महापालिकेत दोन वर्षांपूर्वी ‘टीडीआर’ गैरव्यवहाराची सहा प्रकरणे उघडकीस आली. याप्रकरणी तत्कालीन आयुक्तांनी नगररचना विभागातील काही अधिकाऱ्यांना निलंबित केले. अधिकाऱ्यांच्या निलंबनानंतरही ‘टीडीआर’ गैरप्रकाराची काही प्रकरणे उघड झाली. या प्रकरणाची विधीमंडळात देखील चर्चा झाली. घोटाळ्यातील दोषींवर कारवाई करण्याचे आश्वासन देखील शासनातर्फे देण्यात आले. निलंबित अधिकाऱ्यांच्या विभागीय चौकशीची शिफारस तत्कालीन आयुक्तांनी शासनाकडे केली आहे.
या पार्श्वभूमीवर महापालिकेचे विद्यमान आयुक्त मुगळीकर यांनी ‘टीडीआर’च्या काही फाइल पुणे येथील नगररचना विभागाच्या संचालकांकडे तपासणीसाठी पाठवल्याची माहिती मिळाली आहे. ‘टीडीआर’च्या काही प्रकरणात मुगळीकर यांनाही संशय आला आहे. ‘टीडीआर’ चुकीच्या पद्धतीने दिल्याच शक्यता लक्षात घेऊन त्यांनी काही प्रकरणाच्या फाइल संचालकांकडे पाठवल्याचे सूत्रांनी सांगितले. संचालकांच्या अभिप्रायानंतर मुगळीकर ‘टीडीआर’च्या त्या फाइलबद्दल निर्णय घेणार असल्याचे मानले जात आहे.
संचालकांकडे पाठवण्यात आलेल्या फाइलमध्ये गैरप्रकार आढळून आल्यास संबंधित अधिकाऱ्यांवर कारवाई होऊ शकते, असेही मानले जात आहे. नगररचना विभागाच्या फाइल आयुक्तांनी संचाकलांकडे तपासणीसाठी पाठवण्याची पालिकेत अलिकडच्या काही वर्षांतील ही पहिलीच घटना असल्याचे बोलले जात आहे.
टीडीआर प्रकरणातील फाइल नगररचना विभागाच्या संचालकांकडे पाठवण्यात आल्या, ही बाब खरी आहे. विधीज्ञांच्या मतांमध्ये भिन्नता असल्यामुळे संचालकांचे मार्गदर्शन मागवले आहे. काही फाइल शासनाकडे देखील पाठवल्या आहेत. संचालक व शासनाच्या मार्गदर्शनाची वाट पहात आहे. त्यांनी केलेल्या मार्गदर्शनानुसार कारवाई केली जाणार आहे.
- डी. एम. मुगळीकर, आयुक्त, महापालिका
मोबाइल अॅप डाउनलोड करा आणि राहा अपडेट
बाहुबली, मोटूपतलू राखीवर विराजमान
नाट्यशास्त्र विभागात सीसीटीव्ही
