Maharashtra Times

म. टा. प्रतिनिधी, औरंगाबाद
नोटबंदीच्या निर्णयानंतर सुरुवातीच्या दोन आठवड्यांत औरंगाबाद शहरात मोठ्या प्रमाणात चलन बदलून घेण्यात आले. त्यामुळे शहरात गेल्या काही दिवसांपासून बँका कॅशलेसच झाल्या. शहरातील ‌वि‌विध बँकांनी सुमारे ३५०० कोटींच्या चलनाची मागणी केली अाहे.
गेल्या काही दिवसांपासून कॅशचा वारंवार तुटवडा जाणवत आहे. एटीएम आणि बँक काउंटर यांना रोज किमान ४०० कोटींची गरज आहे, पण रिझर्व्ह बँकेकडून शहरासाठी होत असलेला पतपुरवठा कमी होत आहे. करन्सी चेस्टकडूनही विविध बँकाना रोज किमान २० लाख ते ६० लाखापर्यंतच कॅश पुरवली जात आहे. करन्सीचा तुटवडा पाहून व ७ तारखेपर्यंत शहरात नोकरदारांचे होणारे पगार लक्षात घेऊन गेल्या एसबीआयने १५०० कोटी, एसबीएचने ९०७ कोटी, बँक ऑफ महाराष्ट्रने ४०० कोटी, आयडीबीआयने ४०० कोटी रुपयांच्या चलनाची रिझर्व्ह बँकेकडे मागणी केली आहे, मात्र त्यास प्रतिसाद मिळलेला नाही. आजपर्यंत शहरात दोन वेळा नोटांचे कंटेनर आले. त्यातून सुमारे ५०० कोटींपर्यंतची कॅश आली आहे. नोटांची गरज लक्षात घेऊन बँकांना सुमारे ३ हजार ते ४ हजार कोटींच्या कॅशची गरज आहे, असे स्टेट बँक ऑफ इंडिया आणि बँक ऑफ महाराष्ट्रचे बँक अधिकारी सांगतात.
दरम्यान, गुरुवारी शहरातील ७० ते ८० टक्के एटीएम सेंटर सुरू होते. पगार झाल्याने नागरिकांना पैसे काढता यावा यासाठी बहुतांश राष्ट्रीयकृत बँकांच्या एटीएममध्ये रोख भरली होती. सुमारे ५०० एटीएमवर पैसे उपलब्ध होते. बुधवारी संध्याकाळपर्यंत आणि गुरुवारी सकाळी अनेक एटीएमवर कॅश भरण्यात आली. ही रोकड दोन हजार रुपयांच्या नोटांच्या स्वरुपात होती. नागरी आणि शेड्युल्ड बँकांचे सुमारे ३५०हून अधिक एटीएम गेल्या काही दिवसांपासून बंद आहेत.

नव्या चलनाची मागणी वाढली
करन्सीचा तुटवडा जाणवत आहे. आज आम्हीच आमच्या शाखेत चलन कमी असल्याचे पाहून पैठण शाखेतून सुमारे २ ते ३ कोटी रुपये मागवले. आता पगार होत आहेत. जुन्या नोटांचा भरणाही तुलनेने कमी झाला आहे. हे पाहून करन्सीची मागणी वाढली आहे, असे स्टेट बँक ऑफ हैदराबादचे रवी धामणगावकर यांनी सांगितले.

Latest Images