म. टा. प्रतिनिधी, औरंगाबाद
जगभरातील दर्जेदार चित्रपटांची पर्वणी असलेला पाचवा औरंगाबाद इंटरनॅशनल फिल्म फेस्टिव्हल आयोजित करण्यात आला आहे. प्रोझोन आयनॉक्स येथे १८ ते २१ जानेवारी या कालावधीत महोत्सव होईल. महोत्सवाला प्रसिद्ध दिग्दर्शक अदूर गोपालकृष्णन, दिग्दर्शक महेश मांजरेकर, मृणाल कुलकर्णी, दिग्दर्शक संदिप सावंत आदी मान्यवर उपस्थित राहणार आहेत.
नाथ ग्रुप व महात्मा गांधी मिशन प्रस्तुत व यशवंतराव चव्हाण प्रतिष्ठान विभागीय केंद्र औरंगाबाद यांच्या वतीने पाचवा औरंगाबाद इंटरनॅशनल फिल्म फेस्टिव्हल आयोजित करण्यात आला आहे. भारतीय चित्रपट, आशियाई चित्रपट आणि जागतिक चित्रपट अशा तीन विभागात चित्रपट दाखवले जाणार आहेत, अशी माहिती समन्वयक व प्रसिद्ध समीक्षक अशोक राणे यांनी शुक्रवार पत्रकार परिषदेत दिली. या महोत्सवाचे उद्घाटन गुरुवारी (१८ जानेवारी) सायंकाळी सहा वाजता होणार आहे. यावेळी चित्रपट दिग्दर्शक महेश मांजरेकर व अभिनेत्री मृणाल कुलकर्णी यांची प्रमुख उपस्थिती राहणार आहे. अतनु मुखर्जी दिग्दर्शित ‘रूख’ चित्रपटाने महोत्सव सुरू होईल. भारतीय गटात आसामी, हिंदी, मल्याळम, मराठी, पहाडी आणि बंगाली भाषेतील नऊ नवीन चित्रपट आहेत. सर्वोत्कृष्ट भारतीय चित्रपटाला रोख एक लाख रुपयाचे पारितोषिक दिले जाणार आहे. तसेच सर्वोत्कृष्ट दिग्दर्शक, पटकथा, छायाचित्रण, संकलन, ध्वनी संकलन, सर्वोत्कृष्ट कलाकार ही वैयक्तिक पारितोषिके आहेत. या चित्रपटाच्या परीक्षण समितीत दिग्दर्शक विकास देसाई, प्रा. एमी कॅटलीन(अमेरिका), समीक्षक सैबल चॅटर्जी, पटकथाकार प्रा. अजित दळवी आणि अभ्यासक सुजाता कानगो यांचा समावेश आहे. आशियाई विभागात सात चित्रपट, जागतिक सिनेमा विभागात पाच, राष्ट्रीय पुरस्कार विजेत्या गटात ‘स्वयंवरम’, ‘अकलेर संधाने’, ‘समर’ आणि ‘कासव’ या चित्रपटांचा समावेश आहे. हंसल मेहता दिग्दर्शित ‘शाहीद’, ‘सिटीलाइट्स’ आणि ‘अलिगढ’ चित्रपट दाखवले जाणार आहेत. अमोल पालेकर यांचा ‘अनाहत’ आणि शशी कपूर यांचा ‘जुनून’ चित्रपटाचा महोत्सवात समावेश आहे. रविवारी (२१ जानेवारी) सायंकाळी सात वाजता समारोप सोहळा होईल. यावेळी ज्येष्ठ दिग्दर्शक अदूर गोपालकृष्णन यांच्या हस्ते दिग्दर्शक अमोल पालेकर यांना ‘जीवन गौरव’ पुरस्काराने सन्मानित करण्यात येईल. या पत्रकार परिषदेला प्रतिष्ठानचे अंकुशराव कदम, नंदकिशोर कागलीवाल, अशोक राणे, नीलेश राऊत, अजित दळवी, सुजाता कानगो, सुनील किर्दक, शिव कदम, उल्हास गवळी, संतोष जोशी, मोहम्मद अर्शद, प्रिया धारूरकर आदी उपस्थित होते.
पोस्टर प्रदर्शन
चित्रपट महोत्सवानिमित्त शशी कपूर यांना आदरांजली वाहणारे पोस्टर प्रदर्शन भरवण्यात येणार आहे. शशी यांच्या चित्रपटांची ५० पोस्टर्स प्रदर्शनात असतील. या प्रदर्शनासाठी राष्ट्रीय चित्रपट संग्रहालयाने सहाय्य केले आहे. तसेच राष्ट्रीय पुरस्कार विजेत्या चित्रपटांच्या पोस्टरचेही प्रदर्शन आहे. महोत्सवानिमित्त १५ कॉलेजात विद्यार्थ्यांसाठी विशेष कार्यक्रम आहेत. महोत्सावाच्या नोंदणीसाठी शहरात दहा ठिकाणी सुविधा केंद्र उपलब्ध आहे.
दोन परिसंवाद
महोत्सवात १९ जानेवारीला प्रसिद्ध दिग्दर्शक हंसल मेहता यांचा ‘मास्टर’ क्लास होणार आहे. निवडक विद्यार्थ्यांशी ते संवाद साधतील. तर २० जानेवारीला ‘मराठी चित्रपट व जागतिक व्यासपीठ’ या विषयावर विशेष परिसंवाद होईल. या परिसंवादात दिग्दर्शक चंद्रकांत कुलकर्णी, संदीप सावंत, क्रांती कानडे, सुमित्रा भावे-सुनील सुकथनकर व मिलिंद लेले सहभागी होणार आहेत.
मोबाइल अॅप डाउनलोड करा आणि राहा अपडेट