इंद्रधनुष्य युवक महोत्सवाचा शानदार समारोप
म. टा. प्रतिनिधी, परभणी
वसंतराव नाईक मराठवाडा कृषी विद्यापीठामध्ये आयोजित करण्यात आलेल्या पंधराव्या महाराष्ट्र राज्य आंतरविद्यापीठ युवक महोत्सव इंद्रधनुष्य २०१७ मध्ये मुंबई विद्यापीठाने सर्वसाधारण विजेतेपद पटकावले, तर कोल्हापूरच्या शिवाजी विद्यापीठाचा संघ उपविजेता ठरला.
मागील चार दिवस विद्यापीठामध्ये रंगलेल्या या महोत्सवाचा समारोप गुरुवारी झाला. या महोत्सवामध्ये राज्यांतील एकूण १९ कृषी व अकृषि विद्यापीठातील सुमारे ७१४ कलावंत सहभागी झाले होते. या पाच दिवसीय युवक महोत्सवात संगीत, नृत्य, साहित्य, रंगमंचीय व ललित कला अशा विभागांतील २४ कलाप्रकारांमध्ये विद्यार्थ्यांनी कला सादर केल्या. पारितोषक वितरण कार्यक्रमास परभणीचे खासदार संजय जाधव यांची प्रमुख पाहुणे म्हणून उपस्थिती होती, तर अध्यक्षस्थानी कुलगुरू डॉ. बी. व्यंकटेश्वरलु होते. व्यासपीठावर शिक्षण संचालक डॉ. विलास पाटील, स्पर्धा निरिक्षक डॉ. अनिल पाटील, डॉ. अजय देशमुख, संशोधन संचालक डॉ. दत्तप्रसाद वासकर, कुलसचिव डॉ. गजेंद्र लोंढे, कुलसचिव डॉ. दिनेश भोंडे, विद्यापीठ अभियंता डॉ. अशोक कडाळे, विद्यापीठ नियंत्रक विनोद गायकवाड, विद्यार्थी कल्याण अधिकारी डॉ. महेश देशमुख आदी उपस्थित होते.
यावेळी बोलताना खासदार जाधव म्हणाले की, परभणी ही संताची भूमी असून या महोत्सवातील सहभागी कलावंत विद्यार्थ्यांनी सोबत आठवणी घेऊन जाव्यात. जाधव यांनी यावेळी विजयी कलावंत विद्यार्थ्यांना शुभेच्छा दिल्या. अध्यक्षीय भाषणात कुलगुरू व्यंकटेश्वरलु यांनी राज्यातील विद्यार्थ्यांनी आपल्या कलागुणांचे मोठ्या शिस्तीत सादरीकरण केल्याबाबत कौतुक केले. या महोत्सवाच्या उत्कृष्ट आयोजनाबाबत स्पर्धा निरीक्षक डॉ. अजय देशमुख व डॉ. अनिल पाटील यांनी वसंतराव नाईक मराठवाडा कृषि विद्यापीठाचे अभिनंदन केले. विद्यार्थी वैष्णवी पाठक, हर्षल गाडे, आकाश पाटील यांनी, तसेच संघ प्रशिक्षक डॉ. निलेश सावे व डॉ. विजया पाटील यांनी या वेळी मनोगत व्यक्त केले.
कार्यक्रमात डॉ. विलास पाटील यांनी महोत्सवाबाबत माहिती दिली, तर डॉ. महेश देशमुख यांनी प्रास्ताविक केले. सूत्रसंचालन डॉ. आशा आर्या, डॉ. दयानंद मोरे व सुनिल तुरकमाने यांनी केले, तर आभार अशोक खिल्लारे यांनी मानले.
मान्यवरांच्या हस्ते विजयी संघाना पारितोषकांचे वितरण करण्यात आले. स्पर्धेतील सर्वसाधारण विजेतेपदाचा बहुमान मुंबई विद्यापीठाने, तर सर्वसाधारण उपविजेतेपदाचा मान कोल्हापूरच्या शिवाजी विद्यापीठाने पटकावला. ‘गोल्डन बॉय’चा पुरस्कार शिवाजी विद्यापीठाचा विद्यार्थी ऋषिकेश देशमाने याला, तर ‘गोल्डन गर्ल’चा पुरस्कार मुबंई विद्यापीठाची विद्यार्थिनी हेमा चौधरीने पटकावला. कार्यक्रमास विद्यार्थ्यी विद्यार्थ्यीनी, प्राध्यापक, अधिकारी मोठया संख्येने उपस्थित होते.
- विविध कला प्रकारांतील विजेते व उपविजेते
कलाप्रकार विजेते उपविजेते
वाङमयीन कलाप्रकार सावित्रीबाई फुले पुणे विद्यापीठ मुंबई विद्यापीठ
ललित कलाप्रकार शिवाजी विद्यापीठ मुंबई विद्यापीठ
संगीत विभाग मुंबई विद्यापीठ शिवाजी विद्यापीठ
रंगमंचीय कला विभाग मुंबई विद्यापीठ शिवाजी विद्यापीठ
नृत्य विभाग मुंबई विद्यापीठा शिवाजी विद्यापीठ, सावित्रीबाई फुले पुणे विद्यापीठ
शोभायात्रेतील उत्कृष्ट सादरीकरणाचा प्रथम पुरस्कार गडचिरोली येथील गोंडवाना विद्यापीठाने मिळवला, तर द्वितीय व तृतीय पुरस्कार अनुक्रमे नागपूरचे महाराष्ट्र प्राणी व मत्स विद्यापीठ, नागपुर व सोलापूर विद्यापीठ यांनी मिळविला.
मोबाइल अॅप डाउनलोड करा आणि राहा अपडेट