उपनिबंधकांचा पदभार काढला

December 4, 2016, 1:30 pm

≫ Next: ‘मेडिकल पीजी’च्या अडीचशे जागा वाढणार

≪ Previous: नगरसेवक मंजुळे यांचे अपघातात निधन

$

0

0

म. टा. प्रतिनिधी, औरंगाबाद
मुंबई हायकोर्टाच्या औरंगाबाद खंडपीठाच्या न्यायमूर्तींच्या मुलासाठी उपनिबंधक कार्यालयाकडून पदाचा दुरुपयोग करून प्रोटोकॉल धाब्यावर बसविणारे अधिकारी एस. डी. धोंगडे यांच्याकडून पदभार काढून घेतला असल्याचे सूत्रांनी सांगितले.
औरंगाबाद खंडपीठाच्या न्यायमूर्तीचा मुलगा राजस्थान येथे दौऱ्यावर जाणार होते.त्याच्यासाठी ‘व्हीआयपी’ तयारी सज्ज ठेवा, अशा आशयाचे पत्र औरंगाबाद खंडपीठाच्या निबंधक कार्यालयाकडून राजस्थान न्यायालयाच्या निबंधक (प्रोटोकॉल) कार्यालयाला पाठवण्यात आले होते. प्रशासनाच्या वतीने हा पत्रव्यवहार करण्यात येऊन त्यावर औरंगाबाद खंडपीठाचे उपनिबंधक धोंगाडे यांची स्वाक्षरी आहे. त्यांच्याकडून हा पदभार काढून घेण्यात आला आहे.

मोबाइल अॅप डाउनलोड करा आणि राहा अपडेट

---

‘मेडिकल पीजी’च्या अडीचशे जागा वाढणार

December 4, 2016, 1:30 pm

≫ Next: येळकोट येळकोट जय मल्हार

≪ Previous: उपनिबंधकांचा पदभार काढला

$

0

0

Nikhil.Nirkhee@timesgreoup.com
Tweet-nnirkheeMT
औरंगाबाद : मेडिकल कौन्सिलच्या (एमसीआय) नुकत्याच झालेल्या सर्वसाधारण बैठकीमध्ये एका शासकीय वैद्यकीय प्राध्यापकामागे पदव्युत्तर अभ्यासक्रमाच्या दोनऐवजी तीन, तर एका सहयोगी प्राध्यापकामागे एकऐवजी दोन जागा मान्य झाल्यामुळे राज्यातील १६ शासकीय वैद्यकीय महाविद्यालयांमध्ये सुमारे १२०० पदव्युत्तर जागा वाढणार आहे. या निर्णयामुळेच मराठवाड्यातील चार शासकीय वैद्यकीय महाविद्यालयांमध्ये २५० ते २७० पदव्युत्तर जागा वाढण्याचे संकेत आहेत. अर्थात, केंद्र सरकारच्या अधिसूचनेनंतरच येत्या शैक्षणिक वर्षांपासून नवीन जागा वाढण्याचा मार्ग मोकळा होणार आहे.
एमसीआयच्या निर्धारित प्रमाणानुसार शासकीय वैद्यकीय महाविद्यालयातील एका प्राध्यापकाला पदव्युत्तर अभ्यासक्रमाच्या दोन जागा मान्य आहेत, तर एका सहयोगी प्राध्यापकाला एक जागा मान्य आहे, मात्र तज्ज्ञ डॉक्टरांची संपूर्ण देशात कमतरता असल्यामुळे ‘पीजी’च्या जागा वाढवण्याची मागणी दीर्घ काळापासून कायम आहे. याचा विचार करूनच दिल्लीत नुकत्याच झालेल्या ‘एमसीआय’च्या सर्वसाधारण बैठकीमध्ये प्राध्यापक व सहयोगी प्राध्यापकांमागील ‘पीजी’च्या जागांचे प्रमाण वाढवण्याचा निर्णय घेण्यात आला. या बैठकीमध्ये एका प्राध्यापकामागे दोनऐवजी तीन, तर एका सहयोगी प्राध्यापकामागे एकऐवजी दोन ‘पीजी’च्या जागा मान्य करण्यात आल्या.
यासंदर्भात महाराष्ट्र आरोग्य विज्ञान विद्यापीठाचे कुलगुरू डॉ. दिलीप म्हैसेकर म्हणाले, ‘एमसीआय’ने विद्यार्थ्यांचे प्रमाण वाढवण्याचा निर्णय घेतला असला तरी केंद्र सरकारच्या अधिसूचनेनंतरच या निर्णयाची प्रत्यक्ष अंमलबजावणी होईल. अर्थात, येत्या शैक्षणिक वर्षांपासून या निर्णयाची अंमलबजावणी होईल.’

घाटीत वाढणार ८६ जागा
सद्यस्थितीत औरंगाबाद येथील शासकीय वैद्यकीय महाविद्यालयामध्ये (घाटी) सुमारे २० विषयांमध्ये ८४ ‘पीजी’च्या जागा आहे. हा निर्णय लागू झाल्यास त्यामध्ये आणखी ८६ जागांची भर पडू शकते; म्हणजेच घाटीतील ‘पीजी’च्या एकूण जागा १७०पर्यंत जातील, असे घाटीचे उपअधिष्ठाता डॉ. शिवाजी सुक्रे यांनी ‘मटा’ला सांगितले. तसेच नांदेडच्या शासकीय वैद्यकीय महाविद्यालयामध्ये सध्या ३८ जागा आहे, ज्यामध्ये ५४ जागांची भर पडून एकूण ‘पीजी’च्या जागा ९२ होतील, असे अधिष्ठाता डॉ. कानन येळीकर म्हणाल्या. लातूरच्या ‘शासकीय वैद्यकीय’तील ४१ जागांमध्ये आणखी सुमारे ५४ ते ८० जागांची भर पडू शकते आणि अंबाजोगाईच्या ‘शासकीय वैद्यकीय’तील ४७ जागांमध्ये सुमारे ३० ते ५० जागा वाढू शकतात, असेअधिष्ठाता (लातूर) डॉ. अशोक शिंदे व अधिष्ठाता (अंबाजोगाई) डॉ. सुनील घाटे म्हणाले.

पायाभूत सुविधांचे काय?
‘पीजी’च्या जागा वाढवण्याचा निर्णय घेण्यात आल्यानंतर वाढीव पदव्युत्तर विद्यार्थ्यांना किमान सोयी-सुविधा देण्याचे आव्हान नक्कीच उभे ठाकणार आहेत. महाविद्यालयांपासून ते वसतिगृहापर्यंत वेगवेगळ्या पायाभूत सुविधा वाढवाव्या लागणार आहेत आणि त्यादेखील शैक्षणिक वर्ष सुरू होण्यापूर्वीच. त्या दृष्टीने राज्य शासनाची प्रभावी अंमलबजावणी अत्यंत महत्वाची ठरणार असून, त्यावरच या निर्णयाचे यश अवलंबून राहणार असल्याचे मत वैद्यकीय शिक्षकांनी ‘मटा’कडे व्यक्त केले.

मोबाइल अॅप डाउनलोड करा आणि राहा अपडेट

येळकोट येळकोट जय मल्हार

December 4, 2016, 1:30 pm

≫ Next: रेल्वे क्राँसिंगजवळ एकाचा रेल्वेच्या धडकेमुळे मृत्यू

≪ Previous: ‘मेडिकल पीजी’च्या अडीचशे जागा वाढणार

$

0

0

म. टा. प्रतिनिधी, सातारा
लाखो भाविकांचे श्रद्धास्थान व प्रतिजेजुरी म्हणून ओळखल्या जाणाऱ्या साताऱ्याच्या खंडोबाची दर्शन यात्रा ३० नोव्हेंबरपासून सुरू झाली असून, रविवारी हजारो भाविकांनी दर्शन घेतले. सकाळी नऊपासूनच रांगा लागल्या होत्या. महिला व पुरुषांच्या वेगवेगळ्या रांगा करण्यात आल्या होत्या. सोमवारी, चंपाषष्टीला यात्रेचा मुख्य दिवस आहे.
यात्रेनिमित्त शहर, जिल्ह्याबाहेरूनही भाविक येतात. मंदिरावर भाविकांकडून बेलभंडाऱ्याची उधळण करीत यळकोट यळकोट जय मल्हारचा जयघोष केला जातो; तसेच तळी उचलल्यानंतर कांदे, वांगे खाण्यास सुरुवात होते. नवमीपर्यंत यात्रा सुरूच असते. यात्रेसाठी देवस्थान समिती, महापालिका प्रशासन व पोलिस यंत्रणा सज्ज झाली आहे. महापालिका आयुक्त ओम प्रकाश बकोरिया यांनी लक्ष देऊन रस्ते, पथदिवे यात्रेसंबंधी लागणाऱ्या बाबींची पूर्तता केल्याने देवस्थान समिती व भाविकांमधून समाधान व्यक्त होत आहे.
सोमवारी सकाळी प्रमुख पाहुण्यांच्या हस्ते महाआरती झाल्यानंतर श्री खंडोबा देव ८ वाजता पालखीद्वारे वाजतगाजत दांडेकर यांच्या वाड्यात जातील. तेथे लघुरूद्राभिषेक, कुलाचार, नैवेद्य आरती झाल्यानंतर रात्री पुन्हा ८ वाजता देव परत मंदिरात येतात. येणारे भाविक मंदिरावर रेवड्या व बेलभंडाऱ्याची (हळद) उधळण करतात. मंदिर परिसरात वेगवेगळी दुकाने लागली असून, रविवारी एमआयटी कॉलेज ते मंदिरापर्यतचा रस्ता भाविकांच्या गर्दीने फुलून गेला होता. गर्दीत लहान मुले, दागिने, मौल्यवान वस्तू, पाकीट, पर्सची काळजी घेण्याचे व शांततेत दर्शन घेण्यासह दीपमाळेजवळ गर्दी न करण्याचे आवाहन देवस्थान समितीतर्फे करण्यात येत होते.
एमआयटी कॉलेजजवळ, अहिल्यादेवी होळकर चौक, महादेव मंदिराजवळ, चोपडे वस्तीजवळ या चार ठिकाणी पार्किगची व्यवस्था करण्यात आली असून, मोटारसायकल १० रुपये, ऑटो रिक्षा व फोर व्हीलरसाठी २० रुपये असे दर ठेवण्यात आले असल्याचे अध्यक्ष साहेबराव पळसकर यांनी सांगितले.

पोलिसांचा मोठा बंदोबस्त
देवस्थान समितीने रंगरंगोटी, मंदिरावर रोषणाई, सीसीटीव्ही, फोकस बसवणे आदी कामे करण्यात आली. महापालिकेने डांबरी रस्ता, पथदिवे बसवणे, मंदिरातील हायमास्ट लाईट बसवणे, पाण्याचे टँकर, फुटलेल्या ड्रेनेज लाइनची दुरुस्ती, स्वच्छतेसाठी कचराकुंड्या, कर्मचारी तैनात केले असून, आरोग्य पथकही राहणार आहे. बंदोबस्तासाठी २ पोलिस निरीक्षक, २० पोलिस उपनिरीक्षक, १५० कर्मचारी, ३५ महिला कर्मचारी, स्ट्राईकिंग फोर्स राहणार आहे.

मोबाइल अॅप डाउनलोड करा आणि राहा अपडेट

रेल्वे क्राँसिंगजवळ एकाचा रेल्वेच्या धडकेमुळे मृत्यू

December 4, 2016, 1:30 pm

≫ Next: जागतिक कॅथलॅब ‘रोपळेकर’मध्ये

≪ Previous: येळकोट येळकोट जय मल्हार

$

0

0

म. टा. प्रतिनिधी, औरंगाबाद
नगरसोल ते नरसापूर ही रेल्वे गेट क्रमांक ५४च्या अलिकडे थांबली. रेल्वे अचानक का थांबली, हे पाहण्यासाठी भुयारी मार्ग तयार करण्याच्या मागणीसाठी आंदोलन करणारे आंदोलक धावले. त्यांनी रेल्वेच्या धडकेने जखमी झालेल्या व्यक्तीला उचलून घाटीला नेले, मात्र तेथे जखमीचा मृत्यू झाला. मंगेश पानसरे असे त्याचे नाव आहे.
रविवारी दुपारी एकच्या सुमारास भुयारी रेल्वे मार्गासाठी देवानगरी भागातील नाग‌रिक, रेल्वे क्रॉसिंग गेटवर ‘भिख मांगो’ आंदोलन करीत होते. दुपारी एक ते दीडदरम्यान जालन्याकडे जाणारी नगरसोल-नरसापूर रेल्वे अचानक क्रॉसिंग गेटच्या अलिकडे शंभर मीटर अंतरावर थांबली. रेल्वे थांबल्यामुळे आंदोलन करणारे श्रीमंत गोर्डे पाटील आणि अन्य नागरिक अवाक झाले.
अपघात झाल्याचे त्यांना समजताच देवानगरी भागातील नागरिकांनी आंदोलन सोडून रेल्वेकडे धाव घेतली. रेल्वेच्या धडकेत मंगेश चंद्रकांत पानसरे (४१, रा. गुलमंडी) हे जखमी अवस्थेत पडले होते. त्यांना आंदोलकांनी गाडीत टाकून घाटी हॉस्पिटलकडे उपचारासाठी नेले. घाटीत नेल्यानंतर उपचारदरम्यान मंगेश पानसरे यांचा मृत्यू झाला. या घटनेची नोंद जवाहर नगर रेल्वे ठाण्यात करण्यात आली. काही प्रत्यक्षदर्शीनुसार रेल्वे रूळ ओलांडताना हा अपघात घडला.

मोबाइल अॅप डाउनलोड करा आणि राहा अपडेट

जागतिक कॅथलॅब ‘रोपळेकर’मध्ये

December 4, 2016, 1:30 pm

≫ Next: शुभारंभानंतर भरड केंद्राला ठोकले टाळे

≪ Previous: रेल्वे क्राँसिंगजवळ एकाचा रेल्वेच्या धडकेमुळे मृत्यू

$

0

0

म. टा. प्रतिनिधी, औरंगाबाद
जागतिक दर्जाच्या आधुनिक तंत्रज्ञानाची व जर्मन बनावटीची डिजिटल कॅथलॅब ‘रोपळेकर, रुबी हार्ट केअर सेंटर’मध्ये दाखल झाली असून, येत्या दोन दिवसांत ती रुग्णसेवेत येणार आहे. डोक्यापासून ते पायापर्यंतच्या कुठल्याही भागाची अँजिओग्राफी अधिकाधिक अचुकतेसह अधिकाधिक सुरक्षितपणे करण्याची आणि त्यामुळेच अँजिओप्लास्टीदेखील तितक्याच अचुकतेने करण्याची सोय या कॅथलॅबद्वारे शक्य झाल्याची माहिती रुग्णालयाने रविवारी पत्रकार परिषदेत दिली.
रुग्णालयातील सिमेन्स कंपनीच्या ‘आर्ट्रिझ झी प्युअर कॅथलॅब’द्वारे ८५ टक्के कमी रेडिएशन डोसमध्ये उत्कृष्ठ दर्जाची अँजिओग्राफीची प्रतिमा मिळते आणि कमी रेडिएशनमुळेच रुग्णाला कॅन्सर व इतर आजार होण्याची शक्यता नगण्य होते. यातील ‘क्लिअर स्टेन्ट लाइव्ह’ या सॉफ्टवेअरमुळे स्टेन्टचे द्रुष्यिकरण अधिक मोठ्या व सुस्पष्ट प्रतिमेसह होते, ज्यामुळे अँजिओप्लास्टी व इतर उपचार अत्यंत अचुकतेने व नेमक्या जागी करणे शक्य होते. त्याचवेळी ऑपरेशन टेबलवरील रुग्णाच्या उंची व वजनानुसार रेडिएशनचा डोस संबंधित रुग्णाला उपकरणाद्वारा सोडला जातो. तसेच डोक्यापासून पायापर्यंतच्या कुठल्याही भागाची अँजिओग्राफी रुग्णाची जागा न बदलता व पाहिजे त्या कोनांसह व सुस्पष्ट प्रतिमांसह करता येते.
बालरुग्णांमधील जन्मजात हृदयविकार, हृदयातील पडद्यामधील छिद्र आदींसाठीही हे उपकरण अत्यंत उपयुक्त ठरते. कोरोनरी अँजिओग्राफी, अँजिओप्लास्टी, स्टेन्टिंग, पेसमेकरसाठी हे उपकरण सद्यस्थितीत सर्वोत्तम आहे. अनियमित हृदयाच्या स्पंदनांचा आजार नियंत्रित करण्यासाठीदेखील या उपकरणाचा उपयोग होतो. मेंदूच्या व हाता-पायांच्या रक्तवाहिन्यांच्या चिकित्सेसाठीही हे उपकरण उत्तम ठरते, असे रुग्णालयाचे संचालक डॉ. सतीश रोपळेकर व डॉ. कांचन रोपळेकर यांनी सांगितले. या प्रसंगी ‘ओझोन ग्रुप’चे डॉ. बालाजी आसेगावकर, डॉ. प्रमोद अपसिंगेकर, डॉ. अजित हिवरकर आदींची उपस्थिती होती.

गोरगरीबांना अत्युच्च तंत्रज्ञान
रुग्णालयातील या अत्युच्च तंत्रज्ञानाचा लाभ राजीव गांधी जीवनदायी आरोग्य योजनेतील रुग्णांना मिळणार आहे. राज्य-केंद्र सरकारच्या वेगवेगळ्या योजनाही रुग्णालयामध्ये सुरू आहेत. तसेच ‘इंदिरा गांधी नॅशनल ओपन युनिव्हर्सिटी’तर्फे (इगनू) ‘क्लिनिकल कार्डिओलॉजी’ या विषयातील दोन वर्षांचा पदव्युत्तर पदविका अभ्यासक्रमही रुग्णालयामध्ये राबविण्यात येत असल्याचे सांगण्यात आले.

मोबाइल अॅप डाउनलोड करा आणि राहा अपडेट

शुभारंभानंतर भरड केंद्राला ठोकले टाळे

December 5, 2016, 1:24 pm

≫ Next: अतिक्रमण भोवले; सदस्यत्व गमावले

≪ Previous: जागतिक कॅथलॅब ‘रोपळेकर’मध्ये

$

0

0

गणेश जाधव, फुलंब्री
शेतकऱ्यांच्या मालाला तालुक्याच्या ठिकाणी बाजारपेठ मिळावी म्हणून फुलंब्रीत १७ नोव्हेंबर रोजी शासकीय भरड धान्य केंद्राचे विधानसभा अध्यक्ष हरिभाऊ बागडे यांच्या हस्ते मोठ्या थाटात उद्घाटन झाले. उद्घाटन होऊन २० दिवस उलटले. मात्र, एक दिवसही हे केंद्र उघडले नाही. त्यामुळे शेतकऱ्यांत असंतोष आहे.
सध्या मका पिकाचे उत्पादन मोठ्या प्रमाणात आहे. मात्र, हे केंद्र बंद असल्याने नाईलाजाने त्यांना ही मका व्यापाऱ्यांना विकावी लागते. अनेक शेतकरी भरड केंद्रात खरेदीबाबत विचारण्यास येतात. मात्र, येथे तहसीलने अद्याप एकही कर्मचारी दिला नाही. त्यामुळे या शेतकऱ्यांना निमुटपणे परतावे लागते. या केंद्राची पूर्ण जबाबदारी तहसीलची आहे. शासकीय खरेदी करणे व त्याचा हिशोब ठेवणे हे तहसील कार्यालयाचे काम. यासाठी तहसीलतर्फे एका कर्मचाऱ्याची नियुक्ती केली जाते. मात्र, मका खरेदीसाठी १४ अंशाची आद्रता पाहिजे. त्या अद्रतेची मका येत नसल्याने वजनात मोठी घट होते. हे नुकसान प्रशासनाकडून कर्मचाऱ्याच्या माथी मारले जाते. त्यामुळे या खरेदी केंद्रावर कोणताही कर्मचारी येत नाही. नियुक्त केला तरी तो कोणतेही कारण देऊन ही जबाबदारी टाळतो. यामुळे हे केंद्र बंद असल्याचे समजते. सध्या तहसीलदार या केंद्रावर तलाठ्याची नियुक्ती केल्याचे सांगतात. मात्र, तलाठी मला तसा कोणताही आदेश मिळाला नसल्याचे सांगत हात वर करत आहे. या समन्वयाच्या अभावात शेतकऱ्यांची कोंडी सुरू आहे.
...अशीही टोलवाटोलवी
तहसीलदार संगीता चव्हाण यांना या बंद असलेल्या भरड केंद्राबाबत विचारले तेव्हा त्यांनी, ‘शहर तलाठ्याची या धान्य केंद्रावर नियुक्ती केली आहे. त्यांनाच खरेदीबाबत माहिती असेल,’ असे सांगितले. मात्र, शहर तलाठी कैलास थोरात यांनी ‘मला तसे आदेश नाहीत. त्यामुळे मी खरेदी केंद्राकडे गेलो नाही. यामुळे खरेदीबाबत मला कुठलीही माहिती नाही,’ असे उत्तर दिले.

मोबाइल अॅप डाउनलोड करा आणि राहा अपडेट

अतिक्रमण भोवले; सदस्यत्व गमावले

December 5, 2016, 1:26 pm

≫ Next: शैक्षणिक कॅलेंडरच्या भंगावर विद्यापीठाचे मौन

≪ Previous: शुभारंभानंतर भरड केंद्राला ठोकले टाळे

$

0

0

पैठण : अतिक्रमण केल्याप्रकरणी तालुक्यातील टाकली अंबड ग्रामपंचायत सदस्य रामदास खवले याना त्यांचे पद गमवावे लागले आहे. अप्पर जिल्हाधिकारी पी. एल. सोरमारे यांनी ही कारवाई केली.
टाकळी अंबडचे ग्रामपंचायत सदस्य रामदास खवले यांनी शासकीय जागेवर कब्जा करून पक्के बांधकाम केल्याचा आरोप करत त्यांचे ग्रामपंचायत सदस्यपद रद्द करावे, अशी तक्रार प्रदीप नरके यांनी जिल्हाधिकारी कार्यालयाकडे केली होती. माझे वडील भीमराव खवले हे घेवरी (ता. शेवगाव, जि. अहमदनगर) येथील रहिवासी होते. घेवरी गाव जायकवाडी प्रकल्पात संपादन झाल्याने टाकळी अंबड येथील गट क्र .१९५ व १९ येथे सरकारी प्लॉट मिळाले. माझे वडील १९७६ पासून त्याठिकाणी राहतात व आपण अतिक्रमण केले नसल्याचा खुलासा ग्रामपंचायत सदस्य रामदास खवले यांनी केला. मात्र, याप्रकरणाची चौकशी केल्यावर तहसीलदारांनी सादर केलेल्या अहवालात, रामदास खवले यांचे वडील भीमा खवले हे धरणग्रस्त नसतानाही पुनर्वसित जागेवर बेकायदा राहत आल्याचे अहवालात नमूद केले होते. यामुळे खवले यांनी शासकीय जागेवर अतिक्रमण केल्याचे सिद्ध झाले होते.

दुसरा झटका
अतिक्रमण प्रकरणी यापूर्वीही टाकळी अंबड ग्रामपंचायतचे सदस्य शिवाजी खडके यांनी गट क्र .१९५ व १९ मध्ये पुनर्वसन केलेल्या मिळकत जागेवर अतिक्रमण करून सिमेंटचे पक्के बांधकाम केले होते. त्यावर ते किराणा दुकान चालवित असल्याचा आरोप करत त्यांचे ग्रामपंचायत सदस्य पद रद्द करावे, अशी तक्रार प्रदीप नरके यांनी केली होती. अप्पर जिल्हाधिकारी यांनी काही दिवसांपूर्वी शिवाजी खडके यांना अपात्र ठरवले होते. त्यानंतर आता खवले यांच्यावरही कारवाई करण्यात आली.

मोबाइल अॅप डाउनलोड करा आणि राहा अपडेट

शैक्षणिक कॅलेंडरच्या भंगावर विद्यापीठाचे मौन

December 5, 2016, 1:30 pm

≫ Next: सत्व गमावले; विकासाची प्रतीक्षा!

≪ Previous: अतिक्रमण भोवले; सदस्यत्व गमावले

$

0

0

म. टा. प्रतिनिधी, औरंगाबद
डॉ. बाबासाहेब आंबेडकर मराठवाडा विद्यापीठाने पदवी, पदव्युत्तर अभ्यासक्रमांच्या परीक्षेत वेळापत्रकाला केराची टोपली दाखविण्यात आली. याप्रकरणी प्रशासनाने कोणतीही कार्यवाही केली नाही. आता विभागाच्या वेळापत्रकातही एकवाक्यता राहिलेली नसल्याचे समोर आले आहे.
विद्यापीठाच्या सत्र परीक्षा यंदा लवकर उरकण्यात आल्या. सत्र पद्धतीत ९० दिवसांचा कालावधी पूर्ण होणे अपेक्षित असताना विद्यापीठाने ६० दिवसांतच परीक्षा घेतली. प्राध्यापकांनी कुलगुरूंची भेट घेऊन नाराजी व्यक्त केली. त्याला दीड महिना उलटला, तरी त्यावर कोणतीही कार्यवाही प्रशासनाकडून करण्यात आली नाही. त्यासह विभागाच्या परीक्षांच्या वेळापत्रकातही विभागनिहाय तफावत आहे. अनेक विभागांनी परीक्षाचे वेळापत्रक डिसेंबरच्या दुसऱ्या आठवड्यात निश्चित केले आहे, तर काही विभागांच्या परीक्षांचे वेळापत्रक अद्याप जाहीर नाही. प्रशासनाच्या नियंत्रणाअभावी परीक्षांच्या वेळापत्रकांमधील गोंधळ थांबलेला नाही.

९० दिवसांचा कालावधी कागदावरच
विद्यापीठ प्रशासनाने मे महिन्यात प्रसिद्ध केलेल्या वेळापत्रकानुसार कॉलेजांसाठी ‌२७ जून ते २४ ऑक्टोबर असे अध्यापनासाठी वेळापत्रक दिले होते. यात २८ सुट्या वगळून ९२ दिवसांचा अध्यापनाचा कालावधी शिल्लक राहतो. हा कालावधी पूर्ण होण्यापूर्वीच विद्यापीठाने परीक्षा ४ ऑक्टोबरपासूनच परीक्ष घेण्यासाठी वेळापत्रक जाहीर केले. विद्यापीठ कायद्यानुसार; सत्रासाठी ९० दिवसांचा कालावधी पूर्ण होणे बंधनकारक असते. विद्यापीठांच्या विभागांमध्येही परीक्षांच्या वेळापत्रकात एकवाक्यता नाही. त्यामुळे सत्रपद्धतीचे नियम केवळ कागदापुरतेच उरले आहेत.

शैक्षणिक वेळापत्रकात बदल झाले, तर त्याचे परिणाम सगळ्याच घटकांवर होतात. विद्यार्थ्यांचे शैक्षणिक नुकसान होते. आपण विद्यार्थ्यांवर अन्याय करतो आहोत, याचे भान प्रशासनाने ठेवायला हवे. आता एकसत्र कमी आणि दुसरे जास्त कालावधीचे असा विरोधाभास निर्माण झाला आहे. याला प्रशासनच जबाबदार आहे. शैक्षणिकवर्षाचे वेळापत्रकात एकवाक्यता येण्यासाठी, ज्येष्ठ प्राध्यापकांचे मत विचारात घ्यायला हवेत.
- डॉ. अशोक तेजनकर, सचिव, बामुक्टो.

मोबाइल अॅप डाउनलोड करा आणि राहा अपडेट

---

सत्व गमावले; विकासाची प्रतीक्षा!

December 5, 2016, 1:27 pm

≫ Next: घाटी ‘मनोविकृती’मध्ये आता रोज होताहेत मनोरुग्ण दाखल

≪ Previous: शैक्षणिक कॅलेंडरच्या भंगावर विद्यापीठाचे मौन

$

0

0

विजय चौधरी, खुलताबाद
सत्व गमावलेले शहर, बिनचेहऱ्याचे गाव आणि फक्त ऐतिहासिक ठेव्यावर सुरू असलेली वाटचाल हे खुलताबादचे वर्तमान आहे. उर्दूत ‘ खुल्द ’चा अर्थ स्वर्ग होतो. मात्र, येथे येणाऱ्या भाविकांना मंदिर व दर्गा परिसरात साचलेला कचरा, रस्त्यावरून वाहणारे गटारे पाहून नको इथले दर्शन अशी म्हणायची पाळी आली आहे. नगरपालिका निवडणुकीत हे प्रश्न पुन्हा उपस्थिती होतील.
पंधरा हजार लोकसंख्यावस्तीच्या या शहराचा समावेश गंगापूर–खुलताबाद विधानसभा मतदारसंघात होतो. गेल्या पंचवार्षिकपासून आमदार प्रशांत बंब विधानसभेत प्रतिनिधीत्व करीत आहेत. २०११ मध्ये झालेल्या नगरपालिका सार्वत्रिक निवडणुकीत सर्वाधिक आठ नगरसेवक आमदार बंब गटाचे निवडून आले होते. तर कॉँग्रेस ५ , राष्ट्रवादी कॉग्रेस ४ असे पक्षीय बलाबल होते. नगराध्यक्षपदाच्या निवडणुकीपूर्वी कॉँग्रेस आणि राष्ट्रवादी कॉग्रेसची आघाडी जाहीर झाली होती. आघाडीची घोषणा जाहीर होऊन काही तास उलटत नाही तोच राष्ट्रवादी कॉँग्रेसने आमदार प्रशांत बंब गटाशी हातमिळवणी करून उपनगराध्यक्ष मिळवले होते. सत्तेपासून आमदार बंब गटाला दूर ठेवण्यासारखी नगराध्यक्ष आणि उपनगराध्यक्ष दोन्हीही पदे राष्ट्रवादीला देण्याची तयारी कॉँग्रेसने दाखवलेली असताना राष्ट्रवादीने धक्का तंत्र अवलंबले. बंब गटांच्या नगरसेवकांना ‘नगरसेवक आपल्या दारी’ उपक्रम राबवून नागरी समस्या सोडविण्याच्या सूचना दिल्या. काही नगरसेवक वगळता सर्वांनी याकडे पाठ फिरवली. सुभाष झांबड यांच्या स्थानिक स्वराज्य संस्था विधानपरिषद निवडणुकीत बंब गटाचे नगरसेवक आमदार बंब यांच्यापासून दुरावले आहेत.

पर्यटन प्राधिकरण झाले पण
ऐतिहासिक आणि धार्मिक पर्यटनस्थळे असलेल्या खुलताबादच्या पर्यटन व्यवसायाने चांगले बाळसे धरले आहे. दीड कोटी खर्चून बनी बेगम बागेचे संवर्धन, १ कोटी ३५ लाख रुपये खर्चून नगारखाना प्रवेशद्वाराचे संवर्धन देखभाल दुरुस्ती, पर्यटन माहिती केंद्र, पार्किंग आदी कामे पर्यटनाला चालना देणारी आहेत. म्हैसमाळ, वेरूळ, खुलताबाद, सुलीभंजन पर्यटन प्राधिकरणासाठी मुख्यमंत्री देवेंद्र फडणवीसांनी ४५३ कोटींचा निधी जाहीर केल्याने एकीकडे पर्यटनाचा दर्जा मिळविण्याच्या दृष्टीने वाटचाल सुरू ठेवली असली तरीही त्याचवेळी शहरातील कायम असलेल्या नागरी समस्या आणि राजकीय निर्णायकतेकडे होत असलेली वाटचाल भवितव्याच्या दृष्टीने भलेमोठे प्रश्नचिन्ह उभे करीत आहे. गेले पाच वर्ष नगरपालिका आमदार प्रशांत बंब यांच्या ताब्यात होती. उन्हाळ्यात पिण्याच्या पाण्याचा गंभीर प्रश्न बनला होता. शहरवासीयांना पंधरा दिवसांनी पाणीपुरवठा करण्यात आला. नागरिकांना टँकरने विकत पाणी घ्यावे लागले, पण तरीही या गावाची निर्णायकी अवस्था शहराच्या दिशाहीन विकासाला ताळ्यावर आणू शकली नाही. खुलताबाद शहराच्या नागरीकरणाचा वेग कमालीचा वाढला असून पंधरा हजारावर लोकसंख्येच्या या शहरात नागरिकांना सर्वप्रकारच्या नागरी सुविधा पुरवताना नगरपालिकेची दमछाक होत आहे. या रेट्यामुळे स्थानिक रहिवाशांच्या सुविधांवरही ताण पडत आहे. परिणामी शहराच्या काही भागात पिण्याच्या पाण्याची समस्या कायम आहे. घंटागाडीसारखी कचरा गोळा करण्याची आदर्श योजना राबविली जाऊनही अनेक ठिकाणच्या कचऱ्यांच्या ढिगामुळे सार्वजनिक आरोग्याची ऐशीतैशी होत आहे.
वेरुळ लेणीमुळे खुलताबाद जगाच्या नकाशावर आहे. भद्रा मारुती मंदिर, औरंगजेब कबर, मलिक अंबर कबर, सुफिसंत यांच्या दर्गाह, बनी बेगम बगीचा अशा ऐतिहासिक आणि धार्मिक स्थळे येथे असल्याने खुलताबाद तसेही जगप्रसिध्द आहेच. एखाद्या शहराच्या ललाटी ऐवढे तेजोवलय असताना या नगराला सर्वाथाने मोठे होणे तसे अवघड नाही. अनेक वर्ष कॉँग्रेस, जनता दल, शिवसेना, अपक्ष अशा बहुविध राजकीय पक्षांना स्थान देणारी खुलताबादकरांची प्रायोगिक भूमिकादेखील कुठे न कुठे या निर्णायकीला जबाबदार असावी का, असा प्रश्न या निमित्ताने पडतो. नगरपालिका निवडणुकीच्यानिमित्ताने खुलताबादच्या अजेंड्याचा विचार होणार की नाही, हा खरा प्रश्न आहे. गेल्या पाच वर्षात ३० कोटींचा निधी खर्चून सिमेंट, गट्टू, डांबरीकरण रस्ते, आठवडीबाजारात २९ दुकान गाळे शॉपिंग कॉम्प्लेक्स आदि कामे करण्यात आलेले आहेत.

रखडलेल्या योजना
- १८ कोटींची पाणीपुरवठा योजना
- २२ कोटींची ड्रेनेज लाइन
- २.५ कोटींचे पांगरा तलाव संवर्धन
- नगरपालिका प्रशासकीय इमारत

मोबाइल अॅप डाउनलोड करा आणि राहा अपडेट

घाटी ‘मनोविकृती’मध्ये आता रोज होताहेत मनोरुग्ण दाखल

December 5, 2016, 1:30 pm

≫ Next: गुरूमंत्र : समुपदेशनातून जबाबदारीची शिकवण

≪ Previous: सत्व गमावले; विकासाची प्रतीक्षा!

$

0

0

म. टा. प्रतिनिधी, औरंगाबाद
शासकीय वैद्यकीय महाविद्यालय व रुग्णालयाच्या (घाटी) मनोविकृती विभागाच्या आंतररुग्ण विभागात नियमित रुग्णभरती सुरू झाली आहे. अडीच वर्षे बंद राहिलेला आंतररुग्ण विभाग मागच्या महिन्यात एकदा सुरू झाला. पहिल्या आठवड्यात मोजून काही रुग्णांना दाखल करण्यात आले होते. आता नियमित रुग्णभरती सुरू झाली आहे.
क्षुल्लक कारणांमुळे घाटीतील मनोविकृती विभागाचा आंतररुग्ण विभाग तब्बल अडीच वर्षे बंद करण्यात आला होता. अलिकडे जुन्या ‘एमआयसीयू’मध्ये वेगवेगळे बदल करण्यात आले व दीर्घ प्रतिक्षेनंतर नोव्हेंबर महिन्यात हा वॉर्ड एकदाचा सुरू करण्यात आला. वॉर्ड सुरू करण्यात आल्यानंतर पहिल्या आठवड्यात अगदी मोजकेच रुग्ण दाखल होते. पहिल्या काही दिवसांत तर एकच रुग्ण दाखल होता. आता मात्र नियमित मनोरुग्ण दाखल केले जात आहेत. जवळजवळ रोजच एक-दोन रुग्ण दाखल केले जात असून, मनोरुग्णांची महत्वाची अडचण दूर झाली आहे. वॉर्डामध्ये पुरेसा औषधी पुरवठा तसेच डॉक्टर-कर्मचारीदेखील पुरेशा प्रमाणात उपलब्ध असल्यामुळे मनोरुग्णांची सोय झाल्याचे सध्यातरी चित्र आहे. सध्या चार ते पाच मनोरुग्णांना वॉर्डात दाखल करुन त्यांच्यावर उपचार केले जात असल्याचे सूत्रांनी सांगितले.

मोबाइल अॅप डाउनलोड करा आणि राहा अपडेट

गुरूमंत्र : समुपदेशनातून जबाबदारीची शिकवण

December 5, 2016, 1:30 pm

≫ Next: प्राथमिकस्तरावर गृहपाठ नाही

≪ Previous: घाटी ‘मनोविकृती’मध्ये आता रोज होताहेत मनोरुग्ण दाखल

$

0

0

ramchandra.vaybhat@timesgroup.com
Tweet : @ramvaybhatMT
आजच्या आधुनिक समाजात आदेश, उपदेश व संदेशाची भाषा कालबाह्य ठरत अाहे. अशा स्थितीत विद्यार्थ्यांना घडविताना वडगाव (रामपुरी येथील जिल्हा परिषदेच्या प्राथमिक शाळेत संवादाच्या भाषेचा वापर केला जात आहे. त्या माध्यमातून शाळेमध्ये अभ्यासाचे धडे गिरविण्यासोबतच विद्यार्थी हा चांगला माणूस कसा होईल, याकडे लक्ष देण्यात येते. पहिली ते सातवीपर्यंत वर्ग असलेल्या या शाळेमध्ये विविध प्रकारचे उपक्रम राबवण्यात येतात. त्यासाठी शिक्षक राधेशाम शर्मा यांनी पुढाकार घेतला आहे. विद्यार्थ्यांसोबत करण्यात येणाऱ्या खुल्या संवादामध्ये आपल्यासोबत घडत असलेल्या घटनांचे बारकाईने निरीक्षण करणे, प्रत्येक विषयाचा अभ्यास करताना पडणाऱ्या प्रश्नांची उकल स्वतः करणे, यासाठी मित्र, नातेवाईक, पालक यांच्यासह इंटरनेट, वर्तमानपत्राची मदत घेणे आदी गोष्टी सांगण्यात येतात. याचाच एक भाग म्हणून विद्यार्थ्यांकडून दररोज दिनचर्या भरून घेण्यात येते. यामध्ये आज मी सर्व काम करू शकलो काय?, मी स्वच्छ राहिलो का? माझे साहित्य जागेवर ठेवले काय? आज मी चांगली गोष्ट शिकू शकलो काय? आदी गोष्टींचा अंतर्भाव असतो. विद्यार्थ्यांमध्ये चुका झाल्यास मार बसेल, अपमान होईल, अशी भीती असते, मात्र शाळेत राबवण्यात येत असलेल्या ‘जो चुकतो तोच शिकतो’ या उपक्रमामुळे विद्यार्थ्यांमधील भीती दूर करून मुले चुकातून शिकू लागली असल्याचे शर्मा यांनी सांगितले. उपक्रमाचाच भाग म्हणून, आपण इतरांच्या उपयोगी पडलो तर आपल्याला देखील आनंद मिळतो हे जगल्यानेच समजते, यासाठी मुलांना एकमेकांच्या उपयोगी पडण्याची संधी उपलब्ध करून दिली जाते. या शिवाय बोधकथा, चित्रपट, वर्तमानपत्रे यांच्या माध्यमातून प्रामाणिकपणाची उदाहरण विद्यार्थ्यांसमोर ठेवण्यात येते. त्याचबरोबर शाळेत स्मरणशक्तीच्या आधारावर खेळ, टाकाऊपासून टिकाऊ वस्तू तयार करणे आदी उपक्रम घेण्यात येतात.
सामाजिक शास्त्रे विषय शिकवत असताना शर्मा सरांनी विद्यार्थ्यांसोबत तास सुरू होण्यापूर्वी विविध विषयांबाबत संवाद साधतात व अडचणी जाणून घेतात. व्यक्तिमत्व विकासाच्या माध्यमातून जीवनकौशल्याबाबत विद्यार्थ्यांना मार्गदर्शन करण्यात येते. अभ्यासाव्यतिरिक्त इतर विषयांवर चर्चा होत असल्यामुळे; तसेच विद्यार्थ्यांना तासिकेमध्ये अडचणी मोकळेपणाने मांडता येतात. इतिहासाच्या अभ्यासातून विविध विषयांची समिक्षा करण्यात येते, तर चर्चासत्रात वर्गातील आठवड्याभरातील उदाहरणे देत मला जबाबदार व्हायचेय की बेजबाबदार, यावर चर्चा करण्यात येते. भूगोल विषयाच्या अभ्यासातून निसर्गात सर्व घटक व्यवस्थेमध्ये आपापली भागीदारी पार पाडत आहेत याचा वारंवार प्रत्यय आणून देणे त्या पद्धतीचे चित्रपट, व्हिडिओ, पीपीटी मुलांना दाखवण्यात येते. यावरून आपणही निसर्गाचे घटक आहोत, मग आपण कसे राहिले पाहिजे, यावर विद्यार्थी विचारमंथन करतात.
झाडांचे महत्त्व समजावे म्हणून शाळेत तुळस व औषधी वनस्पतींचे वृक्षारोपण करण्यात येते विद्यार्थ्यांचे विविध विषयांबाबत असलेले प्रश्नांची उत्तरे दररोजच्या परिपाठात देण्याचा प्रयत्न करण्यात येतात. ‘चेतना विकास मूल्य शिक्षा’ हे शिबिर करण्याची संधी मिळाली. त्यातून शिक्षक म्हणून जबाबदारी विकसित करण्याची गरज असल्याचे लक्षात आल्यानंतर एक वर्षासाठी छत्तीसगड येथे ए. नागराज यांच्या संशोधनातून तयार झालेल्या ‘चेतना विकास मूल्य शिक्षा’ या वाङमयाचा सविस्तर अध्ययन शर्मा सरांनी अध्ययन केले. शाळेत विविध उपक्रम राबवण्यासाठी; तसेच संवादाच्या माध्यमातून विद्यार्थ्यांना मूल्यांचे शिक्षण देण्यासाठी शाळेचे मुख्याध्यापक पवारसर व शिक्षकवृंद जैस्वालसर, उमेशसर, पठाणसर, मंगरुळे मॅडम आदींचे सहकार्य मिळते, असे शर्मा यांनी सांगितले.

मोबाइल अॅप डाउनलोड करा आणि राहा अपडेट

प्राथमिकस्तरावर गृहपाठ नाही

December 5, 2016, 12:32 pm

≫ Next: ‘देवगिरी’साठी बागडेंना साकडे

≪ Previous: गुरूमंत्र : समुपदेशनातून जबाबदारीची शिकवण

$

0

0

म. टा. प्रतिनिधी, औरंगाबाद
मराठी माध्यमांच्या शाळांमधील ज्ञानरचनावाद शिक्षणपद्धतीमुळे शाळांचे रूप पालटल्याचे चित्र असतानाच, आता आयसीएसई बोर्डानेही आनंददायी शिक्षणाचा पाठ सुरू करण्याचा निर्णय घेतला आहे. प्राथमिकस्तरावर विद्यार्थ्यांना गृहपाठ देण्यात येऊ नयेत, अशा सुचना शाळांना देण्यात आल्या आहेत.
आनंददायी शिक्षणाची संकल्पना विविध माध्यमांच्या शाळांमध्ये राबविली जाते. काही वर्षापासून सीबीएसई माध्यमांच्या शाळांनी त्यानुसार अभ्यासक्रमाच्या रचनेत बदल केले. महाराष्ट्र सरकारनेही ‘प्रगत शैक्षणिक महाराष्ट्र’ उपक्रमतंर्गत ज्ञानरचनावाद पद्धती आणली. त्याच धर्तीवर आयसीएसई माध्यमांच्या शाळा आता गृहपाठाविना भरणार आहेत. पूर्वप्राथमिक ते चौथीपर्यंतच्या विद्यार्थ्यांना गृहपाठ देण्यात येऊ नये, अशी सूचना नव्या शैक्षणिक आराखड्यात करण्यात आल्या आहेत. वाढत्या स्पर्धेत विद्यार्थ्यावर शिक्षणाचा ताण वाढू नये, त्यांना साजेसे शिक्षण मिळायला हवे. या हेतूने हे बदल करण्यात आले आहे.

इंडियन सर्टिफिकेट फॉर सेकंडरी एक्झामिनेशन (आयसीएसई) मंडळाने यंदा प्राथमिक, माध्यमिस्तरावरील अभ्यासक्रमाची रचना केली आहे. प्रथमच मंडळाने अभ्यासक्रमात कशाचा समावेश असावा, हे नव्या रचनेत स्पष्ट केले आहे. यापूर्वी केवळ ९ व १० वी इयत्तेचा अभ्यासक्रम निश्चित केला जायचा. पूर्वप्राथमिकपासून ते आठवीपर्यंत शाळांनाच अभ्यासक्रम ठरविण्याचे अधिकार होते. त्यामुळे अभ्यासक्रमात एकवाक्यता नाही. नव्या बदलामुळे अभ्यासक्रमात सुसूत्रता येणार असल्याचे बोलले जात आहे. २०१७-१८ शैक्षणिक वर्षापासून हे बदल होणार आहेत.

आयसीएसई मंडळाने यंदा अभ्यासक्रमाचे स्वरूप कसे असावे हे स्पष्ट केले आहे. त्याबाबत वेबसाइटवरही हे स्पष्ट करण्यात आले आहे. अभ्यासक्रमात नेमके काय असावे, हे नव्या रचनेत निश्चित करण्यात आले आहे. त्यामुळे एक सुसूत्रता येण्यास मदत मिळणार आहे. त्याचे परिणाम चांगले दिसतील. - प्रशांत मुळे, प्राचार्य, पोदार स्कूल

मोबाइल अॅप डाउनलोड करा आणि राहा अपडेट

‘देवगिरी’साठी बागडेंना साकडे

December 5, 2016, 12:33 pm

≫ Next: भूसंपादनासाठी आणखी पाडापाडी

≪ Previous: प्राथमिकस्तरावर गृहपाठ नाही

$

0

0

म. टा. विशेष प्रतिनिधी, औरंगाबाद
डबघाईस आलेला फुलंब्रीचा देवगिरी सहकारी साखर कारखाना सुरू करण्यासाठी संचालक मंडळाने विधानसभा अध्यक्ष हरिभाऊ बागडे व भाजप प्रदेशाध्यक्ष खासदार रावसाहेब दानवे यांच्याकडे साकडे घातले आहे. कारखाना विक्रीची प्रक्रिया थांबवून राज्य शासनाने मदत करण्याची विनंती संचालकांनी केली आहे.
देवगिरी कारखान्याकडे ४६ कोटी ४९ लाख रुपये थकित कर्ज आहे. साखर कारखान्याची दैनिक गाळप क्षमता २५०० टन आहे. २३ मार्च २०११पासून कारखाना बंद आहे. कारखान्याकडे शासकीय भाग भांडवल ८ कोटी ८५ लाख आहे. १ कोटी ९३ लाख रुपये शासकीय कर्ज आहे. राज्य सहकारी बँकेचे कर्ज १८ कोटी ३३ लाख आहे. कारखान्याकडे सावंगी येथे १५६ एकर, तर चौका येथे ४८ एकर जागा आहे. सावंगीच्या जमिनीतून समृद्धी महामार्ग (मुंबई-नागपूर एक्सप्रेस हायवे) जात आहे. राज्य शासनाने ही जमीन संपादित केल्यास कारखाना कर्जमुक्त होईल. शिवाय कारखाना पुन्हा सुरू होईल, असे कारखान्याचे अध्यक्ष जगन्नाथ काळे यांनी ‘मटा’शी बोलताना सांगितले. सावंगीची जमीन औरंगाबाद झालर क्षेत्रात येत असून, जमिनीच्या किमतीत वाढ होईल, असेही त्यांनी सांगितले. सकारात्मक पाऊल उचलण्याचे आश्वासन बागडे यांनी संचालक मंडळाच्या शिष्टमंडळास दिले आहे.

मोबाइल अॅप डाउनलोड करा आणि राहा अपडेट

भूसंपादनासाठी आणखी पाडापाडी

December 5, 2016, 12:33 pm

≫ Next: ‘फायर एनओसी’साठी पुणे पॅटर्न राबवा

≪ Previous: ‘देवगिरी’साठी बागडेंना साकडे

$

0

0

म. टा. प्रतिनिधी, औरंगाबाद
जिन्सी चौक ते गंजे शहिदा चौकातील आणखी काही मालमत्तांचे सोमवारी महापालिकेच्या पथकाने भूसंपादन केले. रविवारी ज्यांची घरे पाडली होती त्यांनी सोमवारी महापालिका शाळेच्या आवारातील लक्ष्मीमातेची मूर्ती पूजा करून मूर्तीचे सिडको एन सहा येथील स्थलांतर केले.
जिन्सी परिसरातील रस्त्याच्या रुंदीकरणासाठी पालिकेने रविवारपासून भूसंपादन मोहिम हाती घेतली. दीडशे मालमत्तांचे अंशत: भूसंपादन करण्यात येणार असून, दोन दिवसांपासून ही कारवाई सुरू करण्यात आली आहे. जागेवरच मोजणी, मूल्यांकन आणि जागेवरच टीडीआर किंवा एफएसआय देण्याची महापालिका प्रशासनाची पूर्ण तयारी असल्यामुळे मोहीम पुढे सरकत आहे.
पहिल्याच दिवशी महापालिका शाळेच्या आवारात असलेल्या लक्ष्मी मातेच्या मंदिरामुळे भूसंपादन खोळंबले होते, मात्र भाविकांनी मूर्तीचे स्थलांतर करण्याचा निर्णय घेतला. मूर्तीची पूजा केली आणि सिडको एन - सहा येथील माता मंदिरात स्थापना केली. बाजार समितीच्या जागेवरील जवळपास सात ते आठ मालमत्ता पाडण्यात आल्या. रहिवाशांनी कालच त्या रिकाम्या करून ठेवलेल्या होत्या.

मोबाइल अॅप डाउनलोड करा आणि राहा अपडेट

‘फायर एनओसी’साठी पुणे पॅटर्न राबवा

December 5, 2016, 12:34 pm

≫ Next: नवऱ्याने घोटला पत्नीचा गळा

≪ Previous: भूसंपादनासाठी आणखी पाडापाडी

$

0

0

म. टा. प्रतिनिधी, औरंगाबाद
दुकाने, मंदिरे, पेट्रोल पंप, मोठ्या इमारती आदींना अग्निशमन विभागाचे ना हरकत प्रमाणपत्र देण्याविषयी पालिका प्रशासनाकडे संभ्रम आहे. फायर एनओसी देण्यासाठी पुणे पॅटर्नचा अवलंब करा, असे आदेश पालिका आयुक्त ओम प्रकाश बकोरिया यांनी दिले.
पालिका अधिकाऱ्यांची आढावा बैठक सोमवारी झाली. त्यावेळी विविध विषयांचा आढावा घेण्यात आला. पेट्रोल पंपांना अग्निशमन दलाचे ना हरकत प्रमाणपत्र नसल्याचा मुद्दा सध्या गाजत आहे. पालिकेच्या निकषानुसार हे प्रमाणपत्र आवश्यक आहे. केवळ पेट्रोल पंप नव्हे, तर मंगल कार्यालये, खदानीसाठी स्फोटके बाळगणारी प्रतिष्ठाने आणि मोठे अपार्टमेंट यांच्यासाठीही फायर एनओसी आवश्यक आहे. यापुढे फायर एनओसी देताना पुणे पॅटर्नचा अवलंब करा, असे आदेश आयुक्तांनी दिले. पुण्यातील अग्निशमन दलाकडून दिली जाणारे ना हरकत प्रमाणपत्र कोणत्या निकषांच्या आधारावर दिले जाते, याचा अभ्यास करावा, असेही त्यांनी सांगितले.
डीपी रोडच्या कामाबाबत आयुक्तांनी अधिकाऱ्यांना धारेवर धरले. हे रस्ते का केले जात नाहीत? असा सवाल त्यांनी केला. हर्सूल, पैठणगेट, गुलमंडी, चेलीपुरा, राजाबाजार हे रस्ते डीपीतील आहेत. त्यांचे रुंदीकरण व मजबुतीकरण करण्यासंदर्भात अधिकाऱ्यांनी हालचाल करावी, असे त्यांनी सांगितले. काही बड्या मंडळींची मालमत्ता व अतिक्रमणाची प्रकरणे न्यायालयात आहेत. वर्षानुवर्षे कोर्टात असलेल्या या हाय प्रोफाइल केसेससाठी असलेल्या वकिलांच्या जबाबदारी बदलाव्यात, असेही आयुक्तांनी स्पष्ट केले. काही मोबाइल कंपन्यांकडून ऑप्टिक फायबर केबल टाकण्याचे काम सुरू आहे. भूमिगतची कामे त्यात केबलची कामे यामुळे रस्ते खोदलेले आहेत. याच काळात या कंपन्यांनी कामे पूर्ण करावीत. ‘भूमिगत’ची कामे संपल्यानंतर महापालिकेकडून रस्ते केले जातील, त्यानंतर ऑप्टिक फायबर किंवा अन्य कामासाठी कुणालाच रस्ता खोदण्याची परवानगी दिली जाणार नाही, असे त्यांनी स्पष्ट केले.

मोबाइल अॅप डाउनलोड करा आणि राहा अपडेट

---

नवऱ्याने घोटला पत्नीचा गळा

December 5, 2016, 12:34 pm

≫ Next: स्वातंत्र्यसैनिक कॉलनीला धूळयातना

≪ Previous: ‘फायर एनओसी’साठी पुणे पॅटर्न राबवा

$

0

0

म. टा. प्रतिनिधी कन्नड
गौताळा अभयारण्यात २० नोव्हेंबर रोजी सापडलेल्या महिलेच्या प्रेताचे रहस्य अखेर उलगडले आहे. पिंपळगाव (ता. चाळीसगाव) येथील रवींद्र बाजीराव शिरसाठ यानेच आपल्या पत्नीचा खून करून ती हरविल्याची तक्रार नोंदविल्याचे तपासात उघड झाले आहे.
चाळीसगाव पोलिस ठाण्यात शिरसाठ याने ३ डिसेंबर रोजी आपली पत्नी अर्चना उर्फ गुड्डी (वय २४) ही घरातून कुणालाही न सांगता १८ नोव्हेंबरपासून निघून गेल्याची तक्रार नोंदविली होती. हा गुन्हा दाखल होण्यापूर्वी या अर्चनाची माहिती कन्नड पोलिसांकडून चाळीसगाव पोलिसांना मिळाली होती. त्यामुळे त्यांनी अर्चनाच्या माहेरील मंडळीकडे (रा.कृष्णापुरी, त्र्यंबकनगर, पाचोरा) कसून चौकशी सुरू केली. तिची आई सिंधू बागुल व भाऊ किरण बागुल यांना गौताळा येथील सापडलेल्या मृत महिलेचे फोटो, कपडे, अंगावरील दागिने दाखवले. त्यावरून त्यांनी ही आपलीच मुलगी असल्याची शंका व्यक्त केली. त्यामुळे चाळीसगाव पोलिसांनी कन्नड पोलिसांशी संपर्क साधला. पोलिस निरीक्षक शिवलाल पुरभे, पोहेकॉ. कैलास निंभोरकर यांनी मयताच्या प्रेताची ओळख पटविण्यासाठी घाटीच्या शवागारात ठेवलेला मृतदेह त्यांना दाखवला. त्यांनी हे प्रेत अर्चनाचे असल्याचे सांगितले. कन्नड पोलिसांनी खात्री पटल्यानंतर अंत्यविधीसाठी हे प्रेत त्यांच्या स्वाधीन केले.

पतीची कोठडीत रवानगी
पोलिस अधीक्षक नवीनचंद्र रेड्डी व उपविभागीय पोलिस अधिकारी नीरज राजगुरु यांनी तपासाची चक्रे फिरवत मयताचा पती रवींद्र शिरसाठ यास ताब्यात घेतले. विश्वासाने विचारपूस केली असता त्याने अनैतिक संबंधातून पत्नीचा खून केल्याची कबुली दिली. यावरून कन्नड पोलिसांना त्यास अटक करून त्याची पाच दिवसांच्या पोलिस कोठडीत रवानगी केली.

मोबाइल अॅप डाउनलोड करा आणि राहा अपडेट

स्वातंत्र्यसैनिक कॉलनीला धूळयातना

December 5, 2016, 12:35 pm

≫ Next: चालत्या रेल्वेखाली ‘जीवघेणा’ सेल्फी

≪ Previous: नवऱ्याने घोटला पत्नीचा गळा

$

0

0

म. टा. प्रतिनिधी, औरंगाबाद
जिल्हा परिषदेच्या मैदानावर भरिवण्यात आलेल्या फटाका बाजारला आग लागून महिना उलटला. अद्यापही मैदानावरील राख उचलण्यात आलेली नाही. या राखेचा स्वातंत्र्यसैनिक कॉलनीतील रहिवाशांना सहन करावा लागत आहे. धुळीमुळे आजारी पडण्याचे प्रमाण वाढले आहे.
शहरातील महत्त्वाच्या फटका बाजारला २९ ऑक्टोबर रोजी आग लागली. फटाका बाजार आगीने काही तासांत भस्मसात झाला. सुरक्षेच्या दृष्टिकोनातून येथून हा फटाका बाजार हलविण्यात यावा, यासाठी स्वातंत्रसैनिकांचा लढा पुन्हा समोर आला होता. त्यात आता आगीची घटना होऊन महिना उलटला. त्यानंतर आता तेथील राख पूर्णपणे साफ करण्यात आलेली नाही. राखेची धूळ हवेत मिळसते आहे. त्यामुळे या परिसरात राहणाऱ्या नागरिकांचे आरोग्य धोक्यात आले आहे. प्रशासनाने या प्रश्नाकडे तातडीने लक्ष द्यावे, असी मागणी स्वातंत्रसैनिक सहकारी गृहनिर्माण संस्थेने केली आहे. महापालिकेलाही याबाबत निवेदन दिले आहे. जिल्हा परिषद मैदानावरील २४० दुकाने आगीत भस्मसात झाली. जळालेल्या दुकानाचे पंचनामे करण्यात आले, मात्र फटाक्यांची राख, कचरा अद्याप उचलण्यात आलेला नाही. ही राख आता नगारिकांना त्रासदायक होत असून, मैदानाला कचराकुंडीचे स्वरूप आले आहे. मैदानावरून जाता-येता उडणारी धूळ परिसरातील नागरिकांसाठी त्रासदायक ठरते आहे; तसेच परिसरातील घरांमध्येही धुळीचे कण पसरत आहेत. नागरिकांच्या आरोग्याचा विचार करून यावर तातडीने उपाययोजना करावी, नागरिकांचे आरोग्याची काळजी घ्यावी, असे रहिवाशांनी निवेदनात म्हटले आहेत. निवेदानावर अध्यक्ष अशोत मतसागर, चिटणीस अनिरुद्ध कुलकर्णी यांच्या स्वाक्षऱ्या आहेत.

मोबाइल अॅप डाउनलोड करा आणि राहा अपडेट

चालत्या रेल्वेखाली ‘जीवघेणा’ सेल्फी

December 6, 2016, 2:59 am

≫ Next: एका सहीअभावी मृतदेह सहा तास पडून!

≪ Previous: स्वातंत्र्यसैनिक कॉलनीला धूळयातना

$

0

0

Abdul.Wajed@timesgroup.com

Tweet : @wajedaMT

औरंगाबाद : सेल्फीपायी अनेकांचा जीव गेल्यानंतरही जीवघेणे सेल्फी काढण्याचे वेड काही केल्या सुटत नाही! असाच एक अंगावर काटा आणणारा प्रकार सोमवारी येथील सिल्क मिल कॉलनीजवळून जाणाऱ्या रेल्वे मार्गावर घडला. एका तरुणाने चक्क रेल्वेच्या रुळांमध्ये झोपून धावत्या रेल्वेखाली सेल्फी काढले. रेल्वे चालकाच्या हा प्रकार लक्षात आल्यावर तातडीने रेल्वे थांबविण्यात आली आणि या अघोरी सेल्फी काढणाऱ्या तरुणाला रेल्वे पोलिसांच्या स्वाधीन करण्यात आले. आकाश विकास गायकवाड (२५, रा. मालाबाजार, चेंबूर, मुंबई) असे त्याचे नाव आहे.

आकाश सोमवारी सकाळी आठच्या सुमारास सिल्क मिल कॉलनीजवळील रेल्वे गेट क्रमांक ५२ येथे आला. जालना-नगरसोल डेमू रेल्वे त्या वेळी औरंगाबाद रेल्वे स्टेशनवरून निघण्याच्या तयारीत होती. त्यामुळे गेट बंद करण्यात आले. आकाश रुळाजवळ येऊन सेल्फी काढत होता. अनेक तरुण अशा प्रकारे रोजच रेल्वे गेटवर सेल्फी काढत असल्याने उपस्थित नागरिकांनी त्याच्याकडे दुर्लक्ष केले. दरम्यान, रेल्वे स्टेशनवरून निघाली आणि तिने गती घेतली. रेल्वे पाहून आकाश रुळाच्या मधोमध रेल्वे इंजिनच्या दिशेने पाय करून पालथा झोपला. ते पाहताच उपस्थितांच्या काळजात धस्स झाले. रुळांवर तरुण दिसल्याने चालकाने रेल्वे थांबविली. मात्र, तोपर्यंत काही डबे त्याच्या अंगावरून गेले होते. अर्थात रुळांच्या मध्यभागी तो झोपला असल्याने त्याला कोणतीही इजा झाली नाही. रेल्वे थांबताच, क्रॉसिंगवरील कर्मचाऱ्याने त्याला बाहेर काढले. रेल्वे सुरक्षा दलाच्या कर्मचाऱ्यांनी नंतर त्याला ताब्यात घेतले.

आकाश नागसेननगरमध्ये राहणारी बहीण शिल्पा गाडे यांच्याकडे मुंबईहून आला होता. रेल्वे सुरक्षा दलाने त्याच्यावर आत्महत्येच्या प्रयत्नाचा गुन्हा दाखल केला.

जालना-नगरसोल डेमू रेल्वे येताना आकाश हा तरुण रुळामध्ये झोपला होता. त्याने आत्महत्येचा प्रयत्न केल्याची माहिती रेल्वे चालकाने दिली. त्यानुसार त्याच्यावर गुन्हा दाखल करण्यात आला आहे.

- धमेंद्र कुमार,रेल्वे सुरक्षा निरीक्षक, औरंगाबाद रेल्वे सुरक्षा दल

मोबाइल अॅप डाउनलोड करा आणि राहा अपडेट

एका सहीअभावी मृतदेह सहा तास पडून!

December 6, 2016, 1:30 pm

≫ Next: निम्मे सदस्य निवडणुकीद्वारे

≪ Previous: चालत्या रेल्वेखाली ‘जीवघेणा’ सेल्फी

$

0

0

म. टा. प्रतिनिधी, औरंगाबाद

घाटीमध्ये १९ नोव्हेंबरपासून दाखल असलेल्या अनोळखी वृद्धेचा मंगळवारी (६ डिसेंबर) मृत्यू झाला, मात्र केवळ पोलिसांची स्वाक्षरी झाली नसल्याने कारण देऊन शवविच्छेदन करण्यात आले नाही. त्यामुळे तिचा मृतदेह तब्बल सहा तास वॉर्ड क्रमांक १२ समोर पडून होता. दोन्ही शासकीय यंत्रणांच्या टोलवाटोलवीमुळे वृद्धेच्या मृतदेहाची विटंबना झाल्याचे दुर्दैवी चित्र समोर आले.
शिर्डीतून एका ६० वर्षीय अनोळखी वृद्धेला १९ नोव्हेंबर रोजी घाटी रुग्णालयात दाखल करण्यात आले. घाटीमध्ये दाखल होताना तिच्या पायाला अपघात होऊन मार लागल्याचे स्पष्ट झाले होते.
उपचारादरम्यान तिचा मंगळवारी मृत्यू झाला. पायाला लागलेल्या मारामुळे तिच्यावर ‘एमएलसी’ दाखल होती आणि ‘एमएलसी’ केसमध्ये रुग्णाच्या मृत्यूनंतर शवविच्छेदन करावेच लागते, मात्र शवविच्छेदनासाठी आवश्यक असलेली पोलिसांची सही झाली नसल्याचे कारण तिचे शवविच्छेदन दुपारी साडेचारपासून ते रात्री उशिरापर्यंत शवविच्छेदन झाले नव्हते आणि तिचा मृतदेह वॉर्ड क्रमांक १२समोर पडून होता. या दोन्ही यंत्रणांच्या विसंवादामुळे मृतदेहाची विटंबना झाल्याचे दिसून आले.

पोलिस अनभिज्ञ
यासंदर्भात बेगमपुरा पोलिस ठाण्याशी संपर्क साधला असता, ‘संबंधित प्रकरणाची माहिती घाटी चौकीतून घ्यावी,’ असे सांगण्यात आले. घाटी चौकीत मात्र उशिरापर्यंत कोणीही फोन उचलला नाही. पुन्हा बेगमपुरा पोलिस ठाण्यासी संपर्क साधला असता, ‘घाटीतील प्रकार समजला आहे. पोर्टमार्टेम करावे लागेल,’ असे सांगत, ‘हे प्रकरण शिर्डी येथील आहे. याचा तपास करावा लागेल. आम्ही गाडी पाठविली आहे,’ असे सांगण्यात आले. सर्व प्रकरणाची माहिती पोलिसांपर्यंत आली नसल्याचे त्यांनी सांगितले. दरम्यान, रात्री उशिरा घाटी चौकीशी संपर्क साधला असता तेथील कर्मचाऱ्याने सांगितले की, या प्रकरणाची माहिती दुसऱ्या कर्मचाऱ्याकडे आहे. ते कागद घेऊन गेले आहेत.

मोबाइल अॅप डाउनलोड करा आणि राहा अपडेट

निम्मे सदस्य निवडणुकीद्वारे

December 6, 2016, 1:30 pm

≫ Next: वंदे मातरम् सभागृहाचे भूम‌िपूजन

≪ Previous: एका सहीअभावी मृतदेह सहा तास पडून!

$

0

0

म. टा. प्रतिनिधी, औरंगाबाद
प्रस्तावित महाराष्ट्र सार्वजनिक विद्यापीठ कायदा-२०१६ अधिवेशनात मांडण्यात आला आहे. कायद्याबाबत २१ आमदारांची संयुक्त समिती नेमण्यात आली. समितीने कायद्यात अनेक बदल करत १४६ पानी अहवाल सादर केला आहे. नवीन बदलात अधिकार मंडळावरील नियुक्त सदस्यांचा टक्का कमी करून ५० टक्के सदस्यांची निवडणुकांमधून नियुक्तीचा मार्ग स्वीकारण्यात आला आहे.
विद्यापीठ कायदा दोन वर्षांपासून रखडलेला आहे. विधीमंडळात मंजुरीसाठी मांडण्यात आला, परंतु त्याला मान्यता मिळाली नाही. कायद्यात अधिकार मंडळावरील सदस्यांच्या नेमणुका करताना नामनिर्देशनाचा मार्ग स्वीकारण्यात आला होता. त्याला आमदांराचा विरोध होता. त्यानंतर २१ आमदारांची संयुक्त समिती नेमण्यात आली. एप्रिलमध्ये नेमण्यात आलेल्या आमदरांच्या समितीने अहवाल सादर केला आहे. आता कायद्यात ५४ महत्त्वाचे बदल केल्याचे अहवालात नमूद केले आहे. हा १४६ पानी अहवाल आहे. या बदलांसह कायदा सादर करण्यात आला आहे.
नव्या कायद्यात कुलगुरूंचे अधिकारी पुन्हा मर्यादित करण्यात आले आहे. सोल संकल्पना रद्द करत, अधिकार मंडळावरील सदस्य ५० टक्के निवडणूक प्रक्रियेतून येणार आहेत. नियमबाह्य गोष्टी केल्यास संस्थेला दंड, संस्थेत विवाद, गैरवर्तन झाल्यास कॉलेजचे व्यवस्थापन शासनाच्या ताब्यात घेणे, प्र-कुलगुरूंची जबाबदारी निश्चित करणे, विद्यार्थी तक्रार निवारण केंद्र असे महत्त्वाचे बदल असल्याचे सूत्रांनी सांगितले.

भरतीवर नियंत्रण नाहीच
कॉलेजांमधील शिक्षक भरतीमध्ये होणारे गोंधळ लक्षात घेत, ही प्रक्रिया केंद्रीय पद्धतीने व्हावी, अशी मागणी बेरोजगारांमधून केली जाते. या मागणीला नवीन विद्यापीठ कायद्यात स्थान नाही. खाजगी, अभिमत विद्यापीठेही कायद्यापासून दूर रहाणार असल्याचे सूत्रांनी सांगितले.

समितीने विविध सूचना, हरकतीवर विचार करत आणि चर्चेअंती हा अहवाल सादर केला आहे. नवीन कायद्यात कौशल्य विकासावर भर आहे. त्याचबरोबर विद्यार्थी संसद निवडणूकांचा समावेश आहे. पहिल्या मसुद्यात कुलगुरूंकडे बहुतांशी अधिकार होते. नामनिर्देशित सदस्य अधिक होते. या अधिकारात बदल करत, अधिकार मंडळात निवडणुकीच्या माध्यमातून ५० टक्के सदस्य घेण्यात येणार आहेत. ‘सोल’ ही संकल्पना रद्द करण्यात आली आहे. समितीने अभ्यासाअंती हा अहवाल सादर केल्याने याच अधिवेशनात मंजुरी मिळेल, अशी अपेक्षा आहे.
- राजेश टोपे, सदस्य, विधीमंडळ संयुक्त समिती, माजी उच्चशिक्षणमंत्री.

मोबाइल अॅप डाउनलोड करा आणि राहा अपडेट