा दाखल केला. याप्रकरणी ‘मटा’ने १८ नोव्हेंबर रोजी वृत्त प्रसिद्ध केले होते.
सराफा रोडवरील सीटीएस क्रमांक ६२१२ येथील मालमत्ताधारक अब्दुल समीर अब्दुल साजेद यांनी १५ मीटर रस्त्यासाठी जागा दिली. त्या मोबदल्यात एफएसआय देण्याची मागणी केली. मालमत्तेची रस्त्यात बाधित झालेली जागा महापालिकेला हस्तांतरित करावी, असे पत्र नगररचना विभागाच्या उपअभियंत्यांनी १७ जुलै २००८ रोजी अर्जदाराला दिले. त्यानुसार मालमत्ताधारकाने तेवढी जागा रस्ता रुंदीकरणासाठी दिली. त्या आधारे नगररचना विभागाने मालमत्ताधारकाला १९ जुलै २००८ रोजी बांधकाम परवानगी व एफएसआय दिला. त्यानंतर मालमत्ताधारकाने २०१३-१४मध्ये त्याच जागेसाठी टीडीआरची मागणी केली. अब्दुल समीर अब्दुल साजेद यांनी अब्दुल सिकंदर अब्दुल साजेद यांना मुख्त्यारनामा दिला. नगररचना विभागाने अब्दुल सिकंदर अब्दुल साजेद यांना टीडीआर देखील मंजूर केला. त्याबाबत १७ मे २०१४ रोजी जाहीर प्रगटन देऊन आक्षेप मागवण्यात आले. आक्षेपाची मुदत संपल्यावर अब्दुल सिकंदर यांना २७ मे रोजी त्याच जागेचा टीडीआर देण्यात आला.
एकाच मालमत्तेसाठी एफएसआय व टीडीआरच्या स्वरुपात दुहेरी मोबदला देण्याचा हा प्रकार गंभीर असून, त्याची सखोल चौकशी करून दोषींवर कायदेशीर कारवाई करण्याची मागणी सामाजिक कार्यकर्ते किशोर राजपूत यांनी केली होती, त्याची दखल घेऊन आयुक्त ओम प्रकाश बकोरिया यांच्या आदेशाने अब्दुल सिकंदर यांच्याविरुद्ध १८ नोव्हेंबर रोजी नगररचना विभागाच्या अधिकाऱ्यांनी सिटीचौक पोलिस स्टेशनमध्ये तक्रार दाखल केली होती.
अधिकाऱ्यांना वाचविण्याचा प्रयत्न?
याप्रकरण तक्रार दाखल होऊन दहा दिवस उलटले तरी गुन्हा मात्र दाखल केला जात नव्हता. याच संदर्भात ‘मटा’ने बुधवारच्या अंकात वृत्त प्रसिद्ध केल्यावर बकोरिया यांनी पोलिस आयुक्तांशी चर्चा केल्यानंतर गुन्हा दाखल करत आला. पोलिसांनी अब्दुल सिकंदर यांच्याविरुद्ध कलम ४२०नुसार गुन्हा दाखल केला. मालमत्ताधारक, जीपीएधारक, महापालिकेचे अधिकारी यांनी संगनमताने एकाच मालमत्तेला दुहेरी पद्धतीने मोबदला दिल्याप्रकरणी कलमांची नोंद एफआयआरमध्ये करण्यात आली नाही. त्यामुळे मोबदला प्रकरणातील अधिकाऱ्यांना वाचवण्याचा प्रयत्न पोलिस व पालिका अधिकारी करीत असल्याची चर्चा आहे.
मोबाइल अॅप डाउनलोड करा आणि राहा अपडेट
म. टा. प्रतिनिधी, जालना
