....
पैसे भरल्याशिवाय २८० डीटीसी दुरुस्त न करण्याचा महावितरणाचा निर्णय
..............
म. टा. प्रतिनिधी, औरंगाबाद
गेल्या अनेक वर्षांपासून शेतकऱ्यांकडे कृषीपंपाची असलेली वीज बिलाची थकबाकी वसूलीची कारवाई महावितरण कार्यालयाकडून सुरू करण्यात आली आहे. या कारवाईत परिमंडळातील ३३७ वाहिन्या वीज बिलाच्या वसुलीसाठी बंद करण्यात आलेल्या आहेत. तर वीज बिल भरल्याशिवाय ग्रामीण भागातील २८० डीटीसी (डीपी) बदलून देणार नाही, असा निर्णय महावितरण कार्यालयाने घेतला असल्याची माहिती मुख्य अभियंता सुरेश गणेशकर यांनी दिली.
औरंगाबाद परिमंडळातंर्गत औरंगाबाद जिल्ह्यात २ लाख १३ हजार १६७ शेती ग्राहकांकडे १४८२ कोटी थकबाकी आहे. तर जालना जिल्ह्यात १ लाख २२ हजार ४८३ ग्राहकांकडे १०५० कोटी ९१ लाख रूपये थकबाकी आहे. या शेतकऱ्यांना वीज बिलाची रक्कम अदा करण्यासाठी मुख्यमंत्री कृषी संजीवनी योजना आणण्यात आली होती. या योजनेतंर्गत परिमंडळात फक्त ४८,९९१ शेतीपंप ग्राहकांनी २० कोटीचे थकीत वीज बिल महावितरण कार्यालयाकडे भरून या योजनेचा लाभ घेतला. संजीवनी योजना संपल्यानंतर महावितरण कार्यालयाकडून वीज बिलाच्या वसुलीसाठी कारवाई सुरू करण्यात आली. परिमंडळात ११ हजार ८७० वीज ग्राहकांनी चार कोटी ७९ लाख ही थकबाकी वसूल करण्यासाठी १ डिसेंबरपासून महावितरण कार्यालयाकडून कारवाई सुरू करण्यात आली आहे. या कारवाईत परिमंडळातील १ लाख ७ हजार ३२९ वीज ग्राहकांचा वीजपुरवठा खंडित करण्यात आला आहे.
याशिवाय शेती पंपासाठी परिमंडळात असलेल्या १६ हजार ९०० डीटीसी पैकी ७९१० डिटीसी बंद करण्यात आले आहे. डीटीसी बंद केल्यानंतर संबंधीत ग्राहकांनी आकडा टाकून वीज घेऊ नये. यासाठी ३३७ वाहिन्या बंद करण्यात आल्या आहेत. ग्रामीण भागात रोहित्र जळण्याचे प्रमाणही वाढत चालले आहे. परिमंडळात २८० रोहित्र किंवा डीटीसी जळलेल्या आहेत. या डीटीसी वीज बिलाचे पैसे भरल्यानंतरच दुरुस्त करण्यात येणार असल्याची माहिती सुरेश गणेशकर यांनी दिली.
.............
लाखपती थकबाकी वीज ग्राहकांवर होणार कारवाई
औरंगाबाद शहरात रहिवासी वाणिज्य व औद्योगिकसह एकूण २२५५ वीज ग्राहकांकडे एक लाखांपेक्षा अधिक रकमेची थकबाकी आहे. या वीजग्राहकांकडे ४३ कोटी रुपये थकीत आहेत. अशा वीज ग्राहकांवर आगामी आठवड्यात कारवाई केली जाणार आहे. वीज बिल भरले नाही तर अशा वीज ग्राहकांचे वीज मीटर जप्त करण्यात येणार असल्याची माहिती गणेशकर यांनी दिली.
...........
थकबाकीमुळे अधिकाऱ्यांच्या झाल्या बदल्या
औरंगाबाद शहर विभाग एक क्रमांक येथे कार्यरत शहर कार्यकारी अभियंता ए. पी. पठाण यांची थकबाकी व्यवस्थित नसल्याने जालना येथे बदली करण्यात आली आहे. याशिवाय छावणी येथील अतिरिक्त कार्यकारी अभियंता विनय घनबहादुर यांची बदली वसुलीच्या कारणावरून बीड येथे करण्यात आली आहे. याशिवाय अनेक कर्मचाऱ्यांना चार्जशीट देण्यात आले असल्याची माहितीही गणेशकर यांनी दिली.
..........
९१ लाखांचा दंड
शहरात २३ ऑक्टोबर ते ३ नोव्हेंबर काळात वीज बिल वसुली तसेच वीज मिटर तपासणी मोहीम राबविण्यात आली होती. या कारवाईत ४५ हजार वीज ग्राहकांच्या वीज मीटरची तपासणी करण्यात आली. या कारवाईतंर्गत ज्या वीज ग्राहकांचे वीज मीटर दोषी आढळले किंवा ज्या वीज ग्राहकांनी आकडे टाकून वीज चोरी केली, त्या दोषी ग्राहकांना ९१ लाख २८ हजाराचा दंड ठोठावण्यात आला आहे.
मोबाइल अॅप डाउनलोड करा आणि राहा अपडेट
