![]()
विमा हप्ता, कर्जमुक्तीचा अर्ज भरण्यासाठी रांग, मुखेडमध्ये लाठीमार तर बोरीत गुन्हे
टीम मटा, औरंगाबाद
मराठवाड्यातील शेतकऱ्यांनी पीक विम्याचा हप्ता भरण्यासाठी व कर्जमुक्तीचा अर्ज भरण्यासाठी बँकासमोर मोठी रांग लावली आहे. ही प्रक्रिया ऑनलाइन असल्याने शेतकऱ्यांचा बराचसा वेळ बँकासमोरच जात आहे. गर्दीवर नियंत्रण ठेवण्यासाठी शुक्रवारी पोलिसांनी मुखेडमध्ये लाठीमार केला. यावेळी दगडफेकीत एक महिला जखमी झाली तर बोरीमध्ये रास्ता रोको केल्याप्रकरणी २४ शेतकऱ्यांवर गुन्हे दाखल केले आहेत.
मुखेडमध्ये दगडफेकीत महिला जखमी
नांदेड - मुखेड यथे बँक ऑफ इंडियाच्या शाखेसमोर पीक विमा भरणाऱ्या शेतकऱ्यांच्या रांगेत घुसणाऱ्यांना पोलिसी खाक्या दाखविल्यामुळे कोणी तरी चिडून दगडफेक केली. त्यात पद्मिनीबाई डोईफोडे यांच्या डोक्याला मार लागला. हा प्रकार शुक्रवारी घडला.
विमा भरणाऱ्या हजारो शेतकऱ्यांनी दिवसभर बँकेच्या वेळात रांगा लावल्या होत्या. वेळ संपल्याने अनेकांना घरी परतावे लागले. सध्या शेतातील मशागतीकडे लक्ष देण्याची आवश्यकता असताना जागोजागी शेतकरी पीक विमा भरण्यासाठी रांगेत उभा आहे. नियोजनाअभावी होणारे हाल खरच किती मनुष्यशक्ती वाया घालणारे ठरत आहेत. त्यामुळे याचा जाब कुणाला विचारावा ? असा सवाल मालेगाव येथील सतीश कुलकर्णी यांनी व्यक्त केली.
बोरीच्या २४ शेतकऱ्यांवर गुन्हे दाखल
परभणी - पीक विमा भरण्यसाठी राहिलेल्या अल्पकाळामुळे शेतकऱ्यांनी विमा भरण्यासाठी बँका आणि ई-महासेवा केंद्रांवर गर्दी केली. मात्र, इंटरनेट सेवेत येत असलेल्या अडचणींमुळे शेतकऱ्यांना दिवसरात्र रांगेत उभे राहावे लागत असल्याने अनेक ठिकाणी शेतकरी आंदोलन करत आहेत. गुरूवारी जिंतुर तालुक्यातील बोरीच्या शेतकऱ्यांनी असेच रास्ता रोको आंदोलन केल्याने पोलिसांनी त्यांच्यावर लाठीमार केला होता. शिवाय, शुक्रवारी आंदोलनकर्त्या २४ शेतकऱ्यांवर गुन्हे दाखल केल्याने बोरीकरांनी कडकडीत बंद पाळला.
जिल्हाभरात शेतकऱ्यांनी पीक विमा भरण्यासाठी केवळ दोन दिवस शिल्लक राहिल्याने बँका आणि ई-महासेवा केंद्रांबाहेर तोबा गर्दी केली आहे. परंतु, इंटरनेट सर्व्हरमध्ये येणाऱ्या अडचणींमुळे पिक विमा भरण्याची प्रक्रिया वारंवार खंडीत होऊ लागली आहे. त्यामुळे तासाभराच्या कामाला शेतकऱ्यांना दिवस-रात्र रांगेत उभे राहावे लागत आहे.
लाठीमाराचे विधानसभेत पडसाद
ऑनलाइन पीक विमा भरण्याच्या प्रक्रियेत सतत होत असलेल्या बिघाडामुळे विमा भरून घेण्यास अनेक अडचणी येत आहेत. बोरी येथील जिल्हा मध्यवर्ती सहकारी बँकेत उद्भवलेल्या अडचणींमुळे शेतकऱ्यांनी रास्तारोको आंदोलन करण्याचा प्रयत्न केला. मात्र आंदोलन करणाऱ्यां या सर्व शेतकऱ्यांवर दंगा नियंत्रण पोलीस पथक बोलावून अमानुष लाठीचार्ज करण्यात आला. पिक विमा भरण्याची तारीख वाढवून देऊन याबाबतचे परिपत्रक शासनाने तात्काळ जिल्हाधिकाऱ्यांना पाठवावे, अशी मागणी शुक्रवारी आ. डॉ. राहुल पाटील यांनी विधानसभेत केली आहे.
शेतकऱ्यांची रात्र रस्त्यावर
परभणीसह तालुक्याच्या शहरी भागात ऑनलाइन केंद्रांवर पिकविमा भरण्यासाठी शेतकरी मोठी गर्दी करत आहेत. मात्र, विमा कंपनीची वेबसाईट जाम होत असल्याने दिवस भरात पाच-सहा शेतकऱ्यांचे अर्ज भरल्या जात आहेत. यासाठी रात्री तरी वेबसाईट चालेल म्हणून शेतकरी किरायाचे वाहन करून शहरात दाखल होत आहेत. ज्यामुळे शेतकऱ्यांना रात्रभर रस्त्यावर जागुन काढावी लागत आहे. शहरातील बँका आणि ई-महासेवा केंद्रांबाहेर हे चित्र दिसून येत आहे.
