घोषित केल्यानुसार भारनियमन केले जात आहे की नाही, याची बुधवारी महावितरणचे सहव्यवस्थापकीय संचालक, मुख्य अभियंता व इतर अभियंत्यांनी प्रत्यक्ष रस्त्यावर उतरून तपासणी केली. सहव्यवस्थापकीय संचालक ओम प्रकाश बकोरिया यांना गारज येथे भारनियमनात त्रुटी आढळली, त्यांनी त्याबद्दल तपासणीचे आदेश दिले आहेत.
कोळशाचा पुरवठा कमी झाल्याने वीज निर्मितीत घट झाल्याने राज्यात भारनियमन केले जात आहे. पण, राज्यात अनेक ठिकाणी वेळापत्रकानुसार भारनियमन केले जात नसल्याच्या तक्रारी व्यवस्‍थापकीय संचालक संजीव कुमार यांच्याकडे करण्यात आल्या आहेत. याशिवाय भारनियमन लागू केल्यानंतरही अपेक्षित निकाल मिळत नसल्याने संजीव कुमार यांनी प्रादेशिक कार्यालयांच्या सहव्यवस्थापकीय संचालक, मुख्य अभियंत्यांना भारनियमन काळात विविध ठिकाणी जाऊन तपासणी करण्याचे आदेश दिले.
या आदेशानुसार, सहव्यवस्थापकीय संचालक ओम प्रकाश बकोरिया यांनी देवगाव रंगारी आणि गारज येथे जाऊन तपासणी केली. मुख्य अभियंता सुरेश गणेशकर यांनी जालना येथे तीन फिडरवरील भारनियम तपासले. अधीक्षक अभियंता शहर, ग्रामीण तसेच अन्य वरिष्ठ अधिकाऱ्यांनीही विविध ठिकाणी जाऊन भारनियमन तपासून अहवाल मुख्यालयाला पाठविला आहे.
देवगाव रंगारी आणि गारज येथे भारनियमनाची तपासणी केली. धुळे जिल्ह्यातील काही गावांत गुरुवारी तपासणी करण्यात येणार आहे.
-ओम प्रकाश बकोरिया, सहव्यवस्थापकीय संचालक
मोबाइल अॅप डाउनलोड करा आणि राहा अपडेट
