म. टा. प्रतिनिधी, औरंगाबाद
‘प्रभू रामचंद्र की जय,’च्या घोषणा, घोडे आणि उंटावर काढलेल्या सजीव देखाव्याने शहरवासीयांच्या डोळ्यांचे पारणे फडले. हिंदू नववर्ष समितीच्या वतीने गुढीपाडव्यानिमित्त शहरात जंगी मिरवणूक काढण्यात आली. संस्थान गणपती येथून निघालेल्या या मिरवणुकीचा खडकेश्वर येथे समारोप करण्यात आला.
सायंकाळी पाच वाजता संस्थान गणपतीची महाआरती केल्यानंतर मिरवणूक सुरू झाली. यावेळी खासदार चंद्रकांत खैरे, जिल्हाप्रमुख अंबादास दानवे, महापौर बापू घडमाडे, आमदार अतुल सावे, उपमहापौर स्मिता घोगरे, प्रदीप जैस्वाल, शहरप्रमुख राजू वैद्य, बाळासाहेब थोरात, नंदू घोडेले, महिला आघाडीच्या रंजना कुलकर्णी आदींची यावेळी प्रमुख उपस्थिती होती. मिरवणुकीत हिंदू नववर्ष समितीच्या पदाधिकारी कार्यकर्त्यांसोबतच नरेंद्र स्वामी महाराज परिवार, सुधांधू महाराज भक्तगण परिवार, सावरकर मित्र मंडळ, हिंदू जनजागरण समिती, सनातन संस्था तसेच इतर हिंदूत्ववादी संघटना सहभागी झाल्या. संस्थान गणपती, शहागंज, सराफा, सिटीचौक, मछलीखडक, गुलमंडी, औरंगपुरा मार्गे खडकेश्वर येथील मंदिराच्या प्रांगणात मिरवणुकीचा समारोप करण्यात आला.
सनई चौघडा ते ढोल ताशे : सनई चौघड्याच्या सुरांसोबत चाळीसगावचे प्रसिद्ध बँड पथक, प्रिंप्री राजा येथील बँड पथक तसेच शिवाजीनगर येथील विघ्नहर्ता क्रीडा मंडळाचे ढोल पथक मिरवणुकीत सहभागी झाले. बँड पथकाने आकर्षक चालीवर धार्मिक व देशभक्तीपर गीते सादर करत चांगलीच रंगत आणली.
आकर्षक देखावे
मिरवणुकीत धार्मिक सजीव देखावे सादर करण्यात आले. यामध्ये महिला आघाडीचा सीता स्वयंवर देखावा, बाल शिवाजी, शिवाजी महाराज, खंडेराय, रथामधील नरेंद्र महाराजांचा देखावा, शिवरायांचे घोडे व उंटावर असलेले मावळे आदी देखाव्यांचा समावेश होता. पारंपरिक वेषभूषेत सहभागी झालेले हे देखावे बघण्यासाठी गर्दी झाली होती.
बालवारकऱ्यांनी धरला ताल
मिरवणुकीच्या सुरुवातीला सिल्लोड येथील श्री माऊली वारकरी शिक्षण संस्थेच्या बाल वारकऱ्यांनी ताल धरला. टाळ मृदंगांच्या सुरेल तालात या पथकाने पावली सादर केली. तसेच कलशधारी महिला व महिला भजनी मंडळाने आकर्षक चालीत भजने सादर करत पावली खेळली.
गारखेड्यात मिरवणूक
गुढीपाडव्याच्या निमित्ताने नववर्षाच्या स्वागतासाठी गारखेडा भागातून मोठ्या उत्साहात मिरवणूक काढण्यात आली. ढोल ताशांच्या गजरात अबालवृध्द या मिरवणुकीत सहभागी झाले. गारखेडा येथील मारुती मंदिराजवळ मिरवणुकीची सांगता झाली.
नववर्षाच्या स्वागतासाठी जुन्या शहरातून जशी मिरवणूक निघते, तशीच मिरवणूक गारखेडा भागातून काढली जाते. यंदा काल्डा कॉर्नरपासून एक मिरवणूक सुरू झाली. दुसरी मिरवणूक जयभवानीनगरमधून सुरू झाली. या दोन्हीही मिरवणूकीमध्ये मोठ्या संख्येने नागरिक सहभागी झाले.
महापौर भगवान घडमोडे, आमदार अतुल सावे, शिवसेनेचे जिल्हाप्रमुख अंबादास दानवे, शहर प्रमुख रेणुकादास वैद्य यांच्या प्रमुख उपस्थितीत मिरवणूकीला सुरुवात झाली. यावेळी श्री स्वामी समर्थ केंद्राचे विलासराव देशमुख यांच्यासह अन्य
सेवेकरी सहभागी झाले. भाजपचे डॉ. भागवत कराड, बसवराज मंगरुळे, माजी सभापती दिलीप थोरात, महापालिकेचे सभागृहनेते गजानन मनगटे यांच्यासह गारखेडा भागातील बहुतांश नगरसेवक सहभागी झाले होते.
मिरवणूक मार्गावर रांगोळ्या काढण्यात आल्या होत्या. घोड्यांवर बसलेले मावळे मिरवणुकीचे आकर्षण होते. ढोल - ताशाचा समावेश, मिरवणुकीत होताच, पण त्याचबरोबर मुलींचे ढोल पथक देखील मिरवणुकीत सहभागी झाले. पालखी खांद्यावर घेऊन मार्गक्रमण करणारे वारकरी सर्वांचे लक्ष वेधून घेत होते. पारंपारिक वेशात नागरिक देखील मोठ्या संख्येने सहभागी झाले होते. मिरवणुकीमुळे संपूर्ण परिसरात उत्साहाचे वातावरण निर्माण झाले होते.
मोबाइल अॅप डाउनलोड करा आणि राहा अपडेट
