मुलीचा प्र‍वेश घेऊन परताना आई-वडील ठार

June 16, 2017, 2:30 pm

≫ Next: उद्योजकांनी भरला ८६ लाखांचा कर

≪ Previous: कर्जमाफीचा आराखडा फसवणूक करणारा

$

0

0

म. टा. प्रतिनिधी, फर्दापूर
जळगाव येथे मुलीचा शाळाप्रवेश करून परत येताना झालेल्या अपघातात आई-वडील ठार झाले. अपघातानंतर शिफा दूरवर फेकली गेल्याने बचावली. याप्रकरणी फर्दापूर पोलिस ठाण्यात गुन्हा दाखल करण्यात आला आहे.
तोंडापूर (ता. जामनेर) येथील इम्रान खान सरताज खान (वय ३०) हे पत्नी अनिसाबी इम्रान खान (वय २५) व मुलगी शिफा (वय ४) यांच्यासह दुचाकीवरून (एम एच १९ ए एच ७६५१) जळगाव येथील मित्तल हायस्कूलमध्ये प्रवेशासाठी गेले होते. तेथून परत येत असताना फर्दापूर येथे जळगाव-औरंगाबाद महामार्गा वरील मराठवाडा-खान्देशाच्या सिमेवरील पुलावर दुचाकीला अज्ञात वाहनाने मागून धडक दिली. या अपघातात इम्रान व अनिसाबी जागीच ठार झाले. ही माहिती मिळाल्यानंतर सहायक पोलिस निरीक्षक शरद जऱ्हाड, जमादार राजू काकडे, संदीप सुसर यांनी घटनास्थळी जाऊन मृतदेह सोयगाव येथील ग्रामीण रुग्णालयात पाठवले.

मोबाइल अॅप डाउनलोड करा आणि राहा अपडेट

---

उद्योजकांनी भरला ८६ लाखांचा कर

June 16, 2017, 2:30 pm

≫ Next: अतिप्रसंगाचा प्रयत्न; आरोपीला सक्तमजुरी

≪ Previous: मुलीचा प्र‍वेश घेऊन परताना आई-वडील ठार

$

0

0

उद्योजकांनी भरला वाळूज‌ ग्रामपंचायतीचा ८६ लाखांचा कर

मसिआ संघटनेचा पुढाकार; १२५ जणांनी भरला कर

म. टा. प्रतिनिधी, औरंगाबाद
वाळूज एमआयडीसीतील बहुतांश भाग हा अजूनही वाळूज ग्रामपंचातीशीच निगडित आहे. या ग्रामपंचायतीचा तब्बल २०११ पासूनचा ८६ लाखांचा कर भरणे बाकी होते. १२५ उद्योजकांनी हा सर्व कर आता भरला आहे. यासाठी मसिआ या उद्योजकांच्या संघटनेने पुढाकार घेतला.
रांजणगाव शेणपुंजी ग्रामपंचायत हद्दीतील कारखानदारांकडील मालमत्ता कर थकबाकीत ५० टक्के सवलत देण्यात येणार होती. उद्योजकांचा ४ वर्षांचा मालमत्ता कर थकला होता. यातून ग्रामपंचायतीचे नुकसान होत होते, आता ८६ लाखांचा कर भरण्यात आला आहे. यानुसारच आता इतर उर्वरित उद्योजकांकडूनही कर वसुलीसाठी ग्रामपंचायत व मसिआ प्रयत्न करणार आहे. ग्रामपंचायतचे सदस्य, उद्योजक व ‘मसिआ’ पदाधिकारी यांच्या वारंवार बैठका घेण्यात आल्या होत्या. याला आता यश येऊ लागले आहे. मालमत्ता कर थकबाकी भरण्यासाठी तीन दिवसांच्या शिबिराचे आयोजन करण्यात आले होते. त्यानुसार ही थकबाकी वसुली करण्यात आली आहे. रांजणगाव शेणपुंजी ग्रामपंचायत हद्दीत उद्योजकांकडे सुमारे साडेसात कोटी रुपयांचा मालमत्ता कर थकला आहे. ५० टक्के सूट देण्याच्या निर्णयामुळे ग्रामपंचायतीला साडेतीन कोटी रुपयांचा फटका बसणार आहे. असे असले तरी उद्योजकांनी आता कर भरण्यास सुरुवात केली असून मसिआच्या प्रयत्नांना यश आले आहे.

२०११ पासून ते २०१६ पर्यंतचा तब्बल ७६ लाखांचा कर थकला होता. ग्रामपंचायत आणि मसिआ यांनी पुढाकार घेऊन उद्योजकांशी संवाद साधला. मसिआ संघटनेचे जेवढे सदस्य आहेत त्यात चर्चा झाली यानंतर १२५ उद्योजकांनी हा कर भरला आहे.
सुनील कीर्दक, अध्यक्ष मसिआ संघटना

मोबाइल अॅप डाउनलोड करा आणि राहा अपडेट

अतिप्रसंगाचा प्रयत्न; आरोपीला सक्तमजुरी

June 16, 2017, 2:30 pm

≫ Next: ‘भूमिगत’ रडारवर

≪ Previous: उद्योजकांनी भरला ८६ लाखांचा कर

$

0

0

म. टा. प्रतिनिधी, औरंगाबाद
घरात घुसून चाकूचा धाक दाखवत शहरातील १७ वर्षीय मुलीवर अतिप्रसंग करण्याचा प्रयत्न करणाऱ्या आरोपाला तीन वर्षे सक्तमजुरी व ३०० रुपये दंडाची शिक्षा जिल्हा व अतिरिक्त सत्र न्यायाधीश यू. एल. तेलगावकर यांनी शुक्रवारी ठोठावली.
पीडित मुलीच्या फिर्यादनुसार ३० मे २०१४ रोजी ती घरी एकटी असताना आरोपी अरूण (उर्फ शेंडी) दादाराव भालेराव (वय ३२, रा. मिसारवाडी, औरंगाबाद) याने घरात घुसून चाकूचा धाक दाखवत अतिप्रसंग करण्याचा प्रयत्न केला. याप्रसंगी मुलीने आरडाओरड केल्याने शेजाऱ्यांनी धाव घेतली आणि आरोपी पळून गेला. मात्र पळताना तो नालीत पडला आणि त्याला अटक करण्यात आली. या प्रकरणी फिर्यादीच्या तक्रारीवरुन आरोपीविरुद्ध कलम ३५४ (अ), ३५४ (ब) व ४५२ अन्वये सिडको पोलिस ठाण्यात गुन्हा दाखल करण्यात आला होता. खटल्यावेळी, सहायक सरकारी वकील उदय प्रल्हाद पांडे यांनी ८ साक्षीदारांचे जबाब नोंदविले. यामध्ये प्रत्यक्षदर्शी साक्षीदार शेख ताहेर शेख छोटू व शेख मुक्तार शेख कदीर यांची साक्ष महत्त्वाची ठरली. दोन्ही बाजुंच्या युक्तिवादानंतर व साक्ष-पुराव्यांवरून आरोपीला कलम ४५२ अन्वये तीन वर्षे सक्तमजुरी व १०० रुपये दंड, तर कलम ३५४ (अ) व कलम ३५४ (ब) अन्वये प्रत्येकी तीन वर्षे सक्तमजुरी व १०० रुपये दंडाची शिक्षा कोर्टाने ठोठावली. दंड न भरल्यास आरोपीला दोन दिवस अधिक सक्तमजुरी भोगावी लागणार आहे.

आरोपीवर डझनभर गुन्हे

आरोपी अरूण दादाराव भालेराव याच्यावर शहरातील विविध पोलिस ठाण्यांमध्ये १२ ते १३ गुन्हे दाखल आहेत. या घटनेपासून आरोपी आधी पोलिस कोठडीत व नंतर न्यायालयीन कोठडीत होता.

मोबाइल अॅप डाउनलोड करा आणि राहा अपडेट

‘भूमिगत’ रडारवर

June 16, 2017, 2:30 pm

≫ Next: एक महिन्यापासून सातारा गावाला गढूळ पाणीपुरवठा

≪ Previous: अतिप्रसंगाचा प्रयत्न; आरोपीला सक्तमजुरी

$

0

0

म. टा. प्रतिनिधी, औरंगाबाद
भूमिगत गटार योजनेचे काम करणारे कंत्राटदार खिल्लारे-घारपुरे इन्फ्रास्ट्रक्चरला कारणे दाखवा नोटीस बजावण्यात आली असल्याची माहिती महापालिकेचे आयुक्त डी. एम. मुगळीकर यांनी दिली. गेल्या आठवड्यात भूमिगत गटार योजनेच्या कामांची पाहणी करण्यात आली. पाहणीदरम्यान आतापर्यंत झालेल्या कामात अनेक त्रुटी आढळल्या. यासंदर्भात आठ दिवसांत खुलासा करा असे, या नोटीसमध्ये नमूद केल्याचे त्यांनी स्पष्ट केले.
केंद्र शासनाच्या यूआयडीएसएसएमटी (अर्बन इन्फ्रास्ट्रक्चर डेव्हलपमेंट स्किम फॉर स्मॉल अँड मिडिअम टाउन्स) या योजनेतून औरंगाबाद शहरासाठी भूमिगत गटार योजना मंजूर करण्यात आली. त्यासाठी ३६९ कोटी ९४ लाख रुपये मंजूर करण्यात आले. यापैकी ८० टक्के निधी केंद्र सरकारने द्यावा व २० टक्के निधी महाराष्ट्र शासन व महापालिका यांनी समप्रमाणात द्यावा, असे स्पष्ट करण्यात आले होते. औरंगाबाद शहरातील सर्व नाल्यांमधून मोठ्या व्यासाची ड्रेनेज लाइन टाकून वाहते नाले भूमिगत करण्याचे नियोजन या योजनेमध्ये करण्यात आले आहे. २०१४-१५मध्ये योजनेच्या कामाला सुरुवात झाली. तीन वर्षांत काम पूर्ण करण्याची तरतूद निविदेत होती. ३० जून २०१७ रोजी तीन वर्षांचा कालावधी पूर्ण होणार आहे. हा कालावधी पूर्ण होण्यास काही दिवस बाकी असताना या योजनेच्या कामाचा आढावा घेतला असता, किमान पन्नास टक्के काम बाकी असल्याचे स्पष्ट झाले आहे.
भूमिगत गटार योजनेसाठी मुख्य रस्ते खोदून ड्रेनेज लाइन टाकण्यात आली. खोदलेल्या रस्त्याचे अवशेष नाल्यांमध्ये टाकण्यात आले. त्यामुळे नाले धोकादायक बनले. यासंदर्भात सर्वप्रथम ‘मटा’ने वृत्त प्रसिद्ध केले. त्यानंतर जून महिन्याच्या पहिल्या आठवड्यात झालेल्या पावसाने भूमिगत गटार योजनेच्या कामाचे पितळ उघडे पाडले. नागरिकांचे मोठे हाल झाले. याची दखल घेऊन खासदार चंद्रकांत खैरे यांनी भूमिगत गटार योजनेच्या कामाची पाहणी केली. त्यांना कामात अनेक त्रुटी आढळल्या. या त्रुटींची यादी त्यांनी आयुक्तांना दिली व कामात सुधारणा करण्याचे आदेश दिले. दरम्यान, स्थायी समितीच्या बैठकीतही नगरसेवकांनी भूमिगत गटार योजनेच्या कामाचे वाभाडे काढले.
या पार्श्वभूमीवर पालिका आयुक्त मुगळीकर यांना विचारले असता ते म्हणाले, ‘संबंधित कंत्राटदाराला कारणेदाखवा नोटीस बजावली आहे. पाहणीत आढळलेल्या त्रुटींसंदर्भात आठ दिवसांत खुलासा करा, असे नोटीसच्या माध्यमातून बजावण्यात आले आहे. खुलासा प्राप्त झाल्यावर कारवाईचा निर्णय घेतला जाईल.’

आयआयटी पवईला विनंती करणार
भूमिगत गटार योजनेच्या कामाचे टेक्निकल ऑडिट करण्याबद्दल आयआयटी पवईला विनंती केली जाणार आहे. टेक्निकल ऑडिटचा अहवाल आल्यावर संबंधितांवर कारवाईचा निर्णय घेतला जाईल. आर्थिक लेखापरीक्षण मात्र महापालिकेच्या मुख्य लेखापरीक्षकांमार्फत केले जाईल, असे आयुक्त मुगळीकर यांनी स्पष्ट केले.

काय आहे भूमिगत गटार योजना?
- २०११-१२च्या दरसूचीनुसार ३८५ कोटी ६२ लाखांचा मूळ प्रस्ताव
- शासनाने काढलेल्या त्रुटींच्या पूर्ततेनंतर सुधारित प्रस्ताव झाला ३६९ कोटी ९४ लाख रुपयांचा
- मूळ प्रस्तावानुसार ५४४ किलोमीटरची ड्रेनेज लाइन टाकली जाणार होती
- यापैकी अंतर्गत ड्रेनेज लाइनची लांबी २७२ किलोमीटर नमूद करण्यात आली होती
- निधी कपात झाल्यामुळे अंतर्गत ड्रेनेज लाइन रद्द करण्यात आली
- शहरातून वाहणाऱ्या नाल्यांमधून ड्रेनेज लाइन टाकण्याचा प्रस्तावात उल्लेख
- सहा सिवरेज ट्रिटमेंट प्लंट बांधण्याचा प्रस्तावात समावेश आहे
- प्रत्यक्षात चार एसटीपीचे काम केले सुरू असून, दोन एसटीपी रद्द करण्यात आले.

मोबाइल अॅप डाउनलोड करा आणि राहा अपडेट

एक महिन्यापासून सातारा गावाला गढूळ पाणीपुरवठा

June 16, 2017, 2:30 pm

≫ Next: भद्रा मारुती दिंडीचे पंढरपूरकडे प्रस्थान

≪ Previous: ‘भूमिगत’ रडारवर

$

0

0

म. टा. प्रतिनिधी, सातारा
महिनाभरापासून ब्लिचिंग पावडर नसल्यामुळे सातारा गावाला पाणीपुरवठा करणाऱ्या विहिरीतून दोन हजार घरांना गढूळ पाणी येत आहे. हे पाणी पिण्यायोग्य दूरच वापरण्यासारखेही नाही. त्यामुळे विहीर भरलेली असूनही महापालिकेच्या दुर्लक्षामुळे गावकऱ्यांना पाण्यापासून वंचित राहण्याची वेळ आली आहे.
उन्हाळ्यात पाणी नसल्यामुळे सातारा गावाला १५ दिवसाला पाणीपुरवठा होत होता. आता निसर्गाने साथ दिली. पाऊस चांगला झाला. बाजूलाच नाल्याचे खोलीकरण व रुंदीकरण झाल्याने विहीर भरली. परंतु, त्यातील पाणी हे पूर्ण गढूळ असून, घाणही साचली आहे. त्यामुळे सध्या मुबलक पाणी असूनही गावकऱ्यांना गढूळ पाणी येत आहे. सातारा प्रभाग कार्यालय नावालाच असून, तेथे फक्त साफसफाई, करवसुली, जन्म मृत्यू व विवाह नोंदणी प्रमाणपत्र हीच कामे होतात. इतर कामांसाठी कुणी गेले तर सरळ मुख्यालयात जा, असे सांगण्यात येते.
मनपा आयुक्तांनी या ५० फूट खोल विहिरीची पाहणी करून त्याची उंची वाढवणे, डागडुजी व जाळी बसवण्याचे आदेश प्रशासनाला दिले होते. यापैकी कोणतेही काम अद्याप करण्यात आलेले नाही. त्यामुळे विहिरीतून पाणीही वाहून जात आहे. त्यामुळे हे काम लवकरात लवकर केल्यास विहिरीत पाणीही मोठ्या प्रमाणावर साचेल, तसेच घाणही साचणार नाही. तोपर्यंत ब्लिचिंग पावडर टाकून चांगले पाणी पुरवण्याची मागणी सोमीनाथ शिराणे, विनोद सोळनर, सचिन वाघ, राम काळे यांनी केली आहे.

मोबाइल अॅप डाउनलोड करा आणि राहा अपडेट

भद्रा मारुती दिंडीचे पंढरपूरकडे प्रस्थान

June 16, 2017, 2:30 pm

≫ Next: कुलसचिव रमले गाण्यात

≪ Previous: एक महिन्यापासून सातारा गावाला गढूळ पाणीपुरवठा

$

0

0

म. टा. प्रतिनिधी, खुलताबाद
श्री भद्रा मारुतीच्या दिंडीचे शुक्रवारी टाळ मृदुंगाच्या तालावर ज्ञानोबा तुकारामाच्य गजरात पंढरपूरकडे प्रस्थान झाले आहे. आषाढी वारीत सहभागी होण्यासाठी आलेल्या वारकऱ्यांमुळे खुलताबाद गजबजून गेली आहे.
श्री भद्रा मारुती संस्थान येथे प्रस्थानाच्या मुख्य कार्यक्रमाला दुपारी साडेबारा वाजता प्रारंभ झाला. संस्थानचे अध्यक्ष मिठ्ठू पाटील बारगळ यांच्या हस्ते महाआरती झाली. भद्रा मारुतीचे भक्त विठुरायाच्या भेटीसाठी वारकरी अतूर झाले आहेत. आता पांडुरंगाच्या भेटीला जाण्यासाठी भक्त सज्ज झाले आहेत. राज्यात मान्सूनचे वेळेत आगमन झाल्यामुळे वारकरी हर्षोल्हासात असून, ते यंदा आषाढी वारी सोहळ्यात मोठ्या संख्येने सहभागी होतील, अशी अपेक्षा व्यक्त करण्यात आली होती. त्यानुसार यावर्षी भाविकांची गर्दी वाढली आहे. प्रत्येक ठिकाणी ज्ञानोबा, तुकोबांचा गजर सुरू होता. दिंडीतील भाविकांची काळजी घेण्यासाठी संस्थानतर्फे खबरदारी घेण्यात येत आहे. भागीनाथ मरकड यांच्या निवासस्थानी दिंडीचे स्वागत करण्यात आले. पिठलं पोळीचा महाप्रसाद घेऊन दिंडी जुना बाजार गंज येथील विठ्ठल मंदिरात दर्शन घेऊन पंढरपूरला मार्गस्थ झाली.

मोबाइल अॅप डाउनलोड करा आणि राहा अपडेट

कुलसचिव रमले गाण्यात

June 16, 2017, 2:30 pm

≫ Next: शाळांत एक लाख फुटबॉल वाटप; तालुक्यांत स्पर्धा

≪ Previous: भद्रा मारुती दिंडीचे पंढरपूरकडे प्रस्थान

$

0

0

म. टा. प्रतिनिधी, औरंगाबाद
डॉ. बाबासाहेब आंबेडकर मराठवाडा विद्यापीठाचा कळाहीन कारभार आणि शैक्षणिक संघटनांच्या राजकारणाने विद्यापीठ कॅम्पस नेहमी धुमसत असतो. या वातावरणाचा पुरेपूर अनुभव घेत असलेले कुलसचिव डॉ. प्रदीप जब्दे गुरुवारी ‘रफी-मुकेश’ यांच्या संस्मरणीय गाण्यात रमले. लोकप्रिय गाणी सादर करून जब्दे यांनी विद्यापीठातील रसिकांना वेगळा धक्का दिला.
हिंदी चित्रपटाच्या संगीत सुवर्णयुगात विशेष योगदान असलेले मोहम्मद रफी व मुकेश यांनी स्वरबद्ध केलेली गाणी अजूनही रसिकांना साद घालतात. कुलसचिव डॉ. जब्दे या दोन्ही गायकांचे चाहते आहेत. विद्यापीठाच्या व्यापातून वेळात वेळ काढून ते अनेकदा गायनाचा रियाज करतात. या संगीत प्रेमातूनच कुलसचिवांनी संगीत रजनीद्वारे नवीन शैक्षणिक वर्षाचे स्वागत केले. विद्यापीठातील सिफार्ट सभागृहात गुरुवारी सायंकाळी ही संगीत रजनी रंगली. वृत्तपत्रविद्या विभाग, नाटयशास्त्र, संगीत आणि ललित कला या चार विभागांच्या वतीने हा कार्यक्रम घेण्यात आला. यावेळी डॉ. जब्दे यांनी रफी-मुकेश यांची अवीट गाणी सादर केली. ‘अकेला हूँ मैं’, ‘दिन ढल न जाये रात न जाये’, ‘हुस्नवाले तेरा जवाब नही’, ‘ओ मेरे शायर’, ‘लाखो निगाहों में’ ‘याद न जाये बिते दिनो की’ ही मोहम्मद रफी यांची गाणी सादर झाली. तर मुकेश यांच्या ‘चंदन सा बदन’, ‘चांदसी महेबुबा हो मेरी’, ‘कही दूर जब दिन ढल जाये’, ‘तुम जो हमारे मीत न होते’ अशी सरस गाणी जब्दे यांनी गायली. प्रेषित रुद्रवार यांनी सूत्रसंचालन केले. योवळी ‘एक्सपिरीयन्स द रफी’, ‘एक्सपिरीयन्स द मुकेश’ या डॉ. जब्दे यांनी गायलेल्या ध्वनीचित्रफितीचे प्रकाशन करण्यात आले. प्रमोद आडसुळे यांनी संगीत साथसंगत केली. यावेळी संगीतकार पं. विश्वनाथ ओक, प्रभारी अधिकारी डॉ. सतीश पाटील, प्राचार्य डॉ. सर्जेराव ठोंबरे, वित्त व लेखाधिकारी डॉ. नंदकुमार राठी, अधिष्ठाता डॉ. दिलीप खैरनार, डॉ. वाल्मिक सरवदे, परीक्षा मंडळ संचालक डॉ. राजेश रगडे, संयोजक डॉ. जयंत शेवतेकर, डॉ. दिनकर माने, डॉ. संजय मोहड आदींची उपस्थिती होती.

रियाजाचे महत्त्व
सध्याचे जीवनमान अत्यंत घाईगडबडीचे असून, मानसिक ताणतणाव वाढले आहेत. दिवसभरातील शीण घालविण्यासाठी संगीत साधना करायला हवी, असे प्रतिपादन पं. विश्वनाथ ओक यांनी केले. जब्दे यांचा रियाज तरुणांसाठी प्रेरणादायी आहे, असेही ओक म्हणाले. जनसंवाद व वृत्तपत्रविद्या विभागाच्या स्टुडिओत ‘कराओके’ पद्धतीने गाणी गात जब्दे यांनी बराच रियाज केला. या रियाजानंतर हा कार्यक्रम आकारास आला.

मोबाइल अॅप डाउनलोड करा आणि राहा अपडेट

शाळांत एक लाख फुटबॉल वाटप; तालुक्यांत स्पर्धा

June 16, 2017, 2:30 pm

≫ Next: पावती दाखवल्यावरच पैसे

≪ Previous: कुलसचिव रमले गाण्यात

$

0

0

म. टा. प्रतिनिधी, औरंगाबाद
सतरा वर्षांखालील जागतिक फुटबॉल स्पर्धा भारतात प्रथमच होत आहे. त्यानिमित्त क्रीडा विभागातर्फे राज्यभरात तब्बल एक लाख पाच हजार फुटबॉलचे वाटप करण्यात येणार आहे. औरंगाबादसह मराठवाड्यातील आठ जिल्ह्यांतील चार हजार ८०० शाळांमध्ये २४ हजार फुटबॉलचे वाटप करण्यात येणार आहे.
सतरा वर्षांखालील जागतिक फुटबॉल स्पर्धेचे यजमानपद प्रथमच भारताला मिळाले आहे. ही स्पर्धा आयोजन ६ ते २८ ऑक्टोबर या कालावधीत होणार आहे. या स्पर्धेतील सामने नवी मुंबई, कोलकात्ता, कोची, नवी दिल्ली, गुवाहाटी, मार्गो (गोवा) या शहरांमध्ये खेळवण्यात येणार आहेत. या स्पर्धेनिमित्त राज्यभर वातावरण निर्मितीसाठी क्रीडा विभागाने फुटबॉलचे वाटप करण्याचा निर्णय घेतला आहे. हा उपक्रम राज्यभर एकाचवेळी राबवण्यात येणार आहे.
जागतिक फुटबॉल स्पर्धेच्या निमित्ताने राज्यात फुटबॉल फिव्हर निर्माण करण्यासाठी ३५ जिल्ह्यांमध्ये २१ हजार शाळांमध्ये एकूण एक लाख पाच लाख फुटबॉलचे वाटप करण्यात येणार आहे. प्रत्येक जिल्ह्यात ६०० शाळांमध्ये प्रत्येकी पाच चेंडू दिले जाणार आहेत. मराठवाड्यातील चार हजार ८०० शाळांत फुटबॉलचे वाटप केले जाईल. फुटबॉलचे वाटप करताना प्रत्येक तालुक्याच्या ठिकाणी आमदार करंडक फुटबॉल स्पर्धांचेही आयोजन करण्यात येणार आहे. हा उपक्रम राज्यभर एकाचवेळी राबवण्यात येणार आहे. १५ ऑगस्ट किंवा २९ ऑगस्ट (राष्ट्रीय क्रीडादिन) रोजी फुटबॉल स्पर्धांचे आयोजन होण्याची शक्यता आहे. या स्पर्धेत प्रत्येक जिल्ह्यात एक लाख खेळाडूंचा सहभाग होईल, याची जबाबदारी क्रीडा कार्यालयांवर सोपवण्यात आलेली आहे.

फुटबॉलपटूंची झेप
औरंगाबाद शहरातील पाच फुटबॉलपटूंनी गेल्या दोन वर्षांमध्ये आंतरराष्ट्रीय शालेय फुटबॉल स्पर्धांमध्ये देशाचे प्रतिनिधित्व केले आहे. त्यात सौरभ रामटेके, यशश्री देशमुख, तनिष्क देशमुख (पोदार स्कूल), गायत्री कोरडे (गुरुदेव समंतभद्र विद्यामंदिर), आर्यन बॅनर्जी (देवगिरी कॉलेज) या खेळाडूंचा समावेश आहे. फुटबॉल फिव्हरच्या निमित्ताने अधिकाधिक खेळाडूंना फुटबॉल खेळण्याकरिता प्रेरित करण्याचा मानस या उपक्रमामागे आहे.

सेल्फी पॉइंट
फुटबॉल फिव्हर निर्माण करण्यासाठी फुटबॉल स्पर्धांच्या आयोजनावेळी मैदाने, विद्यापीठ, कॉलेज, शाळा, गर्दीचे चौक या ठिकाणी सेल्फी पॉइंट तयार करण्यात येणार आहेत. फुटबॉल खेळाडू, फुटबॉलप्रेमींना सेल्फी काढण्यासाठी प्रोत्साहित करण्यात येणार आहे.

जागतिक फुटबॉल स्पर्धेच्यानिमित्ताने औरंगाबाद शहरातही फुटबॉल वाटप होईल. फुटबॉल खेळणाऱ्या शाळा; तसेच फुटबॉल खेळू इच्छिणाऱ्या शाळांमध्ये चेंडूंचे वाटप करण्यात येईल. आमखास मैदानावर फुटबॉल स्पर्धा घेण्याचा मानस आहे.
- ऊर्मिला मोराळे, जिल्हा क्रीडा अधिकारी

मोबाइल अॅप डाउनलोड करा आणि राहा अपडेट

---

पावती दाखवल्यावरच पैसे

June 16, 2017, 2:30 pm

≫ Next: संत एकनाथांच्या पालखीचे पंढरपूरला प्रस्थान

≪ Previous: शाळांत एक लाख फुटबॉल वाटप; तालुक्यांत स्पर्धा

$

0

0

म. टा. प्रतिनिधी, औरंगाबाद
गणवेश खरेदीची पावती दाखवल्याशिवाय विद्यार्थ्यांच्या खात्यावर ४०० रुपये जमा करू नका, असे आदेश महापालिकेने काढले आहेत. ४०० रुपये रोखीने न देता धनादेशाद्वारे द्या, असेही शालेय समितीला कळविण्यात आले आहे.
पालिका शाळेतील सर्व मुली, अनुसूचित जाती (एससी), अनुसूचित जमाती (एसटी) संवर्गातील मुलांना शासनाच्या सर्वशिक्षा अभियानाच्या माध्यमातून मिळणाऱ्या अनुदानातून गणवेशासाठी पैसे दिले जाणार आहेत. गेल्या वर्षीपर्यंत या पैशातून महापालिकेचे प्रशासन गणवेश खरेदी करून विद्यार्थ्यांमध्ये त्याचे वाटप करीत होते. यंदापासून शासनाने नियमात बदल केला आहे. प्रत्येक विद्यार्थ्याच्या बँकखात्यात ४०० रुपये जमा करण्याचे फर्मान शासनाने सोडले आहे. विद्यार्थ्याने ४०० रुपयांतून दोन गणवेश खरेदी करावेत, असे सांगण्यात आले आहे. खुल्या प्रवर्गातील विद्यार्थ्यांसाठी महापालिकेच्या फंडातून तरतूद केली जाते. यंदा ६ हजार ५३२ विद्यार्थ्यांसाठी ३५ लाख रुपयांची तरतूद करण्यात आली आहे. ही तरतूद डॉ. बाबासाहेब आंबेडकर गणवेश सहाय्य योजनेच्या माध्यमातून करण्यात आली आहे.

पैसे मिळणार धनादेशाद्वारे
शालेय समितीने विद्यार्थ्याने गणवेश खरेदी केल्याची पावती सादर केल्यानंतर त्याच्या बँक खात्यावर ४०० रुपये धनादेशाद्वारे जमा करण्यात यावेत. विद्यार्थ्यांना रोख स्वरुपात रक्कम देण्यात येऊ नये. कोणत्या विद्यार्थ्याला केव्हा रक्कम दिली याचा दिनांकनिहाय हिशेब ठेवा असेही आदेश शालेय समितीबरोबर मुख्याध्यापकांना देण्यात आले आहेत.

मोबाइल अॅप डाउनलोड करा आणि राहा अपडेट

संत एकनाथांच्या पालखीचे पंढरपूरला प्रस्थान

June 16, 2017, 2:30 pm

≫ Next: न्यायाधिकरणाची माहिती दडवली

≪ Previous: पावती दाखवल्यावरच पैसे

$

0

0

म. टा. प्रतिनिधी, पैठण
हरिनामाच्या जयघोषात संपूर्णपणे भक्तिमय वातावरणात व टाळ-मृदंगाच्या गजरात, शुक्रवारी ऐन सूर्यास्तावेळी गोदातीरावरून आषाढीवारी महोत्सवात सामील होण्यासाठी पैठण येथील संत एकनाथ महाराज यांच्या पालखीने पंढरपूरकडे प्रस्थान केले.
गावातील नाथमंदिरात शुक्रवारी सकाळी संत एकनाथ महाराज यांच्या पालखीला सजवण्या आले. त्यानंतर विधिवत पूजन करून पालखीत नाथांच्या पादुका ठेवण्यात आल्या. नाथांच्या पालखीची गावातील नाथमंदिरापासून समाधी मंदिरापर्यंत पायी मिरवणूक काढण्यात आली व समाधी मंदिरात ही पालखी भाविकांच्या दर्शनासाठी ठेवण्यात आली. संध्याकाळी ठीक चार वाजता नाथांची पालखी गागा भट्ट चौकातील पालखी ओट्यावर वारकरी, भाविक व गावातील नागरिकांच्या दर्शनासाठी ठेवण्यात आली. दर्शनासाठी भाविकांनी एकच गर्दी केली होती. ऐन सूर्यास्ताच्या वेळेस हजारो भाविक, वारकरी व पैठण शहरातील नागरिकांच्या उपस्थितीत नाथांची पालखीने पंढरपूरकडे प्रस्थान केले.
नाथांच्या पालखीत सहभागी होण्यासाठी गुरुवारपासूनच विदर्भ, खान्देश व मराठवाड्यातील अनेक दिंड्या पैठण मध्ये दाखल झाल्या होत्या. १९ दिवसाच्या प्रवासानंतर मराठवाडा व पश्चिम महाराष्ट्र या भागातील १९ गावांमध्ये मुक्काम केल्यावर ३ जुलै रोजी संत एकनाथ महाराज यांची पालखी पंढरपूरला पोहचणार आहे. संत एकनाथांची पालखी ३ जुलै रोजी पंढरपूर येथे पोहचणार आहे. आषाढी वारीत महोत्सवात सहभागी झाल्यावर ८ जुलैपर्यंत पालखीचा मुक्काम पंढरपूरच्या नाथ मंदिरात राहणार आहे.

पालखी मार्ग

पालखीचे मार्गक्रमण याप्रमाणेः चनकवाडी, हादगाव, लाडजळगाव, कुंडल पारगाव, मुंगुसवाडा, राक्षसभुवन, रायमोह, पाटोदा, दिघोळ, खेर्डा, दांडेगाव, अनाले, परंडा, बिटरगाव, कुर्डू, अरण, करकंब, होळे, शिरढोण.

नाथांच्या नावाने दोन पालख्या

न्यायालयीन लढाईनंतर, सुप्रीम कोर्टाने रघुनाथ महाराज पालखीवाले याना संत एकनाथ महाराज यांची मानाची पालखी पंढरपूरकडे नेण्याचा अधिकार दिलेला आहे. त्यानुसार मागच्या अनेक वर्षांपासून ते नाथांची पालखी पंढरपूरला घेवून जातात. मात्र, यावर्षी अन्य नाथ वंशजानी संत एकनाथ महाराज यांच्या नावाने दुसरी पालखी पंढरपूरकडे नेली. दुपारी साडेचारच्या दरम्यान छैय्या महाराज गोसावी यांच्या नेतृत्वाखाली ही पालखी पंढरपूर कडे रवाना झाली.

मोबाइल अॅप डाउनलोड करा आणि राहा अपडेट

न्यायाधिकरणाची माहिती दडवली

June 16, 2017, 2:30 pm

≫ Next: आमदार सत्तारांविरुद्ध भाजप, शिवसेनेचा रास्ता रोको

≪ Previous: संत एकनाथांच्या पालखीचे पंढरपूरला प्रस्थान

$

0

0

Tushar.bodkhe@timesgroup.com
Tweet : @tusharbMT
औरंगाबाद ः विद्यार्थ्यांच्या तक्रारींचा निपटारा करण्यासाठी स्थापन झालेले विद्यार्थी न्यायाधिकरण अजूनही विद्यार्थ्यांपासून कोसो दूर आहे. प्रवेश प्रक्रियेवेळी न्यायाधिकरणाची माहिती देणे बंधनकारक असूनही महाविद्यालयांनी हा नियम गुंडाळला आहे. मागील दोन महिन्यात न्यायाधिकरणाकडे फक्त एक तक्रार आली. परीक्षा विभागाच्या समन्वयाने तक्रार सोडवण्यात आली.
डॉ. बाबासाहेब आंबेडकर मराठवाडा विद्यापीठात विद्यार्थी न्यायाधिकरणाचे काम सुरू झाले आहे. कॉलेज व विद्यापीठ स्तरांवरील शैक्षणिक अडचणींबाबत विद्यार्थ्यांना थेट प्राधिकरणात दाद मागता येणार आहे. मोठा खर्च पेलवणे शक्य नसल्यामुळे शैक्षणिक तक्रारींचे कोर्टात कमी प्रमाण आहे. या पार्श्वभूमीवर विद्यार्थी न्यायाधिकरण स्थापन करणारे डॉ. बाबासाहेब आंबेडकर मराठवाडा विद्यापीठ राज्यातील पहिले विद्यापीठ आहे. या न्यायाधिकरणाचे नोडल ऑफिसर प्राचार्य डॉ. एस. बी. बिराजदार आहेत. नवीन विद्यापीठ कायद्यानुसार न्यायाधिकरण स्थापन झाले. विद्यार्थ्यांना शैक्षणिक समस्यांना सामोरे जावे लागते. गुणवत्ता यादीत डावलणे, शिष्यवृत्ती रखडणे, अतिरिक्त शुल्क, वसतिगृह समस्या, गुणपत्रिकेतील चुका अशा समस्या असतात. याबाबत विद्यार्थी न्यायाधिकरणात दाद मागू शकतात. विद्यापीठ प्रशासनाने न्यायाधिकरणाच्या निर्णयावर १६ ऑगस्ट २०१६ रोजी व्यवस्थापन परिषदेत शिक्कामोर्तब केले होते. सध्या विद्यापीठ कॅम्पसमध्ये विद्यार्थी न्यायाधिकरणाचे कार्यालय आहे, पण विद्यार्थ्यांचा प्रतिसाद अत्यंत कमी आहे. विद्यापीठाशी संलग्न चार जिल्ह्यांतील विद्यार्थी न्यायाधिकरणात दाद मागू शकतात. प्रत्यक्षात न्यायाधिकरणाचे कामकाज माहिती नसल्यामुळे विद्यार्थी दाद मागत नाहीत.
संबंधित महाविद्यालयांनी न्यायाधिकरण आणि त्याचे कामकाज याबाबत विद्यार्थ्यांना जागरूक करणे गरजेचे आहे. सध्या कॉलेजात प्रवेश प्रक्रिया सुरू आहे. माहितीपुस्तिकेवर विद्यार्थी न्यायाधिकरणाची माहिती बंधनकारक आहे, मात्र कॉलेजांनी हा नियम डावलून माहितीपुस्तिका प्रकाशित केल्या आहेत. महाविद्यालयाविरुद्ध तक्रार असल्यास विद्यार्थ्यांनी न्यायाधिकरणाकडे दाद मागू नये, म्हणून हा मार्ग निवडला आहे. विशेष म्हणजे अशा महाविद्यालयांवर कारवाईचे अधिकार न्यायाधिकरणाला नाही. न्यायाधिकरण फक्त नोटीस देऊन माहिती प्रकाशित करण्याबाबत सूचना करू शकते.
या प्रकारामुळे विद्यार्थी न्यायाधिकरणाचे महत्त्व नगण्य राहण्याची भीती आहे. तक्रारींचे निरसन ऑनलाइन करण्याची सुविधासुद्धा उपलब्ध आहे. पण, न्यायाधिकरण विद्यार्थ्यांना माहिती नसल्यामुळे कामकाज थंडावले आहे. या शैक्षणिक वर्षात न्यायाधिकरणाचा प्रसार झाल्यास शैक्षणिक कामकाजात पारदर्शकता वाढण्याची शक्यता आहे.
केवळ एकच तक्रार

केवळ एकच तक्रार
गेल्या दोन महिन्यांत विद्यार्थी न्यायाधिकरणाकडे वैजापूर येथील एका विद्यार्थ्याने दाद मागितली होती. उत्तरपत्रिका फेरमूल्यांकनाबाबत त्याची तक्रार होती. परीक्षा विभागाच्या समन्वयाने तक्रारीचा निपटारा करण्यात आला. आतापर्यंत आलेली ही एकमेव तक्रार ठरली आहे. न्यायाधिकरणाबाबत माहिती देण्यासाठी पुस्तिका प्रकाशित करण्यात येणार होती, पण निधीअभावी योजना रखडली आहे. न्यायाधिकरणाची माहिती प्रवेश पुस्तिकेत छापा, तसेच कॉलेजच्या वेबसाइटवर माहिती द्या, विद्यार्थ्यांना सुविधा देण्याबाबत दक्षता बाळगा अशा सूचना कॉलेजांना करण्यात आल्या आहेत, मात्र बहुतेक कॉलेज नियम डावलत आहेत.

प्रवेश प्रक्रियेच्या पुस्तिकेवर आणि वेबसाइटवर विद्यार्थी न्यायाधिकरणाची माहिती ठळक स्वरुपात देण्याबाबत कॉलेजांना एक महिन्यापूर्वी कळवले होते. पुन्हा नव्याने ड्राफ्ट तयार करून काम करणार आहे. न्यायाधिकरण सक्रिय होण्यास वेळ लागेल; मात्र, निश्चित चांगले काम करण्यात येईल.
- डॉ. एस. बी. बिराजदार, नोडल ऑफिसर

मोबाइल अॅप डाउनलोड करा आणि राहा अपडेट

आमदार सत्तारांविरुद्ध भाजप, शिवसेनेचा रास्ता रोको

June 16, 2017, 2:30 pm

≫ Next: शिक्षणमंत्र्यांनी दत्तक घेतलेल्या शाळेची दुरवस्था

≪ Previous: न्यायाधिकरणाची माहिती दडवली

$

0

0

म. टा. प्रतिनिधी, सिल्लोड
दहीगाव येथे जमिनीच्या वादातून शेतकऱ्याला शिवीगाळ करताना हिंदू देवतांचा अवमान केल्याप्रकरणी आमदार अब्दुल सत्तार यांना अटक करावी, या मागणीसाठी शिवसेनेने शुक्रवारी रास्तो रोको आंदोलन केले. यामुळे जळगाव-औरंगाबाद रस्त्यावरील वाहतूक थांबली होती. शिवसैनिक हटत नसल्याने शहर पोलिसांनी शिवसेना पदाधिकाऱ्यांना अटक करून नंतर सोडून दिले.
सिल्लोड शहरातील डॉ. बाबासाहेब आंबेडकर चौकात शुक्रवारी दुपारी बारा वाजता रास्ता रोको आंदोलन करण्यात आले. आमदारांना अटक करण्याच्या मागणीसाठी शिवसैनिक ठाम असल्याने वाहनांच्या रांगा लागल्या. आंदोलनात उपजिल्हा प्रमुख रघुनाथ चव्हाण, नगरपालिका गटनेते सुनील मिरकर, तालुकाप्रमुख किशोर अग्रवाल, नगरसेवक सुदर्शन अग्रवाल, उपतालुका प्रमुख दत्ता चव्हाण, शहर प्रमुख मच्छिंद्र घाडगे, किसान सेनेचे तालुका संघटक कैलास वराडे, उपशहरप्रमुख रवी रासने, युवासेना प्रमुख प्रवीण मिरकर, राजू सिरसाठ, पंकज जैस्वाल, महेंद्र बावस्कर, शिवाजी टोंपे, अशिष कुलकर्णी, सरदार लकवाल यांच्यासह पदाधिकाऱ्यांची उपस्थिती होती.

फर्दापूरमध्ये रस्ता अडवला

हिंदू देवतांचा अवमान केल्याप्रकरणी आमदार अब्दुल सत्तार यांच्या अटकेच्या मागणीसाठी जळगाव-औरंगाबाद रस्त्यावर भाजपतर्फे रास्ता रोको आंदोलन करण्यात आले. भाजपचे तालुकाध्यक्ष जयप्रकाश चव्हाण व जिल्हा सरचिटणीस राजेश काळे यांनी आंदोलनाचे नेतृत्व केले. जळगाव-औरंगाबाद रस्त्यावरील बसस्थानकाजवळ सुमारे अर्धातास आंदोलन केले. आमदारांच्या विरोधात घोषणांमुळे परिसर दणाणून गेला होता. आंदोलनामुळे वाहनांच्या रांगा लागल्या होत्या. आमदार सत्तार यांना अटक करावी, पोलिस अंगरक्षकाला निलंबित करावे, अशी मागमी करण्यात आली. प्रवाशांची गैरसोय होत असल्याने सहायक पोलिस निरीक्षक जऱ्हाड यांच्या विनंतीवरून रास्ता रोको मागे घेण्यात आला. यावेळी नायब तहसीलदार व्ही. टी. जाधव यांनी निवेदन स्वीकारले. भाजप प्रदेश कार्यकारिणी सदस्य सुरेश पाटील बनकर, सिल्लोड तालुकाध्यक्ष ज्ञानेश्वर पाटील, सिद्धेश्वर साखर कारखान्याचे चेअरमन इद्रस मुलतानी, सोयगावचे नगराध्यक्ष कैलास काळे, कमलेश कटारिया, नंदू पवार, श्रावण राठोड, हर्षवर्धन जगताप, मनोज ठाकूर, फिरोज पठाण, भीमराव बोराडे यांच्यासह कार्यकर्त्यांचा उपस्थिती होती.

वैजापूरमध्ये निवेदन

दहेगाव शिवारातील शेतजमीनीचा ताबा घेतांना आमदार अब्दुल सत्तार यांनी अर्वाच्य भाषेत शिविगाळ करत हिंदू देवतांचा अपमान केल्याप्रकरणी कायदेशीर कारवाई करावी, अशी मागणी करण्यात आली. या मागणीचे निवेदन उपविभागीय अधिकारी यांना देण्यात आले आहे. निवेदनावर भाजप शहर उपाध्यक्ष सचिन दाढे, महेश भालेराव, अमोल गोरक्ष, आकाश शिंदे, दीपक त्रिभुवन, जुनेद पठाण आदींच्या सह्या आहेत.


भाजपकडून बदनामीचा डाव

भाजपतर्फे जातीय तणाव निर्माण करण्याचा व आमदार अब्दुल सत्तार, काँग्रेसची बदनामी करण्याचा खेळ खेळला जात आहे. दोन समाजात जातीय तणाव निर्माण करणाऱ्या प्रवृत्तींना न रोखल्यास येत्या सोमवारी दुपारी एक वाजेपर्यत शहर बंद ठेवून मूक मोर्चा काढण्यात येईल, असा इशारा देणारे निवेदन काँगेसने सिल्लोडच्या तहसीलदारांना दिले आहे.
काँग्रेसचे तालुकाध्यक्ष गणेश दौड, जिल्हा परिषद उपाध्यक्ष केशवराव तायडे यांनी शिष्टमंडळाचे नेतृत्व केले. शिष्टमंडळात दुर्गाबाई पवार, उपनगराध्यक्षा शकुंतलाबाई बन्सोड, बाजार समिती सभापती रामदास पालोदकर, उपसभापती नंदकिशोर सहारे यांची उपस्थिती होती.
दहिगांव शिवारातील लक्ष्मण सखाराम कल्याणकर व विठ्ठल सपकाळ यांनी २० ते २२ वर्षांपूर्वी ही शेतजमीन खरेदी केली आहे. मागासवर्गीय समाजातील लक्ष्मण कल्याणकर हे त्यांच्या ताब्यातील जमिनीवर पेरणीसाठी गेले असता प्रतिवादींनी वाद करून कल्याणकर यांच्यावर हल्ला केला. याप्रसंगी आमदार अब्दुल सत्तार हे भांडण सोडविण्यासाठी गेले. त्यावेळी कथित बनावट व्हिडिओ क्लिप तयार करीत त्यामध्ये छेडछाड करून दोन समाजामध्ये तेढ निर्माण करण्यासाठी ती व्हायरल केल्याचा आरोप निवेदनात केला आहे. आमदार हे भांडण सोडविताना व लक्ष्मण कल्याणकर यांना बेदम मारहाण होताना दाखवण्यात आले नाही, फक्त कथित शिवीगाळ केल्याचे दर्शविले आहे. आमदार सत्तार हे भांडण सोडविण्यासाठी गेले नसते, तर कल्याणकर यांचा खून झाला असता असे निवेदनात म्हटले आहे. त्यामुळे बदनामीचा हा प्रकार रोखावा, अशी मागणी प्रशासनाकडे करण्यात आली आहे.

मोबाइल अॅप डाउनलोड करा आणि राहा अपडेट

शिक्षणमंत्र्यांनी दत्तक घेतलेल्या शाळेची दुरवस्था

June 16, 2017, 2:32 pm

≫ Next: ​ २३ मंडळात अतिवृष्टी

≪ Previous: आमदार सत्तारांविरुद्ध भाजप, शिवसेनेचा रास्ता रोको

$

0

0

म. टा. प्रतिनिधी, उस्मानाबाद
उस्मानाबाद तालुक्यातील घुगी येथील जिल्हा परिषद शाळा शालेय शिक्षणमंत्री विनोद तावडे यांनी दत्तक घेवून एक वर्षाचा कालावधी लोटला. त्यांनी ही शाळा दत्तक घेतल्याने शाळेचे भोग संपतील अशी आशा होती. मात्र, शाळेची दुरावस्था व हालअपेष्टा संपण्याची चिन्हे दिसत नाहीत.
घुगी येथील शाळेत पहिली ते आठवीपर्यंतचे वर्ग भरतात. येथील पटसंख्या सुमारे १५० इतकी असून, सात शिक्षक येथे कार्यरत आहेत. या शाळेत वर्गासाठी म्हणून आठ खोल्या आहेत. या खोल्याचे बांधकाम काळ्या मातीत झाल्याने येथील वर्गासाठीच्या चार खोल्या या वापरण्यास योग्य नसल्याचा अहवाल येथील मुख्यधिकाऱ्यांनी जिल्हा परिषदेच्या शिक्षण विभागाला वारंवार कळविला आहे. परंतु, प्रशासनाने याची फारशी दखल घेतली नाही. २८ मार्च २०१६ रोजी घुगी परिसरात वादळी पाऊस झाला. यामध्ये या शाळेच्या ८ पैकी ५ वर्ग खोल्यावरील पत्रे उडून गेले. सर्वच वर्गखोल्यांच्या भिंतींना तडे गेले. यामुळे शाळेच्या या सर्व खोल्या वापरण्यास धोकादायक असल्याचा अहवाल शाळेने संबंधितांना पाठविला.
घुगी परिसर हा भाजपला पोषक असल्याने शालेय शिक्षण व क्रीडा विभाग मंत्री विनोद तावडे यांनी घुगीला भेट देऊन ही शाळा स्वतः दत्तक घेत असल्याची घोषणा ४ मार्च २०१६ रोजीच्या उस्मानाबाद जिल्हा दोऱ्यात घुगी येथे केली होती. इतकेच नव्हे तर घुगी येथे शाळेची परिपूर्ण वास्तू तात्काळ उभारण्याचे आश्वासन दिले होते.
यानंतर, सर्व शिक्षा अभियानांतर्गत (२०१६-१७) मध्ये या शाळेची ८ वर्ग खोल्यासहिताची संपूर्ण इमारत, किचनशेड, स्वछतागृह, संरक्षक भिंत बांधण्याबाबतचा प्रस्ताव जिल्हा परिषद शिक्षणाधिकारी (प्राथमिक) यांनी ६ एप्रिल २०१६ रोजी राज्य प्रकल्प संचालक, महाराष्ट्र प्राथमिक शिक्षण परिषद, मुंबई यांना पाठवून दिले. या कामासाठी ८२ लाखांची तरतूद करण्याबाबत
प्रस्तावित केले. त्यानंतर राज्य शिक्षण विभागाने या शाळेच्या कामासाठी म्हणून ९० लाखाचा निधी मंजूर केला. इतकेच नव्हे तर हा निधी जिल्हा परिषदेकडे एक वर्षांपूर्वी प्राप्त झाला आहे.

झेडपीच्या शिक्षण विभागाचे दुर्लक्ष
घुगी येथील जिल्हा परिषदेची ही शाळा शिक्षणमंत्री विनोद तावडे यांनी दत्तक
घेऊन १५ महिन्याचा कालावधी लोटला. मात्र, अद्यापही येथील कामाची सुरुवात झालेली नाही. त्याशिवाय दत्तक घेतलेल्या शाळेच्या प्रगतीचा व कामाबाबतचा अहवाल व विचारपुस करण्याची गरज मंत्री महोदयाबरोबरच जिल्हा परिषद शिक्षण विभागाला वाटली नाही. सध्या ही शाळा येथील शिक्षकांनी व ग्रामस्थांनी गोळा करून उभारलेल्या पत्र्याच्या दोन शेडमध्ये व पडझड झालेल्या चार खोल्यात सुरू आहे.


घुगी येथील शाळेच्या इमारतीसाठी ९० लाखांचा निधी प्राप्त होऊन एक वर्षाचा कालावधी लोटला. तेथे शाळेची नवीन इमारत उभारण्यासाठी ग्रामपंचायतीने देऊ केलेली जागा अद्याप महसूल विभागाने जिल्हा परिषदेच्या नावे केली नसल्याने, येथील बांधकाम रखडले आहे.
सचिन जगताप, शिक्षणाधिकारी (प्राथमिक)
जिल्हा परिषद, उस्मानाबाद

मोबाइल अॅप डाउनलोड करा आणि राहा अपडेट

​ २३ मंडळात अतिवृष्टी

June 16, 2017, 3:26 pm

≫ Next: सरकारकडून शेतकऱ्यांचा विश्वासघात

≪ Previous: शिक्षणमंत्र्यांनी दत्तक घेतलेल्या शाळेची दुरवस्था

$

0

0

म. टा. प्रतिनिधी, औरंगाबाद
गेल्या पंधरा दिवसांपासून मराठवाड्यावर पावसाची कृपादृष्टी असून शुक्रवारी (१६ जून) सकाळपर्यंत विभागातील तब्बल २३ मंडळांमध्ये अतिवृष्टी झाली. नांदेड, बीड आणि लातूर जिल्ह्याला पावसाने झोडपून काढले.
मराठवाड्यात गेल्यावर्षी प्रमाणे यंदाही जून महिन्याच्या प्रारंभीच मान्सूनपूर्व पावसाने दमदार हजेरी लावली. पहिल्या काही दिवसातच मान्सूनपूर्व पावसाने विभागातील सर्व ७६ तालुक्यांना पावसाने चिंब केले. आता १५ दिवसानंतरही पावसाची दमदार हजेरी सुरूच आहे. शुक्रवारी सकाळपर्यंत औरंगाबाद जिल्ह्यातील लाडसावंगी (९० मिमी), अंबड (जि. जालना) तालुक्यातील जामखेड (६५ मिमी), हिंगोली जिल्ह्यातील हिंगोली (७२ मिमी), वासंबा (७६ मिमी), डिग्रस (८१ मिमी), औंढा नागनाथ तालुक्यातील येहळेगाव (७० मिमी), नांदेड (८६ मिमी), विष्णूपुरी (१०५ मिमी), वजिराबाद (१११ मिमी), नांदेड (७९ मिमी), तरोडा (८० मिमी), लोहा तालुक्यातील कुरुला (९९ मिमी), नायगाव तालुक्यातील कुंटूर (७२ मिमी), मुखेड तालुक्यातील मुक्रमाबाद (७२मिमी) बीड जिल्ह्यातील आष्टी तालुक्यात पावसाने जोरदार हजेरी लावली. तालुक्यातील कडा (६६ मिमी), पिंपळा (७० मिमी), टाकळसिंग (८७मिमी) व धानोरा (७३मिमी) तसेच शिरुर कासार तालुक्यातील तिंतरवणी (७५ मिमी) तालुक्यात अतिवृष्टी झाली. लातूर जिल्ह्यालाही पावसाने झोडपले. अहमदपूर तालुक्यातील शिरुर ताजबंद (७९ मिमी), जळकोट तालुक्याती झरी बु. (९५ मिमी), जळकोट तालुक्यातील घोन्सी (९७ मिमी) व देवणी तालुक्यातील अंबुलगा मंडळात ७० मिलिमीटर पाऊस झाला. वादळी वारे, विजांच्या कडकडाटासह झालेल्या पावसामुळे विभागाची पावसाची वार्षिक टक्केवारी १७.३ पर्यंत पोचली आहे.

उस्मानाबाद जिल्ह्यात सर्वाधिक पाऊस
मान्सूनपूर्वीच लातूर, बीड, उस्मानाबाद जिल्ह्यामध्ये पावसाचा जोर होता. १ जून ते १५ जूनदरम्यान आतापर्यंत सर्वाधिक एकूण १९२ मिलिमीटर पाऊस उस्मानाबाद जिल्ह्यात झाला आहे. १५ जूनपर्यंतच जिल्ह्यामध्ये वार्षिक सरासरीच्या तुलनेत तब्बल २४.७ टक्के पाऊस झाला आहे. तर औरंगाबाद जिल्ह्यात १७.६, जालना १७.७, परभणी १३.६, हिंगोली १५.४, नांदेड १०.९, बीड २१.४ तर लातूर जिल्ह्यात वार्षिक सरासरीच्या तुलनेत आताच १९.४ टक्के पाऊस झाला आहे.

८ तालुक्यांकडे पावसाची पाठ
पावसाने हिंगोली आणि नांदेड जिल्ह्यातील ७ तालुक्यांकडे पाठ फिरवली असून या तालुक्यांमध्ये वार्षिक सरासरीच्या दहा टक्केही पाऊस झाला नाही. यामध्ये हिंगोली जिल्ह्यातील कळमनुरी तर नांदेड जिल्ह्यातील उमरी, किनवट, माहूर, हिमायतनगर, देगलूर, बिलोली व नायगाव तालुक्यांचा समावेश आहे.

मोबाइल अॅप डाउनलोड करा आणि राहा अपडेट

सरकारकडून शेतकऱ्यांचा विश्वासघात

June 16, 2017, 3:29 pm

≫ Next: लातूरमध्ये एटीएसचे बोगस कॉल सेंटरवर छापे

≪ Previous: ​ २३ मंडळात अतिवृष्टी

$

0

0

म. टा. प्रतिनिधी, लातूर
राज्य सरकारने गेल्या अडीच वर्षाच्या काळात शेतकऱ्यांची घोर फसवणूक नाही तर विश्वासघात केला असल्याचा आरोप राष्ट्रवादी काँग्रेसचे नेते अजित पवार यांनी केला. लातूर येथे राष्ट्रवादी काँग्रेसच्यावीतने संघटनात्मक बांधणीसाठी घेण्यात आलेल्या मेळाव्यानंतर आयोजीत पत्रकार परिषदेत केला.
यावेळी राष्ट्रवादी काँग्रेसचे प्रदेशाध्यक्ष सुनील तटकरे, विधान परिषदेचे विरोधी पक्षनेते धनंजय मुंडे, आमदार विक्रम काळे यांची उपस्थितीती होती.
यावेळी बोलताना अजित पवार म्हणाले,‘शेतकऱ्यांना दिलेल्या कर्जमाफीमध्ये अत्यंत किचकट अशा अटी घालण्यात आल्या आहेत. राज्य सरकारने १४ जून रोजी काढलेल्या आदेशात तर ३० जून २०१६ पुर्वीची शेतकऱ्याची कर्ज माफ करण्याचे म्हटले आहे. त्याच प्रमाणे सरसकट कर्ज माफी दिली नसून फक्त दहा हजार रुपये माफ केले जाणार आहेत. त्यात ही चार चाकी वाहन असणाऱ्यांना नाही, अशा अनेक अटी आहेत. त्यामुळे गरजु शेतकऱ्यांना त्याचा फायदा होणार नाही. बँकाना अद्यापही या शेतकऱ्यांना कर्ज द्या किंवा याचे माफ करा असे सांगितले नाही. त्यामुळे बँकाही काही करीत नाहीत.’
महसूल मंत्री चंद्रकांत पाटील यांनी सर्व राजकीय पक्ष, संघटनाशी बोलून निकष ठरवले जातील असे सांगितले होते. परंतु त्यांनी तसे केले नाही. गरजु शेतकरी कर्जमाफीपासून वंचित राहणार आहेत. त्यामुळे आम्ही सरकारशी चर्चा करून त्याला न्याय मिळेल यासाठी प्रयत्न करु आणि गरज पडली तर संघर्ष ही करणार असल्याचे त्यांनी स्पष्ट केले.
शिवसेनेचे मंत्री रामदास कदम यांच्या वक्तव्याची फार दखल गरज घेण्याची गरज नसल्याचे सांगून राष्ट्रवादीचे प्रदेशाध्यक्ष सुनील तटकरे म्हणाले की, रामदास कदम हे वाचाळ मंत्री आहेत. ते भाजपबरोबर सत्तेत राहतात आणि मुख्यमंत्र्यांवर टीका ही करतात. त्यांनी प्रथम राज्यकर्ते म्हणून पाळावयाचे शिष्टाचार शिकून घ्यावेत. त्यानंतर राष्ट्रवादी काँग्रेसला शिकवावे, एवढाच त्यांना इशारा पुरे आहे.
राष्ट्रवादी काँग्रेसने पुढील वर्ष हे बळीराजाला समर्पित केल्याचे सांगून शेतकऱ्यांच्या कल्याणासाठी शेतकऱ्यांच्या ११ मागण्यांची सनद राज्य सरकारला दिली आहे. या मागण्या पूर्ण करून घेण्यासाठी आम्ही विधी मंडळात सनदशिरमार्गाने लढा देणार आहोत. गरज पडली तर रस्त्यावर संघर्ष करू असे ही यावेळी तटकरे यांनी स्पष्ट केले.
यावेळी राष्ट्रवादी काँग्रेसच्या महिला प्रदेशाध्यक्षा चित्रा वाघ, जिल्हाध्यक्ष बाबासाहेब पाटील, मकरंद सावे, बसवराज पाटील-नागराळकर, संजय शेटे, संजय बनसोडे यांची उपस्थिती होती.


अशी सत्ता कोणी सोडेल का ?
कोणाताही पक्ष नेहमीच निवडणुकीला तयार असतो. थांबा आमची तयारी झाली नाही असे कोणी म्हणत नसते. त्यामुळे मध्यावधी झाली तर आम्ही लढणारच आहोत. परंतु, पंधरा वर्षानंतर मिळालेली सत्ता अशी कोणी सोडतो का असा उलट सवाल ही अजित पवार यांनी यावेळी केला.

मोबाइल अॅप डाउनलोड करा आणि राहा अपडेट

---

लातूरमध्ये एटीएसचे बोगस कॉल सेंटरवर छापे

June 16, 2017, 9:09 pm

≫ Next: दिल्ली-औरंगाबाद झूम एअरचे विमान

≪ Previous: सरकारकडून शेतकऱ्यांचा विश्वासघात

$

0

0

मटा ऑनलाइन वृत्त | लातूर

जम्मू-काश्मीरच्या लष्करी गुप्तचर यंत्रणेकडून मिळालेल्या माहितीनंतर महाराष्ट्र दहशतवादविरोधी पथकानं (एटीएस) लातूर पोलिसांच्या मदतीने जिल्ह्यात अनेक ठिकाणी छापे टाकले आहेत. या छाप्यात पोलिसांनी एकूण ४ लाख ६० हजार रुपयांच्या वस्तू जप्त केल्या केल्या असून दोघांना अटक केली आहे. बोगस कॉलसेंटर्समुळे दूरसंचार विभागाला आजवर तब्बल १५ कोटींच्या महसूल बुडाल्याचं सांगितलं जात आहे.

बोगस कॉलसेंटर्सच्या माध्यमातून आरोपी लोकल मोबाइल क्रमांकानं बेकायदा पद्धतीने आंतरराष्ट्रीय कॉल्स हाताळत असल्याचं उघड झालं. आंतरराष्ट्रीय कॉल अनधिकृत गेटवेच्या साहाय्याने लोकल लाइनवर वळवायचे असा हा बोगस कारभार लातूरमध्ये सुरू होता. अशा पद्धतीच्या कॉल्सचा वापर गुप्तचर यंत्रणेकडून शेजारी देशांशी संपर्क साधताना लष्करासंबंधीची अतिमहत्त्वाची माहिती पोहोचवण्यासाठी केला जातो. जम्मू-काश्मीरमध्ये लष्कराला लातूरातूनही असे कॉल्स हाताळले जात असल्याची माहिती मिळाल्यानंतर महाराष्ट्र एटीएसने छापासत्र सुरू केलं. एटीएसने सुरुवातीला लातूरच्या प्रकाश नगर भागात एका बोगस कॉलसेंटरवर धाड टाकली. यात एका ३३ वर्षीय इसमाला अटक करण्यात आली. त्यानं दिलेल्या माहितीनुसार, पोलिसांनी आणखी दोन ठिकाणी छापे टाकले.

प्रकाश नगर भागात एक इसम बोगस कॉलसेंटर चालवत असल्याची माहिती एटीएसला कळली होती. येथील कारवाईत पोलिसांनी ९६ सिमकार्ड, एक कम्प्युटर, सीपीयू, ३ अनधिकृत कॉल ट्रान्सफॉर्मिंग मशिन्स जप्त केल्या. गेल्या सहा महिन्यांपासून आरोपी अनधिकृतरित्या हे कॉलसेंटर चालवत असल्याचंही समोर आलं. या उद्योगामुळं आतापर्यंत ९ कोटींचं नुकसान झाल्याची माहिती दूरसंचार विभागाने निदर्शनास आणून दिली.

आरोपीच्या चौकशीत आणखी धागेदोरे मिळाल्यानंतर जिल्ह्यात वालनवाडी येथेही अशाच बोगस कॉलसेंटरवर छापा टाकण्यात आला. यात दोन बेकायदेशीर आंतरराष्ट्रीय गेटवे, १४ सिमकार्ड आणि १ लाख २० हजार इतक्या किमतीच्या इलेक्ट्रॉनिक वस्तू जप्त करण्यात आल्या आहेत. या पाठोपाठ चाकूर तालुक्यातही छापा टाकण्यात आला. येथेही एक २७ वर्षीय इसम बेकायदेशीररित्या कॉल सेंटरचं जंक्शन हाताळत असल्याचं उघडकीस आलं. आरोपीकडून तब्बल ६४ सिमकार्ड, एक लॅपटॉप, २ आंतरराष्ट्रीय गेट-वे मशिन्स आणि दीड लाख रुपयांचं एक मशिन असा ऐवज जप्त करण्यात आला आहे. दूरसंचार विभागाने झालेल्या नुकसानाची मोजणी केली असता या बोगस कॉलसेंटरमुळे तब्बल ६ कोटी रुपयांचा तोटा झाल्याचं स्पष्ट झालं आहे. गेल्या ५ महिन्यांपासून या भागात हे बोगस कॉलसेंटर सुरू होतं. एटीएसकडून आता याप्रकरणी पुढील चौकशी सुरू आहे.

मोबाइल अॅप डाउनलोड करा आणि राहा अपडेट

दिल्ली-औरंगाबाद झूम एअरचे विमान

June 17, 2017, 11:05 am

≫ Next: लातूरमध्ये परदेशी कॉलचे जाळे उद्ध्वस्त

≪ Previous: लातूरमध्ये एटीएसचे बोगस कॉल सेंटरवर छापे

$

0

0

म. टा. प्रतिनिधी, औरंगाबाद

औरंगाबादेतून दिल्ली आणि मुंबईला जाण्यासाठी नवीन विमान सेवा लवकरच सुरू होण्याची शक्यता आहे. औरंगाबादहून ‘झूम एअर’ आणि ‘डेक्कन एव्हिएशन’ या दोन विमान कंपन्यांनी विमानसेवा सुरू प्रस्ताव दिला आहे. झुम एअरवेजने औरंगाबादहून लवकरच दिल्लीसाठी विमान सेवा सुरू होणार असल्याची अधिकृत घोषणाही केली आहे.
उड्डाण योजनेंतर्गत ट्रू जेटने नांदेड येथून हैदराबादसाठी विमान सेवा सुरू झाली आहे. या योजनेमुळे छोट्या कंपन्यांकडून महत्त्वाच्या शहरासाठी विमान सेवा सुरू करण्याबाबत प्रयत्न केले जात आहे. औरंगाबाद विमानतळावरून सध्या हैदराबाद, मुंबई आणि दिल्ली या तीन शहरांसाठी विमान सेवा सुरू आहे. जेट एअरवेज, ट्रु जेट आणि एअर इंडिया या तीन कंपन्यांची विमानसेवा सुरू आहे. देशांतर्गत विमान सेवा सुरू करण्याबाबत अनेक कंपन्यांकडून प्रस्ताव देण्यात येत आहे. इंडिगो एअरलाइन्सतर्फे विविध शहरांसाठी विमान सेवा सुरू करण्याचे प्रयत्न सुरू आहेत. मात्र अजूनही इंडिगो विमान कंपनीकडून विमानसेवा सुरू करण्याबाबत निर्णय घेण्यात आलेला नाही. विमानतळ प्राधिकरणाच्या सूत्रांनी इंडिगो विमान सेवा ही ऑक्टोबरनंतर सुरू होण्याची शक्यता वर्तविली जात आहे.
तत्पूर्वी डेक्कन एव्हिएशन आणि झुम एअर या कंपनीने ‌औरंगाबादहून विमान सेवा सुरू करण्याबाबत प्रस्ताव दाखल केला आहे. डेक्कन एअरवेजने मुंबईसाठी विमान सुरू करण्याचा निर्णय घेतला आहे. या कंपनीला विमानतळ प्राधिकरणाकडून मान्यता अजूनही मिळालेली नाही तर दिल्ली शहराला औरंगाबादहून विमानसेवा देण्यासाठी झुम एअर नावाची विमान कंपनीने पुढाकार घेतला आहे. या विमान कंपनीने नवीन विमान सेवा दिल्लीहून तेरा शहरांसाठी विमान सेवा सुरू करण्याची घोषणा केली आहे. यात औरंगाबाद शहराचाही समावेश आहे. झुम एअरची विमान सेवा ही सकाळ आणि संध्याकाळ अशा दोन सत्रांत चालविण्याबाबत प्रस्ताव आहे.

मोबाइल अॅप डाउनलोड करा आणि राहा अपडेट

लातूरमध्ये परदेशी कॉलचे जाळे उद्ध्वस्त

June 17, 2017, 1:13 pm

≫ Next: ​ ‘वन स्टॉप सेंटर’ सुरू होणार

≪ Previous: दिल्ली-औरंगाबाद झूम एअरचे विमान

$

0

0

म. टा. प्रतिनिधी, लातूर

औरंगाबाद, लातूर येथील दहशतवाद विरोधी पथक (एटीएस), स्थानिक गुन्हे शाखेने शुक्रवारी रात्री येथील दोन अनधिकृत दूरध्वनी केंद्रांवर छापे टाकले. जम्मू-काश्मीरच्या लष्करी गुप्तचर यंत्रणेकडून माहिती मिळाल्यानंतर ही कारवाई करण्यात आली. या प्रकरणी दोघांना अटक केली असून, त्यांच्याकडून ९६ सिमकार्डसह चार लाख ६० हजार रुपयांचा मुद्देमाल जप्त करण्यात आला आहे. या केंद्रांवर परदेशातून बेकायदा दूरध्वनी येत असल्याचे समोर आल्याने सुरक्षिततेचा प्रश्न निर्माण झाला आहे.

जम्मू-काश्मीर आणि मुंबई, औरंगाबादच्या एटीएसकडून लातूरच्या पोलिसांना दूरध्वनी केंद्रांविषयी मिळाली. त्याआधारे लातुरातील प्रकाशनगर भागातील शंकर बिराजदार यांच्या घरावर छापा टाकण्यात आला. त्यामध्ये पोलिसांना अनधिकृत सिमकार्डसह एक कम्प्युटर आणि ३ अनधिकृत कॉल ट्रान्स्फॉर्मिंग मशिन आढळल्या. त्यानंतर पोलिसांनी रवी साबदे यांच्या घरावर छापा टाकला. त्यातही आक्षेपार्ह साहित्य सापडले. या दोघांनाही अटक करण्यात आल्याचे दहशतवाद विरोधी पथकाच्या लातूर विभागाचे पोलिस अधिकारी राजकुमार पुजारी यांनी सांगितले. जिल्ह्यातील वलांडीमध्ये बंद मशिन आढळून आले. या अनधिकृत केंद्रात परदेशातूनही दूरध्वनी येत होते. त्यामुळे दूरसंचार विभागाचे १५ कोटी रुपयांचे नुकसान झाल्याचे दूरसंचार विभागाने सांगितल्याची माहिती पुजारी यांनी दिली.

लष्कराची गुप्तमाहिती

या केंद्रावरून आरोपी लोकल मोबाइल क्रमांकाने बेकायदा पद्धतीने आंतरराष्ट्रीय कॉल्स लोकल लाइनवर वळवायचे. अशा पद्धतीच्या कॉल्सचा वापर गुप्तचर यंत्रणेकडून शेजारी देशांशी संपर्क साधताना लष्करासंबंधीची अतिमहत्त्वाची माहिती पोहोचवण्यासाठी केला जातो. जम्मू-काश्मीरमध्ये लष्कराला लातूरमधूनही असे कॉल्स हाताळले जात असल्याची माहिती मिळाली होती.

मोबाइल अॅप डाउनलोड करा आणि राहा अपडेट

​ ‘वन स्टॉप सेंटर’ सुरू होणार

June 17, 2017, 1:50 pm

≫ Next: ऐतिहासिक वास्तूंना उजाळा

≪ Previous: लातूरमध्ये परदेशी कॉलचे जाळे उद्ध्वस्त

$

0

0

म. टा. प्रतिनिधी, औरंगाबाद
दोन वर्षांपूर्वी घोषणा होऊनही दिरंगाईमुळे लांबणीवर पडलेले आणि पीडित महिलांना सहाय्यभूत ठरणारे मराठवाड्यातील पहिले ‘वन स्टॉप सेंटर’ ‘मटा’ने वारंवार केलेल्या पाठपुराव्यामुळे महापालिकेच्या नेहरूनगर रुग्णालयात सुरू होण्याचा मार्ग मोकळा झाला आहे. जिल्हा महिला व बालविकास विभागानेही या वृत्ताला दुजोरा दिला.
निर्भया प्रकरणानंतर पीडित महिलांसाठी खास मदत केंद्र ओएससी अर्थात वन स्टॉप सेंटरची घोषणा केंद्र सरकारच्या महिला व बाल विकास विभागाने केली होती. या केंद्रात पीडितेला एकाच छताखाली मोफत वैद्यकीय सेवा, विधी सेवा प्राधिकरणची उपलब्धता, पोलिसांची मदत, समुपदेशन केले जाईल. बलात्कारासारख्या प्रसंगाचा सामना करावा लागणाऱ्या पीडितेला एकाच ठिकाणी आवश्यक ती मदत उपलब्ध करणे या योजनेचा हेतू आहे. २०१५पासून देशभरात ‘ओएससी’ सेंटर सुरू करण्यात आले. यामध्ये राज्यातील ११ जिल्ह्यांमध्ये औरंगाबादचाही समावेश आहे. योजना शंभर टक्के केंद्र शासन पुरस्कृत असून यासाठी राज्य सरकार किंवा पालिकेला पैसे खर्च करावे लागणार नाहीत. पालिकेला केवळ जागा उपलब्ध करून द्यायची होती. देशभरात असे किती सेंटर सुरू झाले, याचा आढावा जिल्हाधिकारी कार्यालयात नऊ मे रोजी झालेल्या बैठकीत घेण्यात आला. योजना सुरू होऊन दोन वर्षे उलटली, पण शहरात केंद्र सुरू नसल्याचे समजल्यावर जिल्हाधिकारी नवलकिशोर राम यांनी या केंद्रासाठी जागा उपलब्ध करून द्यावी असे पत्र पालिकेला दिले. या पत्राची दखल घेत पालिकेने नेहरूनगरच्या रुग्णालयाजवळची दोन खोल्यांची जागा निश्चित केली. योजनेच्या निकषांमध्ये हे केंद्र रुग्णालयाजवळ असावे किंवा पालिका किंवा सिव्हिल सर्जन, आरोग्य अधिकाऱ्यांच्या दवाखान्याजवळ असावे अशी अट आहे. त्यानुसार सध्या नेहरूनगरच्या जागा पालिकेने सुचवली. या बैठकीमध्ये जिल्हा महिला व बालविकास अधिकार्यांना ही जागा तात्काळ हस्तगत करण्याचे आदेश देण्यात आले होते. मात्र, नंतरही विभागाने जागेची पाहणी केली नव्हती. ​​महिला व बाल विकास विभागाच्या उपायुक्तांनीही याबाबत आग्रही भूमिका घेणे गरजेचे होते. दोन वर्षे जागा नाही म्हणून योजना नाही. आता तात्पुरती जागा मिळाली तरी जागा नक्की करून केंद्र सुरू करण्यासाठी अजून किती दिवसांची प्रतीक्षा हवी असा सवाल सामा​जिक संघटना विचारत होत्या. त्यानंतर हा केंद्र सुरू करण्याच्या हालचाली तीव्र झाल्या.

पायाभूत सुविधांचे काम कधी होणार?
जिल्हा महिला व बाल विकास विभागाच्या या दिरंगाईचे वत्त ‘मटा’ने प्रसिद्ध केले होते. त्यानंतर दोन आठवड्यांपूर्वीच विभागाने जागेची पाहणी केली व अहवाल व्यवस्थापन समितीसमोर ठेवला. जिल्हाधिकारी नवल किशोर राम या समितीचे अध्यक्ष आहेत. नेहरूनगरची जागा निश्चित झाल्यावर मात्र जिल्हा महिला व बाल विकास विभागाच्या अतिरिक्त जिल्हा महिला व बालविकास अधिकारी रेश्मा चिमंद्रे व संपूर्ण विभागानेच केंद्र सुरू करण्याच्या हालचाली तीव्र केल्या. या केंद्रासाठी कंत्राटी कर्मचारी व पायाभूत सुविधांवर अजून काम होणे बाकी आहे.

मोबाइल अॅप डाउनलोड करा आणि राहा अपडेट

ऐतिहासिक वास्तूंना उजाळा

June 17, 2017, 1:52 pm

≫ Next: विद्यापीठ वेबसाइट अपडेट करणार

≪ Previous: ​ ‘वन स्टॉप सेंटर’ सुरू होणार

$

0

0

औरंगाबाद : शहराची दोन हजार वर्षांची ऐतिहासिक परंपरा जाणून घेताना पर्यटनप्रेमी चकीत झाले. राजस्थानी- मुघल शैलीचे उत्तम स्थापत्य असलेला सोनेरी महाल पाहताना सर्वजण थक्क झाले. हेरिटेज वॉक उपक्रमात इतिहास तज्ज्ञांनी ऐतिहासिक वास्तूंचे वेगळेपण सांगत उजाळा दिला.
महाराष्ट्र पर्यटन विकास मंडळाने ऐतिहासिक वास्तूंबाबत जागरूकता वाढवण्यासाठी हेरिटेज वॉक उपक्रम सुरू केला आहे. प्रत्येक महिन्यात दोन वेळेस हा उपक्रम होतो. सोनेरी महाल येथे शनिवारी सकाळी हेरिटेज वॉक झाला. डॉ. बाबासाहेब आंबेडकर मराठवाडा विद्यापीठातील पर्यटन विभागाचे संचालक डॉ. राजेश रगडे यांनी शहरातील वास्तूंची माहिती सांगितली. ‘मध्ययुगीन इतिहासात औरंगाबादचे वेगळे महत्त्व आहे. शहरातून काही काळ राज्यकारभार चालवला गेला. त्यामुळे ऐतिहासिक वास्तूंची निर्मिती झाली,’ असे रगडे म्हणाले. यावेळी राज्य पुरातत्व विभागाच्या अधिकारी नीलिमा मार्कंडेय, एम. व्ही. साखरे यांनी सोनेरी महालातील हत्तीखाना, तोफा, पाणी व्यवस्थापन याची माहिती दिली. या उपक्रमात एमटीडीसीचे अण्णासाहेब शिंदे, राज्य पुरातत्वचे सहायक संचालक अजित खंदारे, प्रदीप देशपांडे, डॉ. पंडित नलावडे, डॉ. कामाजी डक, संजय पाईकराव, मयुरेश खडके, प्रतिम बारभुवन, सौरभ जामकर आदी उपस्थित होते.

विद्यार्थ्यांचा सहभाग
पंडित जवाहरलाल नेहरू महाविद्यालयातील राष्ट्रीय सेवा योजना विभागाच्या स्वयंसेवकांनी ‘हेरिटेज वॉक’मध्ये सहभाग घेतला. ‘एनएसएस’चे कार्यक्रमाधिकारी डॉ. पंडित नलावडे, प्रा. ज्योती अधाने यांच्यासह मोहन खंडागळे, सचिन साळुंके, सद्दाम सय्यद, सूरज जाधव, सोनाली सोहोनी, आरती वाघ, माधुरी परेकर, आकाश सोनकांबळे, वैजनाथ झळके, नीशा पाटील, आदिनाथ घुगे आदी सहभागी झाले.

हिमायतबागेत आज हेरिटेज वॉक
मुघल बागेचा उत्कृष्ट नमुना असलेल्या हिमायतबागेत औरंगाबाद हिस्ट्री सोसायटीच्या वतीने रविवारी (१८ जून) सकाळी साडेसात वाजता हेरिटेज वॉकचे आयोजन करण्यात आले आहे. बागेतील ऐतिहासिक जलव्यवस्था, बांधकाम शैलीचा उत्कृष्ट नमुना असलेल्या समर पॅलेसला जवळून पाहण्याची संधी मिळेल. शहरातील मुघलकालीन खिजरी तलावाला बुजवून त्या जागी ही बाग तयार करण्यात आली. या बागेतून शाही परिवारांसाठी फळे रवाना करण्यात यायची. हिमायत बागेत असलेला अर्ध भूमिगत समर पॅलेस दख्खनेत सापडत नाही. या पॅलेसचे महत्त्व आणि बांधकामाची शैली पाहण्याची संधी मिळणार आहे. इतिहास अभ्यासक डॉ. दुलारी कुरैशी, रफत कुरैशी, डॉ. बीना सेंगर, हिमायत बागेचे एसओएसचे स्वप्नील जोशी हे माहिती देतील.

मोबाइल अॅप डाउनलोड करा आणि राहा अपडेट